Monday, November 30, 2015

Khawkpi 6 (Azom) : Kitheihna Bek Sianthosakna Lim Hi Kei




Kitheihna Bek Sianthosakna Lim Hi Kei

 

            Lungdam theihna, a hih kei leh lungdam lohna cihte pen sianthosakna a ngah leh a ngah lo a kitheihna hi lo hi. Sianthona ngah paksai cih om thei lo hi. Sianthona taktak pen nisim nasep hi-a, nuntak laitenga zop suak ding a hihi. Nisimin zia-etnate do-a, mawh nopna lungsimte zo zela, lungsim leh pumpi sianthona ding a hanciamte in, siangtho khin ta'ng ci-in kisial ngei lo hi. Amaute in diktatna lunggulh mahmah uh hi. Mawhna pen siahuai sa mahmah uh hi. SL, laimai 10.

            Ih mawhnate hangin Pasian in hong nusia pah lo hi. Khialhna nei-in A Kha zong ih dah sak kha thei ding hi. Kisikin, kisuantakna lungsim tawh Amah ih zuat ciangin Ama'n hong kiheisan lo hi. Ih hep khiat ding kol-awknate om hi. Ih lungsimte maan lo-in, kiphatsakna, kiliatsakna, lungtomna leh phunhatnate ih nei hi. Tuate khempeuh in Pasian tawh hong kikhen sak hi. Mawhnate ih pulaak kula, lungsim sungah hehpihna in na a thuk sep zawk kul hi. Thanema hat lo a kisate, Pasian' mi thahatte suak thei-a, Topa'a ding nasep thupi sem thei zaw hi. Amaute in panmun sang ah na sem ding uha, angsung ngaihsutna peuhmah nei lo ding uh hi.

            Kimkhatte in a hun ngakin, Ama thuphate a saan ma-un, kipuah pha a hihna uh Topa kisittel sak phot sawm uh hi. Ama thuphate tu mahmahin zong kingen thei hi. A zawngkhalna uh a huh dingin Khris' Kha a hi Ama hehpihna a ngah ding uh kisam hi. Tua lo-in Khristian zia leh tong nei zo lo ding uh hi. Ih hi bang lian - mawhna a dim a cimawh a guaksuakpi mahin Amah ih zuat ding Jesu in hong deih hi.

            Kisikna hi ta leh mawh mai sakna hi ta leh Khris' tung tawna Pasian' hong letsong a hihi. Mawh ih hih lam ih kiphawk leh mawh mai sakna kisam ih hih lam ih kitheihna pen Kha Siangtho' nasepna hang a hihi. Kisikna tawh lungsim kitam khamte longal kuamah in mawh mai sakna ngah lo hi. Kisikna lungsim a piang sak zong Pasian' hehpihna mah a hihi. Ih thanemna leh ih zawngkhalnate Ama'n hong theih piha' Ama'n hong huh ding hi. 2TT, laimai 91-94.

            Khuazing leh lungkhiatna ih tungah khat veivei hong tung dinga hong lungkham sak ding a hih hangin, ih muanna ih khah suah kei ding hi. Kitheihna ih nei-a ih nei kei a hi zongin Jesu ih mit suan gige ding ki sam hi. Sep ding mah hi cih ih theih khempeuh muan huai takin ih sem dinga, Pasian' kamciam muangin ih om ding hi.

            Ih ginat lohna ih kiphawk ciangin khat veivei patau gawp ngingei thei ih hih hangin tua pen ei' lamah Pasian hong kikhelna, ahih kei leh Pasian' lamah ei ih kikhelna lim hi tuan lo hi. Lungsim a hong phawng gawp thei ding khat peuh hih hamtang ding hi lo hi. Zan ni-a ih neih lungnopna leh lungdamna tu ni-in ih nei kei kha thei ding hi; a hi zongin upna tawh Khris' khut lenin, khawvak sung (nopsakna hun) a Amah ih muan mah bangin khawmial sung (dahna hun) ah zong ih muang ding hi.

            A gual zo mite'a dinga a kikoih lukhute upna tawh en in; kithata Pasian' a dinga eite a hong tan Tuuno manpha hi, manpha hi, cih tatsate' lapi ngai in. Tuate a taktak mah hi na cih theihna dingin hanciam in.

