Monday, October 26, 2015

Zo Phualva Thupuak - Volume 05, Issue 22




A Sung aa Om Thute:

A SANG ZAW MUN AH
CIDAMNA THU
Sikhum Zunkhum
KAAL SUNG NEWS
Gupna Bucing Crusade
Maranatha Phatna Labu
Dah Pihna
THEIH HUAI NONO
THU ZAKSAKNA
Pawl Lutna
ZSM / CDK
Youth Alive Camp
Laibu Hoih Pawlkhat
Lungdam Kohna
Church Address

"A SANG ZAW MUN AH"

 Tu hun aa Christian tampite in amau dinmunte ngaihsun in, pilna siamna leh laitan neilo kahih teh hisang a dinmun sangzaw kahto theih nading om kei, (ahk) kei bang numei khat a' ding in tua kan a panlak theih nading om kei, (ahk) singtang khuaneu papi khat a' ding in tua dinmun kan a hihtheih ding bangmah om kei, cihte tawh lungkim sawmin khantoh sawm nawnlo uh hi. Mi tampite in tu a dinmun sanga khantoh nading lampi theilo in a sep ngeingei mah uh sem in om uh hi. Pawlkhatte in ahih leh tulaitak a atuah uh taksa leh kha dinmunte ah lamet bei, thanem in om uh hi.

Ahih zongin sanggam aw, hih thu phawk in: tulai takin na si kei a, na nungta hi. A ihmu na hibek a, hong phong ding leh hong khanglosak ding na kisam hi. A nungta nate ciamtehna khat ah "A nungta nate khangto hi" (Living things grow) kici hi. Thu-um mite zong ih up sungteng ih khantoh ding kisam a, ih khantoh nawn kei leh a si (ahk) a sikuan ih hi ding hi.


  Khat vei lai in ukeng-no khat tuikhuk thuk mahmah sung-ah om a, tui pek zialzial in a lungkim mahmah hi. Ni khat ni ciangin, "Nuntakna pen kei ading in hikan bang om nawn ahiam, hih tuikhuk ah ka u ka nau teng tawh om in, ka duhduh kane a, ka utna mun tengah pai in hih sang anuam zaw bang om mawk diam" ci hi. Ahih hangin, nikhat  tuikhuk tungpan khuavak hong taang sesa mu in banghiam cih thei nuam ahih manin tuikhuk bang tungah a kahto kankan hi. A tung atun ciangin a et leh tua a omna tuikhuk sang' azah zakhat val banga zai zaw bual khat va mu hi. Damdam in tua bual lam ah va kin phei a, tua bual atun ciangin a pam lam a va et lai leh tuipi zai mahmah mu lai sawnsawn hi. Bual pan in tua tuipi lam zuan in va pai a, tuipi gei atun ciangin, "Aw tuma lai a ka omna tuikhuk pen hih tuipi tawh teh leng phelkhai gol khat sunga tui dim pan tui taak khat bang bek na hi mawk" ci hi.


Hih ukeng tangthu mah bangin ih Pasian in nang hong lamsang nopna dinmun ii alang lang lang(12.5%) zong atung nailo nahi hi. Pasian in dinmun sangzaw ah hong koih nuam a, na lungsim na-ngawn in na ngaihsut ngei nailo dinmun ciang nangwn hong tonpih thei hi cih um in. Gam laak beh ding tampi na nei lai a, na sik ngei nailoh gamthak ah Topan hong tonpih ding hi. Tu laitak na omna in mailam na dinmun ding tawh na teh ciang tui phelkhai gol dim sunga tui taak khat bang bek hi cih um in. Mihingte bek pen Pasian in ama' lim-le-mel sun a hong bawl ih hi a, piansak na dangte neih ngei loh talent, siamna leh vangliatna thupitak nei a hong bawl ihi hi.


