CHRISTIAN KI-ITNA SUNGAH PAHTAWINA.

Tuingo khua 

Christian nuntak pen ki-itna leh khat leh khat kipahtawina simloh adang omlo hi. Piakkhiat khempeuh ki-itna tungtawnin hong paikhia hi. Nungzuite hun kaphawkkik hi.
Amaute nekhawm dawnkhawm uh hi. Avaal omlo a, kisam zong omlo hi. Ki-itna omlo hileh neihsa themcik zong kipia nuamlo ding hi.

Mission president van hong kisuat ciangin," Global Mission Project Plan" namkhat ahi Pilna-Sang kihong hi. Lusei Community sung ahi Tuingo khua-ah Elementary School kihong masa pen hi. A honni ciangin bawngkhat tawh lawm uh hi. Mipi ankuang umkhopna hi a, lungdam thei mahmah uh hi.

Vaitun-muakna khuanawl ah Gatepi khat bawlin pakkual tawh Choir limci mahmah tawh nong muak uh hi. Christian sanggam ki-itna leh Topa naseem zahtakna tawh kisem  khempeuh thulimci ahi hi. Deih ngennuam ahihleh corruption suak leuleu hi.

Pasian in hong hehpih a, minam deidanna leh zawhthawhna lungsim neucik zong kavom kei hi. Lusei community first priority kapiak hangin mawhsakna leh telkhelhna kapeng tuan kei hi. Kei katukloh nangin ka kikem hi.

Pasian tung kingalo uliante pen kithutuahna a om ciangin patau uh hi. Leitung political danin kalsuan uh-a,  " Divided and Rule " policy zangnuam zaw mawk uh hi. Tua zong Christian sungah Racism, monopolism leh corruption hong kipatna ahi hi. Namneute khangto-a, a khupkik ding lau uh hi. Pasian muangzolomeidawina namkhat ahi hi.

Leitung [political point of view] tawh en phial leengzong, Lusei, Pawi, Zomi cihkhawngpen minamkhat ihi hi. Midangte suktuah aa omhun hinawnlo hi. Duhopna in khalam mit hong tawsak hi. Hazaatna in launa leh meidawina piangsak aa khamuanna om lo hi. Khalam semsem ah ki-itna thukzaw tawh kizop huai hi.

Pyidawtha Pawlpi.
Pyidawtha khua pen munnopci khat ahi hi. Katun cilin Sabbath School member 16 tawh Company khatin na om uh hi. Meipi vaakin Bible Study pia-in nitaksim Home-visit kabawl uh hi. Khuasung khangno tangval, 4 khawng in hong panpih mahmah uh hi. Kumkhat sungin SS member 61 hong pha hi. Pawlpi khangto-in nasepna nuam mahmah hi.

Mission president aa ka-om ciangin kahawhkik hi. Pawlpi thahaat semsem hi. " Global Mission Plan" project dingin Middle School kihonsak hi. Tua bang a kihonnate pen Local Pawlpi kipiakzawhnamun leh amautha tawh a paisuakzo ding munte kisem masa hi. Mite deihsakna mawktawh kiseem ngam lo hi.

Pakkual hoihmahmah leh choir ngaih mahmah tawh nong dawn uh hi. Keelpi khat go-in Elder leh makai zawdeuh teng tawh tukhawmin mailam kalsuan zia ding kikumin kilawp mahmah hi. Pyidawtha kangai mahmah hi.M leh C pen pawlpi hilo hi. Ki-ukna policy hibek hi. C in a Sangpi ih run zawh hunciangin hong kihei dingin kalamen hi.

Lezaang khua leh Anlang.
Khamtunggam khualzin pen theihsa mah bang ahi hi. Puankhelh teng zong kipuakhop khin hi. A gaalkhat a khua tun nangin luitaw dong kituaksuk a, mualdawn ih tun mateng kikahto kik hi.

