KAWLGAM MISSIONARY

Homalin ah

1976-kumin Homalin katungto uh hi. Gun gei tembaw khawlna khua hi-a Kalewa panin tuitawm laitak tawh kituak ahihmanin, ni-7 tembaw tungah kagiak uh hi. Kalewa katun ni-un katapa nihna Thangsan kha-6 hong cing hi. Kalawmnu lah vitamine kisamin kaulikliak hi. Mitnai siak puatpuat in Homalin kazing tun uh hi. 

Sia Thangpu innsapna ah kinga photin khakhat phial katengkhawm uh hi. Sia Thangpu pen, thugen siamlo hi. Lasa le-zong aklui khuangcil bangin kiki-ik zangzang khong hi. Ahih hangin uliante sawlna nial ngeilo hi. Homalin missionary ding kisam a, kuamah mipil misiam painuam omlo thong hi. Sia Thangpu kipaisak hi. Kum bangzah hiam khat komai-ah na omkhin hi. Pasian nasepna sungah mipil misiamte mah bangin zakhang mahmah hi. Tavuan kisuan khempeuh thatang siitlo-in sem hi.

 Amau bel Homalin inntekta uh ahih ciangin nathau-in ang kiukiau uh hi. Ka omsung uh an ka tuamhuan uh hi. A minkhit ciangin kikumin kane khawm veve uh hi. Khalamah sanggam hisi, silehsa tawh unau kahihman un sanggam dangte sangin kikholhna nuamzaw hi. 

Ko pen kasum teng uh lamsaapin bei hi. Kakhasum lah service-junior lua kahihmanun tawm si hi. Mehlim cih khawng ngaihsut navet omlo hi. Phongpin manta puang kingkeng naungek-lutang ciacia pha a, lim mawhlo hi. Tawmman ahihmanin tuate bebek kabawl uh hi. 

Belhding omlo

Misionary kici liang napi Mission panin Mission Quarter ding bangmah kigeello hi. A omsung khempeuh innsap sak hi. Bangbang igen zongin ei Kawlgam pen gamdangte tawh idea kikhailua hi.

Biakinn lamding aa kigel pen singmal tangkhat zong kikhol nailo hi. Biakinnmun dingin Budhist Phongyi huang tawh kimaingat leitang khat nalei hi. Omnang kineilo ahihmanin ta-ngek nih tawh inn omlopi singbul khat beelin ka kikhin mai uh hi.Kawlsing kungnih kikalah guatawn khungin biphuah pai-in anuai-ah kalum uh hi. Zansimin kabil sung vuah miksi lutin naupangte kapzakzak tawntung hi. Apumpi-in miksi pehin san zia hi. Ui vakthapte in beel hong tawntung a kabeng thapai uh hi. Tua khawngpen gentham hong hilo hi.

Khuapiguah leh Huihpi nuai-ah

Khuapi guah hong zudihdih hi. Singkungte in a kim-apam vaatin pakzuazua hi. Leimaitang aa om singthem suangthem khempeuh semkek hi. Kawlsingkung leh singbul nekbekbakin puantawh ka kitungkhuh uh hi. Naungeek sisen lai, Muangpi kumnih hipan, aakpi in atate a op bangin atungah opin  puantawh kadal uh hi. Kawl innvengte in tuipuan tawh hong delh uh hi. Inn kilam manlo ahihmanin nihvei vilvel kathuak uh hi.

"Kabiak Pasian nang koi-ah om, Na tate " cihleh kekkia a, zomtheilo-in ka om hi.

Innlam ding hong khaktan

Sia Thangpute lah painuam ta. Mission innlam nang sum amakep ahihmanin hong zawhpih nuam si. A khuam dingin luisung singnip  mam pepate aatsakin ahinglai mahin kaphut mengmeng uh hi. Khathum zong phalo-in kasingte uh ngetin ne, sing-aat nasemte Sentau gei om bangin ciak ziahziah tawntung hi.

Phongyi sayadaw in hong khia cih za kahihman un, nawhtakin kasem uh hi. Sual kaphah khit uh ciangin inntung khuh nailo-in sualtung-ah katengto uh hi.