            Ih lungsim in Khris leh vantung khua a ngaihsut phat semsem ciangin Topa' galte ih do pihna ah tha leh pan pihna ih ngah zawsem ding hi. A sawt lo-a ih ten na ding a hi tua gam hoih zaw ih ngaihsut ciangin kiphatsakna leh leitung iplahna hong bei ding hi. Khris-a it huaina longal leitunga a iplah huai khempeuh a  mawkna hong suak ding hi.

            Rom thong inn sungah kikhuma, vantung khawvak leh huih kingah sak lo-in, gospel a tangkona kikhamin, thah dinga mawh sakna bek ngaka a om lai takin Paul in lunghianna leh lungkiatna nei tuan lo hi. Tua kulhbiing mial sung panin, a khang a khanga mi siangtho te leh upna hanga thahna thuakte' lungsim a khauk sak, upna leh hanna a dim sih kuan teci panna hong ging khia hi. Ama kammalte in hih laidalte sunga ih gengen sianthosakna hanga a kingah thaman hong gen hi:  "Biakna-a kilui dingin ka kiging zo hi. Ka pai ding hun hong tung ta hi. Galdona a pha ka do zo hi. Taina ding kung dongin ka tai zo hi. Upna thu ka zui zo hi. Tu-in dikna lukhu kei'a dingin kikoih zo-a, thumaan thukhenpa in tua ni ciangin kei a hong pia ding hi. Kei bek hi lo-in, Amah hong kilat ding a ngaklah khempeuh zong a hong pia ding hi. 2 Timothy 2:6-8. SL, laimai 89-96.

(zop lai ding)


Monday, November 23, 2015

Zo Phualva Thupuak - Volume 05, Issue 24




A Sung aa Om Thute:
SABBATH NI ADEIHNA
Inn-ngak Nupi Pawlkhat A'ding
CIDAMNA THU
Gawnza
Kal Natna Neite
Naptui Bukvei Natna
Nu-le-Pa Lungmuanna Sanginn
Nu-le-Pa Phawksakna
THU ZAKSAKNA
Pawl Lutna
ZSM / CDK
Maranatha Labu
Laibu Neu Athak Nih
Lungdam Kohna
Church Address

SABBATH NI ADEIHNATE

 Sabbath ni hong tun ciangin, eite in nasepna pan tawlngak pelmawh dingin ih nei hi. Pasian in ei thu-um mite adingin hong piak hih Sabbath ni pen a nuai aa bangin Topa hong deihsakna thu thukpite theih beh leng Sabbathni tawlngakna in ih taksa a'ding leh kha a'ding in man-nei zawl lai-in ka lamen hi. Sabbath in lamdanna lianpi leh khalam ah khiatna thukpi nei hi.

           1). Sabbath ni pen Piansakna Phawkna: Pasian in piangthak tate zuih ding ahong piak Thukham Sawm ah Sabbath ni athupina bulpi pen Pasian in a piansak nate phawkna ding ahi hi. (Pai 20:11). Sabbath pen "Pasian in leitung vantung a om na khempeuh a piansakna tawh kikhen thei lo bek thamlo in lei mihingte in zong amau kipiansakna phawkna dingin Pasian vangliatna in amaute tungah hong kilatna ahi hi." Tua ahih manin Sabbath pen Pasian hong piak ni manpha a piansakna phawkna ni ahi hi. Pasian ih biakna in Amah piangsakpa cihna ahih mah bangin, Sabbath ni zong ciaptehna leh piansakna phawkna ahi hi. Eite in suahni (birthday) ih bawl mah bangin Sabbath ni pen leitung vantung leh a sunga om khempeuh suahni (birthday) ahi hi.


2). Sabbath ni Eite Tatkhiatna Lim: Pasian in Israel mite Egypt sal panin a suahtak sak khit ciangin, Sabbath ni, Pasian' piansakna phawkna ni pen suahtakna phawkna ni zong hong suak pah hi (Thuhilhkikna 5:15). Pasian in nipikaal Sabbath ama deihna banga atangte Isrealte bang in suakta sak nuam hi. Tulai mite kisap in sila tuamtuam ahi, huaihamna, thuneih nopna, liangko kikimlohna, mawhna tuamtuam leh angsung khualna panin suahtak ding ih kisam hi.


