JESU BANGIN ITNA TAWH THUMANN GENNA
A thupi penpen Laisiangtho mun khat in "A it thei lo mi peuhmah in Pasian a thei kei hi; bang hang hiam cih leh Pasian in itna ahi hi" (1 John 4:8) cih ahi hi.
Jesu in leitung ah a nasep sungin itna ii thupitna hong gen phapha hi. "Koi thupiak in athupi pen hiam" (Mark 12:28) a kicih ciangin Jesu in Thuhilhkikna sung na man aa, "Na Topa Pasian, na lungtang khempeuh, na hinna khempeuh, na lungsim khempeuh le na thahatna khempeuh tawh it in. A nihna hih ahi hi: 'Nang le nang na ki-it bangin na vengte it in.' Hihte gel sanga lianzaw thupiak khat beek a om kei hi," (Mark 12:30,31).
A nungzuite' khe a silsak khit ciangin Jesu in, "Thupiak thak khat note kong pia hi: Khat le khat na ki-it un. Keimah in note kong it bangin note khat le khat na ki-it pelmawh un. Note khat le khat na ki-it uh leh ka nungzuite na hilam uh mi khempeuh in a thei ding uh hi" (John 13:34,35) ci hi.
Sawltak John in zong hih thu paipi 1 John 4:7, 8 ah na gen kik hi: "Kong it lawmte aw, Pasian pana itna hong pai ahi manin eite khat le khat ki-it ni. A it thei mi peuhpeuh, Pasian pana suak hi-a Pasian a thei hi. A it thei lo mi peuhmah in Pasian a thei kei hi; bang hang hiam cih leh Pasian in itna ahi hi."
John in aneu 16 ah agen beh lai in-ah, "Tuaci bangin Pasian in eite hong it lam i thei a, tua itna tungah i kinga hi. Pasian in itna ahi hi. Itna sungah a nungta mi peuhmah Pasian sunga nungta hi-a, ama sungah zong Pasian a nungta hi. Thukhen ni cianga muang taka i om nadingin hih bangin eite lakah itna hong kicingsak hi. Bang hang hiam cih leh hih leitung ah amah tawh i kibang hi. Itna sungah launa a om kei hi. Ahi hangin a kicing itna in launa a hawlkhia hi; bang hang hiam cih leh launa pen gawt ding kihtakna ahi hi. A lau mite, itna sungah kicinsak nai loh ahi hi. Amah in eite hong it masa ahi manin eite in i it hi" (aneu 16-19).
Suangmanpha Hoih
Suangmanpha hoih bangin, Pasian zong a kitaatsa, amaai sa suangmanpha ahi hi. Itna Pasian in thuman Pasian ahi hi. Thuhilhkikna 32:4 sungah "Amah Suangpi hi a, a nasepte kicingin a lampi khempeuh thutang ahi hi. A muanhuai, a khial lo Pasian, thudikin thutang hi" na ci hi. Pasian' itna kikheel lohna in A thumanna kikheel lohna tawh kikim hi. Malachi 3:6 sungah, "TOPA keimah ka kikhel kei hi" ci hi. Pasian kikheel lo a, A thuman zong kibang paisuak hi.
Christ in A Pa kiangah hibang in thungen hi: "Amaute thutak tawh siangthosak in; na thu thutak ahi hi. Leitungah kei nong sawl bangin, amaute leitungah ka sawl zo hi" (John 17:17,18).
Pasian' Kammal, Laisiangtho in Ama' thuman hi. Ahang in hih in Ama thutak hi a, kikheel lo hi. Jesu in A thuman agen khia dingin Amah a umte sawl hi. Ama thuman in leitung ah kileh laak ahih manin galbawlna leh pampaihna hong om hi. Bangbang ahi zongin, "Itna lungduai a, itna a migi hi. Eng loin a kisial kei a, a kisathei kei hi. Gamhtat loin ama angsung ding bek zong lo a, heh baih loin gamtatkhialhnate a ciamteh kei hi. Itna in gitlohna pakta lo a, ahi hangin thutak ah a lungdam hi" (1 Cor. 13:4-6).
Itna tawh Thuman Genna.