Neurologist (khuak lam asin mi) te in mi mawkmawk khat in ama neih pilna leh siamna pen sawm ah khat (10%) zong zanglo hi ci hi. Sawm ah kua (90%) pen a muhkhiat nailoh leh zatnai loh in om hi cihna hi. Israelte zong Egypt gam pan in Canaan gam a paina uh lampi maan tawn le uh ni sawm kim bek sawt ding hi kici hi. Ahih hangin kum 40 bang a paikhit uh ciangin zong, Egypt gam sangin Canaan gam neh zaw tuanlo uh hi. Ahang in upna a kisap man uh ahi hi. Pasian in a piak sawm gam pen upna tawh mu banlo uh hi. Tu laitak a, amai ah a phutkhak uh haksatna bek mu in phunhat uh a, apai khitna gamte ah kileh kawikawi uh hi. Horeb mual kim ah kual pai kawikawi uh a ni 10 khawng a tun theih ding pen kum 40 hong sawt mawk hi. Tua bangin Horeb mual kim ah a ki vialvial lai un, Pasian in Moses hopih in "Hih mual kim ah sawt na om khin ta uh hi, kithawi in kalsuan khia un la, Amor te mualtung gam leh a kim a gamte va la un, note kong pia khin ta hi" ci hi (Thkna 1:6-8). Tua bang mah in eite zong ih Christian nuntakna pen singlamteh mah lungdampih in singlamteh kiim teng ah ih pai kawikawi hi. Tuni in ih Pasian in "Hih uplahna mual, ki lungkimsakna mual leh lungkim a tawlngak hithiat na mual ah sawt na om khin lua uh hi, ki thawi in kisuan khia un. Gamthak na luah ding uh kong geelsak khin zo hi", hong ci hi. Tuni in nithak, kumthak ahi hi. Hih nithak hong piak sungah Topa in DINMUN SANGZAW AH hong koih sawm hi. Tua sanga zah tampi in Topa'n hong zangh thei a, hong zang nuam hi. Tua na dinmun sang' ahoih zaw ah nang hong koih thei in hong koih nuam hi. Tua thu pen na up ding kisam a, na up kei leh cikmah hun in apiang kei ding hi.


Gualzawhna pen na Lungsim pan Kipan Masa

Kumli hal a kinei den Olympic games kimawlna a tai kidem mi khat in taikhat pen minute 4 sanga tawm zaw in ki tung zolo hi ci in misiamte in ngaihsun uh ahih manin, "Four minutes Theory" na ci uh hi.  Ahih hangin, Roger Banister in hih "Four Minutes Theory" pen sang zolo in, "taikhat pen minute li sang tawm zaw in atun theih lam ka lak ding hi" ci hi. Hong kisin toto in, tai khat pen minute li ma in hong tung ziau mawk hi. Roger in azawh khit ciangin mi 336 tak in minute 4 ma in hong tung theita uh hi. Banghang hiam? Tulai khangthakte nidang a mite sang ahat zawk man hi lo hi. Nidang a mite lungsim ah hi theilo cih lungsim ngaihsutna in na hencip hang bek hizaw hi. Pasian in eite hong piak pilna leh siamnate zangin dinmun sangzaw ah hong koih thei, zong hong koih sawm hi cih ih up masak ding kisam hi. Na lungsim in gualzawhna a ngah masak kisam hi.

Khat vei zan khuamial lak ah papi khat nawhsa takin inn lam zuan a ciah, tungbaih nuam lua lamdawt atawt leh tuikhuk alui thukpi khat mu kha lo a, sik khial in a kia hi. Zan thapai tua sung pan pai khiat ding hanciam napi diang khia zolo ahih manin, zing khuavak ding ngak in a kiu khat ah a tu hi. A sawt-lo in papi zukham khat zong tua tuikhuk lui sung mah ah hong kia hi. Amah zong tam veipi pai khiat sawm napi a paikhia zo pak kei hi. Tua laitak in a kiu a tu papi masapa in aw ngaihtak in a ot san leh, zukhampa lau lua in a tha neih zah tawh apua lam hong diang khia zo hi. Tamveipi a sawm azawh zawh loh pen a lauh luat man in hong diang khia zo mawk hi.


Hih thu pan in eite phawk loh siamna, hihtheihna leh thahatna tampite Pasian in hong pia khinkhian hi cih ki thei hi. Pasian in Ama minthan nading in, tuate zang in dinmun sangzaw ah hong koih nuam hi. Tua ahih manin hun beisa aa Satan hong buaisakna hang tawh haksakna leh thanemna tampi om mah leh mai lam ah Topa hong piak ding dinmun hoihte mu khol inla lungsim khauh takin pan la kik in. A taktak in Satan in na mailam a Pasian hong koih sak dinmun sangzaw pen mukhol ahih manin tu in lamet bei in hong koih nuam hizaw hi. Na hun beisa a minsiatna, haksatna leh zahkona na tuahte pen na mailam a Pasian hong piak ding thupha leh hamphatna na ngah nadingte susia khasak kei in. Pasian pawlpite zong Satan ii hong do-na ahang in mailam hun a Lungdamna thu tangko zo ding dinmun sangpen nei ahih lam thei ahih manin hong do leh hong buaisak ahi hi. Tua ahih manin Satan in nang pen "dotak" hongsakna hangin Pasian tungah lungdam ko zaw in. A sawt lo in nang a' ding zingkhua hong vak ding hi. Na nuntakna ah buaina khuazing a sah semsem leh zong gualzawhna khuavak nai semsem cih phawk in.


