GC Zumpi ah Nget Huai (Written by Mungno Gualnam)

General Conference zumh pi ah Adventist Logo zat theih nading leh Conference status va nget huai


Kong it Zomi SDA pawlpi mi te,

Tu sawng teng ih pawlpi sung kalsuan zia leh thubuai nengneng kikupna te Zomi-Adventist-Communication@googlegroups.com leh ZomiSDA@yahoogroups.com sung pan na sim zel ingh. Ih pawlpi kalsuan zia leh ki ukh zia te ih kikup ciang iin upna kilamdanna hang aa buaina hi lo iin pawlpi sung kalsuan zia, kikep kikhal zia te zuih loh hang ahihmanin upna akibangh ei SDA pawlpi mi te zuih ding aa SDA pawlpi in a bawl ahi Church Manual leh Working Policy tungtawn aa kikup ding bek ahi hi. Pawlpi mimal khat peuh, pawlpi mi hon khat peuh, or pawlpi hon khat peuh ii hoih saksak iin ih pawlpi a kihei ziauziau kawikawi thei hi lo hi.

Email sung aa lai kigelh te ka sim ciang iin a diakdiak iin Upper Myanmar Mission makai te leh Myanmar Union Mission makai te muanlahna leh gaal neihna vive kibul phuh phial mawk hi. Ei nget bangbang Division makaipi te in hong piak loh man iin ih Division makaipi te nangawn thoihman aa diktansakna (naa-lee-hmuh) sung ah a mangthang khin bang aa a gen pah zongh om hi. Ih zin do siam lohman peuh tawh Conference maan piak theih ding pipi a hong pia lo ding khawng iin pawl khat in ih seh khak man iin ih muhna zia a toi mahmah lam hong kilangh sak zaw hi. Division President pa Kawlpi ah a hong pai tungtaang iin Zo ngeina, Zo la, lamm leh khuang te tawh ih nadawn aa Zo puandum te ih napia hi. Itna leh zahtakna hang aa ih piak hi ding iin ka um aa conference ngah theih nading aa mai etna or thoihna a hi ding iin ka um kei hi. Conference ngah theih nading aa mai etna leh thoihna dan aa a seh kha te ading iin bel working policy tawh kituak lo pi iin hong pia thei tuan lo ahihmanin a hehsuah huai tawh kibang hi.  An kuang nek khat nek nih peuh tawh zindo siam man leh mai et siam man peuh tawh conference a kingah ahih tuan loh mah bang iin  an leh tui, lamm leh khuang, pahtawina paakkual leh letsong mal khat zongh tawh ih dawn ih piak loh hang iin working policy dung zui aa piak theih ding ahíh nak leh hong pia veve lua ding hi. Division makaipi te peen thukip guipi (principle) tawh thu vai hawm uh hi. Thoihman aa diktansakna (naa-lee-hmuh) cih khawng vive tawh a mawh saksak te in amau’ lungsim puak zia a lengkiksak (reflect) hi zaw uh hi. Division makai pi a hong suak tatak te bel ei muh bang iin muhna toi lua saam lo uh hi. Tua bang nengno tawh Division makai te in thukhen lo iin ih gamtat, ih kammal, email sung aa ih gelhgelh te Kha Siangtho tawh a kidim hiam, mi muanhuai te kammal hiam ci aa a na en gige uh hi zaw hi.

A lungdam huai thu khat ah conference te in“SDA upna nusia lo-in amau tupna khahsuahlo ding ahihmanin, GC body tawh kizop theih nang lampi khatpeuh bawlsak ding uh hi. Union buppi in Conference Status a lak keileh, Myanmar Union tawh kizomlo-in GC tawh kizopna lampi zong ding hi. Bang hang hiam cihleh mipum kikakna kitelkhialhna lianlua khin hi. Myanmar Union Conference la a, Conference policy tungtawnin Conference Status mahtawh kizopna a omtheih leh lampi tua bek om hi.” “Union Administration panpih nopna tawh kawikaih aa zolna ahilo, C lam aa khate itna tawh GC tawh kizop theih nang lampi a om mateng lungduaitak leh lungsim siangtakin i ngak ding hi. Upper Myanmar Conference ngente in SDA upna suahkhia ngeilo ding uh hi.(Thang Siangh, February 26, 2010) ci ahihmanin Sia Siangh policy bek a hih teii hang iin Conference policy tungtawnin Conference Status maan bek mahtawh kizopna lunggulh laai buang cih peen ka lung tawm khat hong nuamtuam sak hi.

