Khoisianlangh Dotna Sia Mungno Dawnna

Kong it Zomi SDA a kua maciat:

A tung aa thulu tawh kisai Sia Langh' dotna te ka dawnkikna peen tu ziing tuung aa PDF file tawh kong khah khiat hinapi PDF file hong thei keng a ci tawh, ngah kha keng a ci tawh pawl khat in hong ngen kik ahihmanin personal email address ka neih teng leh ZomiSDA@yahoogroups.com leh zomi-adventist-com@googlegroups.com ah a kingah kim tek ding lunggulhna leh deihsakna tawh anuai aa bang iin hong khah khia kik ingh.   A kua matek in a ngah kim tek ding leh a tel siam tek ding iin hong lamen ingh. 

November 27, 2010

A thu: Policy Paizia maw Apostasy Paizia? cih thulu pan Sia Khoi Sian Langh' dotna te

 Kong it Langh leh lai sim Zomi SDA a kua maciat:

Langh in a nuai aa dotna a bawl te ka et ciang iin a theih loh takpi a dong hi lo iin a thei lo takpi te ading or a thei lo a kineih thapai laai te ading a deihsakna tawh a dot hi zaw ding iin um kahihmanin thumaan a lunggulh takpi mi khat beek in phattuamna a ngah tuam khak leh cih lametna tawh hong kuppih ingh.  Thumaan a lunggulh khempeuh adingin phattuamna a om ding iin Topa’ Khasiangtho in na lungsim ngaihsutna te uh hong makaih ta hen.  

 Dotna #1 pan #5 sung aa khempeuh guang kik lengg dawnna teng tawh sau lua ding ahihmanin Langh ii dot bulpi te bek teng khia iin tom lak ingh. 

1.     "1987 kum pek pan ih hanciamna mumu khin hang, Union pan in e leh Upper Myanmar in Conference ih ngah theih nading in Union President/Secretary semngei te’n Deihsakna takpi tawh bangci ciang ong koici geelpih/vaihawmpih------- Ih Zo ngeina aa innluahdingpa in inntuan dingte a tuanzawh nadingin a vaihawmpih danin, deihsakna takpi tawh ong vaihawm pihna a om sunsunte tel leeng kipumkhatna omding hi." (Khoi Sian Langh, Friday, November 12, 2010, 12:25:05)  

Dawnna:

(a)   1987 kum iin Division President leh Union officers thum hong pai iin Upper Burma Section officer thum teng leh pawlpi mi makai tampi tawh kimu khawm iin tua meeting pan aa kilungkimna tawh hoih tak iin Conference kingen ahihmanin hih peen Union leh Division te hong geelpih/vaihawm pihna ahi hi. 

(b)   Division in thukan ding iin survey group hong paisak hi.  Survey group in amau muhna bang iin report a piak ding uh tavuan nei uh hi.  Deihsak, deihsak lo cih om lo iin thumaan a muh bang un a report uh kul hi.  Survey team hong pai sak iin amau sep ding teng hong sem uh ahihmanin hihpeen Division in hong geelpih/vaihawm pihna ahi hi. 

(c)    Myanmar Union Mission in Conference status ih ngah theih nadingin hong huh theih uh om lo hi.  Ih theih ciat ding a thupi mahmah khat ah Upper Myanmar Mission in Conference status suak theih nading eligibility leh requirements te ih picin zawhna, ih qualify na leh quality ih neihna ih lah (prove) theih ding tavuan ih nei hi.  Sum leh paai, khaa lam, leh makaihna te ah ih picin ciang iin Conference suah nading steps and procedures zui iin recommend huai ihih leh Myanmar Union Mission in recommendation hong piak ding tavuan nei hi.  Tua lo buang Myanmar Union Mission in Conference status ih ngah theih nadingin hong sepsak or hong huh theih uh om lo hi.  Ih qualify takpina Myanmar Union Mission leh Division te tung ah lak thei takpi peuh lengg Union in hong dal ngei lo ding aa hong dal mah leh zongh ih qualify takpi nak leh hong dal zo ngei lo ding hi. 