          Kongit ute naute aw, hih thute um in na san nak uh leh na nisim nuntakna ah mainawt a khantohna na mu ding uh hi. A hih zongin na phawk det ding thu khat in: tu laitak a na nasep (dinmun) in na mai lam a' ding hong ki tawikhai laitak hi a, Pasian in nang hong sittel hi cih phawk in. Tu laitak a na nasepte lungkim huai tak a na zawh nak leh mai lam hun ah na khantohna ding pen kuamah in hong khaktan zolo ding hi. Na makaite, na seppihte, na galte leh Satan nangawn in hong dal zolo ding hi. Tu a nasep muanhuai tak in na sep nakleh, a hun hong tun ciangin Topa in " Hong kah tota oleh" hong cih hun hong tung takpi ding hi. David zong a gancinna ah muanhuai lua mahmah in, a nasep a zawh zia Topa'n mu ahih manin, Israel kumpi dinmun ah Pasian in  zakhan to mawk hi. Tua bangmah in, Joseph zong  a nasep khempeuh ah muanhuai tak in asep manin, gamdangmi bek thamlo sal miginalo a ki ngaihsut dinmun pan in gam-uk (Prime Minister) ah tungto ziau hi. Tuni pen nang a dingin a lungdam huai ni hi. Hun beisa a na lungsim hong nasakte mangngilh in. A bul pan pan pha kik in. Lungkia kei in. Hih lungdam huai ni pha sungah Pasian in hong koih sawmna dinmun sangzaw lam ento ni. Ih nung lam a haksatnateng mangngilh in, ih mai lam a Pasian in hong makaih nading ah mitsuan in mainawt ciat ni. Topa'n mimal kim thupha hong pia ta hen. Amen.

? Pastor PL Thlenga, Translated by Daniel Shoute

 

 

 

Wednesday, October 14, 2015

Zo Phualva Thupuak : Volume 05, Issue 21




A Sung aa Om Thute:

KHRIS EITE' DIKNA
CIDAMNA THU
  • Tui tawh Damtheihna
KAAL SUNG NEWS
  • Gupna Bucing Crusade
  • MARANATHA Phatna Labu
  • Lungdam Pihna
  • Dah Pihna
THU ZAKSAKNA
  • Pawl Lutna
  • ZSM / CDK
  • Youth Alive Camp
  • Laibu Hoih Pawlkhat
  • Health Talk Om Ding
  • Lungdam Kohna
  • Church Address

"KHRIS EITE' DIKNA"

 Eite in ih mawhnate pulaak lehang, ih mawhnate hong mai saka, ih diklohna khempeuh pana hong siang sak dingin Amah muan huai-in thutang hi" (1 John 1:9).


Ih mawhnate pulaaka, Ama mai ah ih lungsim ih niam khiat ding Pasian in deih hi. Amah a muangte a nusia ngei lo ding Pa Pasian hi ci-a ih muan ding zong deih hi. Upna tawh kalsuan lo-in muhna tawh a kalsuan mi tampi ih om hi. Ih muh theih nate bek umin, Lai Siangtho sunga a manpha kamciamte ih um kei hi. Ama gen thute muang laha, Topa in hong cih takpi mah hiding hiam, hong khemna peuh ahi diam ci-a ih lung kaat sangin Pasian ih thusim loh zawkna omlo hi.


Ih mawhnate hangin Pasian in hong nusia lo hi. Khialhna bawlin A Kha dah sak kha mah ding hihang. Ahi zongin kisikin, kiniamkhiatna lungsim tawh Amah ih zuat leh Ama'n hong paisan lo ding hi. Ih hepkhiat ding kol-awknate om hi. Ih lungsimte maan lo-in, kiphatsakna, kiliatsakna, lungtomna leh phunhatnate ih nei hi. Tuate khempeuh in Pasian tawh hong kikhensak hi. Mawhnate ih pulaak kula, lungsim sungah hehpihna in na a thuk sepzawk kul hi. Thanema hat lo a kisate, Pasian' mi thahatte suak thei-a, Topa'a ding nasep thupi sem thei hi. Amaute in panmun sang ah na sem ding uha; ang sung ngaihsutna peuhmah nei lo ding uh hi.


