Na'sep na'bawlna khat pepeuh ah ong kihawmthawhin ong kitawsawnsawn or ong kigen siatsiat hangin lungkia/ lauthawng vetkei in. Banghanghiam cihleh suangmanpha leinen lakah tam om khollo hi cih phawk in. (Khamti/Mogog/Phakant suangto ngeiten teltheih pen khadingin um ingh.) Pasian' thu ah Missionary pai ngeite mah in telpen leuleu ding hi.
Sanggamte aw, thuhaksa a tuamtuam na thuak uh ciangin lungdamna dingin na ngaihsun zaw un. Tua bangin na upna hong kize-etna na thuakzawh uh ciangin na kipna uh hong kilangsak ahihna thu na thei uh hi. A kisam bangmah omloin a cingtaak nasuah theihna dingun na thuakna uh hangin a tawntungin na kip paisuakna dingun na ngaihsun un. James 1:3,4.
Nuapangno te kiangah tangthu gen masa ni.
Nidanglai pekpekin Pasian in vasa bawl hi. Abawl cilin vasa lenna ding kha (ni le kha hilo, wings) bawlsak lo hi. Tua leh Pasian in vasate lenna ding kha bawlin vasate kiangah ong pai vuau, na lenna dingun na kha dinguh ong bawlsak ingh ei, na ututna uh ah bulh unla, pua un acih ciangin vasa ten giklua inteh utkei ung deihkei ungh cingeingai uh hi. A ngaih sutsut kikkik uh ciangin kha neileng hoihmah inteh ci-in, kikum kikkik uh a, pawlkhat in a muk ah abulh leh giklua sa in lik zolo uh hi.
Tua leh khat in a khecin ah bulhin aom dan kisin sinin nopsa lo, dongkholh sa hi. Khat in a lutung ah ong bulh leh giksa lua hiam a khua-ul kaigawp khitteh ong suahkhia hi. Atawpna ah khat in abanbul ah ong bulh takciangin hakkol bulh mah tawh kibangsa ahih manin zangzaw sa a, a ut utna ah ong puazo ta hi. Vangik pua a gim mite aw na hakkol uh Zeisu tungah suat theih hi.
Hey! little children hih tangthu pen nidang pekpek vasa te a pumpi liangko pan a kha uh a poma thamtham, vasa khat in a kha po khit lending kisin nuamlua a akha azap zap khit teh leng thei in vanlaizang huihlak mualdawn kheng a lengvingvengin a dangteng in a cin ngeingai ma thamtham thupiang lamdang mahmah tangthu ahi hi. Nidangin tua kha te vasa ta dingin vangik mahmah tawh akibat hangin tu-in nidanga a tunngei lohna mun tunna ding vanzat hoih penpen khat ong suakta hi. Kha neilo vasa aom diam? Vasa ahih nakleh kha ong nei ding hi.
Na leitung nuntakna leh na Kha nuntakna ah nasep nabawlna khempeuh vangik tawh kibang nasakna te khempeuh Pasian' ong guatnop nuntak tawntungna mun ah na lenna ding "kha" na banlul ah a bulhbulh na hi khak mel...
Nangkhai
No comments:
Post a Comment