Letsiikan Adventist Camp III (Written by Dongbawi)

Camp Bawlnadign Mun Zonna

Camp kibawl takpi ding hi ta, amun ding hong kisam ta hi.  Amasa in Natchaung khua khen a Meitei gun dung ki en in deih bang lo hi.  Pyidawtha khua gal Mainuai khua lu tuizeu om na ki en leuleu in mihonpi a ding lem ki sa lo hi.  
Hausapi akici na hoih mahmah cih thu kiza ahih manin  Sia Suanno  leh Sangnaupang pawl khat (Sawmtawng te Lianneu te ki hel hi ci ngel ing?) tawh Sialthawzang, Dimzang lam tawn in Tonzang township sung a om Hausapi ki ci  na mun ka va en uh hi.

Tua Hausapi kici na mun pen Suang mual/keen  veva  pi khat  ahihi.  Tua sungpek pi agam la pan I muh ciang Gunkuangpi/tembaw nung a hei na (peh) sikpek dekda  abungbu lam a aki phut thawh kibang ka cih leh lawm te khat in innsang pi a tung kum om lo a adawl tungnung pen a kongkhak lang khat bek a ki hong tawh ki bang hong ci hi.  Tua a sang mahmah suang pek pi I gal muh phet in a phual tun ding ki ngaklah  ahih manin I lampi a sau pha diak tawh ki bang ka sa hi.

Tonzang lam pan hong luang suk damtui cim kilkel, tua Suang mual pi sung ah lut in alang lam ah hong luang khia hi. Tua hong luan khiat na mun lam ah tuilii neu in hong cing a tui pek na ding nop tuak mahmah hi.  Lui pang keen tung kah to in tua suangmual bul kheng to leng lui naak lam ki pai thei hi.  Amun te kamtawh gen theih loh in hoih in nopci a, kawng tantan apha lui tui cim kilkel sung ah zung nih ciacia khap khat pan tong khat tantan a pha ngasa hon vak hialhial etlawm mahmah hi.  Sia Suanno in hong genna ah hih ngasa te a nungzangbek aki mu hi a, atatak in gol mahmah ding hi acih leh sangnaupang pawl khat in takpi maw sia ci in dong kik uh hi.

Amun ahoih mahmah hang in Mihonpi tawh pai na ding lem mel lo ahih manin March 1997 kum a Sia Lianpau (UMM Youth director) makaih na tawh Adventist nungak tangval teng bek apai na mun Letsiikan pai ding in a ki khensat  ta hi.

Giahphual kisat khol

Sia Suanno makai in Pangpi  leh Pinlong khangno pawl khat mi 30 kiim ( apha zah lian thei nawn lo) giah phual sat ding in ki pai khol sak a giah buk leh State te na lam khol uh hi.  Mi pi khem peuh giah theih na ding a alam uh ahih hang, mi hong tam lua mahmah ahih manin  numei  naupang te a ding bek hong suak ta hi.  

Mipi hong tung

Sia Mangpi leh Sia Genmung makaih na tawh Tedim leh Tonzang town ship pan Condor pi 4 dim mitmet in Kawlpi hong tung pet mah ta uh hi.  Nungak tangval bek hi lo nupi papi naupang avek un mawtaw tung pan hong tuak khia  phangh phangh ka mu a lungdam na leh patauh na ka awm sung dim in hon lut  hi.  Pawlkhat te biakinn nung lam va tai in tu suk uh a, lam kal tawntung, a ippcip uh anking te a kam dimdim un siakhia ziahziah ta uh hi (Lua).   Pa Sian Cin Zam (Zamno) leh ulian pawlkhat ka muh ciang, den a ka patauh na teng paih khiat hong bang zo mawk hi.

Kawlpi leh a kiim pan hong pai te zong hong tung damdam ta a, KAS huang dim in mi ki leh matmat hi.  Mi khempeuh kham ding in, akihuan Buhcim a ki nek khit ciang in mawtaw tung ki kah sak kik hi.  Yangon  leh Maymyo zum pi pan thugen ding a akicial  Pr. Daniel Nangno, Pr. Do Thang, Pr. K.K. Khual te a ki pan Tahan Puia, Pa Zamno cih te in mawtaw khat tek hong makaih sak hi.   AY alaan (flag), KAS alaan, EGT alaan cih te mawtaw tung a kikhai khit ciang Letsiikan lam zuan in ki nawn ziahziah ta hi.

Nitak lam nai 4 bang hong sat petmah ta ahih manin hong pai ding a dangte ki ngak zo nawn lo in Pr. Khamkhen leh sia pawlkhat tawh Diana dim in anunung pen Kawlpi pan ka ding khia ta uh hi.  Aphual ka tun ma un ni in mual hong liap san a khua hong mial ta hi.  A sawtlo in mual zaang khat ah ka suak to uh a, mei taang zihziah ka gal muh hi.  Tua ataang zihziah mei leh ko suaktoh na ki kal ah tuilii pi khat in hong hal a, tua meitaang te tuiliipi tungpan in hong leng in nopci mahmah hi.  Limsuai siam te in vantung gam dan ding a suaih uh ka phawk a Vantunggam bang zah in nopci ding cih ka lung ngai kha hi.

Ka tuan uh mawtaw in tua Limlang tuipi gei ah hong taiphei pih zetzet  hi.  Tua ka galmuh a tang zihziah leh limlang tuipi pan hong leng kik khua vak in ka lungtang hong tan a aki gen thei lo lungnopna khat ka ngah hi.  Ka awm sung ah alom pi khat hong lut in ki hual vanvan ahih manin kapum pi sung a tui pawl khat ka mit pan sawn khia hi. Lungdam kipak na hang a aluang mittui te khuamial sung pan ka khutbom tawh nual hiathiat ka hih lam ka gei a tu ten hong thei in ka um se kei hi.  Mihonpi husa te hong gin ngaih tetek a, a sawtlo in mipi om na ka tung taktak ta uh hi.

Hih camp thu ka ngaih sut kik sim in  mual hong liapsan sa ahi Pr. Do Za Thang leh Security  kician taka hong let sak (U Lianpu) ka phawk mahmah hi.

Keima phawk kik teng ka at hi in ka theih khialh aom leh athei te in deihsak na tawh nong puah sak na ding un ka hong thum hi.  Lai hong simsak mimal tung ah Topa in thupha hong pia ta hen.

Itna tawh

Dongbawi