(d)   Tua hi aa Myanmar Union Mission in Upper Myanmar Mission peen Conference status piak ding iin kilawm hi ci iin recommendation a piak lam uh ka thei kha ngei kei hi.  Conference status ngah theih nadingin a kisam khempeuh ah picing takpi iin qualify lua mahmah napi hangh Myanmar Union Mission in hong recommend nuam mahmah lo hi ci in gen theih ding thu lah ka mu zo tuan kei hi.

Ka phawkna ciangciang ah 1987, 1988, 1989 kum pawl te iin sum leh paai lam ah tangdinzawhna tan (self supporting percentage) peen 90% - 100% kiim bang hi aa 100% naih mahmah hi.  Sawm-aa-khat zungpi (tithe base) peen hoih hi ka ci ngam kei hi.  November 9, 2010 ni iin laimai 2na sung ah hih vai hong gen khin ingh.  Kha lam thu ah ih pawlpi makai te leh pawlpi mi te paubanna lianpi gen ding om lo ahihmanin tua hun laai iin UMM ah spiritual maturity om ka sa hi.  Pr. Cin Za Kham, Pr. Daniel Nangno, Pr. Do Hen Pau, Pr. Kenneth Thang, Pr. Kip Za Nang, Pr. Langh Sawm Mang, Pr. Than Khuma, Pr. Thang Khuma, Pr. Thangpu, Pr. Thang Kawl, Pr. Thang Siangh, Pr. Zen Do Lian, etc. te om uh aa makai picing nei ka kisa lel hi.  Hi ci bang teng tawh Myanmar Union leh Division in Upper Myanmar Mission peen conference status hong kisin sak ahi hi. 

Ahizongh'n 1990 kum akipan Union ah ih leibaa te khang to hanhan iin 1991 kum bei ciang iin Upper Burma Section in Ks. 25,00,000 ($416,000) bang Union ah leibaa nei hi.  Conference ngah theih nading iin "sumlam ciangtanna zong om ngeilo hi" (Thang Siangh, November 19, 2010) a cih mawk ciang iin thumaan gen lo hi.  Dollar or kyat tua zah cih sum mal ciangtan a om loh hang iin tangdinzawhna tan (self-supporting percentage) leh sawm-aa-khat zungpi (tithe base) cih tehna te ahi general guideline te tungtawn aa conference piak huai or huai lo cih te Mission, Union, leh Division in a seh uh ahi hi.  Sum leh paai vai aa leibaa khangto gawp cih loh buang ah spiritual maturity leh leadership peen khantohna leh kiamna ka mu tuan kei aa 1987-1991 kum bei dong hoih ka sa hi.  Hi ci bang leibaa pi iin Myanmar Union in Division ah Upper Myanmar Mission peen Conference status a ngah ding iin kilawm ka sa takpi uh hi ci iin recommendation a pia thei lo hi ding iin ka um hi.  Conference status ngah theih nadingin paulap leh pauban khat zongh om nawn lo iin a picing sinsen kimlaai Union in hong daal hi cih lah theih ding a om leh ken zongh thei nuam ingh.  UMM in ei leh ei kiciantak aa ih qualify na ih lah theih kei leh bel ei ii kicinlah na, ei ii mawhna hi khin pah aa recommend huai or huai lo cih peen Union EC ii khut sung ah a app suak ihihmanin Union EC in amau muh bang aa a sep uh peen mawhsak theih om lo hi.  

Zo ngeina aa innpi pa leh inntuan pa kizopna te leh Conference status ngah theih nading aa leitung bup SDA pawlpi kiukna in a kiciangtan steps te kiteh kaak theih lo hi.  Zo ngeina ah inn tuan pa ading inn pan beel leh kuang kipia hi.  A inn ding tha peuh kicial iin bii both iin sing sui iin kilam pih hi. Zo ngeina ah inntuanna vai iin zuih peel mawh ding thukhun (bylaw, rules, or working policy) nei lo hi. Ahunhun iin innpi pa in a neih zah tawh kituak iin or inn tuan pa in ama sum muh dan tawh kizui iin a geel uh ahi hi.  Leitung bup SDA Pawlpi in Conference ngah theih nading iin zuih, neih leh kalsuan zia ding Working Policy sung ah a kikhung linlian sa iin om hi. 