February 18, 2010 ni aa Sia Siangh in “Conference legally in kidingleh, Union, Division,GC te tawh ki-akgual khen ding hilo” ci aa a gen mah bang iin tu aa Mission, Union, Division, leh GC te tawh ih ki aakgual khenna peen lampi maanlo (illegal means) tawh tu maa kum 8 laai pawl akipan illegal Conference ih laak man bek bek hi zen mawk hi. Conference te peen thumaan a deih, zuau leh khem, lammaan lo a deih lo a kici te ihihmanin illegal Conference ih lak khialhna pan ih kikheel pah lian leh buaina teng a veng pah lian ding ahi hi. Tu ni dong ih pawlpi sung leh Zomi SDA te hong saatzaan peen ih kalsuan khialhman linlian ahihmanin thumaan lampi (legal mean) tawh kalsuan nopna lungsim Zomi SDA te sung ah Topa in hong guat kik mengmeng ding ka thungetna hi.

Tua hi aa Conference policy tungtawnin Conference Status mahtawh kizopna a deih taktak vive ihihmanin lammaan lo (illegal mean) tawh ih lak illegal conference peen legal Conference a suah theih nading lampi a om peuh mah leh siit nei lo “leave no stones unturn” iin sep huai ahihmanin General Conference of Seventh-day Adventist Headquarter ah va pai aa GC makai te tung ah ih lungkim tak iin thu vasunh ding bek lampi om laai ahihmanin vapai mengmeng ding kisamh mahmah hi. Tua bang aa sep theih a om laai sun ih sep khit teh General Conference in hong piak theih het lohna hang a om leh lammaan mah tawh GC te hong makaihna bang iin ih zuih ding peen SDA pawlpi mi dikh te ii dinmun ding ahi hi.

Logo Vai: Tu ni ciang dong ih pawlpi sung ah hih Logo hang aa zum thu tawh kisai iin kibuai iin a tel zo lo ih hiam, a tel nuam lo ih hiam, mumang aa kampau a bang keei laai mi tampi om hi. Hih Logo vai tawh kisai iin lai kigelh te ka sim ciang iin upadi (law) pai dan tawh gen lo iin mimal ngaihsut dan vive tawh kigen mawk hi. Thukhenmaang te leh upadi thei te in bel intellectual property right violation hang leh ei zat theih ding a hi lo pi ih zath kalhtang man aa “na veeng te neihsa deihgawh (suth) kei in” cih thukham dung zui iin palsatte (offenders) hong ci uh hi napi, pawl khat te’n lah Paul, Martin Luther, John Huss te bang aa Pasian min hang aa bawlsiatna a thuak bang iin ihmu hi. Tua ahihmanin hi ci bang tel hak ih sak luat thu ah logo a nei General Conference phualpi te va dong ziau lengg, General Conference in na zat ding uh hong phal mah ungh hong ci ziau peuh leh Mission a kici te in zum ah hong khia thei nawn lo ding bek tham lo iin tu aa thu om toto te zongh mission leh conference te in a dawh kik pah uh kul tuak ding hi. Tua ban ah Myanmar Union Mission leh Upper Myanmar Mission te in hong sim mawhna, a thumaan lohna, Working Policy a palsatna, election bawl dan a maan lohna leh logo vai cih te akipan ih lungkim lohna tuamtuam te khempeuh a khong a khia iin kaikhawm iin Conference maan a hong pia thei leh hih logo zath theih na a hong pia thei General Conference of Seventh-day Adventists phual pi aa GC Officer makaipi te, EC member te kiang leh General Counsel, Robert E. Kyte te kiang ah ih thuak bangbang Conference te in hoih tak va suut le hangh Myanmar Union Mission leh Upper Myanmar Mission in hong bawl siat dan uh ahih takpi peuh mah leh General Conference ulian te iin a maan lo aa sep peuhmah deih het lo ding uh ahihmanin thumaan hong kitel pah lian ding hi.

