LAWM DEIH ZAW MAW GAL?

Khua khat ah lokho mi innkuan khat le sabeng innkuan khat ki veng uh hi. Lokhopa te innkuan in, lokho mi a hih mah bang un, vatawt le ak tampi tak khawi in om hi. Sabeng pate zong a mah saben na ah a zattheih ding in, ui tampi tak khawi hi.

 

Sabeng pan ah ta 3 nei in, tua bang in hong om khawm hi. Aihzong in sabengpa ui te hogn gilo thei mahmah in, lokhopa gankhawite hong neksak pahpah teh, lokhopa zong hehlua kisa in, a khua Hausapa kiang ah, a thu le la teng cingtak in gen aa, "Ka veng sabengpan ah, a uite aa ding in gawl hoihtak bawlsak in a kepcing na’ng in thu hong piak sak in" ci-in, hausapa tung ah thu a sung hi. Hausa pan zong, lokhopa thugenteng a ngaih khit dikdek ciang in, "Na vengpa kiang ah, manlang tak-in, na uite aa ding gawl hoih mahmah bawlsak in” ci-in thupia thie lua hi ing. Aih zong-in tua bang in, pia hi zen zen leeng, no vengta na ki mudah pah ding uh aa, nang hong it hong ngai ding innkuan khat na kisum ding aa, hong mudah hong ensan innkuan khat hong kibeh lap suak ding hi. Tuasa’ng in, kei ngaihsutna nong mangzo diam? Veng hoih lah nei ding, na ganno te lah, lungnuam tak-in khawi thei ding hi teh ci-in, a kuppih hi. Lokho pan zong, "Deih zaw mah ing, na cih bang in hi ta hen" ci-in hogn thukim hi.


Hausapan zong, tua aih leh ci-in, lokhopa kiang ah, a vatawt te lak ah a hoih penpen 1 ciat, a veng sabengpa ta 3 teng a piakna dingin a gen hi. Lokhopa'n zong hausapa cih bang lian in, a pia pah hi. Sabengpan zong, a tate vatawt khawi nuamsa in, a vatawtte uh a itmahmah lam a muh khiat tak ciang , a ui khawiten a nektum ding lau aih man-in, kua ma sawl kul loh in, ui gawl hong lam pah hi.A veng ta un hong kilem mahmah pah in, lokho pan ah, a lo pan in a piang mehteh meh gah te, a vengte kholh zel, aveng pan zong a samat te hawm zel cih bangin hong omkhawm in, hong ki ngai mahmah uh.


Ei mihingte i nuntakna ah zong hi bang thu tampi i tuak kha thei hi. Mi khat tawh i ki siat ciang in, ei a kisum hi lel-in, bang mah phattuamna nei hetlo hi. Huaihamna, angsung theihna, kizawh tawhnopna cih lungsim te suah khia in, khat le khat itna tawh kalsuan khawm hi leng, leitung bang za-in a nuam zen diam??????????? Note kong it mah bang in, khat le khat na ki-it un cih laisingtho hong thuhilhna lungngai kawm in............


by-Thanglamtuang