Pawlpi buaina thute vai theih sakna

Dear Adventist Pawlpimite khempeuh
MYUM-UMM sung leh Leitung bup

A Thu: Adventist pawlpi leh a min, logo, a neih a lamh, inn leh lo, vante thu

Pa Pasian leh Khris Jesu ii Topa' hehpihna thupha, hehpihna leh nopna note tungah om ta hen.

1. Upper Myanmar Mission of Seventh-day Adventists pen Myanmar Union Mission of Seventh-day Adventists, Southern Asia-Pacific Division, leh General Conference of Seventh-day  Adventists tawh kizom ahi hi.

2. Upper Myanmar Mission of Seventh-day Adventists in a gam sungah pawlpi mi, pawlpi min, sum le paai, vante, Logo, mission inn, biakinn, leh sanginn te nei hi. Local church in amau sum le paai tawh a lam khit ciangin ki-ukna thuneite khut sungah hong aap in sanna, honna kibawl hi. Tua teng khempeuh pen Upper Myanmar Mission of Seventh-day Adventists buppi neihsa hong suak hi.

3. Ahi zongin ih galpa Lucifer kici Satan nasepna hangin 2003 pan kipan UMM sungah buaina hong om a, tua buainate abaan baan in kilemna kibawl hi. Makaite hong zin to in hong lemtuah hi. Hong pian theih loh tak ciangin a hong piang khia kipawlna ahi "Conference Planning Committee (CPC)/Upper Myanmar Conference (UMC)/Myanmar Union Conference (MUC)" pen hong phiat na ding uh thu kipia a, hong kimanglo hi.

4. UMM/MYUM/SSD makaite sawlna hong kiman loh ciangin, kalsuan zia ding teng hong kikalsuan to in, January 2006 in CPC/UMC/MUC pen kiphiat in pawlpi [11] bang disband kipia hi. Ahi zongin hih kipawlna a neite in Upper Myanmar Mission of Seventh-day Adventists ii neih sa pawlpi min, logo, sum le paai, vante, mission inn, biakinn, sanginn tampi tak hong laaksak hi.

5. Tua bang ahih ciangin pawlpi ngeina tawh kingen kik thei nawnlo a, lampi dang zon ding hong kisam ta hi. Amasa pen in "Min le Logo" a zat loh na ding kumpi thukhen zumah kingen hi. 2009 December sung in hih thu hong siang ahih manin, Kham Khen Pau leh Kai Za Dal te Thong sungah kha 3 hong om hi. Seventh-day Adventists, Adventists, leh apawlpi tawh kisai Logo te a zat nawnloh nading thu hi-a, a zat teitei hangin kihenna hong thuak hi.

6. Hih ciang tawh hong lungkim nailo in, Seventh-day Adventists pawlpi neihsa thu le laa, inn le lote mah hong zangh toto lai hi. Tua bang ahih theih loh nadingin kivaihawm leuleu in, 28 October 2010 ni in Monywa Thukhen Zum panin CPC/UMC/MUC te khut sungah a om neih le lamh, sum le paai, inn le lote khempeuh hong piak kikna ding, Seventh-day Adventist ahi-a, Adventist ahi zong in a zat vet loh nading, Seventh-day Adventists pawlpi kiciaptehna Logo zong a zat loh nading" thukhensatna hong pia hi.

7. Tua thukhensatna tawh kizui in, 25 November 2010 ni in, Pinlon-Kalaymyo ah om CPC/UMC/MUC makaipite ahi Kai Za Dal leh Kham Khen Pau tungah Upper Myanmar Mission of Seventh-day Adventists pawlpi neihsa khempeuh buaina om lo in hong piak kik nading lai kipia ta hi.[Tua lai tawh kisai ii tel theih nading in: biakinn khempeuh ap kik ding, mission inn khempeuh aap kik ding, sanginn khempeuh aap kik ding, pawlpi min zang nawnlo ding, inn sim-a ii suan ahi ADVENTIST HOME cih signboard neu pen CPC/UMC/MUC sungah a om mi khempeuh in zangh thei nawnlo ding cihna hi.]

8. Hih neih leh laamh te tung pan na pusuah ding uh hun hong kipia ding hi. Hun hong kipia sungah thuhoih ngaihsun in kilemna thu ngaihsun in na pusuak zaw un. Kihuat nading a hong kibawl hi zaw lo in, kilem theih kik nading a kibawl hi zaw hi. Tua teng khempeuh sian khit ciangin, mai-lamah ii kizop kik theih nading thu kikum khawm kik ding hi hang.

9. Ahi zongin, lungsim khauh tentan in na pusuak nop kei uh leh, nong apkik nop kei uh leh, a ngeina bangin thuakna om ding hi. Hih pen ii theih sa hi. Tel siam ni.

Topa in a Kha Siangtho tawh hong om pih hen la, kilemna thu kikum khawm thei kik sak ta hen.

It takpi tawh kong sam kik uh hi.
~~~~~~~~~~~~~~~~~~~~~~~~
Suak Khaw Ngin, Director
Department of Education
Myanmar Union Mission of SDAs
PO Box 977 GPO, Yangon 11191
MYANMAR

Office Phone: 951-371757, 371758 [Ext.19]
Residence: 951-371759

Emails: ngin.sk@gmail.com, ngin-sk@myanmaradventist.org