 Logo vai ih va gen ding aa hoih kasak thu a tom iin:

1.      Hih SDA pawlpi ii Logo peen Mission te neihsa hi het lo aa General Conference ii neihsa hinapi Adventist pawlpi ii Logo ka zat uh leh Upper Myanmar Mission in ko conference a hi zaw kim laai Kaleymyo aa kumpi thukhen zum ah hong khia zawsop uh hi.

2.      Kumpi thukhen zum in ko conference te hong mawhsak zaw sop iin Sia Kai Dal leh Sia Kham Khen te ni khat thong kia ding leh sum Ks. 100,000.00 tuak a liau ding iin thu hong khen mawk uh teh lungkim lo iin a tung ah kakah toh uh leh mission te'n zongh hong zui to uh aa tu iin kha 3 thong kia ding iin a saangzaw thukhen zum in thu khen beh sawnsawn uh ahihmanin Kawl gam kumpi thukhenmang te in ko theih dan leh deih dan tawh kituak lo pi iin thu khen uh hi.

3.      Kawlgam aa ko conference a kici te in SDA pawlpi a it takpi leh SDA pawlpi mi tatak hi ungh. Kawlgam aa mission a kici te tawh upna kibang linlian hi ungh. Tua ahihmanin bang hang in ko hih adventist logo zangh thei lo tuan ding ka hi uh hiam?

4.      Hih logo vai ah Myanmar Union Mission leh Upper Myanmar Mission in hong buaisak nawn loh nading iin hoih tak iin hong hilh sak un. Tua hi leh ih pawl sung thubuai te siiang pah ding hi.

ci iin va gen huai mahmah hi.

Conference Vai: Conference vai zongh logo vai ih vagen kawm iin a nuai aa bang iin vagen huai sa mahmah ingh.

1.      January 6, 1987 kum iin Working Policy tawh kituak iin Conference ka nget uh hang iin Division leh Union in hong pia lo uh hi. 2002 election ah ko deih Sia Kham Khen in President a ngah kik loh khit aa kipan kiteelna maan sa thei lo kahihmanun ko leh ko thu aa SDA Conference kici aa a na tuam din hi mai ungh.

2.      Southern Asia-Pacific Division President pa hong pai aa lam hong lah hang iin thoihman aa diktansakna (naa-lee-hmuh) sung ah a mangthang khin dan ding peuh iin seh pong mawk iin ama thu ka nazui nuam kei uh hi.

3.      A kipat tung lam iin India gam sung aa Mizo Conference tawh kizop ding ka hanciam uh hang iin tua bang aa 'naupang tengta kineih' bang iin beelhei ziauziau aa kimawk zop theih nahi lo mawk ahihmanin tu ni dong guaksuak iin kizopna vai bang mah khua suak lo iin ka tavaii laai uh hi. Tua ban ah Mizo Conference pan lammaan hilh ding iin Conference Departmental Director Pr. Biakchawna hong pai liang napi ko deih bang thu hong gen lo ahihmanin ama thu zongh ka namang nuam tuan kei uh hi.

4.      Conference ci aa ka tuam din zawh uh kum 8 bang a pha hi ta napi, sawm aa khat leh sumpi te (tithes and offerings), 13th SS offering, Birthday and Investment, ADRA, GC fund tuamtuam te cih lah Division leh GC ah mu khat pe khat mah zongh kong puak nai kei mawk uh hi. 13th Sabbath overflow cih khawng te zongh lah GC leh Division lam pan khat vei zongh nong khak ngei kei uh hi.

5.      Tu'n kum 8 a cing hi petmah ta aa ko leh ko tu ni ciang dong ding zo saam kahih uhteh Seventh-day Adventist Conference maan takpi iin a hong saang zo tuan nai lo ding nahi uh hiam? Cik ciang Conference maan iin hong saang iin hong pom (recognize) ding na hi uh hiam?