Sabbath ni pen "Eite mawhna gamtatna leh mawhna kol panin Emmanuel makaihna tawh ih paisanna phawkna ahi hi. Eite' puak ih vangik-pen in 'thuman lohna' ahi hi. Sabbath tawlngakna in Khazih han sungah a tawlngakna, mawhna tunga gualzawhna phawkna tawlngakna, Khazih ih san theihna ding hun hoih leh Ama'n ih mawhna hong maisakna, kilemna leh tawlngakna akawk ahi hi."


3). Sabbath ni Eite hong Siangtho sakna Lim: Sabbath ni pen Pasian' vangliatna kilatna, a sianthona or hong siangtho sakna lim ahi hi. Topa in "Keima Sabbath ni in note na tawlnga ding uh hi. Bang hang hiam cihleh hih pen Topa ahi keimah in note hong siangthosakpa ka hihna natheih nadingun na khang tawntung un keimah leh note kikal ah lim khat hiding hi" (Paikhiatna 31:13, Ezekiel 20:20). Tua ahih manin Sabbath ni pen Pasian in eite hong siangthosakpa a hihna lim ahi hi. Eite Zeisu' sisan in hongsiangtho sak (Hebrews 13:12) mah bang in, Sabbath ni zong Pasian umte Zeisu' sisan hanga mawhmaina ih ngahna lim ahi hi. Siangthona in Pasian tawh ki lawmtatna leh amah tawh pumkhat ih hihna ih nuntakzia tawh lahna ahi hi.
4). Pasian tung ah Cihtakna Lahna Lim: Adam leh Eve te Pasian tunga cihtakna pen Eden huan laizang a apo sia-le- pha khentheihna singgah tawh a ki ze-et mah bangin, mi khempeuh zong Pasian in thukham sawm a laizang a ki-at ahi Sabbath ni siangtho sakna tawh hong sit ahi hi. Lai Siangtho in, 'Ni tawpni ciangin mi nam nih in kikhen dinga, Pasian tunga citak muanhuai "Pasian thupiak zui a Zeisu a umte" leh Sapi leh alim abiate om ding hi (Mang 14:12). Tua hun ciangin Pasian' thuman hong kilang dinga, Pasian um taktakte in a upna uh leh Pasian tung a cihtakna pen Sabbath ni tanna tawh lak ding uh hi.


5). Kilawmtatna Hun: Pasian in ganhingte mihingte' lawm ding piangsak in (Pian 1:24, 25), tua sanga kilawmtatna hoihzaw Pasian in mihing masa Adam leh Eve tungah na pia hi (Pian2:18-25). Tua mah bangin Pasian in Sabbath ni-in Amah leh mihingte a' dingin a sangpen ki lawmtatna na nei hi. Sabbath ni hong tun ciangin tua Sabbath in eite lametna, lungdamna leh thathak hong puak in, tua ni pen eite in Pasian biakna, thungetna lasakna, Pasian thu sinkhopna leh lungngaih khopna, Pasian' itna tangko khiatna in zat ding Ama'n deih hi.


6). Eite Upna hang in Midik suahna Lim: Sabbath tanna tawh thu-um mite in midik suah a kisawm hilo zaw in Khazih, Piangsakpa leh hong tanpa tawh a kizop khit manun tua Sabbath ni atang hizaw hi (Rom 2: 14-16). Sabbath a tanna uh pen amaute mawhna kol pan suahtakna leh Khazih tungtung tawn in Diktanna a ngahna lahna hizaw hi. Sabbath tanna in "Eite mithak a hong bawl Khazih, hong Bawlpa leh hong Honpa thupitna kilangsak hi. Tua in a ni maan tanna leh upna hang bek tawh diktanna mann hong piang sak hi.

