CHRISTIAN ITNA HANGAA PAHTAWINA

Matupi-Lungngo
[Weekofprayer] makaih dingin Matupi-Lungngo paiding, Mandalay panin Bus tuangin Gangaw katung hi. Sia Van Pe in cargate ah nong dawn hi. Gangaw zankhat giakin kading khia leuleu uh hi. Gangaw leh Lungngo kikalah zan-4 kigiak hi. Munnih pen khua omna hi-a, munnih pen luigei guahonlak beelin kigiak hi. 


Khua omnate bel Sia Van Pe siam mahmah ahihmanin, adeih khempeuh ngah hi. Tua lo Lungngo luidung zui-in kipaipai uh hi. A luisung tektek kazuihna uh tam mahmah a, khedap keuman lo hi.

Beelpum khat kapua uh hi. Tua beelpum tawh buh huanin amin ciangin sungkhia in, meh kahuan leuleu uh hi. Lam-an dingin buhtang, MSG(aksavui) leh ci bek kikeng hi. Thuk bawlin tuisosa-in kakoih uh hi. Agei-ah tuilii laizangah ngen khungin a nawltuak panin kalok uh hi. Ngasa khutdawh cia ngentang ngenvangah kaang phengphangin awk hi.  Beelsung kadenna mengmeng uh hi. Uh hi, kacih hang kei a tangzo bang hi keng ei.

Mehteh mehgah neektheih ding tawm mahmah khong hi. Mehteh dingaa kizang pen Tuaiteng-dawnngeek ahi hi. Sa a huan simin khahlo-in omlo hi. Ngasa bang tawh kilawm mahmah hi.

Siate khat leh khat
Siapi tengpen a kingetna zui-in field hawh ding kiseh hi. "Sia Siangh nasap u-leh salo-in anne lo hi," peuh na kici zanzan se hi. Ciamnui maw, elpian maw, heek maw ithei kei hi. Innah kawlkaiteh leh pepenpauh kanilnil hong thei tenbel um samlo ding uh hi. Tua bang ciauciaute pen kei aa-in hamphatna suak tawntung hi. Tua hangin kuaman hong lipkhap tuanlo uh hi.

Lungngo ten "siapa neekding" ci-in sazuk nabeng uh hi.  Ngasa na beng uh hi. Nitak simin Pasianthu kigen a, khuabupin biakna deilo-in thungai uh hi. Zindo siam mahmah uh hi. SDA cih hituanlo-in  khuasungah zing leh nitak laihin hongsam uh hi. Nipi  kalkhat sung Mission ah khatvei zong an kane man kei hi.

Zotungmite pen ei Tedim mi bang linlian ahi hi. Vaimiim, taang, be, gatam ciing uh hi. Matupi township ah a pilmasa pen uh ahi hi. Sia Lianbawi in Siapi vasem ngei hi. Laisiangtho leh Christian labu pen Zotung kamtawh aneih sawt mahmah hi. Matupi kamin Sia Thang Kawl in 1990 kimpawlin bawlzo pan hihtuak hi.

Rungli-mual
Lungngo tawh kigalsai-in Rungli kici suangkenpi kikhung deda hi.  Alangkhat panin enleng mualpum kitungto zeza hi. Tua mual pen, Dawi khua, misite khua ci uh hi. Zahtak mahmah uh hi. Lawki haatlai-in kumsimin sialkhat tawh khai(bia) tawntung uh hi. Innpi hausa a sih dingteh khuang leh dak kitumin lumziahziah hi, ci-in gen uh hi.

Tua mualnuai pen kuamthuk mahmah a, singkung lianmahmah zing ngemngamin po hi. Agal pan ih et ciangin kinai mahmah napi, vapai leng kigammang hi, ci uh hi. Innsial taite in tua mualbul beel uh a, gamsial tawh kikhawl uh hi. Dawi ten kem hi, ci uh hi.