Lezaang khua katung uh hi. Paat ngingeei-in khuataw pan kasuakto uh hi. Pawlpi mite in khuanawl ah tuivot tawh nong dawn uh hi. Pakkual hong oksak hi. La dawngkhat Pasian pahtawina leh lungdamna langaih mahmah gampalak singlim nuai ah puaksialsialin hongsa uh hi.  Lungdam si, tuivot in nakpi tawldam sak si hi. Gimna khempeuh tawmno sungin beimang hi. Lezang pawlpi in nikhat hong tutpih a ankuang umkhawmin hong tawldamsak uh hi.

Sia Kham Khen leh Sia Nang Do Dal in zan thapai in Motion picture lakin naseem hi. Gim mahmah kawmkal ah zanthapai-in tawlnga lo uh hi. Ihmut hun ding nangawn omlo hi. Phun kikeuh lo uh hi. Tu-in Pasian thupha saang uh a, milianpi tuakin om hi.

Anlang pawlpi in Motion picture deihlo hi, ci-in kaza uh hi.  Bangbang ahizongin setvante Thalmual ten napua henla zankhat tam phei teitei ni, ci-in kakhensat uh hi. Pawlpimi honkhat in hong pi a, zankhat katam uh hi. Sia Lian Pau na om bembam a kamuh ciangin kanuam mahmah hi. Zankhat tamin Thalmual lam manawhin kapai uh hi. 

Anlang khua pen SDA hong thakhauhsak member tampenna mun ahi hi. Tumahmah in zong MUC te kingaknapi ahi hi.

Thalmual ah

Thalmual katun uh ciangin khuazan khin hi. Hausa upa leh khuasung khangnote in khuanawlah lasa-in hong dawn leuleu uh hi. Zankim ahihmanin gamdai a, la puakziah a hong sak pen vantung mihon zahin kangaihsun hi. Aksi taangsilsial nuai ah Pakkual mah nong oksak phangphang hi. 

Cikmah aa kasin khakloh pakkual okmun lua kahihmanin, hoh, sibaih dingaa mangsia ahi maitam, ci-in kalau simsim liang hi. A zing ciangin khuasung hausa upa dongin ankuang umkhopna hong bawl uh hi. Lawkite nangawn in Zo-minam buppi phattuamna piazo dingin hong lamen ngiau uh hi.

Hizah aa hong kimuanna a bang himawk hiam? ci-in kei leh kei kidongin adawnna ding tudong kangahzo kei hi.

Ngente lamah

Vanpua ding kuli cialin Thalmual khua panin Ngente kadelh uh hi. Lampi haksa a, tuidawn ding nangawn omlo hi. Nikhat paina dingin gamla hi. Taikhatna pan Pawlpi Dorcas ten nahtangtui tawh nong dawn uh hi. Lungdam luakawm tawh tawldam pah hi. Zankhat taamin Zampi manawh kasawm uh hi. Kigimlua ahihmanin , " Sia aw, zankhat tamlai un" hong kicih pen khum ngaungau hi.

Zingsang dingkhia dingin kithawi, khe kasil laitakin Elder nu hong pai hi. Kakhenuai vun sandiakduak amuh ciangin, "nu ei, siapa hibangin Zampi bangci tun ding, sakol kawm ni," ci-in paikhia ding a a kihei laitakleh Zampi panin hong piite sakol thum hong tung hi. Kei khatah hong tuangsak pah hi.

Zampi khuanawlah
Zampi khua pen India tawh gamgilam naih hi a, gamdawn mahmah hi. Zampi pen gamla mahmah hi. Zan 12:00pm khuamialpi -in khuadam thuakin khuanawl ah choir sa-in nong muak uh hi. Khuadam lua ahihmanin, mikang lasiamte bangin a aw uh ling kelkel bek hi. A zingciangin bawngnih go in hong tutpih uh hi. Ninih katam khit uh ciangin lungdamtakin kaciah uh hi.

