THU LAHKHOLHNA
Khris Dawn Dingin Kiging Khol Un
Seventh-day Adventist-te khempeuh in Jesu hong pai kika, a va bawl sa inn nuama om dingin amaute hong lak ding kaal ngaklah mahmah uh hi. Tua vantung inn nuam sungah, mawhnate om nawn lo dinga, cihmawhnate, gilkialnate, zawn nate, sihnate om nawn lo ding hi. John in midikte' hamphatna a kimuhsak lai-in, a cihna ding thei vet lo-in, "En dih un, Pa in eite bang zah takin hong it hiam? Pasian' tate kicih theihna ih ngah hi...Tu-in Pasian' tate ih hihi. Bang ih piang lai ding ih thei kei hi. A hih hangin ih theih pih zawhna ciang pen, Amah hong kilat ciangin Amah tawh ih kibang ding hi." 1 John 3:1,2 ah na ci hi.
Jesu tawh kibanga gamtatna pen Pasian in A mite' neih dinga hong ngim sakna a hihi. A cil lim pheta mihingte' om zia ding Pasian' hong ngim sakna in Ama' meel suuna hong bawl hi-a, Pasian' a bang gamtat hoih ding hong deih hi. Tua bang a pian theihna dingin ih nu leh ih pa masa te in, Eden huan ah Jesu leh vantung mite tawh maitang kimu-in thuhilhna ngah uh hi. A hih hangin mawhna a bawl khit uh ciangin, tua bang a vantung lam mite tawh maitang kimu-a, ki honading akhuan om thei nawn lo hi.
Tua ciangin mihingte lah kimot nusiat cip thei lo-a, Pasian in mihingte tungah a kilahna dan ding lampi hong bawla, a kidawk zaw deuh mite kamsangin hong zang hi. Pasian neh zaw deuh mite, Pasian' mite tungah A deihna thu om bang puak sak zel hi. Israelte' tung ah Pasian in 'Note lakah kamsang khat om leh Keimah Topa in, Kei nong theihna dingun, mangmuhna leh mangmatna tawh tua pa tungah thu kong gen ding hi" ci hi. Num. 12:6.
Pasian in A mite thuhilha, pilvang sak ding deih hi. Tu-a a nuntak sung bek uh hi lo-in hong pai lai ding ah zong a theih a phawk ding uh deih hi. 'Topa in, A nasem kamsangte tungah A thusimte lak khia lo pi-in bangmah mot hih lo ding hi.' Amos 3:7. Hih pen Pasian mite leh leitung mite kibat lohna a hihi. 1 Thes 5:5. Kam sang khat' nasep in, mai lam thu ding hilhkholhna bek hi nai lo hi. Moses, Pasian kamsangpa, Lai Siangtho sunga bu 6 te gelhpa in, mai lam thupiang ding a gelh tawm mahmah lel hi. Ama nasep pen Hosea in a zai zaw in gen a, "Topa in, kamsang khat zang in A mite Egypt pan la khia-a, kamsang mah zangin keem hi" Hosea 12:13 ah ci hi.
Kamsangte, a mihing pihte' teel hi lo-a, amah leh amah kiteel zong hi lo hi. Kamsang ding khat teelna ah, mihingte' lungsim sung a mu thei Pasian khat bek khut sungah om hi. Tanglai-a kipanin, Pasian' mite tung ah Ama thu puak dingin a hun a hun zui-in Pasian mahmah in teel hi, cih kimu hi.
Tua A kamsang numei pasal Pasian' teel mite in, Pasian' kiang pana a siangtho mangmuhna tawh thu hong puakte, lai ah gelhin a kam uh tawh zong gen uh hi. Pasian' thu manphate hong puak uh hi. Tua kamsangte' tungtawnin mihingte in Khris leh a pawlte leh, Satan leh a pawlte kikala kidona thu hong tel phawk sak thei hi. Hih leitung hun bei kuana kidonate hong telphawk saka, Pasian in A nasepnate keemin, a Topa uh dawn nuama kiging mite gamtat hoihna dingin zang hi.
Lai Siangtho nunung pen agelh sawltakte in, leitung bei kuan om zia ding hong tel hilh mahmah hi. Paul in, 'Kisiatna hun' na ci hi. Peter in zong 'Hong zahpih mite in, Ama hong pai ding khapna tu'n koi ah om hiam hong ci ding uh hi' ci-in hong hilh khol hi. Tua hun ciangin pawlpi in nakpi-in galdo ding a hihna, John in zong na mu khola, 'A om lai sunte, do gawp dingin kuan khia hi' mah na ci hi.
Hih Lai Siangtho gelh te in Jesu hong pai ma deuh in, Pasian in A mite a tuam vilvel in khuavak pia-in, huh ding hi cih na mu zo uh hi. Paul in Khris hong pai kik ding lam-ena a ngak Adventist pawlpite in, let-song ngah lo-in om lo ding hi (1 Kor . 1:7,8) ci-in na gen hi. Kipum khatin, picingin, makaih siamin, Kha Siangtho-i hilhkholhna tawh amau sungah sawltak te, thuhilhte, pawlpi ukte, leh laihilhte om ding uh hi' (Eph. 4:11) ah na ci hi.
Sawltak John in, leitung bei kuanan pawlpi maan nu nung Pasian' thupiakte a zui pawlpite' thu na telgen pha mahmah hi. (Mang 12:17). Tua a genna ah, thupiak zui pawlpite hi, na ci-a, tua pawlpi in Jesu Teci panna (Spirit of Prophecy) zong nei hi, na ci khol zo hi. (Mang 19:10).
Tua ahih manin Pasian' ngimna ah, Seventh-day Adventist pawlpi - Hilhkholhna a nei pawlpite hong din khiatna (Spirit of Prophecy) Kha Siangtho hilhkholhna hong nei takpi uh hi. Tua a hih ciangin hih leitung bei kuana A mite tungah kum za lomlom bei sa lai-a A mite tungah kisapna tuam vilvel a om cianga a hilh zel sate mah bangin, kidona nasia, kisiatna hun ah a tuam vilvelin eite tungah thu hong gen a hihna kician mahmah hi.
Hilhkholhna a nei Seventh-day Adventist pawlpi in, a hong pian ding hun kihilh khol sa maan tak a hi tu ma kum za val deuh lai-in hong ding khia takpi-a, ih lak panin AW khat hong ging khia takpi-a, "Pasian in mangmuhaa siangtho tawh hong lak hi" ci hi. Tua pen kisialhna lam hi lo-in, Pasian' a dinga kampau-a a kizang nungakno kum 17 mi khat a hihi. Eite lakah tua AW pen kum 70 sung ih za-a, nasepna tawh hong lam lak in, hong sittel-in, hong hilh hi. Tua AW pen laidal tul tampite tungah Pasian' teel kamtainu Ellen G. White in cimtak lo taka a gelhna pan tu ni-in zong ih za thei hi.
ZOP LAI DING
source: Pawlpi Thu Lamlak
No comments:
Post a Comment