(1) Thu kham pen Pasian in Mawsi khut tung ah a piak a hi hi.
Hehpih na pen Pasian in Jesu khut tung ah a pia a hi hi.
HIh bang upna in Pasian leh Jesu a kilang do tawh kibang sak hi. Pa, Pasian in thukham pia tua pen Tapa Jesu in phiat hehpih na pia cih bang hi mawkmawk ngeilo hi. Hehpih na cih pen Cavary mual pan hong kipan khia pan hi mawkmawk lo hi. Pian 3:21 sungah Adam te a mawh phet in a si pah ding kimlai pen hehpih na tawh Tuuno vun puan silh sak hi. Tua pen Isa 61:10 sungah hotkhiat na puanpak hong silh sak a cih hi a, tua pen in singlamteh tung a Jesu a sih ding limcing khol ahi hi. Mawsi khut tungah thukham 10 suangpek tawh a pia pen Jesu mah hi a, ama hong hepih na in leitung pian cil a kizom paisuak ahi hi. Kahla 3:22,23 Hih lai siangtho mun a ki at laitak in Jesu singlamteh tungah hong si nai lo hi. A hih hangin hong hehpih na om khin zo ci hi.
(2) Thukham pen suangpek tung ah a ki gelh a hi hi.
Hehpih na pen lungtang tung ah a ki gelh a hi hi.
Hih pen man mahmah hi. Suangpek tung ah a kigelh thukham pen hehpih na tawh lungtang tungah hong gelh hi.Heb 8:10; 10:16; hih te in Jer 31:33 sunga agen kholh na a tangtung sak hi a,ci leh sa Isreal te bek a cih nopna hi zenzen lo in, Jehovah Pasian a bia minam khempeuh te a gen na ahi hi. A Laisiang tho mun limtak in sim tel ding thupi hi.
(3) Thukham pen Thuciam lui a hihi.
Hehpih na pen Thuciam thak a hihi.
Hih kammal pen man lo hi. Thuciam lui cih ciangin Laisiangtho lui (Old Testament) cihna hi zaw a, thu ciam thak cih ciangin Laisiangtho thak(New Testament) cihna hi zaw hi.
(4) Thukham in na mawh na a mai na ding in thalawh in ci hi.
Hehpih na in na mawh na a mai na ding in Jesu in ong thalawh sak zo
hi ci hi.
Thukham in na mawh na a mai na dingin tha lawh in hong ci lo in, na mawhna hong lak bek hi a, hong maisak hong sawp siang hi zenzen lo hi. Jesu in kong maisak zo hi hong cih pen hehpih na hi zaw hi.
(5) Thukham pen Sinai mualtung ah ki pia hi.
Hehpih na pen Calvary mual tung ah ki pia hi.
Calvary ah Jesu hong sih na pan hehpih na hong kipia pan a ci nuam hi dingin um ing. Tua ahih leh Calvary ma siah a om te in hehpih na a ngah khalo suak ding hi. Abraham te Noah te in thukham zuih na tawh gupna ngah te hi ding hiam? Tua ahih leh vantung gam ah hehpih na tawh gupna ngah mi pawl khat thukham zuih na tawh gupna ngah mi pawl khat cih bangin mi pawlnih (namnih) om thei mawk ding hiam?
(6) Thukham in Hell lampi ong manawh pih hi.
Hehpih na in Vangam lampi ong manawh pih hi.
Tua ahih leh Thukham apia pa kua hi mawk hiam? Hell tun na ding lampi hong pia suak ding ahih man in tua zah tak in thukham a pia Jesu gilo sak kei ni. Hell tun ding lampi Jesu in hong pia zaw zen lo ding hi. Hih bang upna pen Dawimang pa Satan deih mahmah upna ahi hi.
(7) Thukham in mawhnei mi te Dan(punishment) pia hi.
Hehpih na in mawh nei mi te Dan pan ong suakta sak hi.
Thukham cih ciangin Moses thukham leh Pasian thukham 10 namnih om in Pasian thukham 10 tawh kong dawng ding hi. Psian thukham 10 in Dan(punishment) hong pia ngeilo hi. Hih ken, leh Hih in cih thu bek hi. Pai 20:3-17 ciang limtak na sim kik in.