2.     Conference ngah takpi hileeng ih neihsa teng kua’n nei ding, a om na mun teng lah Conference hi gai ta ding aa Mission bek ii neih theihding a hih leh Central Myanmar, South East Myanmar … cih te Conference ahih naikei leh a mau ong neih/ong vaan/ong sai kul ding ahitam? (Khoi Sian Langh, Friday, November 12, 2010, 12:25:05)  

Kipawlna khat peuhpeuh ah ih piak sum, vanh, inn leh lo te peen ih piak khit ciang iin naupang tengta kineih bang iin ih ut hun iin lak kik suhkik theih hi lo hi.  Leitung bup SDA pawlpi kipawlna ahi SDA Mission ah sang inn, biak inn, leh vanh tuamtuam te ih piak ih app ciang iin leitung bup SDA pawlpi tung tawn aa Pasian kiang ah ih piak ahihmanin mimal khat in ahizongh'n mi pawl khat or hon khat in ahizongh'n ih piaksa neih leh lamh te suth kik thei lo hi.  Tua ahihmanin Mission ah ih piaksa ih app sa khempeuh Mission neih sa ahi hi. 

A zenzen iin Union, Division, leh GC Working Policy dung zui iin SDA Mission khat pepeuh in lammaan tawh SDA Conference maan takpi a ngah thak leh tua Mission ii neihsa khempeuh tua SDA Conference thak ii neihsa hi pah ding hi.  Tua ahihmanin Upper Myanmar Mission in GC, Division, leh Union pan aa SDA Conference maan a ngah ni ni ciang iin Upper Myanmar Mission ii neihsa khempeuh Upper Myanmar Conference ii neih sa hipah ding aa Upper Myanmar Mission ci aa sign board a kisuang khempeuh peen Upper Myanmar Conference of SDA ci iin kikheel kisuang ding hi.  Upper Myanmar Conference ii neihsa suak pah ding hi.  Phawk ding: Tu ni ciang dong Kawlgam sung ah Seventh-day Adventist Conference om lo hi. 

3.     Ih zakzak ‘Zum ah Gospel paina sumzat dan’ te e Church Financial Policy (SDA Working Policy) manmah maw.  Ih pawlpi in Financial Policy anei a hia/aneilo?  A nei a hih leh hibang aa sumzat nading in Mission sung/Conference sungah Budget line allotment om a hi tam? (Khoi Sian Langh, Friday, November 12, 2010, 12:25:05)  

Hoih tak aa ngeina bang aa a kiphut kipawlna khat peuhpeuh ah thu gui khun om hi.  Kipawlna sum don zong om hi. Membership fee a piak laai teng leh kipawlna ngeina a zuih laai teng tua pawlpi mi ahi hi.  Tua kipawlna ah a ut nawn lo te in membership fee pia nawn lo iin buaina om lo iin tawp thei hi.  Kipawlna ngeina a zuih nop kei leh kipawlna pan kihem kipaii khia hi.  Membership fee a piak loh ni akipan or kipawlna pan ama ut thu tawh a tawp ni akipan or tua kipawlna pan a kihepkhiat ni akipan tua bang mi te in tua kipawlna ii neih leh lamh te tung ah thuneihna nei thei nawn lo hi.    

SDA Mission maan or SDA Conference maan ahih nak leh SDA pawlpi' neihsa hi aa a kibang ahihmanin neihsa thu ah zum kitun ka zak om ngeinai lo hi.  Ahizongh’n leitung bup kipawlna SDA Mission, Union, Division, leh GC te phalna om lo pi iin SDA mission or SDA Conference ka hi uh hi ci in makai te thumanglo iin leitung bup SDA pawlpi tawh a kizom SDA Mission or SDA Conference ii neihsa khat peuh phalna om lo pi iin a zang, a luah, a suth a om leh SDA pawlpi langpang leh SDA pawlpi neihsa a gu, a suth, a buluh, suak ahihmanin SDA pawlpi in ama neihsa a ngah kik nading iin kumpi thukhen zum ah huhna a nget peen lampi maan lampi dik ahi hi.   

