SINGKUNG 3 TE THU

Naupangno tiltilte tungah Tangthu khat ong gen ning maw. Zakzak ngeisa hisam naven, gen kikkik lel ni. AFM sungah naupang nih thu kidong in, a masa pa kiangah: nang na golteh bang ut penpen? Kei ka golteh power ranger, vampire ut pen ingh; a cihleh mipi dai khipkhep hi. A nihna pa kiangah: dong leuleu, nang e leh! na golciang bang ut penpen? Kei gol nuamkeng, a cih leh, mipi nuamin nui ngeingai uh hi. A lawmpa utteng aman kihta, lau, utlo himawk hi. Khai' leh, tun tangthu gen zom ni. Ih neulai-in, sakol, laa pauthei, misi guh, luguhte leisung pan thokikin, kawitai luapluap uh, cih zangei khin hang. Tun! singkung pauthei cih tangthu gen ni. Nidang lai-in, singkung thum: theikung tawh dolkung tawh cilankung tawh a thum un a sunmang tenguh a tangtun theihna dingin thungenin kikumkum ki hoho keei uh hi, ci hi. Theikung in nidang ciangin ka gahte miten ong lo-in, ong ne ding uh a, lim samahmah bek thamlo-in, ka kung ong kiphukin inn ah ong ciahpihlai ding a, lettama pa kiangah hih singluang singkuangno ka ngunlekham leh ka sum koihna dingin nong suihsak kilkel khitteh zaa hoih mahmah tawh ong zepsaklai inla,  adangteng zong a tamman mahmah ding in sumbuk ah zuaktheih dingin ong bawlsak lai in, ong kicih ding ut ingh, ci-in a ngaihsutna a sunmang ong gen hi. A nihna Dolkung in zong: kei zong nidang ciangin ong kideih mahmah ahih manin ong kiphukin ong kiciahpih dinga teembawpi-in ong kibawl khitteh tuipi tungah leitung kimvialin kumpi te, milian mihaute pua-in ka zinpih kawikawi ding hi, ong ci leuleu hi. A thumna Cilankung in: kei bel ong kiphuk dahmai henla, khangtoto-in singkungteng lakah a sang penpen, a minthang penpenin khangto-in, ong mu khempeuh in alaisai! hia singkung nak san sam ei! ama' zom ah vantung bek kimu in, a dawn enen leng Pasian nangawn kimu lai, ong kicih ding ut ingh, ci leuleu hi. Tua khitzawh kum tampi ong phakkhit ciangin, a thungetnget a utut uh ong tangtung takpi hi. Gamlakah singkai dingin mi thum a singat, a hei tek uh tawh a kaihna dingun Saiigol mahmah khat tek tawh ong pai takpi uh hi. A masa pa in, theikung ong muh ciangin iiplah in, ken hih theikung ciahpih pahlian ning ei' inn tunleng lettama pa kiangah zuak leng na manpha khat suahthei ding hi, ci-in, phukin ciahpihpah hi. Theikung zong a sunmang tangtung ahih manin mehnuih hiuhiau hi. A nihna pa in zong ken hih dolsing phukin inn tunleng, tembawpi lamna dingin hoih mahmah ding ahih manin, tembaw bawlte kiangah zuak ning ci-in, phukin ciahpih leuleu hi. Dolkung zong nuam mahmah hi. A sunmang tangtung leuleu. A thumna pa in zong Cilankung a muhteh iiplah in ong phuksawm leh a Cilankung dahin lauin linggawpin a tehteng bang ong pulh khia ziahziah hi. Kiphukin kiciahpih mawk leh a sunmang leh a thungetna tangtunglo ding hang na hi hi. Ahi zongin a singkung  deihpa in Cilankung ong phuk veve in a hiangteng heuhsiangin a lawmte bangin a zatna ding theipaklo ahih manin a suih sitset khitteh inn ah ong ciahpih pong hi. Theikung zong lettamapa kiang ong tuntak ciangin lettemapa in order