NUNNA ZAITHA - JK Kam

Naupang pasalno khat pen aneu tung a kipan in a '' leitung ah mi kamsia pen
pa hi ing'' ci in ki ngaih sun hi.
Thagui natna nei a hih manin a khe hoihlo in, a ha te zong ki thuap ngeingai
in kikim hetlo hi. A khangual pih naupang dangte lak ah kihel ngam ngeilo in
a mah bek tang om den hi. Sang a kah ciang siate in lai a dot ciang zong
dawng ngei mello in kuncip thei hi. A mah le mah mi bang kisa lo lua ahih
manin thanem den hi.

Khua khal hun bei in tuk hun hong ki pat kuan hun ni khat ni in, naupang pa'
pa in a vengte kiang pan a ngah singnote la in a tate khat in kung khat ta
inn nung huan sung ah suan sak hi. ''Hih sungno te hoih tak a  khansuah thei
penpen pahtawina letsong kong pia ding hi'', a pa in ci hi. A pa i pahtawina
a man zong ngah nuam mahmah hi. A hi zongin a sanggam te in thalawp takin
singno a suan laitak un aman bangthu hong ngaihsun laizang hiam cih leh,''ka
singno suan bel a sawtlo in vul in si kik pah lel in teh'' cih hong ngaihsun
laizang hi. Tua a hih manin khat vei nih vei khawng bek tui buak in en kik
zun kik nawn mello in nusia dildel lel hi.

Tawl khat khit ciang asing kung suan a va et kik leh, hoih pha takin khangin
hing sitset atehno hong selin a sanggamte singno' sangin khang zaw  ahih lam
amuh ciangin lamdang sa lua mahmah hi. A pa in zong a kamciam sa om bangin
pahtawina tua naupang pa apiak kawmin, '' nang pen na gol ciangin singno lam
pilna anei milian khat suak ding hi teh'' ci in pahtawi in tha pia hi. Kipak
mahmah in tha hong lawp ahih manin tua ni a kipan amah bek tuam om nawn loin
a lawmte lakah hong kihelngam ta hi.

Nitak khat ihmu theilo in, tawlet (window) hongin khatang silsial a et kawm
in, a sangsia pa gen ngei '' singkungte zan hunin khang '' cih thu hong
phawk kha dihdih ahih manin a lupna pan thokhia in a singkungno suan en
dingin inn nuai tuak suk hi. A singkung no kiang a tun madeuh in mi liim
khat mu a, kua hi ding hiam ci in a etet  leh, a pa na hi in ama singno suan
pen abul pan puah a leiza pia a na a semsem na hi gige hi. Tua tak ciangin,
''ka singno suan a si ding a ka ngaihsut hong khangcingna pen hi dan hang ai
ve maw'' cih phawk in, thupiang khempeuh damdam in a ngaihsut kikkik ciang,
a pa' itna hong phawk a,  a lupna tung pan ihmu thei nawnlo in zantha pai
hong kap ngekngek hi.

Hunte damdam in hong kikhelkhel a mibanglo naupang thanempa zong singno lam
mipil misiam hong suak lo bilbel hi. A hi hangin amah pen a 32na USA
president hong suak zen mawk hi. A mah pen ''leengsawn tung tuang kawm a thu
van zo pa'' cih a pawhtawi gentehna na ngawn hong ngah hi. A min in
''Franklin D. Roosevelt'' a hi hi.

*Kum 12 a phak lai tak a '' Itna in nuntakna a ding in a hoih pen leiza hi''
cih a pa' kammal khat hangin *'' Itna in nuntakna a dingin a hoihpen thaza''
*hong suak a hih manin  a vulcip a maimang ding kimlai tua ''ITNA'' hangin
leitungbup i belh le suan, gam thupi pen khat i president (kumpi) ciang hong
suaksak to zo mawk hi.

*ITNA IN I NUNTAKNA A DINGIN A HOIHPEN THAZA HI.

Laisim mimal kim tung pan in mi a thahatsak itna kammal a gen khia thei tek
dingin Pasian in thupha hong pia tek ta hen!

Deihsakna le thangah mahmah na tawh,

JK Kam
ITNA LEIBA