Leitung bup SDA pawlpi' kipawlna ngeina dung zui iin Upper Myanmar Mission peen Myanmar Union Mission ii neihsa hi aa Myanmar Union Mission peen Southern Asia-Pacific Division leh Worldwide Seventh-day Adventist Church ii neihsa ahihmanin thu a sian a ven masiah leitung bup SDA pawlpi in mapang khawm ding uh hi.   Upper Myanmar in sum kicing a neih zawh kei leh Union in a huh kul ding aa, a kisap beh laai leh Division in sum leh paai iin panpih laai ding uh hi. 

A tom iin leitung bup SDA pawlpi' neihsa biak inn, sang inn leh vanh a tuamtuam te phalna om lo pi iin a zangh a suth a om laai teng Mission in a neihsa a huut ding tavuan nei ahihmanin thusian dong sum leh paai zangh in a vaan ding peen financial policy tawh kituak hi.  1997 kum masiah Upper Myanmar ah thukhenzum ah pawl sung or pawl pua tawh thu kinei ngei lo ahihmanin budget line item iin kikoih ngei lo hi.  1997 nung siah legal expense om zelzel tham ta ahihmanin expense line item khat peuh mah iin Mission a kici te hi ta leh Conference a kici te hi ta leh in budget item iin a hel ding uh a kilawm hi aa a koih ding uh zongh ka um hi.  

4.     Sia Dalpu pen a minpi aa Treasurer panmun len leh Secretary in sumkem/sumzeek (Sia kai Mang’ e-mail):  Hi bel Sia Dalpu in telpen in teh!  Sia Mungno in SDA Church Financial Administration System lamsang leh a Audit sepdan telpen ding ahih ciangin kei, sia Kai Mang leh pawlpimi pawlkhat te’ tel dingin ong gen leh ut si hang ee. (Khoi Sian Langh, Friday, November 12, 2010, 12:25:05)  

Hih thu tawh kisai ih group mail sung ah ka sim kha ngei zel hi.  SDA pawlpi in Working Policy leh Church Manual nei hi.  Church pastor, church board chairperson, church finance chairperson, church business administrator, church treasurer leh auxiliary organizations leader te in amau munmun ah makai uh hi.  Local Mission leh Union Mission ah zongh officer te, departmental director te leh Executive Committee member te in organization policy bang iin amau panmun tek ah makai uh hi.  Union aa Sia te in Sia Dalpu kiang pan kha sum thoh lo iin Sia Memory kiang pan khasum a thoh dan peuh leh "Sia Dalpu pen a minpi aa Treasurer panmun len leh Secretary in sumkem/sumzeek" ci iin a ki gelh ciang iin Union treasurer or mission treasurer in khasum khawng a pia tangtang ding iin a seh kha mawkmawk suak iaihmanin organization pai zia a tel loh man or ngimna dang khat tawh a gelh hi ding iin ka um hi.  Organization khat peuh ah officer te in duties and resposibilites a nei dimdiam uh hi aa amau a tek tawh buai khop mahmah uh hi.  Treasurer, Assistant Treasurer, cih te peen sum vai ah a kisam bang aa authorization a pia, makai te hi uh aa kha sum a pia khia te peen treasury department aa staff ahi Cashier te hi zaw hi.  Tua ban ah Langh in "Hi bel Sia Dalpu in telpen in teh!" a cih mah bang iin Sia Dalpu' kam pan ih zak ahih kei leh ei buaipih leh lung hihmawh pih ding vai te hi lo hi.