6.      Conference ka kipat tung vua kipan ka upmawh thu uh leh ko ngaihsut tawm uh tawh SDA Pawlpi mi te kiang ah tu zawh kum 5, kum 10 ciang iin General Conference in Conference hong pia ding hi ci aa ka na gen kholh, kamciam ka na piak kholh pong mawk uh hi. Ei Conference te a maan zaw hi hangh. GC tawh a kizom hi hang ci iin SDA pawlpi mi te ka na lungkim sak pong uh hi. Nong piak mengmeng kei uh leh Zomi SDA pawlpi a it takpi pawlpi mi te a khemkhem khin hi ta mawk ungh.

7.      2005 GC session ah nong sam kei uh aa Myanmar Adventist Conference pan delegate khat zongh nong kihel sak kei uh hi. A sawt lo iin June 23 pan July 3, 2010 sung aa General Conference Session a om kik ding hi leuleu ta hi. Lei tung bup aa Division te, Union Conference te, Mission te pan GC Session ah a sawt lo iin delegate a pai ngeingai ding hi ta hi. Tu dong ciang ko ii Myanmar Adventist Conference te kiang ah thuzak sakna khat zongh nong nei nai kei uh aa GC session ah sapna a ngah nai lo peen ko ii phuat tawm conference bek ahi hi.

8.      Ko peen Conference cih mawkmawk hi lo iin Myanmar Union Conference of Seventh-day Adventists bangh a kici thei zel phial mawk hi ungh. Tua ahihmanin ko Myanmar Adventist Conference pan delegate banghzah hong sam ding na hi uh hiam? Bang hang iin ko, Myanmar Adventist Conference te, kiang ah delegate vai khat vei zongh hong za sak nai lo tuan nahi uh hiam?

9.      Myanmar Union leh Upper Myanmar Mission khut nuai ah a ut lo bek hi ungh aa General Conference kipawlna nuai ah Conference khat iin no tawh a kizom nuam hi ungh. Hi bang ka kalsuan zia uh tawh Conference maan iin saan theih nading lam eth om laai mah hiam or saan theih ngei peuhmah loh ding te ka hi uh hiam?

10.  Bangh hang iin "Union, Division, leh GC te tawh  ki-ak gual khen" mawk aa bang hang iin General Conference in ko conference a kici hi zaw napi ungh ko tawh kizom zaw lo iin “Conference gaal ahi Union administration committee” (Thang Siangh, February 26, 2010) te tawh kizom zaw mawk na hi uh hiam?

11.  Ko ngaihsutna ah ko peen Conference a kici hi aa General Conference tawh ka pawl min uh  kinai zaw, conference tuaktuak a ki ci keei hi ungh aa leitung bup General Conference of Seventh-day Adventist Church in legal conference nong piak theih ngei kei mawk uh leh SDA pawlpi’ ngeina bang iin SDA pawlpi’ neihsa ka na laksak sa te uh ahi, McNeilus building, a dangdang sang inn te, biak inn te leh van dang dang te ka na app kik uh kul mawk ding hi.

12.  Hehpihna tawh tu aa a hong tung ding June 23-July 3, 2010 aa Generence Conference Session sung ah Kawlgam aa Myanmar Adventist Conference in Conference maan recognition ka ngah theih nading un GC Session AGENDA sung ah hong guan sak hamtang unla ka kalsuan zia ding uh lam maan hong hilh un. A zenzen iin ko conference a kici te a khial pipi mah maan a kisa takpi kha pong bek, ko mah a khial zaw, kahih khak uh leh ih pawlpi a langdo do kha hi mawk ding bek tham loh iin thumaan a deih, ih Working Policy bang a zui nuam hi ungh aa midang a zui lo kha a om ciang in zongh a saang thei vet lo te kahihmanun General Conference ii Working Policy leh Church Manual tawh a kituak iin hoih tak ka kalsuan zia ding uh hong hilh hong gen pah un. General Conference in nong gen bangbang uh phun lo pau lo iin hong zui pah ding hi ungh.
ci iin hoih tak va suut ngelhngelh lengg General Conference ah thoihman aa diktansakna (naa-lee-hmuh) lut saam lo ding ahihteh lammaan hong hilh ding aa ih zuih nak leh kilemna hong om pah ding hi ci in ken ngaihsun ingh.