7). Khazih sung a Tawlngakna Lim: Sabbath ni pen Isreal te adingin Canaan gam ah tawlngak nading Egypt gam pan suaktakna, leh agam kiimlehpaamte ukna lak pan suaktakna lim ahih mah bangin (Thuhkn 5:15), eite leitung mawhna pan suakta in Pasian sung ah tawlngakna lim zong ahi hi. Pasian in Ama sungah tawlnga dingin hong sam a, "Pasian in a nasepna pan akhawl bangin, amaute a nasepna pan tawlnga ding hi (Heb 4:10). Hih tawlngakna in khalam tawlngakna, ih mimal nasepna pan tawlnga, mawhna bawlna pan khawlna ahi hi. Pasian in a tate Sabbath ni tawlnga dingin hongsam hi (Heb 4:9), tua Pasian tawlngakna ahi khalam tawlngakna ah upna tawh lut dinga, mawhna zong paisan in ama gupkhiatna dingin amah in thalawh ding hi. "Tuni" in Pasian tawlngakna sungah tawlngakna dingin hun hoih pen hi (Heb 4:7, 3:13).


Tua ahih manin, Sabbath ni in eite a'dingin lim thuk mahmah hong lak a, Pasian deihna bangin ama ni siangtho takin ih tan ciangin Amah hong piangsakpa' phawkna, eite hong tatkhiatna, eite hong siangtho sakna, eite Amah tungah ih cihtakna lahna, eite Amah tawh kilawmtatna, eite Ama hangin midik ih suahna, leh eite Ama sungah ih tawlngakna ahi hi. Sabbath ni hong bawlpa Pasian deihna bangin a zang thei tek dingin Topan thupha hong pia tahen.


A sim mimal khempeuh tungah Sabbath thupha leh tawldamna Topan hong pia kimciat ta hen. Amen.

?  Sia Daniel Mung Shoute

References:
-SDA Encyclopedia p. 1237.

-A.H Strong, Systemetic Theology, p.408

-Bachiocchi, Rest for Modern Man,p.15

-E.G White, Tesimonies, vol6, p.350.

-Andreasen, Sabbath, p.25,94, 105,


 


Sunday, November 8, 2015

Sangmaang Pr. & Mrs. Anderson te kiiang pan itna tongkhum VIDEO, June 13, 2015




1. Sangmaang Pr. Anderson te innkuan sung pan Zomi bup A itna tong khum video, June 13, 2015: https://vimeo.com/144627688

2. Sangmaang Pr. Anderson te innkuan tawh Zomi Adventist Innkuan kimuh khop masak, May 28, 2011:  https://vimeo.com/50467715 

3. Sangmaang Pr. Anderson te innkuan Zogam ah a nuntakna tangthu


Kong it Zomi a kua maciat,

Zaan iin Pr. Anderson in leitung nunna nusia ta iin Pasian gam a hong tun ni ding bek ngak iin om ta ahih thu, 11.00 p.m., Monday, November 2, 2015, iin a nuntakna hu nunung peen sang khia ahih thu hong pulaak zo hi.  

Zomi khangno khanghaam tampi tak leh a tam zaw te in thei kha lo ding nahihmanun Pr. Anderson meel a mu kha ngei lo te ading iin deihsakna tawh May 28, 2011 aa amah tawh ka kilaak khopna uh milim hong belh iin tu kum June 13, 2015, aa amau innkuan tawh ka kimuh khop nunung peen uh video tomno khat leh 2011 kum aa Zomi Innkuante tawh a kimuh khopna video te hong khak ingh. 

Ih it mahmah sangmaang pa in a hong nusiat man iin Zomi a kua mapeuh ading Pasian tawh kinai zawkna hong piiang ta hen. 