Khris' sang ah pilna ih sin kul hi. Ama dikna longal in hehpihna thuciam sunga thuphate khat beek hong ngahsak thei lo hi. Tua thuphate ngah nuamin sauveipi ih hanciam zo-a, ahih hangin, tua thuphate ih ngah theihna dingin a pha ih bawl theih pawl khat om hi cih ngaihsutna nei gige ih hih manin, tua thupha te ih ngah kei hi. Jesu a nungta Honpa a hih lam um lo-in, ei bek ki-enin, ih khawdak nuam kei hi. Eima dikna leh siamnate tawh gupna a ngah dingin ih kingaihsun kei ding hi. Gupna ih ngahna dingin Khris' hehpihna bek mah ih lametna ahi hi. A kamsangpa tung tawnin Topa in, "Mi gi lote in a lampi uh nusia hen la, mi dik lote in a ngaihsutna uh kheel hen. Topa' lamah kihei uh hen. Topa in amaute a hehpih ding hi. Ih Pasian' lamah kihei uh hen. A mawhna uh a mai siang sak ding hi," ci-in kamciam hong pia hi (Isaiah 55:7). Ei' ngaihsutna muang lo-in, kamciam ih muang zaw ding hi. Pasian ih muan taktaka, mawh mai sak Honpa hi ci-a Jesu ih belh taktak leh ih deih theih huhna khempeuh ih ngah ding hi.


Ei leh ei a kihon thei bang keekin ei' tha ih muang hi. Ei leh ei kihon khia zo lo ih hih man mahin Jesu hong si hi zaw hi. Ama hang bekin lametna, mawh mai sakna leh midik suahna om hi. Honpa a nei lo bangin lau-in lung kiat ding hi lo hi. Tua laitak lian mahin eite'a ding Amah in na sema, ih cihmawhna mah tawh Amah zuana gupna ih ngahna dingin hong sam hi. Ih Lawm hoih pen pa ih bawl dan, mawh nei belte zong a hon khia thei pa leh Ama hong itna lian a hong lak den pa ih muanna a neu dan lamdang sak huai mahmah hi.


Ute naute aw, Ama hong hong hot khiat theihna na muan ma-un mawhna tawh kipelh masak kul hi cih ngaihsunin, na thusiamnate un Pasian' maipha hong ngah sak ding ci-in lamen na hi uh hiam? Tua bang lungsim na neih den uh leh, thahatna ngah lo-in a tawpna ah lungkia-a na om ding uh ka lau hi. Gamlak ah lang pang Israel mite a tu dingin Pasian in gul gu neite a khah ciangin, sumngo gul a khai kaang ding leh gul in a tuk liamte in a nuntakna ding un a en sak dingin Mose kisawl hi. Vantung in a vaihawm tua damna a phattuam pih lo mi tampi om hi. A kim a pam uah a si sa leh a si ding a dimin oma, Pasian' huhna a om kei leh a man ahih lam uh kithei hi napi-in, a husap dong uh a liamnate, a nat nate uh leh si ding a hihnate uh thumthum tautau-in, damna a ngah thei pah lian ding kimlai a mit kaang uh dawk sak lel uh hi.


"Moses in gamlak ah gul a khai bangin, Amah a um khempeuh kisia lo-a nuntak tawntungna a ngahna ding in Mihing Tapa kikhai kaang ding hi." Na mawhnate na kiphawk leh a thum a tau-in nitum kei in la, en in la hing in. Jesu bek mah ih Honpa hi. Damna a kitang sam mi awn tampi in Ama hehpihna nial ding uh a hih hangin Ama hehpihna a muang mi khat beek a sia dingin kinusia lo ding hi. Khris lo-a cimawh ih hih lam ih kitheih ciangin lung kiat ding hi lo hi. Kithat napi a hing kik Honpa ih beel ding hi. A cimawh, mawhna tawh cina-a a lung kia mi aw, en in la hing in. Jesu in hong kham zo hi. Amah a zuan khempeuh hon khia ding hi.