5.     Sia Siangh UMM President sep sung Sum zatdan manlo (Sia Mungno’e-mail): kumli sungbang hi ding aa Auditor lut ngeilo maw?  Ahih keileh Section/ Union ulian pepeuh Policy sang lian zaw pahpah maw?  (Khoi Sian Langh, Friday, November 12, 2010, 12:25:05)  

“Sia Siangh UMM President sep sung Sum zatdan manlo” (Sia Mungno’ e-mail) ci in Langh in dotna #5 na ah hong gelh ciang iin ka lai gelh te sung ka zon kik hang iin “Sum zatdan manlo” hi ci aa ka gelhna mu kha kei ingh.  Ka genna a om a mu pak lo bek kahih leh a context khat om aa ka gelh hi ding hi.  “Sum leh paai a lut leh a pusuak khinkhai lo iin” cih peen gelh mah ingh.  Kyats 2.5 million ($416,000) bang kum nih sung khawng iin Myanmar Union tung ah Upper Myanmar Mission in leibaa ahihmanin Income and expense or revenue and disbursements balance lo a ci ka hihi.  Leibaa nei eu au mawk ihihmanin “sum zatdan manlo” = “Sum leh paai a lut leh a pusuak khinkhai lo” a khiatna a kibang iin ih khiat nak leh “Sum zatdan manlo” cih zongh a maan hi pah lel hi.  Tua hun laai akipan tu ni dong Myanmar Union ah Auditing department om nai lo hi.  Tua hun laai iin Section level peen Union treasurer in audit hi.  1993/1994 pawl akipan GCAS (General Conference Auditing Services) in Myanmar Union Mission, Mission dangdang te leh Union institution te audit kipan hi.  Bangh bangh hi ta leh Myanmar Union aa leibaa tawh kisai peen monthly financial statements sung ah Balance Sheet accounts ahihmanin UMM leh MYUM te ii accounts receivable or accounts payable section te ah kha sim iin kimu pah lel aa audit zongh a kul hi lo hi.  Financial fraud (zuau tawh sum zatsimna) or misuse of funds om hi a kici hi lo iin sum leh paai a lut leh a pusuak khinkhai lo iin leibaa a punna thu a maan kagen ahi hi.   

Working Policy himhim peen Section/Union/Division/GC makai te dong in a zuih ding uh aa policy a kibawl ahi hi.  Executive Committee leh officer te kikop iin policy dung zui aa a sep ding uh ahi hi.  Section/Union ulian pepeuh policy sang iin lian zaw pahpah lo uh hi.  Tua mah bang iin Mission or Union in pawlpi mi hon khat or pawlpi pawl khat te ii a deih uh makai khat peuh a kiteel kik loh man iin or a deih a nget peuhpeuh uh “hi mah hen ou” a cih pih loh man leh a lungkim pih loh man iin pawlpi mi hon khat or pawlpi pawl khat te in Working Policy sang a lian zaw bang keek iin Union leh Mission makai te thu lang pan theih hi tuan lo hi.  Working Policy a palsat te, a mun mun, a hun hun, tawh kituak iin action kila ahihmanin working policy a palsat te lak ah ih kihel loh ding kisam mahmah hi. 

Langh ii dotna tawh kizom het lo napi Sia Siangh in thu pawl khat hong pulaak kik ahihmanin tomno khat hong kuppih ingh.  

(a)   “Lianpu Policy bawl zongh review kiklohin kizangh thei kenteh hong kicilai ei” (Thang Siangh, November 19, 2010) cih leh [“Lianpu policy bawl” cih zongh za ngei mah ingh.  UMM office ah ka om lai khat vei a draft copy mu ngei mah ingh.  Lianpu policy draft dingin Mission officer-te in a sawl le, a khal hi khin ding hi ci ingh.  Conference status a pai ding pen, “Lianpu ii policy draft” pen tawh kalsuan ding cih mawk peuh mah, na kipat un one-man policy tawh kipan khin malam hi lo hiam?  Conference hong ginkhiat phet leh lampialna tawh hong kipan pah hi ci ing.  Policy pen mimal khat in bawl kul lo-a, “Constitution, Bylaws, and Working Policy of the General Conference of Seventh-day Adventists” kinei khin hi.  Tua sungah policy pen a draft in guidelines hong pia khin, tua la in mission committee in puah toh ding hi bek hi.”] (Suak Khaw Ngin, November 23, 2010) cih Conference policy vai ah Sia Siangh leh Sia Nginkok ii gen thu te lai sim khempeuh in na tel nading un telgenna hong bawl ingh. 