Thupuak,



Mungno Gualnam
Riverside, California
Phone (Cell) 951-403-8319
Phone (Office) 951-509-2370



From: mungno@hotmail.com
To: tongsan@googlegroups.com; zomi-adventist-com@googlegroups.com; zomisda@yahoogroups.com; leitungkhua@yahoogroups.com
Subject: Missionary Pr. A. E. Anderson ii husanh nunung, November 2, 2015
Date: Tue, 3 Nov 2015 23:12:40 -0800

Kong it Zomi a kua maciat,

Zogam leh Zomi te ading iin deihsakna tawh amau pianna leh khankhiatna gamnuam, California, USA (United States of America) nusia aa Pasian thumaan a hong taangko, Zogam khuano mun tuamtuam dong aa a zin kawikawi gamdang missionary ih neih laai sun, Pr. A. E. Anderson (Arthur Eugene Anderson) in zaan nitak, nai 11.00 p.m., Monday, November 2, 2015, iin a nunung peen a hu sang iin leitung nusia ta hi cih thu za kahihmanin dahna leh lunglenna tawh Zomi khempeuh tung ah hong zasak sawn ingh.

Ih Zogam ah missionary aa a hong pai Rev. Carlson te, Rev. Cope te in a hong sihsanna uh sawt mahmah khin ta hi.  Zogam leitang sik aa a innkuan vua Pasian nasem aa a hong pai te lak ah Pr. Anderson te innkuan bek a om laai uh hi aa tu iin Pr. A. E. Anderson in zongh hong sihsan ta hi mawk ahihmanin dah iin naa sa mahmah hangh.  Zogam ading deihsakna tawh a hong pai missionary khempeuh, pawlpi deidan om lo, ei Zomi te khempeuh ading iin a manpha mahmah hi uh aa tu iin Zomi te Pasian thu sung ah a hong lamto mi thupi mahmah khat a khahsuah leuleu ta ihihmanin dah mahmah hangh.

A luang hawm lei sung ah phum nading vai bel hawmna nei nai lo uh hi. Ahizongh'n Thanksgiving hun sung iin Pr. Anderson phawkna hun zat ding iin ngaihsun uh hi. A ni leh a hun lian ding gen thei nai lo uh hi.  Bangbang ahizongh'n tu laai tak aa a dah a kap, Mrs. Anderson leh a tate, a tute a kua mapeuh tung ah ih biak Topa Pasian in hong hehnep sak ta hen. 


Dahna tawh thupuak,



Mungno Gualnam
Riverside, California
Phone (Cell) 951-403-8319
Phone (Office) 951-509-2370

-

Missionary Pr. A. E. Anderson ii husanh nunung, November 2, 2015



 

Missionary Pr. A. E. Anderson ii husanh nunung, 11.00 p.m., Monday, November 2, 2015


Kong it Zomi a kua maciat,

Zogam leh Zomi te ading iin deihsakna tawh amau pianna leh khankhiatna gamnuam, California, USA (United States of America) nusia aa Pasian thumaan a hong taangko, Zogam khuano mun tuamtuam dong aa a zin kawikawi gamdang missionary ih neih laai sun, Pr. A. E. Anderson (Arthur Eugene Anderson) in zaan nitak, nai 11.00 p.m., Monday, November 2, 2015, iin a nunung peen a hu sang iin leitung nusia ta hi cih thu za kahihmanin dahna leh lunglenna tawh Zomi khempeuh tung ah hong zasak sawn ingh.

Ih Zogam ah missionary aa a hong pai Rev. Carlson te, Rev. Cope te in a hong sihsanna uh sawt mahmah khin ta hi.  Zogam leitang sik aa a innkuan vua Pasian nasem aa a hong pai te lak ah Pr. Anderson te innkuan bek a om laai uh hi aa tu iin Pr. A. E. Anderson in zongh hong sihsan ta hi mawk ahihmanin dah iin naa sa mahmah hangh.  Zogam ading deihsakna tawh a hong pai missionary khempeuh, pawlpi deidan om lo, ei Zomi te khempeuh ading iin a manpha mahmah hi uh aa tu iin Zomi te Pasian thu sung ah a hong lamto mi thupi mahmah khat a khahsuah leuleu ta ihihmanin dah mahmah hangh.

A luang hawm lei sung ah phum nading vai bel hawmna nei nai lo uh hi. Ahizongh'n Thanksgiving hun sung iin Pr. Anderson phawkna hun zat ding iin ngaihsun uh hi. A ni leh a hun lian ding gen thei nai lo uh hi.  Bangbang ahizongh'n tu laai tak aa a dah a kap, Mrs. Anderson leh a tate, a tute a kua mapeuh tung ah ih biak Topa Pasian in hong hehnep sak ta hen.

