SINNA 7 May 9 - 15 "ZEISU, KHASIANGTHO, LEH THUNGETNA"

Youtube pan na ngaih nop leh.

https://www.youtube.com/watch?v=EicZC4VTz7U

NIPINI (Sabbath) Nitak lam May 9

SIM DINGTE: Luke 2:25-32; John 16:5-7; Luke 23:46;

Luke 11:1-4; Matt. 7:21-23; Luke 11:9-13.

KAMNGAH: Khat vei ka cih in ah, ngen un. Na nget uh leh,

hong pia ding hi. Zong un, na zon uh leh, na

mu ding uh hi. Kongkhak keu un. Na keu uh

leh, hong kihon' ding hi. Bang hang hiam na

cih uh leh, angente khempeuh in angah ding

uh hi. Azongte khempeuh in amu ding uh hi.

Akeute khempeuhte ading kongkhak ahon'

ding hi. (Luke 11:9, 10).

Lungdamna thubu 3 (Matthew, Mark leh Luke), Luke

in Khasiangtho leh Zeisu kizopzia adangte sang in lim gen

zaw hi. Matthew in Khasiangtho 12 vei gen hi. Mark in 6

vei leh Luke in 17 vei leh Sawltak thubu sung ah 57 vei gen

hi. Zeisu mi bang a hong pian a kipan leitung bup a nasem

ding a hong sawlnate ah Luke in Zeisu leh Khasiangtho kikal

ah kizopna mu hi. Hih kizopna pen ih honpa nasep ih telsiam

nang in thupi hi. Luke in Zeisu nuntakna leh anasepnate

ah thungetna' thupitna zong hong lak hi. Pasian takpi hi a,

Pa leh Khasiangtho tawh kikim in aleitung nuntak sung in

thungetna ah ih etteh ding in hong lak hi. Zeisu i thunget

kisam leh, ei kisam san lai ding hi ve hang maw?

Thunget denna lo tawh, zulhtak in thumann lampi

pan pial kha thei ding hi hang. Galpa Satan in hehpihna

tokhom zuatna lampi khaktan ding hanciam den hi.

Hehpihna ih ngah loh nang leh ze-etnate upna leh thungetna

tawh suahtakna vang ih ngah loh nang a abawl ahihi. E.G.

White, Khazih Kiang Zuatna, S.C. p. 95.

NIMASANI (Sunday) May 10

Zeisu leh Khasiangtho (Luke 1:35, 41).

Luke pen Gentile thu um mi khat ahihi. Nungzuipi

Paul tawh khualzin khawm a thupha tangkopa khat ahihi.

Luke in Zeisu thu kician tak in asuahna pan van alut kik

dong leh Paul kizelhzia zong at hi. Luke in hih vaite pen

Khasiangtho makaih hun Pasian kiang pan a na lamdang bang

in mu hi. Zeisu nuntakna ah Too thum Pasian in hotkhiatna

vai hong hawm sak a tua vaite ah Khasiangtho' makaihna vai

hong pho lak hi.

Luke 1:35, 41 leh Luke 2:25-32 sung ah Khazih mi

bang a hong paina vai ah Khasiangtho nasepna bang hong

gen hiam?

Zeisu nasep masuan pen Khasiangtho nasepna tawh

ma kipan hi. Luke genna ah tuiphum John in amah'n tui

tawh baptize a Zeisu in Khasiangtho tawh hong baptize ding

ci hi. Zeisu tui kiphumna ah Pa leh Khasiangtho in zong Zeisu

pen Honpa hihna masuan ah koppih hi. Pa Pasian in tunglam

pan a it Tapa Khazih mite gum ding a kisawl pa cih tangko hi.

Tua lai tak in Khasiangtho vakhu lim la in atung ah hong

kilang hi (Luke 3:21, 22). Tua pan in Zeisu pen Khasiangtho

tawh kidim hi. Galpa Satan tawh kisai ding in gamlak ah

kuan hi. Amasuan akipan hi kawm pah hi (Luke 4:14).

