GSM leh CDMA

GSM leh CDMA te cell phone vai kikup beh pong lengg:

GSM: Hih GSM te ii system peen a tam zaw iin European gam leh Asia gam ah kizangh pha diak hi. USA ah zongh kinak zat mahmah veve hi. US ah GSM system a zangh te peen AT&T/Cingular, Tmobile, leh a hong piang thakthak company neuneu dang te in zangh pha diak uh hi.
Hih GSM te aa peen kei bang hoih sa zaw ingh. Banghang cih leh SIM card zangh ahihmanin na cell phone ngiat a siat hang cell phone dang khat peuh ah na SIM thun ziau le cin kizangh thei pah lel hi. Khat veivei ciang bel main company ah lock and unlock a kisap hun zongh bel om hi. Tua ban ah gentehna iin USA bang ah family plan ci iin innkuan kim aa cell phone ih neih ciang iin kum 1 or kum 2 khit teh a thak kingah kik aa a luui te hoih mahmah laai na pi a thak kizangh zaw hi. Tua leh ih phone te khat peuh hong siat vat khak leh a SIM card la khia iin cell phone luui khat sung ah thun ziau leng kizangh thei pah ziau iin SIM card kizangh kawikawi thei ahihmanin hoih sa zaw ingh. Ahoih loh na ah cell phone mang or kigu cih mah om thei ahihmanin guta tam na mun ah GSM/SIM card system peen lau huai zaw hi. Ahang peen na phone a mu peuh in la iin ama sim card thun ziau leh phone hoih mahmah khat a ngah suak thei ahihmanin cell phone kep siam kul hi.

CDMA: Hih te peen USA bang ah company lian ahi Sprint/Nextel leh Verizon te in zangh pha diak hi. Hih te peen a hoihna ah na mangsak zongh’n or na cell phone a hong kigu zongh’n amau ut bang iin zang gawp thei lo zaw uh hi. Na mansak na muh kik kei leh zongh na service provider te kiang ah service block sak pah le cin a mu te or a gu te in zangh thei tuan lo ahihmanin na phone sung aa information te a guk aa a zat theih leh cih lo buang na cell phone a zat nop man iin hong gu thei lo ding hi. Banghang cih leh na cell phone peen service provider te kiang ah a register masiah zangh thei lo hi.

Kei bang ka cell phone masa peen T mobile te hi aa GSM system zangh hi. Tu laai tak Sprint te zangh kahihmanin CDMA system hi. A nih iin hoih tuaktuak hi. GSM leh CDMA peen a thu iin a kizat theihna dan a thu iin a kibang hi aa a gamla huam leh huam lo cih peen na omna, na tenna gam, leh lei ah service provider te in antenna, satellite reception tower, bang zah koih zo, kinai maw kigamla, cih tawh kisai ding hi. Tua hi aa a mun a mual a gam tawh kizai iin service provider te iin reception tower a koih zawh na uh tawh kituak iin GSM leh CDMA nam te peen a munmun a gamgam zui iin khat hoih zaw or sia zaw or kibang lel ding hi. Kawlgam leh a diakdiak iin Asia gam te ah GSM in market share lianpi ngah zaw uh ahihmanin reception tower leh satellite kizopna kician nei khin kha ding uh ahihman in CDMA sang iin hoih zaw kha ding hi. Tua ban ah gensa mah bang iin GSM phone te in SIM card zangh ahihmanin a man kibang veve, service or reception a hoih na kibang veve bang a lei ding a zang ding te in Kawlgam pha diak ah CDMA sang in GSM te lei huai zaw mai thei iin um ingh.

GSM ah a SIM card neu dildel peen a kiregister pipeen khat suak iin kizangh kawikawi thei hi. CDMA te peen a cell phone bup a kiregister dan ahihmanin kizangh kawikawi ziauziau thei lo zaw deuh hi.

Kikup khawm nop man pong hi. Gen khialh a om leh hong puah beh sak un.

Mungno Gualnam