Dahna tawh thupuak,



Mungno Gualnam
Riverside, California
Phone (Cell) 951-403-8319
Phone (Office) 951-509-2370


Zo Phualva Thupuak - Volume 05, Issue 23




A Sung aa Om Thute:
KHA LEH CIHTAKNA TAWH PASIAN BIAKPIAKNA
DAH PIHNA
Zoliate A'ding Kha Damna Zatuikha Haikhat
CIDAMNA
Pumpi Nosuah Nading,
Gilpi Natna leh Sunghul Luate A' ding
THU ZAKSAKNA
Pawl Lutna
ZSM / CDK
Maranatha Labu Vai
Laibu Neu Athak Nih
Lungdam Kohna
Church Address


KHA LEH CIHTAKNA TAWH PASIAN BIAKPIAKNA

 

Lawmta tangval nih bawlungsuih uk tuak mahmah uh hi. Manchester leh Arsenal te final kimawlna en ding hong kiciam uh hi. Ahih hangin tua final ni pen Nipi (Sabbath) ni na hi mawk hi. A lawm khat in, 'Kei bel kikhawm kei ning in bawlungpuai en zaw mai ning' ci-in pai khia hi. A lawmpa khat zaw in bel 'Kei bel kikhawm zaw ning, pawlpi makai khat hi inga, ka kikhop loh phamawh ding hi' ci hi. Tua bangin a lawmta un khat bawlung suih en dingin pai khia a, khat zaw kikhawm dingin biakinn a pai hi. Bawlung suih en zaw-pa a lung nuam thei mahmah lo in, "Kei mawk Nipini ni-a bawllung suih en, ka lawmpa lah biakinn ah lungnuam takin Pasian na bia ding a" ci-in a lungsim biakinn bek ah om den mawk hi. A lawm biakinn pai pa zong ki ngaihsun in biakinn sungah om himah leh a lungsim pen bawlung kidemna ah om den in, "Aw! Ka lawmpan muh nop sa mahmah ding a, eng mah sing maw, kuan a zo zaw tam maw" ci-in a pumpi biakinn sungah om mah leh a lungsim ahih leh bawlung kidemna tualpi bek ah om mawk hi. Hihte lawmta, khat zaw a taksa bawlung kidemna bawlung tual ah om mah leh a lungsim biakinn bek ah om a, a lawmpa ahih leh biakinn ah a pumpi a om hangin a lungsim bawlung tual bekbek ah na om mawk hi.


Bangbang hita leh ih gen nop bulpi in tulai thu-um mi khangno, khangham tampite biakinn ah kikhawm mah leh, a lungsim a pua lam na tung vingveng thei hi. Mi tampi in biakinn sungah ih cell phone te, Ipod, Ipad te I phone te ih tawi hi. Tuate tawh biakinn ah Facebook, Whats App te leh Viber te ih zang ziahziah aa, lim hoihlo pipi na-ngawn ih en hi. Tua in biakinn ah ih pumpi a om hangin ih lungsim mundang ah om cihna ahi hi. Biakinn pualam a ih nasepte biakinn sungah a sem ih hi lel a, nidang a ih sep nate ih sepna mun a khel hilel hi. Kikhopna ah thugen pa in Pasian thu a tangko laitak in kideh sim in, khat vei leh phone te tawi in apua ah ih pai khia hi. Thu-um lo dawm bia, leh milim biate biakpiak nuntakna na-ngawn ih pha zo kei hi. Kamsang Jeremiah hun lai in Judah te in a biakinn sungah milim pasiante lutpih ahih manin Pasian lungsim nasak mah mah uh hi. Tua hangin, kamsang Jeremiah in khitui tawh a mite hih bang a gamtatna uh a khel na dingin na thuhilh hi. Tuhun ciangin, milim pasiante a taktak in biakinn sungah tumpih lo himah leng, ih Ipad te, ih cell phone te pen ih biakinn a ih tumpih milim pasian namkhat ahi thei mai diam? Biakinn ah tumpih ih hih leh zong ih kikhop lai liang in bel mitsak ngam leng bangzah in ahoih diam? Ih Pasian biakpiakna nuntakna pen tulai vanthak hoih nonote in hong valh tum toto ding hita hi. Pasian pen Kha hi a, amah a biate in Kha leh cihtakna tawh abia ding uh hi. Tua bang micitakte ih Pasian in zong den hi (John 4: 23, 24).