Nazareth a Zeisu thugen masa pen in Isaiah

agenkholhna a Amah Messiah ahihna vai ngaihsun kha sak

hi. "Topa Khasiangtho ka tung ah om hi" (Luke 4:18, NKJV).

Khasiantho Zeisu tawh omkhawm den a Ama thahatna ahihi.

Van akah ciang in Khasiangtho, anungzuite tawh omkhawm

bek lo in Khasiangtho silpiakte angente khempeuh piak ding

thu zong kamciam hi. Pa leh Amasuan ah akoppih den

Khasiangtho pen mah in nungzuite upna masuan ah tha

apia ding ahihi. Tua hi a, Khasiangtho makaihna pen

Christian nuntakna ah thupi mahmah hi. Tua ziak in

Khasiangtho gensiatna in mawhna asuksia pen mawhna

ahihi.

Khasiangtho makaihna ih ngah thei nang in kimanna

anei lampha bang teng hiam? Ama aw in eite hong

lungkhauh sak loh nang in bang ci kidop thei ding ih hi

hiam?

NINIHNI (Monday) May 11

Zeisu' Thunget Nuntak (Luke 3:21)

Zeisu thungetnate pan Luke bek in aciapteh pawl

khat om hi. Anuntakna ah vai thupi anawk hun ciang in

thungetna tawh anuntakzia anuai a vaite ah kimu thei hi.

1. Zeisu in aki tuiphum in thungen (Luke 3:21). "Hun

thak vai thak hong kipan ding hi ta hi. Anuntakna galdona

sung ah lut kipan ta hi. E.G. White, Khangcin Lunggulh,

D.A. p. 111. Zeisu' singlamteh lam azuan mipi lak a Ama

nasepna vai thungetna lo tawh kipan ngam lo hi.

2. Nungzui 12 te atel ma in Zeisu in thu ngen. (Luke

6:12-13). Makaite'n nungzui mawk tel lo uh hi. Zeisu in bel

anungzuite ding te atel mawk bek hi lo hi. Amasuan ah

akipumpiak a atel siam ding te atel ahihi. Amau masuan

pen mihingte sep khempeuh ah vai thupi pen ahihi. Zeisu

nasep azom lian ahihi. E.G. White, Khangcin Lunggulh,

D.A. p. 291.

3. Zeisu in anungzuite ading thu nget sak (Luke 9:18).

Nungzui hihna in Zeisu tung ah cihtakna leh Ama telcianna

lo tawh piang thei lo hi. Ama athei takpi nang un "gamdai

thunget nei hi. Tua khit ciang in, " Kei kua hi hong ci na hi

uh hiam? cih dotna tawh phawngkhia hi." (Luke 9:20,

NKJV).

4. Zeisu in mel kilamdanna vai ma in thu ngen. (Luke

9:28-36). Pasian' "it Tapa" ahihna thu kipsakna anih veina

hong ngah hi. Pa leh Tapa kikal kizopna bang mah in khel

thei lo hi. Tua thungetna in zong nungzuite, "avangliatna mit

tawh amute teci te suak hi.

5. Gethsemane huan ah Zeisu in thungen. (2 Pet.

1:16, NKJV). Hih thungetna pen gupkhiatna vai a thupiangte

sung ah athupi pen hi kha ding hi. Hih mun ah Honpa in

van leh lei kinai tak in hong zom khawm hi. Hih thu hang

mah in thu 3 hong phut a:

a. Pasian lunggulhna leh hong deihsakna,

b. Sihna vai leh sisan suahna vaite dong ah Pasian thu manhna;

c. Pasian deihna bang sepna ah gualzawh nang tha ngahnate ahihi.