Myone Council in hong khamna-lai hongpia takpi hi. Mah-Sah-Lah Party ah thuumna lai ka khia uh hi. Party leh Council pen naseemkhawm kumpi khat himawk a, ci-in lungmuanglo-in Central ah copy kapia uh hi. Kei hong khianuam hinapi keimin theilo ahihmanin, Sia Thangpu mintawh khia uh hi. Thuzawh mateng Sia Thangpu in Homalin nusia thei lo hi. Tua hikeileh hong paisan ding a, keiguak haksa mahmah ding hi. Thu omzia khempeuh Pasian ompihna hong kilang tawntung hi. 

Thu khempeuh kisaatmitta

Council Okatha U Cho pen kitawpsak hi. Galkapbu khat hong puak hi. Tua pan nasiatakin Budhist leh Christian kikal buaina a omloh nangin, Christian pastor teng hong kaikhawm a, kei chairmanin hong koih hi. Kumpi nasemte bangmahin licence hong vaihawmsak hi. Mikhat antang pi-4, sathau tickle-40, suaivua satpia tawnnih, ci, be, khasimin hong thohsak ngiatngiat hi. Sanggam Kuki te bang lungdam lua uh hi. "Awi-zapu, ka kipah e" ci-in hong hopih zel uh hi.

Council zakiapa tawh kiveng sawnsawn kahihman un, lampi-ah ka kituakmun mahmah uh hi. Kikihta tuak maw, kimudah tuak maw, furlong khat kigamla bang khut kilapsanin  thusiamtakin ka kiho uh hi. Khatveivei kituakbakin kapau uh kituak lanlan thei hi. Kingak tuakin hunttanteh ci-in kiho kik le-ung kituak luatluat zel hi. Mikhempeuh Budhist ahih ciangin, thu izawh hang kisuan giauguau-in om tawntung hi.

Mission Center Hongding

Mite pen primitive{Khangto nailolua] lua ahihman leh transportation kici gamtat theih nang omlo hi. Nasep dan ding, bangtawh pan ding cih kitheilo hi. Mission siapite lah a olna munteng bekmah zinzin uh hi.  Tua teng ngaihsunin Naga minamte lak phut nang kageel masa nuam hi. 

Khamti ah tembaw khawlna munnih om hi. Khatpen Naga mualtung paina hi a, a khatpen khuapi tunna ahi hi. Senti kici hi. Nagate sumthalawh a tangguakin  tu zihziah hi. Mission Quater khat phuh kisawm hi. Transportation ding sakol piak ding kingaihsun hi. Nuntakkhop nading khasum banah Aid piak ding kigeel hi. Kei haksaatna teng sihsanin a kisam teng kigeel hi. Kohunlai bangin keugaw-in koih kasawm kei hi.

Kuapuak ding

Kua paisak leng hoihpen ding hiam? ci-in section meetingah kikupna kinei hi. Union personal pen U Ba Hla Thein leh U Ba Khin[Douglas] ahi hi. Missionary nasep pen, a kipumpiakzo, nupakop aa naseem thei kideih hi. Tualaitakin khangno lam muanluat ding omlo hi. Sia Pauno pen thukhual mipawlsiam hi. Nasep hahkat hi. Sianu pen guitar tumthei, la nangawn phuak thei naupang pantah dingin hoih mahmah hi. Tua tungkan omlo ding hi, kici ciat hi. Tua dingin Ordaination nangawn kipia khol zen hi.

1990 kum-in Laungkyinnakung khua dong kapha uh hi. Tua lai-ah Sia Mungno, Sia Thankhum, Sia Ngeekta leh kei kahi uh hi. Khamti Senti ah kikoihleh Central tawh kikawmna olpen ding ngimna ahi hi. Homalin siapa tawh koptawntung thei ding kingim hi.

