A nihun zangkuam lopa lak sawlbawk gei kuama muhlohna munah kipomin kinamin khitui naptui luangin awm kisat kauhkauhin mitsan nilnelin a ki-et kawmkawmun tuhiam dinghiam thei khang kapkhawm ngaungau laizanguh hi.
A galah khangno khat in thaltang khawmin veilam taklam kawitai tai zen ven cin.....
Aki hona uh:
Lawmaw, ong it mahmah ka himaw. Nangpen kei' a dingin na khempeuh na hi. Lungdam mahmah ei' ka nungzang mualmong khupdong nong etet. Kongit mana ka hihtheih tawpa kahih, hihciang atung hihang.Mangngilh ngei peuhmah ken aw,
Mangngilh peuhmah kei ning ei' ka lungtang a kisailai teng..
David leh Jonathan dahna khituilangin mangpha kikhakin utlo pipi kikhenlam manawh uh hi. Noplua khollo ding hi.
Bangdingin mangpha kikhak uh hiam? Bangdingin tua lolai ah om kulse hiam? Tua khangnopa in tua thaltang tawh bang hih hiam?
Tawmkhat suutsuk dih ni:
David zong kumpi Saul inn sungah na ong septak ciangin kumpipa tapa Jonathan tawh ong kilawmta mahmah uh hi. Tua laia tangval ten aomkhonguh teh bangpeuh hih uh aitam
Tulai a te tawh genteh ding nungak melhoih lawmnu ding kikumkum cihloh adang kibatpih luatding genthei khang. David hoh music siam cibilbel ven, zawlla phuaka awiawi dinguh ahih keileh computer lah mek dihdih nai khollo ding cileng,.
Thu khatah nidang ciangin galkapbu galkapmang suaktuak ding hilel theihsa bangin nisimin exercise bawlngekngek ve uncin. muitumtum, namsau tawh satdan kidaldan, kungfu bel naksin mahmah kha dinguh hi. Tuabang nunkhopna mahtawh lawmta ki-itna khang, laisiangtho in Jonathan in David it mahmah ngai mahmah hi, anih un ki-it kingai mahmah uh, khaukhihsa bangin kisuutkik zolo ding zahin kingai uh hi' ci hi.
Bang zahin ki-it uh hiam? hicia tuacia tehna ding omlo, kinak it phamahmah uh cihciang. Ahih hang tulai gam khangtote bangin pasal leh pasal kiteeng bangin na kiteeng lo uh hi. Ei Zomi te mah ong suun uh hi, cih ding hi.
Lungkham sinkham dahna kahna ih tuahtak ciangin ei ong it taktak ih lawm kua hiam cih ki thei pan hi.
David leh Jonathan zong ki-it kingai lua, aki angpomna ding mun azon zon uh teh tua lolai a tungphei vingvenguh na hi hi.
Saul kumpipa tawm khat enkik pak leng, Kumpipa in problem khat ong nei hi. He was crazy. Kha gilo in amah gimsak hi. Hong nasia tektek hi. Alung nopna dingin David in music vatum zel hi. Hih bangteng kawmkalah David minphatna ngah tektek, galhang gal siampen penpa cih mihon pahtawina ong ngahtoh sawnsawn ciangin Saul kumpipa aheh ong suaklua mawk hi. Ahehsuak bek hilo-in David ong huamawk ta hi.
Saul bangzahin heh hiam? bangzahin huatna lian hiam? Ulian heh, sangsiate heh kimungei bekin kumpi heh bel lauhuai linlawn huai mahmah kha dingin um ingh.
David ong liat semsem ciangin Saul ong linglawngta hi. Saul in a teipi tawh atapa Jonathan khatvei, David nih vei khawhphei ngei khin hi. Bek thamloin Jonathan samsia ngiengei lai hi. Huatna ih cih zong nasia buang e mate. Kumpi buang dingin kamsia zangnuam lawmlawm, kikem ning cibuanglo aa. A liangko enden vencin. Ama liangko ciang apha peuhpeuh teipi tawh khawhlup ding sawmsawm. A tawpna ah David tung ong tuta. David bangci leh si theiding cih ong gelgel ta mawk.
Hih sanlian tak hi, David leh Jonathan ki-it zia kilah khiatna. Jonathan teel ding.
Apa lah it, lah pahtawi nuam, apa in lah a it penpen alawmpa thuman lo pi-in thah sawm.
Pa maw? Lawm? koi zaw? Enbel khat lah katem, khat lah kapaai cive hang maw.