Itna tawh thuman koici gen khiat ding cih Jesu in ih etteh ding tampi hong lak hi. Tua sung pan a kithei kim pen khat in John 4 sunga Jacob tuikhuk ah Jesu tawh a kihona ahi hi.
Judah te in Samaria te tawh kiho ding peel uh hi, ahang in amaute siangtho lo in a ngaihsutna hang leh a biakna uh hang ahi hi. Ahi zongin Jesu in mi kim va pha hi. Amah in Samaria ah asep ding nei ahih lam thei a, Pasian' makaih ding muang hi. Tua ban-ah, a nungzuite kiangah a nasep nading uh Israel gam sung bek ahih lohna lak nuam hi.
Jesu in Samaria numei tuikhuk gei ah amuh ciangin, Amah dangtak cih bek hilo in, numei nu kha damsak nuam hi. Jesu in itna tawh thuman gen ding alauh loh manin, tua kimuh khakna in a muibun mahmah ni nih thuman genna hong suak hi.
A Haksa Kihona
Tuikhuk gei a, Jesu leh numei kihona thubaih hilo hi. Jesu in na haksa pawlkhat agen ding nei hi. Ama piak nuntakna tui numei in a kisap lam amuh ding leh Ama kiang pan koi bangin nuntakna nei ngei cih aphawk ding Jesu in deih hi.
Numei in Christ ii apiak nuntakna tui a lunggulh lam hong gen khiat ciangin Amah in numeinu' kisapte damdam in hong suahkhia hi. "Pai-in na pasal va sam inla, hong pai kik in" (John 4:16) ci hi.
Jesu in numei kiangah, "Pasal ka nei kei, nacih amaan mah hi" acih kawm in, "pasal nga na nei zo a, tu-a na neih pa pen na pasal a hi kei hi" (aneu 17, 18) ci hi.
Thuman in sukha hi, numei in a lametna thusimte gen nuam nonlo hi. Kam pelh theih nadingin biakna vai a buaina sau khat hong tun hi: "Sia aw, kamsang khat na hilam ka thei thei hi. Ka pate un hih mualtungah bia uh a, ahi hangin no Jew-te in: Jerusalem bekah kibia thei hi, na ci se uh hi" (aneu 19, 20) ci hi.
Tua kampelhna Jesu in thakhat in zui suk pah lo a, a lungtang sungah thuman aguan theih nangin hunpha ngak in om hi. "Numei aw, kei hong um in. Hih mual tung ahi a, Jerusalem ah ahi zongin Pa na biak loh hun uh hong tung ding hi" (aneu 21) ci hi.
Ahi zong, Jesu in gen beh lai a, "Note in na theih lohpi uh na bia uh hi; kote in ka theih uh ka bia uh hi. Ahang in, hotkhiatna, Jew-te pan ahi hi" (aneu 22) ci hi.
Hih in Samaria mite zak ding akhauh thuman hi a, thupi mahmah hi. Paul in zong hih thuman Rom. 3:1, 2 ah hong hilh kik hi: "Tua a hileh Jew mi hina hangin bang phattuamna oma, vunat mi suahna in bang man nei ahi hiam? Lam khempeuh ah phattuamna a nei kim hi. A masa penin amaute tungah Pasian kammalte tektek a kikemsak khinsa ahi hi."
Kha leh Thutak tawh
Tuikhuk gei ah Jesu in numei a hopih kawm in, pumpi omzia, biakna ngeina leh buaina tunga Samaria numei ngaihsutnate lapsang theih nading zoong hi. Mawhna kol pan leh mawhnopna lungsim pan suakta sak nuam hi.
Jesu in zom lai a, "Ahi hangin abia taktakte in a kha le thutak a, Pa a biak hun uh hong tung ding tham loin tu-in a tung zo hi, ahang in, tua banga biate bek Pa in a zong hi. Pasian in kha ahi hi. Amah a biate in kha le thutakin a bia pelmawh ding uh hi" (John 4:23,24).