(8) Thukham in mi hoih khat na leng mawhnei mi suak sak hi.
Hehpih na in mawh nei pen na leng midik ong suak sak hi.
ICor 15:56,57 sung limtak sim leng thukham leh hehpih na a kizom den hi a, thukham om kei leh mawhna cih om thei lo ding a, mawh na om kei leh, mawhna thaman sih na om lo ding hi sih na om kei leh tua sih na ding pan in that khiat na ding hehpih na kisam nawnlo ding hi. Bang hangin hehpih na om thei si ding ahih man in hehpih na kisam hi. Bang hang si ding hiam? mawh na nei ahih man in si ding ahi hi. Bang in mawhna nei Thukham palsat a hih man in mawhna nei hi. Hih thu limtak in tel siam kul hi. Thukham kul kei na cih leh hehpih na kisam keng a ci tawh na kibang ding hi. Hehpih na kisam ing na cih leh thukham beilo hi na cih na ahi hi.
(9) Thukham hun sung in Tuu te in a Topa a ding in thah na thuak uh hi.
Hehpih na hun sung in Tuu te a ding in a Topa in thah na thuak hi.
Thukham hunsung cih bang hi lo in, Jesu hong sih masiah hi a, Jesu hong si ding hi hong tan ding hi cih lim lak dingin Pasian in tuu no gawhna tawh na lak sak hi. Jesu hong sih khit ciangin tua lim ding tuu te kul nawnlo hi. Tua pen Thukham leh Hepih na tawh kisai zenzen lo hi. Bangin tuu no ki go cih thu Heb a lian 8 leh 9 sung limtak na sim kik in.
(10) Thukham hun lai in HA tang khat tang in HA tang khat ki suh tan sak
hi.
Hehpih na hun sung in na galpa mawh na na mai sak in ci hi.
Thukham hunsung cihbang Laisiangtho sungah kigelh lo in, Moses in a mi te gamlak ahkum 40 sung khualzin pih in tua hun sungin a ki uk na uh upadi ahi hi. Pasian in lungtom hun lung duai hun a nei hi zenzen lo hi.
(11) Thukham hun lai in numei ki zuak te suang tawh ki den lum hi.
Hehpih na hun sung in numei ki zuak te, suatak na ngah uh hi.
Pasian thu ah ci nai kei ni hih leitung ah bang gam bang gam hi ta leh numei kizuak te in suahtak na ngah cihbang tu ni ciangdong om nai lo hi.Jesu in numei kizuak nu a suahtak sak pen suak tatak in numei kizuak a semsak hi ci ding ih hiam? A mawh na mai sak bek hi a, mawhna bawl nawn ken ci hi. John 8:11 (12) Thukham hun lai in mi khempeuh mawhna sung ah ki hencip hi.
Hehpih na hun sung in thu um mi khempeuh suatak na ngah ta uh hi.
Hih a tung a thupen a gennop na tel hak hi. Tua bangin hun na khen luat leh, Pasian hong it na leh hong hehpih na a neubawl lua tawh hong kibang ding hi. Jesu singlam teh tungah hong sih pen na ut bangbang in mawhna na bawlna ding phalna letmat in ngaihsun kha kha ken. Lot te inn kuan Sodom khua kattum na pan a suahtak na un thukham a zui man uh hiam Hehpih na tawh hiam? Hehpih na tawh hi. Gamtat pha hang hi lo hi. A suahtak sak khit teh bang thu pia hiam? Pian 19:17
(13) Thukham in mi khempeuh hamsiat na thuak sak hi.
Hehpih na in thu um mi khempeuh hamsiat na pan hon khia hi.
Thukham sungah Keimah longal pasian dang bia ken, milim bia ken, na nu na pa zah tak in, cih thukham te in hamsiat hong thuak sak hi sam ding hiam? Limtak ngaihsut huai hi. Jesu um mi khat i kampau ding in kilawm lo hi.
(14) Thukham hun sung in a kua a kua suatak na ding lampi om thei lo hi.
Hehpih na hun sung in a kua akua ci lo, suatak thei na ding
lampi om ta hi.