Sia Nginkok' gen mah bang iin General Conference of Seventh-day Advenitsts in Working Policy a bawl sa peen Division tuamtuam te in amau mun leh gam te tawh kituak iin Division Working Policy bawl sawn uh hi.  Tua mah bang iin Southern Asia-Pacific Division in a bawl sa Division Working Policy bulphuh iin Union tuamtuam te in amau gam leh lei tawh kituak iin Working Policy a bawl ding uh ahi hi.  Myanmar Union Mission in Working Policy a neih leh tua working policy bulphuh iin Kawlgam sung aa Section or Mission tuamtuam te in amau gam leh lei tawh kituak iin Mission Working Policy a bawl leuleu ding uh ahi hi. 

Ahizong'n 1987 kum iin Burma Union Mission in Working Policy book nei nai lo uh hi.  Tua mah bang iin Upper Burma Section in zongh working policy a cih nei lo ahihmanin a bul pan aa kipat tawm kul hi.  Pr. Kip Za Nang, President, Pr. Thang Khuma, Secretary, Pr. Thangpu, Treasurer, te in Upper Burma Section makai a sep sung, 1987 kum lang bei khit lam iin Upper Burma Section Executive Committee in Pr. Thang Khuma peen draft Employees Handbook a bawl ding leh Sia Lianpu peen draft Conference Policy a bawl ding iin tavuan pia uh hi.  Pr. Thang Khuma in cik hun iin zo hiam cih ka thei kei hi.  Sia Lianpu in sem pah tinten ahihmanin 1988 midyear committee maa in zo khin ta hi.  Division in a vai khakna tungtawn aa Section EC in maantak aa a sep khiat thu ahi hi.  1987 kum aa Conference ngetna vai ah Division, Union, leh Section tawh a kikalsuan khawm ngelh ngelh ahihmanin khialhna om lo hi.  Tu ni ciang dong ih deih Conference maan a kingah loh man aa a lungkim lo mi pawl khat te ii sepna leh bawlna hoih lo te bul buh iin 1987 kum aa ih Conference nget a maan lo bang aa gen ding peen khialhna khat ahi hi. 

Section EC in draft policy a bawl ding iin mi khat, mi nih, mi thum, -----, or subcommittee khat sawl thei hi.  Upper Burma Section officer teng leh EC member teng tu liailuai iin working policy bawl ngeingai thei lo uh or hun nei lo uh ahihmanin draft working policy a bawl ding iin Upper Burma Section Executive Committee in Sia Lianpu tavuan a piak ahi hi.  Sia Lianpu peen Section officer te' sawl hi lo hi.  Mikhat in draft a bawl aa subcommittee in draft a bawl zongh iin "draft" ih cih himhim peen final hi lo ahihmanin Section Executive Committee in review, edit iin approve ding ngeina ahi hi.  Sia Lianpu in Far Eastern Division (Constitution, Bylaws, and Working Policy of the General Conference of Seventh-day Adventists, Far Eastern Division) ii Working Policy bulphuh iin Kawlgam sung leh a diakdiak iin Upper Burma Section sung tawh a kituak ding iin puah aa draft a bawl hi bek aa  a vek pi aa ama ut thu teng a mawk gelh hi zenzen lo hi.   Conference ngah nai lo ihihmanin tua draft peen Upper Myanmar Mission zum ah update loh iin tu ni dong om laai kha ding hi.  Section or Mission ih suah zawh kum tampi ahih khit hang iin Upper Myanmar Mission bek hi lo iin Kawlgam sung aa Mission dangdang te in zongh tu ni November 26, 2010 ni ciang dong Mission working policy lai bu a nei om nai iin ka um kei hi.  Ka khialh leh hong maisak un.  