Mission Pute leh Pasiangam zaina

Muang aa Committee teel pen Sia Pauno gawtnuam danin kila lian mawk hi. Union kawi-in a paiding phallo hi. Union officer ten a aw-u honglaih hi. Union sponsor tawh Sia Pauno Myangmya kahkik hi. A zi in zuilo hi. Innkuan buaina lianpi hong tung hi. A sawtna-ah Sia Khan Tin Zam Vung hamphatna bang si. Pawlkhat in sianu mawhsak uh hi. Ama mawhna omlo hi. Tua bang haksatna tuak thei dingmah ahi hi.

Tun zong gamthakphutna leh soulwinning tawh kisai Union Adm nasep khempeuh en leng agawinop teng, field puak uh. Angawl phialphialin koih uh. MUC in gamthak phulna pen migawina aa ih suahsak loh nangin kong thuum hi. Union mission sungaa tui kiphum sazian khempeuh, 90% pen member tate ngentang ahi hi. None-adventist sungpan 10% zong hinawnlo ding hi.

Organization ih omna pen Pasiangam zai nang leh, khamangtang zong ding bekaa ding ih hi, cihpen MUC in, khahsuah ngeilo ding hi.

Mahlone

Mahlone pen Homalin pan tai-16 kigamla hi. Gunkuang leh cycle zangin kikawm tawntung hi. U Gin Do Lian [Anlang] Shan zi nei-in na om hi. U Vansiama galkap pensen khat Shan zi nei mah na-om uh hi. Homalin panin tai-38 na ah Nangdaw kici khua-ah Pu Thanzinga Shan zi mahtawh na om uh hi. Shan Bama lakah kilutzo vetlo ahihmanin amau teng mah Sia Thangpu in nadelh vangvang hi. Keizong tua tengmah.

Pu Vansiama pen SDA hilo napi eimi gimnam tawmlua ahihmanin sanggam bangmahin ki-om hi. "Budhist lakah thugen leng a piang tam, nadong in," kacihleh nadong hi. Keilah Kawlkam nall khollo kawmkalah "Parih tawh a gen thei diam" peuh naci sawnsawn uh hi. Nuambuang dahbuangin maikhing dekdakin Lantern Projector zangin kapai uleh, putek pitek dongin [Phongyi Hall] ah nadim khin uh hi.

Pu Van Siama leh Pu Thanzinga in limlahna ding meipi vak uh hi. Katun phetin, Phongyi-Siadaw te bangin mipi mai-ah sabuai phahin Phungyi tenkan khattawh nakhuh uh hi. Khephek aa tut ding hinapi tu theilo-in khedawn peivangvangin amongah katu hi.

Kala-mangkamsiamlote pau bangin siiknei luapluapin Kawlpau tawh kagen theih bangin kegen hi. Budhist thu-um mite hoihna tampi kagen hi. Christian hoihna pen Leitung vantung Abawlpa bia ahihna tawm bek kagen hi. Siapa kadawhna ci-in zingsang khuavak ciangin, Pu Vansiam inn nuai-ah nahtangkai, ak hensa-in, antang, be, sathau nakoih neunau uh hi.

Gunkuang saapin kaciah hi. Kuamah Christian suah ding agen omlo hi. " Christian zong hoih, biak ding hi," ci uh hi. Amau pasian dangte tawh biakkhop dingin hoihsa veve uh hi. Pu Thanzinga pen Sia Thangpu in naphum hi. Sabbath simin Nangdaw pan hong paizel hi.

Mi-4 tuiphumna

U Do Sian Dam pen Khamti panin Homalin ah hong kikhin hi. Pasianthu kikumin hong sangthei ahihmanin kanuam mahmah hi. Amah pen sumzongmi hi-a, kikholhpih lawmlehgual hau mahmah hi, A ompih khempeuh tungah teti pangin, eimi lakteng hong lokzo hi.

Lahe Ohsu lai-aat Sia Khual zong Homalin hong tunlaitak ahi hi. Naga-tapung ten a khetul kapliam a, omngam nawnlo hi. Homalin hong taisuk hi. Damno innmah tung hi. Laisiangtho  hong sinpah tingteng hi.  Pu Vansiama, Pa Do Sian Dam, Nu Thual Ngaih Ning, Sia Khual, mi-4 Pastor Rualchinna in tuiphumna hong piaksak hi.