6. Zeisu in Pasian khut ah anuntakna ap in thungen

(Luke 23:46). Singlamteh tung ah Amah kampau nunung

pen, "Pa aw, ka nuntakna na khut sung ah kong ap hi" na ci

hi (NKJV). Thungetna deihna ah vai thupi pen hong thei

sak hi. Sihna leh suahna ah, galte leh lawmte ma in, ih

ihmu a khua ih phawk zong in thungetna in Pasian tawh

hong kizom sak den thu ahih ding kisam hi.

Hih gentehna in ih thunget nuntakna ah bang phawk

sak hiam?

NITHUMNI (Tuesday) May 12

Thungetzia Khen 1 (Luke 11:1-4)

Luke 11:1-4 sim in. Hih munte in thungetzia'

nasepzia bang hong telsiam sak hiam?

"Pa" cih pen Khazih in Pasian agenna ah adeih pen

kammal ahihi. Lungdamna thubute sung ah atawm pen

170 vei na ki zang hi. Pasian pen "Pa" cih a ih sap ciang

in, Pasian pen pumpi tawh om ahihna leh akibatpih

mihingte tawh kikholh khawm nuam asa thei takpi, itna

leh deih sakna tawh adim mihingte ading a Pa mah abang

takpi cih asang ih hihi. Leitunga ih Pa te tawh kibang lo in

avanglian, mun citeng a om thei den, na khempeuh amu

athei, paubang lo, asiangtho Topa ahihi.

"Van a om Pa" ih cih ciang in asiangtho pumpi tawh

om Pasian hi a Christian biakna pen ngaihsutna, upmawh

thu, na khempeuhte sung a om bang a ki um pasian zong

hi lo hi.

"Nang ma Min siangtho ta hen" (Luke 11:2, NKJV).

Hih mun ah Pasian pen asiangtho ahihna hong kidawk kik

hi. Ama nungzui a ki nei te in Ama min, ih gen ih hawmnate

ah leh ih sep ih bawlnate ah ih siangtho sak ding ahihi. Ama

kazui ci kawm sa a Ama tung a mawhna bawlna in tua min

zahkona suak hi Matt. 7:21-22 sung kammalte in Pasian min

bang ci siantho sak ding cih hong telsiam sak thei ding hi.

"Na gam hong piang ta hen" (Luke 11:2, NKJV).

Lungdam thubu in Pasian gam 100 vei val: Luke ah 40 vei

dek tak Matthew 50 vei dek tak leh Mark ah 16 vei, leh John

ah 3 vei cih bang teng ahihi. Zeisu hong paina in leitung a

hehpihna kumpi gam leh van a minthang kumpi gam te

atakpi ahihna alak ding a hong pai ahihi. Amasa ah lut lo

in, anihna ah kilut thei lo hi. Tua ahih man in gumpa in

anungzuite'n anihna alamet uh leh akhatna sung ah

atualbual ding in lamen hi.

"Vantung a na deihna akicin mah bang in leitung ah

kicing ta hen" (Luke 11:2, NKJV). Vantung a Pasian deihna

thei in mang uh hi. Tua thu Zeisu in saang in leitung a zong

tua bang ding mah lamen hi. Pasian deihna bang leitung a

kisem a, ei mihingte khat sim tawh akipat ciat ding deih hi.

Topa na thei takpi hiam, athu bek a athei na hi

hiam? Na thungetna in hong koici kinai sak zaw thei ding

ahi hiam?

NILINI (Wednesday) May 13

Thungetzia: Khen 2 (Luke 10:38-42).

"Nisim a ka khamkhop ding uh ann hong pia in" (Luke

11:3, NKJV). Topa thungetna pen pia cih kammal tawh kipan

hi. Mihau mahmah te muk leh kam ahi a mizawng daipam

tagahte kiang pan ahi zong in hih thungetna in Pasian ah

kingakna leh Ama muanna ah kinga hi. Ih vekpi in Pasian

tung ah akinga ih hi a, "pia" ih cih ciang in na hoih khempeuh

hong pia pa hong phawk sak hi. Amah in piang sak pa hi a,

Ama sung ah anungta, agamta, akampau ih hihi. Amah in ei

te hong piang sak pa hi a, ei leh ei a piang ih hi kei hi (late

100:3, NKJV).