Mihing khat in a Pasian biakna ah a cihtak leh na khempeuh ah citak ding hi. Daniel leh a lawmte biakpiakna pen cihtakna tawh kidim hi. A nungta Pasian bia loin milim bawltawm mai a kun ding sangin meiphualpi a ki khiat ding teel zaw uh hi. Daniel zong a nisim biakpiakna hunte leh a ngeinate a kheel ding sangin humpi nelkai kua sunga ki khiat ding teel zaw hi. Tua bangin a biakpiakna uh citak mahmah ahih manin, meilipi sungah zong Pasian in ompih a, humpi nelkai kua ah zong na ompih hi. Biakpiakna (Worship) pen vana kidona a piangsakpen ahi hi. Worship in vangtung mi asiangtho na-ngawn a gilo dawi a suaksak ahi hi. Van kidona ah a thu buaipih leh a kinial bulpi in, kua bia ding ih hiam? Hong bawlpa Pasian maw? Lucifer? cih ahi hi. Hun nunung lam ciang zong hih thulu mah tawh Satan leh Zeisu a kidona ahang pen hih mah hong hiding hi. A nungta Pasian bia ding ie hiam? Ahih kei leh Satan (Sapi) bia ding ih hiam? Cih hiding hi. Tu a kipan in, ih mimal nuntaktakna leh biakpiakna ah a citak zolote in ni nunung ciangin hong bawlpa Pasian biak sangin Satan (Sapi ) bia dingin deihtelna hong bawl ding uh hi.


Nai tampi hun ih pia zo kei ta zongin, ni khat nai khat sung bekbek Pasian biakpiakna dingin na hun na zat leh tua ni bup sung hong tung ding haksatna panin Pasian in hong kem ding hi. Tua bang mah in nipi kaal khat ah nisim leh nibup in Pasian ih bia zokei zongin, ni sagih sungah ni khat bekbek cihtakna tawh a nungta Pasian biakpiakna na neih theih leh, tua kaal sung tawntung haksatna leh ze-etna thangg panin ih Topa in gualzawhna hong pia ding hi. Tua pen Pasian in eite ading Nipi ni hong piakna ahang ahi hi. Nipi ni hong tung kik a'ding aa kha lam antawkna ahi hi. Hih ni a biakpiakna citak takin ih zat aa, Pasian tawh ki lawmtatna na neih theih leh tua kaal sung tawntung Pasian Kha Siangtho in hong makaih ding hi. Tua ahih manin ih Pasian biakpiakna ah citak ni. Innkuan khempeuh in nisim ih innkuan biakpianate thaksuahsak kik ni. Topan thupha hong pia ta hen. Amen.

? Pastor PL Thlenga, Translated by Daniel Shoute

 

Zoliate Ading Kha Damna Zatuikha Haikhat

 Khat vei nungak pawl khat pen kikhopna biakinn sungah ataw leh a nawi uh kidawk dekdek akhuh zo phalo puante silhin hong kikhawm uh hi. Chairman in a maute atut sak khit ciangin a maute itna tawh en in a nuntak sung uh a amangngilh ngeiloh ding thu khat hilh hi. Nungakte mit ah en kawm in, "Nungakte aw Pasian in leitung ah van manphate pen abaih taka lak theih loh nadingin mun muanhuaina ah koih hi.