Kawlgam sung aa Mission tuamtuamte cih gen loh ka theih khialh kei leh Myanmar Union Mission in kum 2003 dong Myanmar Union Mission Working Policy book nei nai lo uh hi.  2005 kum pawl aa Pr. Gulfan, SSD President, tawh ka kizopna sung ah Myanmar Union Mission in Working Policy a nei dan iin hong gen ahihmanin tu hun ciang iin Myanmar Union Mission in Working Policy a nei ta samm a hi tam maw a ci pan ka hi hi.  Myanmar Union Mission in Working Policy a neih takpi leh December 7, 2010, ni iin US ah hong pai ding mi muanhuai mahmah khat om ahihmanin Myanmar Union Mission working policy vai khak pah sawm ingh.    

(b)   "Mungnote kuate converted hilo hi." (Thang Siangh, November 19, 2010)  Mungno peen SDA innkuan sung pan aa khang khia ahihmanin Topa' thupha hang iin zuu, zaa, cih te tawh khang khia kha lo iin zuu kham, guta buluh iin vak ngei lo hi.   Zuu beel zuu peeng bul ah tuu iin zamm leh khuang tawh laam kha ngei lo hi.  Aisa, uisa, voksa, cih te tawh kidiah ngei lo ahihmanin SDA pawlpi sung pan aa hoih tak aa a khang khia te converted hi lo hi ci aa Sia Siang in definition a pia ahih leh SDA pawlpi mi nu leh pa aa a nei kha khempeuh unconverted hi mawk ungh.  Converted ka hih loh uh hang iin SDA pawlpi sung ah God's faithful children ka hih ding uh hong hanciam nung.

(c)    "Global Mission plan khempeuh khaktan nuam ahihmanin, kum-4 sung global mission Fund ding pen leiba danin hong lak khia uh ahi hi." (Thang Siangh, November 19, 2010) ci aa a gen peen tel zo kei ingh.  Kam vang tah ci aa a pau lel ngel ahih kei leh Sia Siangh pil mahmah ahihmanin "kum-4 sung global mission Fund ding pen leiba danin" lah dan ding pro forma journal entry khat hong gelh khia iin hong lak leh ut mahmah ingh.  

(d)   “Ba Khin thutawh no C deih maw, ci-in appropriation hong pialo pong mawk hi.” (Thang Siangh, November 19, 2010) a cih peen maanlo ngiat hi.  Conference suak zo takpi ding hiam cih hong kisin sak na iin Elder Colburn ii hong lamlahna tawh kizui iin Burma Union Mission leh Upper Burma Section makai te ii kithukimna dung zui iin Division pan aa Burma Union tungtawn aa kum sim aa huhna (appropriation) te hong pia nawn lo uh hi aa Ba Khin tawh kisai lo hi. 

(e)   “Upper Myanmar naseem leiba nei ngeilote leiba tul-4 tul-5 hong guan kim hi.  Hih ngam lel uh hi." (Thang Siangh, November 19, 2010) "Bonus Ks200‑300 sangte nangawn in Ks2000‑3000 ba uh, bang hang hikhong cin lui ngeingai uh hi." (Thang Siangh, January 8, 2007)   

Sia Siangh aw January 8, 2007 ni iin "Bonus Ks200‑300 sangte nangawn in Ks2000-3000 ba uh" na cih hi aa tua zawh kum 4 cin dek tak, November 19, 2010 ciang iin “Upper Myanmar naseem leiba nei ngeilote leiba tul-4 tul-5 hong guan kim hi." na cih kik zel peen tu zawh kum 5 ciang gelh kik le cin Ks. 7,000-8,000 bang na cing sak tam maw.  Sum khang (interest) bang zah tawh na tuat a hia?  January 15, 2007 ni iin na teltheih ding iin kong gelh khiat sa hi ven a tel lo na kineih nop pawl hi ding ai ve maw.  Sia Siangh aw nang gen loh US pan aa a khang khia church treasurer te, school treasurer te zongh hilh hilh a kul a om thei ahihteh sum sazian thu ah na theihna in baan lo hi ding ahihmanin na tel theih loh thu vanh gik bang aa na khan tawn a pua den ding hi mawk nahihteh hamsia hong sa ingh.  