Pasian in ih kitang sapna khempeuh hong pia ih Pa

ahihi. Hih kamcian pan in alamdang bang thupuak ih mu

thei ding hiam Luke 11;9-13?

"Ko te mawhna zong hong mai sak ta in" (Luke 11:4,

NKJV). Mai sakna pen lungdamna thu laigil ahihi. Pasian

mai sakna lo tawh gupkhiatna ih nei kei hi: "mawhna sung

ah asi na hi uh a . . . . ahi zong in Pasian Zeisu tawh nuntakna

thak hong pia hong guan hi. Ih mawhna khempeuh hong

mai sak hi. Pasian mai sakna angah te'n amau tung a khial

te it thei ding uh hi. Mawhna mai sak na ding thu ngetna

ah "ei mai sak bangh" (Luke 11:4, NKJV) hi ding ih cih ciang

in Pasian hong mai sak nang in ei mai sak na kisam masa

cih na hi zaw lo hi. Ei hong ki mai sak ahih man in Tua mai

sakna angah mite tawh nungta khawm in Ama itna leh mai

sak na bang ei tung a hong mawh te tung ah mai sakna piak

ding ahihi.

"Khelkhemna hong thuak sak kei in la, hong

honkhia in" (Luke 11: 4, NKJV). Thu 2 ih ngaihsut ding

om hi. Amasa pen ah khialkhemna pen mawhna hi lo hi.

Greek kammal in khialkhemna pen peirasmos hi a -asmos

tawh atawp hi in apiang san thu hi a thutawp hi lo hi.

Laisiangtho in khialkhemna pen vai khat amansiang dong

apiang thupaizia ahihi. Khialkhemna pen mawhna hi lo

na pin ih thuak zawh kei leh mawhna suak hi. Nihna ah,

Pasian in khialkhemna pan lo hi (James 1:13). Zong thuak

sak phot kha mah ding hi. A hi zong in mawhna sung

lutpih ngei lo hi. Tua hi a thungetna in Satan thang te ah

ih awk khak loh nang in Pasian in hong panpih ding in tha

hatna aneih lam hong phawk thei sak hi.

Luke 11:1-4 enkik in. Ahuam khak thu teng

ngaihsun in. Hih thute tuah khak nang hang in thungetna

tungtawn in bang ci bang in thu theihna thuk in picing thei

ding a hi hiam?

NINGANI (Thursday) May 14

Thungetna Vai Sinbeh Ding Thute (Luke 18:9-14)

Thungetzia ding agen khit phet in, zan kim lai a

alawmpa kiang a huhna ngen mipa gentehna pia hi (Luke

11:5-13). Hih gentehna tungtawn in thu nget tangtang ding

ahih zia hong gen hi. Anasep zawh kuan lam in Zeisu in

anungzuite kiang ah amawhna te uh hang a dah in

kiniamkhiatna tawh thu nget ding vai gen hi (Luke 18:9-14).

Hih munte in thungetna pen biakna ngeina khat hi mawk lo

in, muanhuai tak a Pa tawh tonkhawm holimkhawm a nuntak

khopna ahihi.

Luke 11:5-8 sim in. Zeisu in mite thungen den ding

a, hanthotna agen ahihi. Thunget pen ngeina khat a neih

mawk bek ding hi lo hi. Pasian tung ah kinga a Amah

tawh kizop denna bulpi ahih ding kisam hi. Thungetna in

kha lam thu husanna ahihi. Tua lo tawh kha lam thu ah

asi ih hihi. Zeisu gentehna a veng leh paam bang a a om

lo vengpa khat' thu gen hi. Alawmpa zan kim lai a ann

lum nget tangtangna in azankim kitangsapna huh sak zo

lo hi. Ahi zongin atawpna ah, tua bang a lungkhauh mi

nangawn khawl lo a kong kieuhna thuak zo lo lo hi. Thu

angen tangtang mipa tung ah Topa'n huhna pia zaw lo

ding hiam?