Jesu' gen biakna maan taktak in kha leh thuman thutak hi a, kha bek or thuman thutak bek cih om theilo in, a nih in kihel ding ahi hi. "Kha" tawh cih adeihna in itna Pasian' kha tawh kithu hual a, Ama lampi zuihna ahi hi. Thuman thutak ih cih in atawntung in Pasian' Kammal tawh kituak hi. Kha leh thuman thutak tawh biakna in biakpiakna maan hi a, Pasian' zon ahi hi. Pasian pen abulpi pen hi a, thuman thutak phungpi hi in, Ama Khasiangtho in bia ding, thei ding leh it dingin eite hong kai ding hi.
Mi Mawkmawk Hilo
Samaria numei in amah tawh a kiho mipa pen mi mawkmawh hilo cih hong ngaihsun hi. A haksa thuman pawlkhat kimaituah in hong kigen uh hangin, EG White in "Numei in a lungsim ah Jesu pen ama lawm, hehpih in a it pa in ngaihsun hi. Jesu' ompihna siantho luatna in ama khialhnate hong kawk khiat sungin, Jesu in mawhsakna kam khat zong pau lo a, a kha nuntakna athak suak sak thei Ama hehpihna thu genpih hi." DA, p 189.
Christ ii pahtakna leh sannate ngaihsun in, alungsim sungah a kidot thu khat in: "Messiah (Christ kici) hong pai ding cih ka thei hi. Amah hong pai ciangin eite tungah na khempeuh hong telgen ding hi" (aneu 26). Tha khat in Jesu in dawng pah a, "Amah pen tu-a nang hong hopih pa ka hi hi" (aneu 26) ci hi.
EG White' gelhkhiatna ah, "Numei in hih kammalte azak ciangin a lungtang ah upna hong nei pah hi. Topa Siapa' muk panin hong luang khia thu lamdangte amah'n hong saang hi." A lungsim ah nuamna tawh kidim in, a ngah thak khuavak manpha midangte kiang hawm dingin manlang takin hong tai khia hi." DA, pp 190,191.
Jesu Sungah Thuman Thutak
Tuni in hun nunung ading thuman thutak Pasian in hong lak zo hi: Thuman thutak Jesu sungah, Ama dikna leh gupkhiatna, Ama vantungmi thum thupuak, Ama biakbuk nasepna, Ama cidamna thupuak, leh Ama hong pai kik baih nading cihte ahi hi. Ei kumkikna alamen mite in hih thumante ih kepcip ding hilo hi. Ei' a hilo a, Pasian' thuman thutak ahi hi. Mi kim in gupna angah nangun ih gen khiat ding Amah'n deih hi.
Ngeina, leitung pilna or manphatnate tawh hong kitukalh hun ciangin zong eite in ei sung mahmah ah itna tawh thuman agen khia ding hong kisam hi. Ih thugenna leh ih upnate ah hong kipawl khawm theilo pawl sung, pawl pua mite ading in lainatna tawh kithuah pelmawh ding hi. Eite in Pasian' Kammal siangtho leh Khasiangtho makaihna tawphah in, ei sungah na hong sem Christ tawntung itna hong lak khia, itna leh lai-natna tawh ih upnate ih hawm khiat ding ahi hi.
Abei bang Pasian' mite tungah hong ki-ap thupuak in Mangmuhna Thubu 14 sunga kigelh mah bangin minam ngei-na khen tuam omlo, bei hun neilo hi: "Tua khit ciangin vansawltak dang khat van kimlai-a leng ka mu-a amah in, minam khempeuh, beh khempeuh, pau khempeuh le mi khempeuh tunga tangko ding, tawntung lungdamna-thu a nei hi" (aneu 6).
Tuni a ih thupuak in 1840 pawlin hong ki tangko khiat mah bangin a kithu hual, athupi thupuak hi a, tun ahih leh Jesu hong kumkik ding naizaw lai ahih manin ki thuhualzaw lai hi. Tuhun in mimal khempeuh mapan khop ding leh Pasian' Kammal ah cihtak ding hun ahi hi. Tuhun in "itna tawh thuman thutak ih gen ding hun" hi aa, "Lutang ahi pa Christ sungah, na khempeuh ah ama sungah i khangto ding hi. Amah panin pumpi na khempeuh thagui tekah kihuh kizom khawmin, amau sep ding tek a sep ciangin tua pumpi, itna sungah khangin amah le amah a kikhansuah hi" (Ephe 4:15,16). ? Ted N. C. Wilson
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.