Pian cil hun lai in zong thukham leh hehpih na ton khawm a, singlamteh ah zong thukham leh hehpih na tonkhawm hi. Tu ni nang nuntak na sung mahmah ah zong thukham leh hehpih na tonkhawm tawntung hi. Thukham in Keimah longal pasian dang bia ken, millim bia ken hong ci hi. Tua hong ci pa pen vantung leh leitung na khempeuh a bawlpa Pasian ahih hi. Tua ahih manin tu in nang zong tua thukham na beisak kei hi.
(15) Thukham in leitung mi te lung nop na pia thei lo hi.
Hehpih na in thu um mi khempeuh lung nop na pia hi.
Hehpih na cih pen (person) a om hi lo in, lungnop na zong hehpih na in hong pia cih bang om thei lo hi. tua mahbangin thukham zong ahi hi. Lungnop na leh suahtak na hong pia pen Jesu ahi hi. Tua pen hong hehpih man ahi hi.
(16) Thukham in mi te Gup ngah sak zo lo hi.
Hehpih na in gup na pia ziahziah ta hi.
Thukham leh Hehpih na tel zo mahmah ih man in kammal tuamtuam ih zat hangin ih cih nop na a kibang vive mah ahi hi. Gupna hong pia pen thukham zong hi lo in, hehpih na zong hi lo in, Pasian leh Jesu ih upna leh ihsan na tungtawn a, hehpih na tawh hong pia ahi hi. Hih pen Laisiangtho hong gen na bang ahi hi.
(17) Thukham in Vangam na tun nop leh hah kat in ci hi.
Hehpih na in Vangam na tun nop le thukham zui sawm kei photphot
in la, Jesu hang bek in gup na ki ngah thei hi cih thu, tel photphot in
ci hi.
Thukham zuih na pen vantung tun na ding hi lo in, vantung a tungding te zuih ding ahi hi. Tedim pan in mawtaw tawh taingen a tawn khempeuh Kawlpi a tung hi lo hi. A hih hangin mawtaw tawh kawlpi a pai ding khempeuh in Taingen tawn uh hi. Mawtaw tawh Taingen tot man a, kawlpi kitung hi lo a, mawtaw tawh Kawlpi tungding te in Taingen a tot loh pha mawh hi. Tua mahbangin Keimah longal pasian dang bia ken cih thukham zuih man a, vantung kitung hi zenzen lo a, vantung tung ding te in pasian dang bia lo uh hi.
(18) Thukham pen Sinai mual pan ki pan a, Calvary mual ah a hun bei ta hi.
Hehpih na pen Calvary mual pan ki pan a, Raptute teh a hun bei ding
hi.
Tua ahih leh tu hun ciangin Keimah longal pasian dang bia ken cih thukham zui kul nawnlo ding hiam? Nu leh Pa te zahtak kul nawn lo ding hiam? Milim biak na in mawhna hi nawn lo hiam?
(19) Thukham in Good news cih bang nei lo hi.
Hehpih na in Good news a dim leet in nei hi.
Thukham deih hetlo thukham hua ngiat Christion te lamdang ka sa mahmah hi. Mi zi mi ta tawh na mawh ken(Ang kawm ken), cih te, mi na na gu ken, cih te a deih loh man, a zuih noploh man uh ahi tam ci in dah mahmah ing.
(20) Thukham in mihoih pipi, that lum hi.
Hehpih na in migilo pipi, hon khia hi.
Zomi te in Jesu pen gumpa honpa ding bek in deih in, Topa dingin deih nawnlo uh tawh kibang ka sa hi. Jesu in Topa hi ih cih takpi ding thupi mahmah hi. Zomi a tamzaw in vantung gam bek tung nuamin, Jesu' gupna bek sang nuam a, tua hong gum pa hong tan pa' hongit na leh a deihna te zuih ding ut het lo mawk ih ihih man in Jesu a it het lo a metbawl nuampak lel taktak te ih hi hi.Hih cibang upna tawh kalsuan leng dah huai mahmah ding in ka mu hi.
Nang e leh Thukham a bulphuh pawl maw Hehpih na a bulphuh pawl?
Nang e leh Jesu a it takpi nuam pawl maw, a metbawl pak nuam pawl ?
Written by Sawm Sang (AWR Zomi)
No comments:
Post a Comment