(f)    "Sanpya Clinic sum Ks. 50,000/- kei leiba ah hong koih sak a, hih ngam lel uh hi." (Thang Siangh, November 19, 2010)  "Sia L S Mang tawh khasum kalak uh, Letbat in na‑om venvan mawk aa, kabuaipih pet mah uh hi.  Kai Khan Khual in sanpya clinic aa ding Yangon hong thoh sum Ks50,000 pen kei leiba iin hong koihsak mawk hi.  Union meeting katut laitak ua hong thoh hi iin kei authorization kisam ahih man iin letmat kathuh ahi hi." (Thang Siangh, January 8, 2007)

Hih thu tawh kisai January 15, 2007 ni in a kitel tak aa kong gen sa hi.  A tel lo na kineih nop pawl mah ahih zel hang iin a tom iin hong gen kik veve ingh.  Tua sum Ks. 50,000 ($8,333 bang) peen Yangon aa cashier kiang pan Sanpya Clinic paulap aa na thoh, Sia Kai Khan Khual na paulap hang iin ama kiang ah lah tua sum na app kei aa UMM treasury office ah zongh na deposit tuan kei hi.  A tun a banna, expense report, na lak thei kei aa Myanmar Union na tun ciang iin Myanmar Union treasury department in nang account sung ah leibaa aa hong guan sak hi ven.  Sanpya Clinic aa ding ka thoh ci napi cin Sanpya Clinic manager Sia Khual kiang ah lah app lo iin Yangon zay (bazaar)  khawng ah deposit kawikawi maw, na ekbuuk sung khawng vuah investment aa koih suk maw ih theih loh, nang sum thoh khawng midang mawhsak ngam laai zen ci lengg, na leibat loh pi leibaa iin a kikoih vetvat takpi hi leh na thuak hak dan ding kitel peuhmah sa ingh.  A taktak cilengg Myanmar Union Mission makai te leh EC member te a thu khual a lungduai luat man uh hi kei leh tua thu buai naneih hun 1992 pek iin na pastor license hong kiphiat sak thei leh personal ministry director panmunh pan hong kihem khia thei lua thu ahihlam thei inla gengen pho laak laak kei lel le cin nang ading iin hoih zaw hi. 

(g)   "Mithat ngam vive te kamsung ah “leadership mature” paungam lai mawk uh hi.”  (Thang Siangh, November 19, 2010)

Zomi gaalkap luui Thual Zen min a lo kha bang om leh "tangtel siktan" bang aa kitom valval phial phawk aa a that ngam zah dong ding aa a piiangthak converted pastor Thang Siangh ii kammal "Thual Zen gal agenpen politicmovement tawh kisai hi‑a, minam veite sihding kihtalo a gamtaangngamte ahihmanin mipi mai‑a gam‑it singamte azahko ngam hanglua kasa hi. Kumpi azawhloh hangin Col. Zel Za Lang kaplum ngamte Gin Sian Mung in daal thei‑in ka‑um kei hi. Gin Sian Mung zong kidawm keileh California aa atennamun pen vantung zahin Security om kasa kei hi."  (Thang Siangh, January 3, 2008) cih bang ka ngaihsut khak ciang iin Conference makai ding aa ka muan mahmah ngei pa' lungsim a hici phangphang mawk maw ci ci kha ingh.  Hi ci bang thu te ka muh hong tam tektek ciang iin spiritual maturity leh leadership quality a na kisam mahmah laai hi mawk ve hang ee cih ka khua nung phawk sansan hi.

Na omna ciat uh ah Sabbath hun nuam hunpha na zangh thei ciat un.  A kua matek Topa'n thupha hong pia ta hen.

Itna leh deihsakna tawh lai gelh,

Mungno Gualnam

Riverside, California