Jesu zuan in la tawldamna leh lungnopna ngah ta in. Tu mahmahin tua thupha na ngah ding hi. Na cihmawhna leh nang leh nang thupha na kipiak theih loh na Satan in hong gen hi. Hi mah hi; a cimawh takpi mah na hihi. Na mai ah Jesu laam to in: A hing kik Honpa ka nei hi. Amah ka muang hi. Lungkhamna hong thuak sak ngei lo ding hi. Ama min tawh ka zo hi. Amah ka dikna leh ka lungdamna lukhu hi,' ci in. Kuamah lamet bei kisa kei uh hen; bei lo hi. Mawhna tawh kidim a cimawh na hih lam na kimu kha ding hi. Tua san lian ah Honpa a kisam na hihi. Pulaak ding mawhna na neih leh ziakai kei in. Tua hunte kham zahin manpha hi. "Ih mawhna te ih pulaak leh, ih mawhnate hong mai saka, ih dik lohna khempeuh pana hong siang sak dingin Amah muan huai-in thutang hi," 1 John 1:9. Dikna a duh a deihte kivaak kham ding hi, ci-in Jesu in hong kham zo hi. A manpha Honpa hi! Hong sang dingin a khut hong zan khia-a, thupha hong pia dingin hong itna lungtang in hong ngak hi.


Kimkhatte in a hun ngakin, Ama thuphate a saan ma-un, kipuahpha a hihna uh Topa kisittel sak phot sawm uh hi. Ama thuphate tu mahmahin zong kingen thei hi. A zawngkhalna uh a huh dingin Khris's Kha a hi Ama hehpihna a ngah ding uh kisam hi. Tua lo-in Khristian zia leh tong nei zo lo ding uh hi. Ih hi bang lian-mawhna a dim a cimawh a guaksuakpi mahin Amah ih zuat ding Jesu in hong deih hi.               

Source: EGW, Pawlpi Thu Lamlak, chapter 4.

  


Tuesday, October 6, 2015

Khawkpi (6) azom : Pasian in Mannei Asakte Sittel




Pasian In Mannei A Sakte Sittel

            Topa Jesu in ih sungah a manpha mahmah khat mu-a, tua pen khangto sak nuam a hih manin, eite haksatna a thuak dinga a hong sam a hihi. Amah in ih sungah Ama min a than sak theihna ding bangmah mu kei leh eite hong hahin Amah nitum nuam lo ding hi. Lingkungte hahin ih mawk gim nuam kei hi. Khris in suang mawkmawkte a pum sung denna lo hi. A mannei sikte bek mah hal hi. 7T, laimai 214.

             Pasian' seh mite in panmun hong ngah ding uh hi. Amau' lungsim banga a ngaihsutnate uh leh a gamtatnate uh a sung a pua uh kisittela, a khialhna uh a kimuh theihna dingin amaute' ginat lohnate a hehpihna tawh Pasian in pholaak hi. Tua bangin amaute in a lungsim uh bawl pha-in a gamtatnate uh puah pha thei uh hi. Amaute in a hoihnate uh puah to thei-a a khialhnate uh a paih khiat theihna dingin a lungsim uh sittela a gamtatna uh a pholaak theihna ding mun ah Topa in mite koih hi. Ama nasemte in amau' lungsim setbupi uh a theih tel ding Pasian in deih hi. Tua banga amaute in sianthona a ngah theihna dingun Pasian in amaute' tungah haksatna meikuang a tun ding phal zel hi. "Ama hong pai ni kua in ngak thei ding hiam? Ama hong kilat ciangin kua ding ding hiam? Bang hang hiam cih leh Amah pummei tawh kibanga, vuttui tawh zong kibang hi. Amah pumzappa leh ngun halpa bangin tu dinga, amaute in dikna tawh antawi a piak theihna dingun, kham leh ngun bangin Levi' tate hahin a siangtho sak ding hi." Malakhi 3:2,3. 4T, laimai 85.

             Kal khat khit kal khat Pasian in a mite makaih hi. A lungsim sung uh a kilat khiat theihna dingin a tuamtuamin hih hi. Kimkhatte in thu khat ah a thuak zawh uh hangin a dang khat ah puuk uh hi. A banbanin, a kician zawsemin lungsim kisittel hi. Pasian' mi hi'ng a cite in a lungsim uh tua nasepna tawh kilehbulh a hih lam a theih uh leh, Topa' kam sung pana siat khiat ding a ut kei uh leh, tua lungsim pen a zawh zawhna ding uh nasep a nei uh a hihi. 1T, laimai 187.

             Pasian'na a sem dingin ih siam lohna ih kiphawk ciangin, Ama pilna tawh hong makaih dingin ih ki-ap leh Topa in ei tawh na hong sem thei hi. Ei' deihna angsung ih paih khiat leh Topa in ih kisapna khempeuh hong guan ding hi. 7T, laimai 213.

Source: Pawlpi Thu Lamlak