Discovery Channel leh Travel Channel tatsatlo-in ka en den hi. Christian mimasate gamthak phuutdan khawng nasialua kasa hi. USA vantungzah aa kigen gampanin, leitung dangtawh kisawh ngeilo Africa leh New Guinea tuikulh a vatuna khawng ahi hi. Gamthak lutdan kibanglo hi. Ngeina leh nuntakzia kibanglo hi. Amun-agam zui-in, minam leh ngeina zui-in gamtang uh hi.
Kagamah na ut uleh ko bangmahin om ding, ci-in kiciamna neisak phot uh hi. Zuih kul masa hi. Missionary nihte bang, kum bangzah sunghiam, a innteekte bang lianin nungta khawm uh hi.
Atenna inn
Amau tenna innte pen adung-avai cih omlo hi. Diameter pi-15 khawng abemin kilam hi. Asanna mihing tuntan bang pha hi. Kawl-lukhu bangin bi tawh khuh hi. Kongvang pen 2.5'x2.5' hi a, pumthawl lianbekin bawl hi. A lutnop ciangin gawlvang aa uilut bangin haksapi in lutgaigai hi. Akhut langkhat leh alu kha masa-in lut kul hi. A galte or sapi khat in simleh avangah a awk sungin thatman ding cih khawngkhat ahimai tam ithei kei hi.
A minam kizepna
Puan, zanpuan cihte omlo hi. Pasal-van pen kemcing mahmah hi. Ganhing taktak lah hisamlo, akhuh omlo pi khawng-a malhzeza a hong pusuah khak ding khawng lau hi ding hi. Carrot tawh kibang mauzung hiam khat sungah khumin, a tunglam kaito-in a kawngah hen khawm hi. A kawngah hen a, bawngzangtuk bang zeuzau hi. Tua pen hoihsa lua himai uh. Pasalte minampuan thupi pen tua hiphot.
Kivakna anneek.
Gambaal limci mahmah piang hi. Kawlkai, hakai, haliam ne uh hi. Beel neilo ahihmanin emmin ngentangin ne uh hi. Antui, mehtui cih bang omtheilo hi. Voksa pen leisung to-in anuai-ah suang phah hi. Nahteh dapin a tungah vokpum phalnih suahin koih hi. A tungah nahtangteh khuh hi. Suangtum hon atungah gual dimdiam hi. Tua tungah meiipi sep hi. Ganlian khempuh tua bang bebekin vutphualin minsak uh hi. Amin hoih mahmah hi. Mikang ten tuadan a kibawlte limsa diak hi.
Amau banglianin omphot
A tawmpen kum-5 sung bang teengkhawm hi. Missionary ten a puansuah khia-in amau zanglawngte mah bulhin tau vauvau-in paita uh hi. Leivui lakah a tangguakin lum uh hi. A vokkhawi te in khuadam a sak ciangin a pute pang nekin lum uh hi. Nakphiphi-in kum-5 sung bang kineih phot hi.
Innlam ciangin damdamin ahoihzaw-in, amau model susia lo-in lam uh hi. Damdamin adung nei dingin dokdok aa innngeina bang dektakin bawlsak hi.
Leibeel sekdan khawng hilh uh hi. Tuu, hei, tem khawng damdamin guan uh hi. Sanginn leh biakinn lamsak hi. Sangsia khat tenden sak hi. Zatui zaha leh secondhand puan alomlomin puak zel hi. Tuahun ciangin ngai mahmah uh a, acih peuhpeuh nial nawn lo hi. Mihing leh a leitang dongin deih bangin zekin puahzo uh hi.
Amau-biak pasian
A tawpna-ah abiak uh bang hiam, ci-in a zung dongin kan uh hi. A Siampi hampen un, suangkuahawm munkhat lak hi. Kapianna uh pen hih suanghawm pan piang hi-ungh cingiau hi. Missionary pa tua kawhawm vanehin naitakin en hi. Minam makaipa laulua-in amau nahum hi. Tua suanghawmpen khaugui in sin aa kikan phengphang hi. Gamvaatna namkhat tawh vaatkhia-in a et ciangin suanghawm mawkmawk nahi a, mompi khat hong taikhia leltak hi.
Tua minamte in mom amuh ciangin emin ne uh hi. Limsa mahmah hi. Tuazahin kumtampi hunla-in amau minam leh a biakna bia bangkekin va -om phot a, tua ciangin minambupin Christian suaksak zo uh hi. Tua mah bangin Zeisu in Mihinghihna hong silhphot a, hotkhiatna kicing hong pia hi.
SDA Missionary
Ei SDA missionary taangthu kasimsim ciangin, amaute bangin, hibang dinmun a phuttna tawm mahmah hi. Civilization gamteng khawng leh Pawldangte nawk nasa mun khawng kinungzuihzuih bek hi. Pawl dangten tuugute hong ci uh hi. Nidanglai Christian masate missionary lungtang kivomlo hi.
Ulian tate munhoih munnuam tata kipia hi. Degree neite Congregation tamna kituh a, tua bangmun bekah sem nuam uh hi. Gamthak phu ding kisangkhaat mahmah hi. Bang hang hiam cihleh Kawlgam gamthak phute favour kipia lo hi. Strategy Plan omlo hi. Gumgawtangin kital phut hi. Haksatna leh taangsapna gen leh a ki-aap zolo bangin ngaihsun uh a, "hanciam in, hanciam in," cipong mawk uh hi.
Gospel tenzong Church Organized omna teng bek kawizuih uh a, munthak phulding genngam vetlo hi. Platform omsa tung aa lamlam bek pen kipumpiakna kicing hinai lo hi. Kipiakloh sangin hoihzaw napi a kipumpiakzo hinailo hi." Gamthak, munthak leh a theinailote zong mungtupin nei ni. Ih gamkek ni. Ih puanbuuk khan ni.
Written by Pr.Thangsiangh
No comments:
Post a Comment