          1. Suangmanphate koi ah mu na hi uh hiam? Leinuai a thukna  mun ah kimu thei bek hi.

2. Tuikep suangte koi ah kimu hiam? Tuipi thuk atawngpen bek ah Pasian in koih hi.

3. Koi tak ah suai kimu hiam? Lei nuai suang kiphah tampi nuai ah koih in kito khia ding hileh zong thatang tampi bei in kingah zo pan hi" a cih khit ciangin a thugen zom lai in, "Tua bang mahin nungakte aw, na pumpi taksa pen siangtho tak, lamdang tak leh thupi takin hong kibawl hi. Tua pen suangmanpha, tuikep suang leh suai tampi sangin manpha zaw tham hi. Tua ahih manin note in hoihtak leh muanhuai takin na khuh cip dinguh kisam hi. Tua bangin na khuh uh leh, suangmanpha ato mi zahtak huai (tangval gamtat hoih) te hong pai dinga, a masa pen in kumpi (na innkuan) te kiangah phalna hong ngen masa pen dinga, tua panin ngeina leh thuciamnate (pawlpi ngeina siangtho kitenna) bawl in thukimna suai akaih khit uh ciangin na suangmanpha hong to khia pan ding uh hi. Ahih hangin, tua na manphate ki khuhcip lo in a kikoih khiat ciangin zahtak huailo mi mawkmawk (tangval zulhzau) te hong kipan ding hi. Tua mite in a van neih bangbang tawh hong tokhia dinga, man neilo mantawm mahmah in hong bawl ding bek tham loin, a hong to khiate na-ngawn in hong deih loh hun om ding hi. Tua ahih manin suangmanpha leh suai a to khia company minthangte lunglut sak nadingin na suangmanpha uh ahi na PUMPI TAKSA uh kicing takin khuh un" ci-in thuhilh hi.    


Hih thu pasalte in hoih ih sa mahmah kha ding hi, ahih hangin numei pawlkhatte leuleu lungdam khol lo kha ding hi. Hih thu pen thumann khat ahi hi. Numeite bek hilo in pasalte zong, mite in ih sunglam lungsim puakziate hong thei lo ahih manin, a kimu thei sun ahi a pua lam na kizepna leh na gamtatna panin hih suangmanpha pen tha leh sum tampi bei in atawh tak diam cih hong tawikhai den uh hi. A pua lam a ih lat dan ahi ih profile te leh ih upload milim tuamtuamte tungtawn in ih man zah ding pen mite in hong seh thei uh hi.


Sanggam aw, bangmi bangmi nahi zongin Pasian in a Tapa' sisan man lianpen tawh hong lei khin hi. Pasian in "Note pen Keima mit ah manpha-in, pahtak-huai-in, nangmah hong it ka hih manin"
(Isaiah 43:4) hong ci hi. Tu in mawhna nei-in tha hatlo himah leteh, nang pen Pasian tatuam leh a mituam, nang bang tatuam dang leh deihsak dang nei lo hi. Sum Pek 100 lai pen alui mahmah zongin, athak khat tawh a manphatna leh a lei theih zah a kikim mah bangin, mite muhna ah man tawm mahmah ta leteh Pasian mit ah nang pen na manphatna kiam tuan peuhmah lo hi.


Banghang hiam cih leh na manphatna pen Pasian in nang tungtawn in hong teh lo in, na man zah tawh hong teh zaw hi. Nang pen Van Kumpi' Tapa sisan tawh hong kilei zo hi.


Tua ahih manin Pasian adingin nang pen suangmanpha leh suai tampi sangin na manpha zaw pek hi. Na pumpi Pasian in a Tapa sisan tawh a leisa a manpha mahmah pen Pasian' Kha tenna Biakinnpi Siangtho hi a, lawmngaih gilo leh ci lehsa nopsakna dingin zang kei in la, mite in a sim a hong muh niamna ding leh hong nuihsan maimai nadingin zang kei in. Na gamtatna leh na kizepna panin Pasian in a it a Tapa na hihna leh na thupitna ki langsak zaw in. Mite neu muh ding leh nuihzaat ding peuh in na gamta aa na kizep ciangin nang bek a minsia hilo in, nang hong tan Pasian a minsia sak na hi hi. Tua pen na langpang Satan lungdamna lianpi ahi hi. "Note pumpi nomau a' hilo in, Pasian a' ahi hi. Note pen Pasian in hong leisa ahih manin, na pumpi uh Pasian' minthan nadingin na zang un"
(I Korin 6:19-20). Topan' a sim mimal kim Thupha hong pia tahen. Amen.

? Pastor PL Thlenga, Alet khia: Daniel Shoute