Tua khit a sawlo-in Sia Khual in Myaungmya Laisiangtho saang hong kahsan a, kalungneu mahmah uh hi.  Sia Khual kacihpen Sia Kai Khan Khual ahi hi. Pr Malsawma tawh Conference support teng hawlkhia ding aa hong pai, ameelhoih athacing angaih huai mahmah pen ahi hi. Tua bek hilo-in Sanpya Clinic Manager semngei a, tun Mission Secratery in om hihtuak hi. Conference makaite khiatna sumbei teng lohna dingin, Sanpya Clinic a zuak dingin M ten tavuanpia cihzong kagalzak hi. Sia Khual kacihcih pen sanggam laizom zah aa ka-it ahi hi. Midangsa kha kei un.

Dahna leh haksatna

Eimi inn-7 kapha uh hi.Tembaw naseem sia Khai Kap Thang leh azi Cing Khaw Lian inn bulphuhin Laisiangtho kikumin kamanlah mahmah uh hi.  Khamti aa Sitni Suan Khan Dong zong hong pai zel hi.

Khat veivei Sitnipa tawh kinial le-ung khua hong vak thei hi. 

Aheh hiding hiam, thuman telnuam lua hiding hiam, " asawtlo-in kihilna khatpeuh hong omhen," cihzah dongtawh kakhawl uh hi. Nithum kihal lo-in ka kikupna uh, inn hong kaang hi. Kei hong nialna dingaa , Sia Thawnneu, Sia Kai Khaw Thawn { Kuki Baptist Secratery} Baptist Bible Commetary khat a kawmpen, kaangtum dikdek hi. Tua thu tawh kisai Kawlgam kaciahlai-in hong genpihlai hi.

Damno tangek in hong nusiatna

Tua laitakin Damno zi Nu Thual Ngaih Ning nausuak a, naungeek damlo-in hong si hi. Eimi khatzong hong dak kikeuhlo hi. Ei Zomite tuhun bangin ki-uapna kisiam nailo hi. Tualai aa omte pen kumpi naseem mitkeuh zawdeuh dingaa kilawm ngentang ahi uh hi. 

Ken Laisiangthobu tawi-in, lawmnu'n naungeksi pua-in kanung hong zui hi. Damno in a khul tawh nading tupeek khat hong liangpuak hi. Damnote leitang awng huangsungah kaphuum uh hi. Thawhkikni ngakin Homalin leitangh tuni dong om hi.

Pu Vansiama in hong nusia

Damnote a innkuanin Mandalay lamah va kikhin uh hi. Pu Vansiama pen Mizogamah sanggamte vehin vapai hi. Hong ciah ciangin gilpi cancer tawh hong si hi. Mahlone ah Christian thuzui kici amah leh Gin Do Lian bek ahi hi. kasigui pih ding omlo hi. [Budhist Gawpakah] kici Biakna upa tengin hong sam hi. "Dah ken, ko hong guisak ding hi ungh. Budhist ngeina tawh kigui ding hi. Nang, a hankhukah singlamteh naphuhnopleh zong khuanungphuh lel in," hong ci uh hi. Hoihtakin Budhist ngeina tawh, khuangtawh zam tawh, kigui ngekngek hi.

Organization Church

Organization Church kici khat bek omlo hi. Company aa kiciamteh zong omlo hi. Seventh-day Adventist  Signboard khatvei zong mukha lo uh hi. [Three Angels ' Message] Lungdamnathu hang aa tui kiphum leh thungetna tawh kiciamteh, Vantung Pawlpi in direct aa akep misiangtho thum in Zeisu hong paikik ngakin  om uh hi. Khat Nangdaw ah om hi. Khat Mahlone ah om hi. Khat Homalin ah om hi.

Signboard nuai aa khangkhia thokik a ommah bangin, SDA signboard mungeilote zong hong tho om ding uh hi.  Organization in vantunggam guarranty pia theilo hi. Hih Pasian tate in Vantungmi thum tangkona khauhtakin len uh hi. Amau sihtangin Zeisu na kikham khin zo a, sihna panin gualzo takin hong tho ding uh hi.

Written by Pr. Thangsiangh