Conference deih ci ci iin “GC tawh kizop theih nang lampi a om mateng lungduaitak leh lungsim siangtakin i ngak ding” (Thang Siangh, February 26, 2010) hi ci pong iin computer mai ah tu iin ZomiSDA leh ZAC net sung ah Conference deihna ih gengen hang iin General Conference ah va pai iin ngen ngei peuhmah kei lengg ‘huih lak aa kumpi inn lam’ bang bek ding hangh aa ih pawlpi mi te a khemkhem bek hi mawk ding hi hangh.

January 6, 1987 kum iin Working Policy tawh kituak iin Conference ih nget hang iin Division leh Union in hong pia nai lo uh hi. Pr. Sandy Dee in Upper Myanmar President hong sep 1992-1993 sung 1992 year-end iin Union ah nget na khat a kibawl kik sim loh 1987 kum khit zawh khat vei zongh kingen kik nai lo hi. Conference a deih mahmah Mission President a sem ngei Sia Thang Siangh (1990-1991) leh Sia Kham Khen (1997-2002) te in lah President panmunh a let sung un Pawlpi nasep tawh manlah lua ahi ding uh hiam, Union leh Division te tung ah kam iin a hi aa, lai tawh ahizongh'n Conference nget ding naphawk kha ngei lo uh aa conference ngetna leh dawpna lai te khat vei zongh gelh kha lo uh hinapi iin kitelkikna ah President a ngah kik loh uhteh or ih deih sak makai khat peuh in President panmunh hong ngah kik loh uh teh Conference ih deih lam phawk kik pan kha pahpah zel hi hangh. A beisa hun te ki lakik thei lo aa tu’n a sep huai lampi khat bek a om laai sun sem lo iin ih om leh Conference maan deih takpi hi lo iin panmunh leh za deihna hang bek takpi ihih lam hong kilangh ding hi.

Tua ahihmanin hi bang aa vai thupi a va gen a va vaan ding peen thugen siam mahmah, mi tampi in ih muan mahmah, Conference a deih mahmah, Zomi ading a deihsak mahmah, Upper Myanmar Mission aa President a sem ngei, Union aa Director a sem ngei, Sia Thang Siangh mah va makai iin hoih tak iin paulap leh kisik a om het lo ding iin tu tungtaang buang thu va sung ngelhngelh leh a maan lo aa a hong kibawlna a om leh a om te hong siiang sak zo tham ding iin muanhuai sa ingh. Tua ban ah Sia Siangh in Myanmar Union Mission sung ah Personal Ministries a let laai aa Division aa a pu luui Dr. Jonathan Kuntaraf peen General Conference ah Sabbath School leh Personal Ministries Director hi laailaai, US visa lak kul selo aa pai ziau thei, motor tawh a hi aa vanleeng tawh ahizongh’n va pai leh a tung pah ding hi samm ahihmanin Pu Sangchia in Kawlgam aa ZomiSDA pawlpi mi te a hong it man iin sum leh paai tampi bei iin a va pai mah bang iin khat khat te’n “Zomi Adventist Conference buppi te PA” a cih Sia Siangh in Washington D.C, General Conference Headquarter ah Conference maan a hong nget sak zo phial ding iin lamen mahmah hangh. Tu aa ih buaina vai teng leh ih lunggulh conference status maan vai teng hoih tak iin Zomi SDA te tang ding iin va gensak hi leh Union, Division, leh GC te kiang ah Conference maan deihna leh ngetna tawh kisai aa Zomi SDA te ading aa a sep khiat masak peenna lah hipah ding ahihmanin Sia Siangh a hong kipiak khiat zawh ding lamen mahmah hangh. Tua hi leh lam khial conference pan aa lammaan Conference a vaihawm zo, “Zomi Adventist Conference buppi te PA” simh taak tuam ding hi.

Zomi Advenist a kua mapeuh tung ah a maan khen tel theihna, ciimna, leh thumaan lunggulh takpi na Topa' Khasiangtho in hong pia suk takpi hen la, Topa Khasiangtho in na ngaihsutna tek uh hong makaih ciat ta hen.

Itna leh deihsakna takpi tawh,



Mungno Gualnam

Riverside, California