Tu-in Zampi M leh C a kikhen hangin, C lampen acil aazah mah pha veve hi. Thagui thatang zangte hi a, hanciam nuam mahmah uh hi. U Vung Za Do makaihna mun ahi hi. A tate nih zong US ah om hi.

Elder Thang Tun in Thalmual panin Tedim dong sakol tawh hong kha leuleu hi. Tedim katun ciangin Sakollaam biakinn hontawh hong kituak a, hun nuamtakin kazang hi. Kikhopi sungin gimna tawlna teng khempeuh hehnepna leh hanthotnate hangin tha ong dimkik hi.

Sawbuazishin B.
Sawbua Pawlpi vehin nihvei kapai uh hi. A masa-in bawng hong gawh hi. A nihveina ah lawi hong gawh uh hi. Laamna leh programmed bawlin zindona Reception hong nei uh hi. Ki-uapna hong muh ciangin pawldangte in, SDA hizah aa ki-it uh hiam, ci-in hong eng mahmah hi. Nitak kikhop hunin "SDA siate hong pai, thu vangai ni," ci-in kizawn sesu uh hi.

Amun siangtho hi. Natna tam zilzul lo hi. Pawlpi Sangpi khat nabawl uh a, hoihtakin kipantah uh hi Lawphuai mahmah hi. Sangnau pangte signature-song sa-in tuanletlet uh hi. SDA pen hong kineu-et lo hi.

Tengkaya khua
Tengkaya pen pasal kician mahmah omna pawlpi khat ahi hi. Bawngkhat go hi Thado ngeinalaam tawh hong tutpih uh hi. " Suktui langlim ngalai leng, amang chungnung zangvuisai sawn nemtawh lawm e," " Ciah tan cinlah sawl pawng ting kaningzu lah nuamnalai e" pungduk, pungduk , ci-in hong tutpihpih mai uh hi.

Kumpipa lobuangin kapaina khempeuh Hausa upa dong aa hong muak pen Lungdamnathu kizelhnuam lua hiding hi, buhte minlua aa lakhunta hiding hi,"ci-in kalungsim hong sawk hi. Khuasung hausate hong welcome namun pen kitaangko thei cihna hipahpah hi.

Lawmte pawlkhat in, leitung kumpi lobuang hibang, ci-a aphunphun pawlkhat om hi. "Kei hong pai ning, na kiging un" ci-in kagenkhol ngei kei hi. Khamtung pen kizawnglua ahihmanin, anlim tuilim kine zo tawntung lo hi.  "Siapa tutpih ding, bawnggo ding" acih ciangin keimah bangin memberte zong nalawp mahmah zel uh hi.

Khamtungah anlim dang kineilo ahihmanin muinam mah hong hanciam uh ciangin lam kipaizo tuam hi.

Sane lo khattawh khual kazin ngei hi. Kazin u-ah akkhat go-in taangham zaupantaksih hong huan hi. Sanelopa aading acih nang theilo-in aktui tang khat pumhuanin hong lui hi. Taangham-taksih hul mahmah si, aktui-pumhuan lah ukk mahmah si, neek hak hongsa mahmah hi.

Cimawh lua cih kamuh ciangin," aksa-mehtui tawh meh lel in," ci-in kamitsin thapai hi. Akhut dawk dekdek napi, sawkngam tatak lo hi. Cihmawh manin khitui luangin anne theilo-in kanui uh hi. Innteeknu in, " Sia bang ahi, mehlakah ahilopi khat kikhah kha ahia?" ci-in hong patau peuhmah hi.

Tua ahih ciangin, Mrs White in mizawnggamah saneekna tawh kisai nakgen kei un, naci hi. Evangelist khat in Laisiangtho thukham ahih keinakleh an namkim neektheih kul hi. Mizawnggam ah a om bangbang lungkim kul hi. Ih tunna munmun zui a nektheih omtheih ding kisam hi. " Namai aa hong kilui khempeuh dongtel lo-in ne in" Zeisu in naci hi.

zoplai ding: by Pr.Thangsiangh