Ki Tawngtawng Nawnkei Leng Cipian (Written by Nangkhai)

Mipil khat in mihai khat tawh zumah thu nei leh mipilpa tungah hehin zahko a, phattuamna piang tuanlo hi. Reconciliation or resolution. Reconciliation mitsuan a i kalsuan sawm leh i relationship ki pehkik bek ding aa, Resolution kisam hi i cih leh problem bebek i mu ding a, cikmah hunin vengngeilo ding ahih manin
ngandekkang gu lut tawh kibang den ding a, siahuai mahmah hi. Tua ahih manin mihing ngeina mihing ngaihsutna zia tawh Khazih a kipan kuamah  en nawn kei ni. Eite pen Pasian' gal hinapi-in Khazih hangin amah tawh a kilem mi hong hisak ahih manin tua kilemna thu mitsuan a, kalsuan ding Khazih min tawh ka hong thum  hi. Khazih tawh kipawlin, Khasiangtho tawh kikhawlin note khatlekhat kihehpihin, dikna na kibawl uh a, na nuntakna uh in note hong thahatsak hi. Huaihamna lungsim leh kisialh nopna lungsim tawh bangmah gamta kei un. Kiniamkhiat ciat un la, midangte thupi ngaihsutzaw un. Note' phattuamna ding bek ngaihsun kei unla, midangte' phattuamna ding ngaihsutsak zaw un. Note in Zeisu Khazih lungsim puakzia na nei un. Note in lungsim kikhatin i Topa Zeisu Khazih' Pa ahi Pasian na phatkhawm theihna dingun Pasian in thuakzawhna leh thahatna hong pia hen la, Zeisu Khazih deihna bangin gamta-in khatlekhat kithutuak takin hong omsak ta hen.

Note khatlekhat ki-it le uh cin keima nungzuite na hihna uh mi khempeuh in hong thei ding uh hi," Topa in ci hi.

Pawlpi sungah hih bang thu themthem hong pian ciangin note khatlekhat na kithuneihnate uh zum kitunin lawki thukhente na khensak tazen uh hi. Nak zumhuai mahmah hi. Note khatlekhat zum na kitut mahmah uh zong a gina hetlo na hihna uh hong kilangsak hi. Bang hangin thuakzaw mailo a, sum ngamzaw mailo na hi uh hiam? Note khatlekhat kisu-in, na sanggamte teekteek nangawn uh tawh thu na nei uh hi. Migilote Pasian' Ukna sungah a lut hetlohna ding thu na thei uh hi. Note kihaibawl kei un. Kua min suangin tui kiphum na hi uh hiam? Pawlpi mi suah nopman maw? or Pasian mi suah  man? Sangamte aw, note khatlekhat kithutuakin, pawl kikhenna omkha loin, na lungsim, na ngaihsutna uh leh na ngimna uh na kikhatsakna ding un i Topa Zeisu Khazih min tawh ka hong thum pha pha hi. Kilemna ding deihin a hanciam mite in Pasian'tate cihna ngah ding uh ahih manin thupha ngah mi ahi uh hi.

Note lakah a om kitotna leh kilaina koi panin hong piang ahi hiam? Deihluatna lungsim na neih manun note' pumsung a kitoktok niloh ahi hi. Pasian kiangah na deih uh ngenlo na hih manun a ngahlo na hi uh hi. Pasian kiangah na nget sun uh ciangin zong note' nopsak na dingbek ngenin, na ngaihsutna uh manlo ahih manin a ngahlo nahi uh hi. Sanggamte aw, khatlekhat kigensia kei un. A mipihte gensia-in thu a khente in Thukham gensia-in thu a khen ahi hi. Thukham na gensiat uh leh Thukham a zui hiloin thu a khen na hi uh hi. Thukham a piapa leh thu a khenpa pen Pasian bek hi a, amah bek in hong honkhiazo a, hong susiazo hi. Tua ahih manin bang hangin na mipihte uh gensia-in thu a khenthei dingin kingaihsun zenzen na hi uh hiam?

No a kineihkhem mite aw,note' mit sunga singluang tang lakhia masa le uh cin, na lawmte uh mit sunga ninthem tang na lakkhiat thehna ding un hoihtakin khua na mu thei pan ding uh hi. Mawhna ka nei kei hi, i cih leh eite a kineihkhem ihi a, eite a thutaklo ihi hi. Lungsim pilte thumuhna tawh kampau uh a, amau' kamkhumna zaknophuai kisa semsem hi. Na kiho uh ciangin kamguh zang kei un la, na pauna uh a za mite in phattuamna a ngahtheihna dingin a kimang kam hoihte bek na pau un. A hihtheih laiteng mi khempeuh tawh na kilemna ding un hanciam un. Na hehna uh kuama tungah thukkik kei un la, Pasian' thukkik dingin koih lel un. Unau ki-itna lungsim nei unla, khatlekhat kizahtak bawl ding lamsang kidem un. Mi tawh kilem theihna ding hahkat un. A hoih in na gamtat manun gimna na thuak uh leh zong Pasian in thupha hong pia ding hi. Topa in a thuman mite mu a, amaute' thungetna pia tawn tung hi.