KORIN KHAU A PAU LAMDANG
KORIN KHUA A PAU LAMDANG (OR) KAM TUAM PAU
1Korin alian 14 na buppi ih sim ciangin Paul hun lai a Korin khua mite pau lam silpiak pen na buaipih mahmah uh cih ki mu thei a, tua ban ah pau lam silpiak angah dan uh leh azatdan te uh zong tulai a ih gam a piangthak a alawp mahmah te zangdan bang a mumal neilo in buaina leh omzai nei hetlo a, awt vatvatna bang nam deuh hi leh kilawm hi.Paul in tua pen thei in Pasian mann pan a pau lam silpiak Penticost ni a pen tawh kibang in na ngaihsut thei hetlo a, pilvang tak leh dawp bawl mahmah sa in hilh in na taii ta hi.
Pau lamdang a thugen tak ciangin mihing te kiangah gen hilo in Pasian kiang ah gen hi zaw a, kua mah in athu gen pen na theilo in, ahih hangin Khasiangtho in thusim agen ahihi.Ahi zong in Pasian thu ahilh te pen mite tungah thu gen hi a, mite tung ah huhna, hanthohna, leh hehnepna apia a hihi. Pau lamdang apau te pen amau mahmah phattuam na ding apau hi a, Pasian thu ahilhte ahih leh Pawlpi phattuamna dingin nasep ahihi.Note khempeuh pau lamdang napau theih dinguh kong deihsak hangin Pasian' thu hilh ding siamna na neih dinguh kong deihsak zaw hi. Pawlpi in phattuamna angah theihna dingin note lakah akhiatna agen theih pah ding om ahih kei buang leh, pau lamdang apau te sangin Pasian thu hilh te lian zaw ahihi ci in 1Korin 14:1-5 ah cihi.Tha khat thu in pau lamdang azat na uh pen paihkhiat sak lianlo in, thupi saklo zaw deuh in na gen to zel hi. A gen zel na ah pen , omzia leh mumal neilo in a awt buaibuai nate uhpen na mawhsak mahmah hi.Tamngai te guitor te nangawng mumal lo in in kitum leh bangla aleh asak uh kua in theithei ding ahihiam?Pengkul te zong mumal omlo in na gingleh kua in galkap dingin kithawi ding ahihiam?Tua mah bangin note inzong nathu gen kammal te kician sinsen kei leh kua in note thu gen theithei ding ahihiam?Leitung ah pau nam tuamtuam tampi tak na om thei mah dinghi,ahih hang in omzia neilo khiatna na neilo cih limlim na omlo hi ci in hilh kawm leh na taii kawm ahihi.
Tua ahih man in mumal omlo leh omzia khiatna neilo a pau na leh seidei gawpna, agen pa leh angai pa nangawng ii theiloh akhiatna gen kik ding a zong aki genkik theilo nam te pen Lai Siangtho a pau thak a thu gen theihna pau lam silpiak akigen tawh pen na kibang hetlo mawk hi.A omlo cih ding pen hi hetlo a, ahih hang in Pasian kiang pan a ngah cih ding pen na hih mel hetlo hi.Bangbang ahizong mi te in Pasian kiang pan a pau lam silpiak ngah uh ahih uh lehzong akhiatna agen theikik ding uh hi a,a khiatna agen theihna ding un Pasian kiang ah thu ngen ta uh hen.1Kor.14:13.
Tua banah amasa a ii gensa mahbang in 1Kor 14:2 na thu, Zo Lai siangtho sungah "Pau lamdang or kamtuam pau" cih pen "Unknown" cih pen behlap tawn ahihi.Greek Lai Siangtho sung lamah na omlo a,"Pau" cihna Glossa cihna mah ahihi.Hih bang in simleng, hih lai a thu awmzia leh agen nopna pen kitheithei lel ding hi.Zomi te lakah Piantit pau tawh thu gen te inah(akhiatna telding a gen maw letkhia kik maw tua bang hikei leh) mihing kiangah gen hilo in, Pasian kiang ah gen hizaw uha,kua man athu gen natheithei lo uhhi.(Pasian bek in theihthei bek hi.)Ahih hang Khasiangtho vangliatna tawh Pasian thusim te gen ahihi.Tua ban ah pau dang German pau (theihtheih loh) a thu gen pa in amahbek phattuam nading a gen ahihi,14:4 etc.Tua bang dan zel in tua pen a omzia leh pai dan mang hi zaw hi.
