Hih mite a ding bek thu a hong ngetsak ka hi kei a, amaute' thugenna hangin kei hong um mite a ding zong a hong ngetsak ka hi hi. Pa aw, amaute khempeuh pumkhat a suahtheihna dingun ka hong ngetsak hi. Nangmah in kei na hong sawlna thu leitung mite in a uptheihna dingun eite gel pawlkhat ihih mah bangin amaute zong eite tawh pawlkhat hong hi ta hen.
Kha Siangtho kimakai sakin, khatlekhat kilemin pawlkhat na hihna uh na kipsak tawntung un. Tua ahih ciangin mi tawh kilem theihna ding, leh kha thu ah khatlekhat thahatna i kipiak theihna ding thute hanciam ciat ni. Annek huhau-in Pasian' sepsa thute susia kei ni. Tua ahih manin Pasian in hehpihna hong piakkhongna tawh kizui-in i siamna a tuamuamte zang ciat ni. I siamna pen Pasian' thu gentheihna ding siamna ahih leh i upna neihzah tawh kizui-in gen ni. Nasepna ding siamna a nei ihih leh na sem ni. Hilhna ding siamna a nei ihih leh hilh ni. Midangte hanthot theihna ding siamna a nei ihih leh midangte hanthawn ni. Midangte hoptheihna ding a nei ihih leh citna taktak tawh hawm ni. Makaih theihna ding siamna a nei ihih leh hoihtakin na sem ni. Midangte hehpih theihna ding a nei ihih leh maitaii takin hih ni.
Upna neu mite pawlbawl unla, na ngaihsutna uh a kituah kei leh zong mawhsak kei un. Topa tungah huhna a ngen mite tawh thuman thutak, upna, itna, kilemna na neihtheihna dingun hanciam khawm un. Thu kihai selna, theilopi a thu kinialnate na pelh in. Tua bangte in kitotna a painsak lamtak na theihsa ahi hi. Topa' na a sem mite, kitot a hatte hilo ding a, mi khempeuh tungah lungsim nemin, thugen siamin, thuakzawna nei-in, thunem tawh a langte' hoihlohna a puahtheite hi ding hi.
Sanggamte aw, note khatlekhat kithutuakin, pawl kikhenna omkha loin, na lungsim, na ngaihsutna uh leh na ngimna uh na kikhatsakna dingun i Topa Zeisu Khazih min tawh ka hong thum hi. Kiniamkhiatin, thumnemin, lungduai-in om tawntung un. Khatlekhat kihuhna tawh na ki-itna uh kilangsak un. Kha Siangtho kimakai sakin, khatlekhat kilemin pawlkhat na hihna uh na kipsak tawntung un. Topa khat bek, upna khat bek, tuiphumna khat bek mah a zangkhawm ihi hi.
Sanggamte aw, Pasian in note tungah thu hong khenkhak lohna dingin khatlekhat na kiphunsan kei un. Sanggamte aw, Topa' min tawh thu a gen kamsangte na phawk un. Gimna a thuak laitakun lungduai-in a thuaknate uh na etteh un. Tua bangin a thuak mite a hampha mahmah hi, i ci hi.
Mi khat' nasemte tungah kua in thu khenthei ding na hi uh hiam? A gina leh a ginalo a khen dingpa pen amau' Topa ahi hi. A Topa un hoih hi, a cih leh a kipsak zawhna ding vangliatna nei ahih manin a kip hilel ding uh hi. Tua ahih leh bang hangin na Christian pihte uh tungah thu khen a, bang hangin simmawhbawl thei na hi uh hiam? Thukhenna a thuak dingin Pasian' maiah eite khempeuh a ding ciat ding ihi hi. A kuamah peuh in i gamtatna ciat Pasian' mai-ah a va kigentel ciat ding ihi hi. Hun nunung lam ciangin Pasian' deihna tawh a kituaklo amau pumpi deihna zui-in note a hong simmawhbawl mi pawlkhat hong piang ding hi. Hih mite in pawl kikhenna piangsak in, amau pumpi deihna bangin gamta uh a, Kha Siangtho zong neilo uh hi. Ahi zongin note pen gamsa bangin khatlekhat kiphuai-in kipetkhale uh cin na vekpi-un na siatlawhkhak ding uh lauhuai ahih manin hoihtakin na kidawm un. Mihing ' deih banga nuntakna in,...kilangbawlna, kitotna, hazatna, hehna, huaihamna, kikhenna, pawltuam lungsim neihna, a kipan adangdangte ahi hi. Khasiangtho deih banga nuntakna in itna,, lungdamna, lungnopna, lungduaina, migitna..ahi hi
Kuamah kiphasak loin, khatlekhat kiphin loin, kuamah i kihaza kei ding hi. Eite a' dinginhih leitungah a kip khuapi omlo ahih manin ahong pianglai ding khuapi a zong ihi hi. Tua ahih manin Zeisu tung tawnin amah i biakna-in i kam tawh ama min pulakin Pasian phat tawntung ni. Khatlekhat tungah thuhhoih kibawlin na kihuh ding uh mangngilh kei un. Hihbang gamtatnate pen Pasian a lungkimsak thei biakna ahi hi. Na makaite uh thu na mang unla, a genna uh bangin na gamta un. Pasian kiangah amaute in a nasepnate uh a pulak ding uh ahih manin tawlnga loin note hong lunghimawh tawntung uh hi.
Amaute' thu mang le uh cin a nasepna uhah lungdam mahmah ding uh a, mang kei le uh cin dahpipi-in na sem ding uh hi. Dahpipi-in a nasepna uh note-a' dingin zong phattuamna a om tuan hilo hi. Na khempeuh, Pasian' minthanna dingin hih ding hi." Ka ut peuhpeuh ka hihtheihna ding thu om hi," a ci omkha ding hi. Ahi zongin na khempeuh ka hihding kilawmlo hi. Na khempeuh hihtheihna ding thu a om hangin a kihihthei khempeuh hihna in midangte' hoihna ding piangsaklo hi. A kuamah peuh in note' angsung ding bek zong kei un la, midangte' phattuamna ding zongzaw un.
Written by Nangkhai
No comments:
Post a Comment