Rome kumpi te hongkhansung in gam kiukna thukham te sungah galkap khat in ama galvan pua ding ( porter) in mikhat peuh peuh taikhat ciang sawl thei hi ci hi. Tua hunlai tak in Rome gam sung ah Gentile ki ci dawibia mi te leh Jews, Abraham suanleh khak te tam teen phadiak hi. Rome mi te sungah Jew biakna muhdah antiJudaism te om aa galkineihna om tawntung hi. Biakna kibanglo minam ki banglo, tatleh zia kibang lo ahihman in kilem hetlo uh hi. Jews te in namdang te ui bangzah in na enniam uh hi.( Canaan numei nu tung ah Topa zeisu in ui cih kammal azat pen hih hang ahi hi. Topa Zeisu in minam deidan man hilo hi)
Mualtung thuhilhna angai mi atamzaw pen Jews te hi. Tua hi aa Galkap khat in a cihciangin a mudah mahmah uh Rome galkap khat in kumpi thukham tawh ki zui in porter taikhat hongsap leh taikhat paibeh lai in ci aa sawl ahihi. Topa Zeisu in gamuk kumpi thu langpang ngeilo hi. Gupkhiatna nasep kumpi te thukham palsat se lo in suahta tak in sem lel hi. Mawhmat na ding zon citak zong uh hi bek aa Topa in palsat lo hi. Thukham 10 leh kamsang te thuhilhna te palsat lo aa palsat hi cia ki mawhmat den hi zaw hi.
Christian te in biakna dang te sang in sepding kilawm ciang bek semlo Topa minthanna ding deihna leh lungsimg ngaihsutna picing zaw hihna tawh sep ding hi ci in hong kisawl hi. Christian te pen biakna dang te sang in thanuam zaw ding , nasep zong lungsim takpi tawh sem aa hamciam zaw ding in Topa’n hong deih hi. Tua hi leh Pasian ta te na hihna uh miten thei ding hi ci hi.
Tu hun ciangin gamdang ah nuntak zong ding in mikhutnuai ah nasem in in om hi. Ih om na gamciat in zong gamthukham na nei kim ciat uh hi. I biak Topa Zeisu in Rome te gam ki ukna a zuihbangmah in ei zong ih tuntun na gam thukham te ih zuih ding a hi hi. Tua bek thamlo in ihveng ihpaam, nasep pih lawmleh gual leh ei hong uk tungsiah te lungsim takpi tawh zahtah bawl ding pen Christian te zia hi sak ding Topa hong hilh a hi hi
Taikhat masa leh taikhat nihna kilamdan na
Taikhat masa leh taikhat nihna kilamdan na
Porter pa ahi Jew pa taikhat khit ciang in ciahkik pah hi leh galkap tawh amau te kikal ah bangmah kizopna ki meltheihna omlo pi in manlel ding hi. A hi zong Jew pa in "tai khat kong huhlai ding" ci leh galkap pa in lamdang sakna tawh "banghang maw" ci kha ding hi. Porter pua pa in nang zong gim ding nahihman in kong hehpih hi tua man taikhat konghuhlai ding hi or ka biak Pasian in hihbang in hongsawl hi ci hi leh Galkap pa nuam mahmah ding aa amau te kizopna hongki pan thei ding ahihi. Amau tegel pen nidang aa Jews leh Romans hihman aa galkinei te hinawn lo lawmta hong hi pah ding uh hi. Topa Zeisu in ei Christian te zong tuabangmah in midang te tawh kilawmta ding in hong deih hi. Ih biak Topa hongthupiakna in thukham zuihna tawh taikhat na pai bek thamlo in Pasian itna zahtakna tawh taikhat nihna pai behlai ding aa midang te tungah Topa minthang sak ding a hihi.Bangzahin manpha hiam? Puansungsilh hong sut te na puantungsilh zong pia in la taikhat thuzawhna tawh hong pai sak te taikhat na paipih beh lai in.
Itna tawh
Mangpi
No comments:
Post a Comment