Ei Greek pau malkhat nangawng zong theilo te kiangah pen Greek pau in Pasian thu hong hilh leh zong,hong kilet khia kik maw hong kihilh cian kik maw ahikeh aleh bel agen pa ading in mi namdang pi kihi ding a, a pau pa zong kei ading in mi namdangpi khat kihi ding hi. 1Korin 14:11 en in.
Tua mah bangin theihthei loh pau tawh thu ngen hileng zong,ih lungsim ih ngaihsut na khempeuh tawh thu ih ngen a, ahih hang theihna lam ah pen hamphatna leh phattuam pihna ih neituan loh hi cih Paul in hong hilh khawm hi.1Kor.14:14 bang hang hiam cih leh pau lamdang tawh thu ka nget ciang in lungsim takpi tawh thu ngen ka hih tei hangin bang ngen ka hihiam cih ka ngaihsun thei kei hi.Theihthei in thu ka ngen ding hi.Tua bang hikei leh Khasiangtho in thupha hong piaksak lehzong…. Bangcih bangin na thu gen theilo pipi in Amen hong cihsak theiding ahi uhhiam?Na lungsim bek tawh Pasian kiang ah lungdamna thu na ko a,mi dang te in hong theihpih lo hi,(1Kor 14:15,16) ci in Paul in hilh kawm leh taii kawm na suah hi.
Tua banah amaute sangin ,Khasiangtho silpiak pau dang a pau theihna leh thu genna tam anei zaw cih zong Korin khua mite pen na hilh hi.(14:18).Ahih ta zong in pawl pite biak kikhawpna sungah pau lamdang ,kamtuam pau kam tulsawm bang kapau sangin midang te phattuam nading in atheih ding uh kammal nga bek ka pau zaw ding hi ci in mumal leh omzia neilo in pau na pen ademzia leh thupi asakloh zia theihtheih ding in na gen hi.1Korin 14:19.
Tua bekzong hilo in, hih pau lam silpiak thugenna pen a umte adingin ciaptehbek hilo in a umlo mite adingin ciamtehna ahih zawkna thu zong na gen hi.Thu hilhna ahih leh pen thu umlo mite adingin ciamtehna hilo in a um mite ading ahih zawk thu na gen hi.1Korin 14:22,tua ban ah pawlpi mite biak kikawpna sungah mumal omzia neilo a awng vakvak uh hi leh, thu umlo mi Pasian theilo te honglut in hi leh lamdang sa mahmah ding hi.Ahih hangin theihtheih pau tawh thu hilh in hileh pen a hoih lohnate uh leh amawhna te uh leh alungsim aninna te uh kithei in, bukkhup in Pasian na bia ding uha, amawhna te uh paisan in hong piangthak ding uha,Pasian amau te lakah a omtaktak lam te hong thei in hong pulak khia ding uhhi.1Korin 14:28,29 en in.
Tua hi in,pau lamdang thu gen nuam a omleh zong, nih bang, ahih kei leh atam pen in thum bangin gen bek dinga tua sang tamzaw kiphal lo, tua zong agen uh ciangin kua in bang gen cih kingaihsak lo a buai nuainuai lel hi lo in khat aman khitciang in khat in abanban in gen ding a, mi khat in akhiatna gen ding a,akhiatna agen thei aom kei leh pen, kikhopna inn sung ah pau lamdangin apau nuampa gamdai tak in om ding hi.1Korin 14:27,28 en in…aban zop lai ding.
Pastor. P.L Biakchhawna
No comments:
Post a Comment