a ngah bangin bawng kuang dingin ong suihiau mawk hi. Theikung zong ama ngaihsutna bang hileh limtak a kizem sitsetding in innsung bizu sung khawngah kikoihding in a sungah sum tampitak leh ngunlekham a dima kiguang dinga  aki upmawh pen innpua bawngbuuk sungah bawngann lopakeu dimlet a kiguang bawng ankuang dingin ong kizatmawk teh  nuampha hiaulo hileh kilawm hi. Dolkung zong tembawpi dinga kibawl ding a kisak leh gunkuang dingin ong kisui hiau leuleu mawk hi, Cilankung leuleu inntual kongbuuk sungtawng miallak ah ong kikoih hi. Hih bangteng tawh kum tampi ong khengkhengin tua singkung thum teng in zong nidang a a sunmang a thungetnate uh ong phawknawnmel khollo ong mangngilhta suak ve. Nikhat a zi gaipha lua kisa a, nausuak khialian ding nupa khat, cihna dingdang omnawnlo ahih manin mun awng ngahzo nawnlo, bawngbuk ah ong paitamai uh in, tua laiah nau ong suakin, bawngkuang sungah lopa tungah naungek ong sialta uh hi. Theikung in zong ngunlekham koihna dinga ka kilamet hiven, ngunlekham sanga lianzaw, manphazaw ong kikoihna ahi tave maw, ci-in ong kingaihsun hi. Tua naungek zong ong khangkhangin ong tangval tak teh a lawmteng tawh a kawivakvak uh leh gimlua ahih manun Dolsing tawh kibawl gunkuang manin tui tungah tawlnga dingin tuipi laizang lam manawh a ong pai laitak un tangvalpa lusu-in ong ihmu dipdep mawk hi. Tua laitak huihpi ong nunggawp tuihualte ong lian mahmahin Dolkung in aw! huihpi tuihualpi lakah hih ka tunga tuangte puazo peuhmah ding ka hi maw' ci-a a lungngaih laitakin tangvalpa ong khanglo a, ong dingto-in, tuihualte leh huihpite kiangah "daita un" a cih leh tuihual leh huihpite in a thumangin ong daipah uh hi. Tua laitakin Dolsing in kumpite pua ding ka kisak bek hiven, kumpite' kumpi a pua ka himawk vele! ci-in, amah leh amah ong kithei hi.      Atawpna ah mikhat in tua Cilansing kisui sitset vala-in, a liangko ah kisuanin ong puak kawmin kongzing lampi ah ong paipai leh mihonpi te in nuihsanin zahpih bawl, ko gawp, cilphih zawzen uh a, a nung zuizui uh in mualdawn ong tunpih tak teh tua singkhuam puapa manin singkhuam tawh hencipin siktukkilh tawh a khut a khe kilhin mualtungah ong phutlai mawk uh hi. Sunday ni ong tuntak ciangin tua Cilan singkhuam in zong mi khempeuh in mitsuan a, a etden uh, en phapha le uh Pasian nangawn muzo dinga mual tungah a po singkhuam ahih lam ong kiphawk hi. A zaknop na! naupang ciltelte. Ong piangsak Pa Pasian in ong it, ong ngai mahmah hi. Amah in na khempeuh i mailam ading ong geelsak tawntung hi. Ama ong geelsakna te a tawntungin a hoih penpen ahi hi. Amah itin muangden lehang Ama kiangah letsong tampitak nei venvan hi. Eite ih hih leh bel Vampire peuh suaknuam om hanga, a suak nuamlo zong ki om hi. Tua singkung thum te zong amau ut, a suahnoptek a suah zawhna ding un thu ngenngen uh in, Pasian in a manpha zaw dingin suaksak zaw hi. Mihingte geelna leh Pasian' sehsakna kibang lo hi. Pasian ki ap tawntung leng Aman a hoihpenpen ong pia ding hi.  God's Plans are Always the Best!!!!!!!!!!!!!!!!!!!!!!!!!!!!!!!!!!!!!!!!!!!!!!