PAWLPI KHATNA : EPHESUS
John tangthu atom in,
Rom kumpi Domitian in Jesu nungzuite nakpi in bawlsia a, John zong, gu dawnsak napi si theilo-a, beelpi sungah sathau suangso in akhiat hang silo veve lai ahih manin, Patmos tuikulh-nisuh tawmtawm bek apo, suangkeu gam gawtaak tuikulh-(thah taangin migilo te thongkhiatna in akinei) mun ah, khum sak hi. Tua tuikulh pen, adung tai 10, avai tai 6 bang azai hi a, alaizang ah mualno St Elias akici pi 750 bang asang khat om hi. Tu in bel John akikhiat lai bang hi lo-in, kipuah ta a, British Museum khawng om a, Biakinn zong 300 bang om hi. Tuipi gei Tembaw khawlna mun nuam munlian 3 bang om hi.
John pen, Domitian in asi lel dingin akoih hi napi in, si lo zaw in leitung buppi in pawlpi maan leh pawlpi lampial, akhentel theih nading Thumaan lahkhiatna Mangmuhna na ngah lawh zaw a, AD 96 kum September 18 ni in Stephenus in Dominiam suam in akaplup ciangin, Kumpi Tokhom ah Nerva kumpi thak hong kahto hi. Kumpithak pa in gam ciamtehna laibu Gezeters a et ciangin, thumaan lotakin John pen tuikulh keugaw gam ah kikoih hi, cih amu hi. Ahin' lai leh va lakhia dingin thupia hi. Na si nai lo mah hi. Bang an ne ahi hiam? lamdang hi! Tui kulh keu panin lakhia uh a, Asia Minor gam Ephesus khua ah, AD 98 kum in, amuh khiat-aki lak mangmuhna teng agelhkhiat khit ciangin si ta hi.
Tua a mangmuhna ah, amasa in Pawlpi 7 te min leh omzia-te hong genkhia hi. Hih Asia Minor gam-a, khuamin 7 te pawlpi min dinga abulhna ah, tua akhua taktak-a om pawlpite tung a thu om leh hilhna hi zaw lo hi. A khua min in khiatna anei thei ding deihna a, tua khua minte agen hi bek zaw a, Nungzuipi te khang pan kipan suk pawlpi te omzia kikhel suksukte ahun zui-a omzia khiatna te tawh kibulh thei khuaminte kila hi bek zaw hi. Akhua-a om pawlpite taktak gen na hi dingin seh leng, tua hun in tua khuate ah pawlpi zong om kim nai beek lo hi. A om sun te mah zong, amaute sangin Jerusalem, Antioch, Corinth pawlpi khawng vaikhak huai zaw mahmah ding hi. Tua hi a, tua hun-a tua khua pawlpite tunga thu kigen hi lo-in, akhang zui-omzia kilamdang suksuk pawlpi tangthu hi, ci in thei ni.
Hih hilhkholhna te sim in, thei in, azui mi in thupha ngah ding hi. Mang 1:3; 22:7. Ni dangin a om ngei zo, tu laitakin zong a om, tu nung ciangin ahong pai kik ding Topa, eite hong it-a, Ama sisan tawh eite mawhna pan ahong phelkhia-Pasian mai-a Siampi leh Kumpi a ahong suaksak ding Topa in, ahong lah Mangmuhna hi. Mang 1;4-8.(tomkaih)
Note tawh Pasian sila ahi khawm, Jesu Christ Teci apang keimah John in, Topa ni (Sabbath) in, Khasiangtho sungah ka om a, ka nunglam pan pengkul aw bang agin'ngaih aw tawh, Ephesus, Smyrna, Pergamos, Thyatira, Sardis, Philadelphia leh Laodicea khua-a om pawlpite kiang ah laigelh dingin hong sawl hi.