Tua mualah leihawm khat om hi. Tualai-ah mai a khiat ciangin tai-4 bang a gamla Lungngo lui pan suakkhia  hi, ci uh hi. Hausapi ci-in minvawh uh hi. Tua mualtung zang tun nading khelam zawino khat om hi. Mihing khatbek kikahto thei hi. Tua zawineu zui-in sathak,saza cihte mualtung kah hi. Mihing tawh  kitalsik thei a, pelhnang omlo ahihmanin athuk mahmah mualtaw tusuk hi. Asa athemthemin leng a, kitawm thelo hi, ci hi. Tuazah sang kenpi kamu ngei kei hi.

Sun kimlai-in meikhu suak a, lasa in khuang leh dak kitum ziahziah theizel hi, ci uh hi.

Lungngo nusia-in ciah
Kabengkha-ah { Li-li-la sial-la law a ci-ci o, li-li-la sia-la-law ci-ci o]  la kisa gingziahziah in kanusia hi.
Zingsang thungenin, kading khia uh hi. Sia Mua Tin in thungkuah-hawm khat hong kuahsak hi. Lampi a zatding teikhut hoihmahmah ciang khat hong pia hi. A zan nitakin, mangpha khakna leh lungdamkohna kapulak hi. Hong pai zelzel in, ci-in hong khokho uh hi.

Mission inn pan paikhiat aa kipan khuanawl tundong, lamsak lamkhang kongkan omkhempeuh ah, nupiten nong pang uh hi. Aktui-sial tangkhatta hong pia uh hi. Kaguanguan ciangin kathung-ip hong dimto a, tamlua kasa phial hi. Siapa kiangah naupangte  nahuansak ve, kacih leh, "ko lah hong guanzolo, lampi ah kisam lua hi, pua in," hong cih ciangin kapua hi

Rungli mual kakhen khit uh ciangin sun-an kane uh hi. Rungli-mual tawh kigaldon kimaingatna munkhat mualdung katun u laitakin, kavan puate un, hong huauthapthap hi. "Pau kei un, hausapi tawh kimaingat hihang. Hong za ding hi,"  cilai zen hi. Naungeek puate in, a nau uh puan tawh khuh uh hi. Dai khikhepin kun ngelhngelhin kapai uh hi. Ei nangawng khuasikmul hong thosak zolai  hi.

Tui omlo
Kham leh zang phak nang ni-4 vilvel kipai hi. Katui puak uh kagai uh hi. Khua phaklohin lamkal ah tui kici omlo hi. Kabah ciangun aktui tangkhat ciat kasial dawn uh hi. Khua phaklian leh ka-aktui uh bei hi.

Zangcin tunkhit khua phakma sungteng tui omlo, nisa lua tuamun tengah khualzin tampi mah tuingawlin si ci uh hi. Pasian nasem munhaksa aa omte bangci huh ding cih suntawh zantawh kingaisunsun hi. Tudongmah nasemte aading kalung nuamlo hi.

Tuamun laizangtakah [A-vui-sih tuikhuk] kibawl henla, Zintun buuk kilamsakin, SDA hiam khat ansai-niangtui sai pian sumzian kipia leh hoih sincia, ci-in kalungsim kasehseh hi. Tuaban ah, motor cycle khat Pastor pa zat ding kikoih leh, kham akah ciangin tua buukah nusia-in, khanglam azin ciangin Gangaw-ah nusia leh cih khawng peuh e! Kagelgel kawmkalah kataltang tungah Conference kikhen a, Mission galin hong lap khong ahihmanin kisem man lo hi.

Tua ahih ciangin, MUC ten Lungngo-ah gospel crusade bawlnuam a omleh, ci-a kakaihkhop $300 kangah khin hi. Hong pawmnuam na om uleh, hong welcome ingh. Nasiatak aa kiginlohin hamsa kha ding hi. Ahih hangin, kumpi in Southern Chin Hills motorlam nak tawh mahmah cih kaza hi. Khualzinna hamsa nawnlo kha ding hi.
Written by Pr. Thangsiangh