Tulai numei leh pasal zong kibanglo uh hi ei'. Na ut penpen teel in kici leh numei ten sumlepaai, hauhna, nopsakna ding mah tel uh hi. Pasalte bel tua cikhol kei.
Bang teeluh hiam cih leh numei mah teel ziau uh hi. Pasal pawlkhatten mawtaw hoih nono khawng, puan hoih tam man tata khawng lei uh hi. Amau deihman ih sak leh numei ten pakta ding cih ngaihsutna tawh a leiuh na hi gige hi. Sunghte inn khawng khantawn kibel theiding hi leh inn hoih, lo hoih zong lei kei kha un teh. he...he...he..
Teelding ollo, teelkhial leh lah lauhuai. Ahi zongin lungsim pumpi kolkhau banga kikhihsa suut dingin lel hi.
Tua leh Saul in a nasem teng kiang leh Jonathan kiangah e-mail khak. Koimun koimun cih omlo amual aguam tuahna peuhpeuhah David that nuam ingh, hih leitang tungpan David ka kaihkhiat zawhna ding a hanciam hing click. send. mawk. Jonathan in bel nidangin na teipi tawh khawhkhawh ngei cin aa khawh khalo mah hive cin maw, Pa. reply lianlo.
Na mitkha ah nabawl dih vevua, Saul kumpipa ann neding sabuai sau tungah nekding dawnding dim zihziah, a ann nekpihding Jonathan omsam, David omlo. Bang a lungngai tam? David bel nabu khinkhian, kumpi inn sungah ann nepa in tua laitak koiah a ne tam? David a omloh tak ciangin Jonathan tung tumikmek, teipi tawh khawh phei pah aidia?
Jonathan dingin kibulh leuleu pak in. Na pa it mahmah. Na lawm zong it mahmah. Ahih hang na pa in na it penpen nalawmpa thahsawm den mawk. Na bangci omdiam? Na it na lawmpa seelding nahiam? Na pa' thumanna in na lawmpa that ding na hiam? Mun dangah taisanin amau tegel kisii sak lel ding na hiam?
Hih munsan takah lawmta ki-itna aki latna penpen mun ahi hi. Jonathan in apa it hi. A it a lawmpa hu in, dal hi. Alawmpa bangci hut a, bangci dal hiam? Dipkuathuai.
Kongit bel ka lawm Vid aw, thaltang thum ong lawn ning in, khangnopa thaltang tawmin na kimnai ah ong pai leh lauhuai lo hi, cih na thei in. Azen zenin thaltang tawmpa agamla ah apai leh Ak Muu mu nabang in na om in.
Tua leh Jonathan ong pai, apa hehlaitak tawh kituak. a thaltang tawmding pa kiangah hia lam pekpekah va tawm Oo. David mangpha khak dingin akua sungpan ong pusuak. Tua ahih manin David leh Jonathan tua zangkuam lolai ah a omkhop a dinkhop uh kul na hi hi.
Na pa leh na lawmpa kikalah hici lecin bang na ci tam? Jonathan in a it a lawmpa hutna dingin a nuntakna khaamin a hun neih gukzat hi. A pa tawh kizopna ah zong a luang khaam mawk hi.
Jonathan pen Saul kumpipa tapa u penpen ahi hi. Galkap hi. Gal zong tampi that hi. Philistines te tawh a kidona uh ah a pa tawh si khawm mawk uh hi. Kumpi David in Jonathan tapa Mephibosheth kemin khankhiat hi.
Hih lawmta tegel tung tawnin phattuamna i ngah khak leh ci-in, a laisiangtho mun tawmkha ong at ingh:
1. Na gen peuhpeuh nang a' dingin kong hihsak ding hi (1 Sam. 20:4)
Ih lawm te kiangah ih ci ngam diam?
2. Ama pumpi a it zahin amah in David a it hi (1Sam 20:17)
Rahab in zong it buang hiven, en zong itleng hoihsam lo ding aimaw?. Ih it takpi leh thaltang lawn ve ni, muk phunsak suausuau lip service hilo zawin ih gawsaili keek ni. Ki-itna kihuutna, lametna thaltang bulh ni.
3. Khatlekhat kinamin, khitui luangin khatlekhat kikah uh hi. (1 Sam20:41)
4. Kei leh nang kikal, leh keima suanlekhakte leh nangma suanlekhak te kikalah a tawntungin Topa om ding hi. (1 Sam20:42)
| 
No comments:
Post a Comment