A khete sumngo bang, a aw tuipi ging bang, amaitang meel nitaang bang ahi mi, mihing Tapa in, kham meivak khuam 7 te laizang ah vaak kawikawi-a om ka mu hi. Ama mai ah misi bangin ka puuk laitakin, a taklam khut ka tungah hong nga-a, "Lau kei in, Keimah amasabel leh anunung bel ka hi hi. Sihna leh sihna gam kong hon' na ka nei hi. Hih kong lah thute gelh in la koih in, kham meivak 7 te in pawlpi 7 te ahi uh hi. Aksi 7 te in pawlpi 7 te' vantung mite ahi uh hi." aneu 9-20.(tomkaih)
Meivak khuam 7 te laizanga vaak kawikawi-a, akhut ah meivak 7 atawi mipa in Ephesus khua pawlpite tunga athupiakna: "Na gamtatna, na nasepna, na thuak zawhnate, sawltak ka hi uh a ci zuauphuakte na telsitna leh na phawk khiatna te Keima min hangin gimlo tawl-lo a na thuaknate ka thei hi. Ahih hangin nang tungah gen ding khat om hi. A masa-a na neih ki-itna na paikhia kha hi. Na kiamna mun phawk in kisik kik inla, na gamtat ngei nei kik in. Na kisik kik kei leh, na meivak na kiang pan ka khinkhia ding hi. Na neih hoihna pen, Nicholas pawlte na muhdahna ahi hi. Khasiangtho thupiakna bil nei mi in ngai ta hen. A zo mi Pasian Paradise gam-a nuntakna gah nek khuan ka pia ding hi."(tomkaih)
Ephesus-Mang 2:1-7; Cihpen, akhiatna,'Deihhuai' cihna hi. Ahun in AD 34-100 ciang huam hi. Nungzuipite nuntak sungteng cih ding hi. Hih hun sunga pawlpite in bang hangin Deihhuai, cih min pua hi ding hiam? cih leh Pawlpi Doctrine maan keem lai uh a, siangtho takin zui lai uh hi. Hih khua pen, Asia Minor gam ah khua kidawk minthang khat hi a, akhua min khiatna Deihhuai cihna ahih manin, Nungzuipite khang hun huam sunga pawlpite omzia lim lahna dingin kizang hi. Pawlpi masate pen, aneihsa nangawn uh gawm a, azawng ahau om tuan lo-in, avek uh nekhawm dawnkhawm, innkuan khat bang in ki-it uh hi.
A hansuahna. Tua aneih ngei uh ki-itna pen kiamsak uh ahih manin nei kik dingin sawl hi.
Athuakzawhna. Tua hun lai in Nero te Herod te in Christiante langbawl lua uh a, huihpi gilo, zinling gilo, kialpi, natpi khat om leh, Christian te hang vive kingawh a, bawlsiatna thuak pahpah uh hi. Nero bangin zin zahtak lian khat nei leh, video et bangin cimthawi-na, zindo nadingin, Christiante man in, humpi khawina ah khia in, agalhiam dingin sakol leeng hawlte sakol satna ciangkang te pia in Sapite tawh kilai sak in, asih kuan uh a, na sa lua a kigawi-awngkeek gawp khawngte et pih hi. Tua bangte amu kihal lua leh, a ankam lim lo-in, a ihmut suak thei lo hi, ci hi. Tua bang pawi pen a kinawh theithei in bawl thithe hi. Ahih hangin Christiante in amau upna thumaan pen khah tuan lo-in len tentan uh a, akithat atam ciangin akibehlap zong tamzaw sem zel uh a, pungpung mai uh hi. Tua ban ah, upna lam pial theih nadingin, Upa 7 kiteel te laka Nicolas pen in upna maan lo lampial pawl nei-a, Nicolaitis pawl leh Gonostic pawl te om hi. Ahih hangin tua te sittel in anung zui lo uh hi, va kipawl lo uh hi. 1Tim 4:1-4 sunga cian kipia khol tuate ahi hi.
Khapna. A zo mi, nuntakna singgah nek khuan ngah dingin kikhaam hi.
Aciamtehna. Mang. 5:9; 6:1. Tuuno in ciamtehna 7 te laka amasa pen ahon' ciangin Sakolkang khat hong pusuak a, atung tuangpa in zawhna thaltang tawi hi. Kumpi lukhu zong khu hi. A pawlpi upna leh zuihna ah, kawkbaang nai lo ahih manin, sakol meel kang hi. A tung tuangpa in zong, zawhna thaltang tawi hi.
Hih hun in, LST pen, Greek pau bek in omlai a, Latin pau in zong kitei nai lo hi. (Zop Lai Ding)
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.
