A Beibang Mite & Kamsanna Silpiak
Khang tangthu-te ah en leng Pasian in a citak Ama' nungzuite na nei hi (Mang. 12). Tua mah bangin LST alui leh athak te sungah zong Pasian' mite' lampialna zong na om hi (Ezek 23; Mang. 17; 2 Thess 2:1-4). Hih nungzui micitakte pen "abei bang Pasian mite" kici hi.
I. Hun Nunungah Abeibang Pasian' Mite (Mang. 12).
1. Khang Tangthu:
Mangmuhna Thubu 12 aa, numei acih in limcinna hi aa Pasian mite cihnopna hi (Isai. 54:5-6; Eph 5:25-32). Tanglai gulpi acih in Satan agen nuam ahi hi (Mang. 12:9). Satan in tua numei ii tapa, Pasian' tokhom ah aki la to, Jesu Christ suksiat ding hanciam hi (Mang. 12:4-5). Tua numei atai hun sung mah in Satan in thu-um mi citakte nakpi tak in bawlsia hi (Mang. 12:6, 13-16). A tawpna ah, Satan in numei suante lak pan aom laite tawh galdo dingin apai khia hi (Mang. 12:17).
2. A Beibang Mite' Zia leh Tong:
Amaute in thuciamna singkuang (Mang. 11:19) sunga kikoih Sabbath a kihel Pasian' thukham sawm (thupiakte) zui in leh Jesuh tecipanna len uh hi (Mang. 12:17; 14:7). Tua ban-ah amaute in Jesu sungah upna leh thuakzawhna nei uh hi (Mang. 14:12). Jesu in amaute' nuntakna laigil hong hi hi.
3. Jesu Tecipanna acih in bang hiam?
Jesu tecipanna ih cih in Mangmuhna Thubu leh lungdamna thu a kihel kamsanna thupuak cih ahi hi (Mang. 1:2,9). Jesu tecipanna in kamsanna kha hi (Mang. 19:10) aa kamsanna silpiak hong guan pen Khasiangtho ahi hi. Mang. 22:9 in Mang. 19:10 tawh kinai mahmah hi. Hih sunga Jesu tecipanna anei sanggamte in kamsangte ahi uh hi. Tua in a citak abeibang Pasian mite in Laisiangtho thupisak uh aa, kamsangte' thupuakte Laisiangtho tawh kituak in saang uh cihna ahi hi.
II. Adventist Sungah Kamsanna
Charles Darwin ii pat khiat "evolution theory: mihing pen zawng pan piang" leh "sih khit ciang kha om / sikha hopihna" updan sandante tawh kum zabi 19 kipat aa kipan mite ngaihsutna leh mukhiatna tampi hong khangto uh hi. Mi tampite amau leh amau Pasian kamsang in kigen uh aa, akhengval lua in om uh hi. Tua bang hun kikheel kawmkal ah Pasian in kamsanna silpiak adik hong lak khia hi.
William Foy: Tuiphum pawlpi mi khat ahih mah bangin Pasian' nasem dingin kiging hi. Jesu hong kum baih tading cih um hi. January 18, 1842 ni-in mangmuhna khat hong ngah aa, thu-um mite leh thu-um lote thu kikhenna mu hi. February 4, 1842 ni-in a nih veina mangmuhna ngah leuleu hi. Amuh khiat thute gen khia dingin kisawl hi. A lian mahmah lungkiatni ahi, October 22, 1844 ni madeuh in a thum veina mangmuhna hong ngah lai hi. A mangmuhna tello ahih manin taangko khiat ding sawlna nial hi.
Hazen Foss: Pilna nei khat hi aa, Jesu hong kum baih tading cih aum khat mah hi. October 22, 1844 ni madeuh in mangmuhna masa ngah hi. A nih veina hong ngah leuleu ciangin tua thu agen dingin kisawl napi, amah'n nial hi. A thum veina angah teh agen kei leh athuak dingte tawh ki vau napi, nial teitei hi. A tawpna ah kisuanna tampi tawh mite kaikhawm dingin amuh thute gen khiat ding hong kipat teh, a mangmuhna teng ki lak khiat sak aa, bangmah gen thei nawn lo hi.
Ellen Gould White: (A nung lam ciang Ellen G. White kici), neu tung panin adam het lo khat, kum thum sung khawng bek sang akah khat hi aa, kum 12 aphak ciangin tui kiphum hi. William Miller thugente hong saang uh aa, Jesu hong kum baih tading cih hong up manun a innkuan un Methodist pawlpi khalna (disfellowship) kipia hi. Kum 17 aphak ciangin Ellen in mangmuhna masapen hong ngah aa, a ngah thute nial het lo in hong gen khia pah hi. A mangmuhnate lai tawh gelh khiat ding Pasian in asawl ciangin, apat lam in hamsa sa napi, tawmvei khit ciang hong baih semsem hi. Kum tampi mah hong dam in, akhan kum 87 acin 1915 kum ciangin hong si ta hi. Midangte'n nasia tak aa akan khiat teh amuh uh Laisiangtho doctrine-te amah'n hong gen khia ziahziah hi. Laibu tampi tak hong gelh khia aa, mimal tampite leh Adventist pawlpi tha-khauhsak hi. Biakna sang leh pastor tintan cihte kah ngeilo hi. Hih kamsanna in mihing sep theihloh Pasian kiang pan ahihna Amah'n gen hi. Ellen White in kamsanna a ngah in Foy nungta lai hi. Nang muh dan lian mah kei zong hong kilak ci hi. Foss zong a sanggam nu inn khat ah Adventist-te in Ellen White thugen ngai ding kituahna ah va om kha hi. A nung ciangin hih mangmuhna kei tung pan kila khia in ama tungah kipia hi, ci hi. A taktak in Ellen White in mangmuhna masa a ngah lai-in Foss in hih mangmuhna na nial khin hi.
III. Ellen White Mangmuh Laitak A Omzia:
Mangmuhna kipat ma in mite in Pasian' ompihna ngah uh hi. Ellen White in mangmuhna hong ngah ciangin "Pasian Minthang hen" ci-in awng hi. A tha bei in sual tungah puk hi. Khat veivei atamzaw thahatna ngah hi. Gtn: pound 18 agik Laisiangtho pen akhut zaak in nai lang sung tawi zo hi. Nak lo hi, ahi zong a lungtang kisai, vun color kilaihna omlo hi. Amit hak sa in, mun khat en gige hi. A mangmuh laitak doctor atuam tuam in sit uh hi.
A mangmuh laitak in akim apaam aa omte phawk kha lo hi. A mangmuh sungin tu, ding, lampai (hkl) lum aa, akhut akhe omzia-te etlawm hi. Mangmuhna aman kuan ciangin nakpi takin naak aa, damdam in anak hong maan kik in, pumpi thahatna hong nei kik hi. Mangmuhna abei khit teh a ngei bangin hong cidam kik hi.
Hih Ellen White omzia-te in kamsang Daniel ii mangmuh laitak aa phutkhak omzia-te hong phawk sak hi. A kamsanna thute in kamsang masate mah bangin abeisa hun, tuhun leh hong pai lai ding hunte tawh kisai (huam gai) hi. (Ama' laibu: KIDONA LIANPI sim in). ? Ekkehardt Mueller
No comments:
Post a Comment