Tua bang hanciam tentanna in Pasian lungsim khel

ding cih hi zaw lo in hong muang sak thei zaw ding hi.

Luke 18:9-14 sim in. Thungetna athupitna vai bang

hiam? Pharisee pa in ama sepna hoih te tungtawn in Pasian

san ding lamen hi. Siahdongpa in ahih leh Pasian hehpihna

tung ah kinga in amah kipum ap hi. Pasian in eite hong

sanna pen ei sep ei bawl tungtawn hi lo in Ama hong

hehpihna hang bek ahihi. Tua bang hehpihna pen mawhna

hang a adeih takpi akiniamkhiat lungsim tamkham mite

bek ahihi.

"Gualzawhna aleh zawhzawhnate in kiniamkhiatna

pan a hong pai ahihi. Singlamteh phung a akun mite

minthanna lukhu in ngak hi". E.G. White, Kamsangte leh

Kumpite, P.P. p. 590.

Topa athei nai lote in amau sang a siahuai zaw te

tawh kiteh kak uh hi. Amau sia lua lo bang a akimuh nang

uh ahihi. Hih bang omzia bang hang in siahuai mahmah

hiam? Mite sang asiat zawk leh bang phamawh hiam?

KIGINNI (Friday) May 15

SINBEH DING: "Pasian huhna leh vangliatna deih a nisim a

nasia tak a thu angente in lungsim picing, thumann leh

omzia dik telsiam zaw sem in, Khazih zialehtong picing

lunggulh sem ding uh hi. Pasian tawh ih kizop den nak leh

midangte tung ah ih lungtang a om khuavak leh lungmuanna

hawmkhia thei sem ding hi hang. Thungetna in thahatna

ngah theih nang in lungsim nei thei sak a, bang ci nget

ding cih ngaihsun thei sak hi. Hih thu 2 te in mihingte

lungsim nisim nuntak na ding in bawlpha a lungmuang

tak in nungta thei sak hi." E.G. White, Mualtung

Thuhilhna, MB. p. 85.

"Pasian pen Pa ci a ih sap ciang in, Ama tate

khempeuh ih sanggam aci ih suak hi. Eite khempeuh in

tua innpi sung a om ih hihi. Ih thunget ciang in ih veng ih

paam te zong ih nget sak ding ahihi. Ama a ding bek a

thupha ngente athunget uh amann nai lo ahihi." Mualtung

Thuhilhna, MB p. 105.

KIKUP DINGTE:

1. Luke in Zeisu leh Khasiangtho nasep pen Ama lai at tawh

aman ta hi lo cih hong gen hi. Mi khat peuh in Christian

pawlpi tangthu atel nang in Luke laibu at nihna Sawltak

thubu sim ding ahihi. Tua hi leh Christian te masuante

ah leh anasem te tung a Khasiangtho nasepzia ngaihsun

kha ding hi. Luke bek mah in nungzuite kiang a Zeisu

vaikhakna ahi Jerusalem a, "Asangna pan vangliatna na

ngah mateng uh" (Luke 24:49, NKJV) ngak phot ding vai

gen hi. Hih pen munkhempeuh ah singlamteh a kithat,

athokik honpa thu gen ding a apaikhiatna ding thu ahihi.

Tua khit ciangin Luke in Sawltak thubu at hong kipan a

Khasiangtho kamciamna tawh hong pan in Pentecost ah

kamciam apicinna gen hi (Sawl. 2). Hih thute in pawlpi

nuntakna vai ah Khasiangtho nasep thupitzia bang hong

gen hiam?

2. Thungetna mahmah zong hih vai ah Pasian lo a apian

theihlohzia leh Ama tung a ih kingakzia hong koici lah

hiam? Bang ci kha lam thuthuuk, hih gentehna tawh,

Zeisu in hong telsutpih hiam (Luke 18:9-14)?