A Sunga Om Thute:
TAI IN, NA THA NEIH ZAH IN TAI IN.
PHAWK DEN DING:
CIDAMNA THU
Nek-le-Dawn panin Cancer Natna Kingah thei
Cancer Natna Ngah Cilte' Ading
NA NUNGAK LAI-IN KIGING IN
KAAL SUNG NEWS
Revival Crusade
Maranatha Phatna labu
Lungdam Pihna
Dah Pihna
THU ZAKSAKNA
Pawl Lutna
ZSM / CDK
Youth Alive Camp
Laibu Hoih Pawlkhat
Lungdam Kohna
Church Address
"TAI IN, NA THA NEIH ZAH IN TAI IN" Phil. 3:12-21
Derek Redmond pen ama' hun lai in leitung ah mite thupimuh leh mi minthng mahmah khat ahi hi. Amah pen, England mi tai hat, England gam min tawh tai kidemna a tai ngei-pa ahi hi. 1985 kum in meter 400 tai kidemna ah British record a break pa ahi hi. Tua kum mah in Roger Black in a mah sang tai hatzaw a, ahih hangin lungkia lo a, ahanciamna hangin 1987 in taihatpen mun hong ngah kik hi. 1988 kum Seoul khuapi a Olympic meter 400 tai kidemna ah kihel sawm a, lamet lohpi in a kipat ma minutes 10 ah a siakmit kim teng a natna hangin a kihel thei kei hi. Kamsiatnna tawh a siakmit teng natna pen 4 vei siuseu ki at hi. Ahih hangin lungkia tuan lo in 1992 Spain khuapi Barcelona a Summer Olympic a neihna ah England gam ai tangin champion ngah nangin meter 400 tai kidemna ah hong tai sawm hi.
Derek Remond in a tai kidem pihte zo toto in semifinal hong kah ta hi. A khatna ngah dingin Semifinal ah tai kidem lai un, amah ahat pen himah leh atawp a tunma meter 250 kisap lai in, kamsiatna tawh a zadang thagui hong kitat in tai zolo in dam damin hong puk sukta hi. Medical teamte leh Security guardte hong tai in Remond pen a pualam ah zawn khiat sawm a, amah ut loin dam tak in hong ding to in, bai kawmsa mah in tai kidemna hong zom to veve hi.
A tai kidempihte in a tawpna tun san khin in a khatna, a nih na, a thumnate zong ki thei khin ta hi. Redmond in a khatna, a nihna, a thumna te ngah nawnlo cih thei mah leh a tawp dong tun sawm in khe bai liangliang mah in hong tai veve hi. Tua bang a bai liangliang a, atai lam amu mipi 65,000 te in a khatna, nihna, thumnate thudon nawn lo in Redmond bek mah thapia in "Redmond Tai in, na tha neihzah in tai in" ci in ding kawmsa in awng ziahziah in tha pia uh hi. Tua banga a ot ziah ziah laitak in papi khat tai kidemna tualpi sungah hong lut a, security te in phallo in a khawl sak sawm uh hangin, "Hua a taipa pen ka tapa hi" ci-in kuaman kham zo lo in a tapa kiang zuan in hong tai hi.
Redmond pa in khebai liangliang atai a tapa kiang a tun ciangin, "Ka tapa aw, lungkia ken, ih nih in tai ni, hong huh ding hi'ng" ci in, a tapa khut pen a aliang ah batto in a, dam dam in a pata un hong taita uh hi. Redmond zong amah lainatna lianpi tawh a huhpa pen a pa ahih lam a theih ciangin, hong kap khia in, kap kawm sa mah in tai kidemna atawp atun dong hong tai uh hi. Tua ni a mipite ot ziahziah kan a thapiakna Olympic games om nai lo hi. A zingciang in tadensa a laimai masa pen ah Derek Redmond te pata, kikawi kawma a taina lim lianpi kisuang khia a, mite in a khatna, a nihna a thumnate sangin lungdampih zaw uh hi.
Kong it sanggamte aw, eite zong ih Khristian nuntakna lampi tai kidemna ah tamveipi liam thuak in gim in, ih bah hun om kha thei mah hi. Pawlkhatte ih lawmte'n hong liam sak in, pawl khatte ih naseppihte in hong liamsak thei hi. Khat veivei ciang ih zite, ih pasalte, ih tate na-ngawn in hong liam sak thei hi. Tua bangin tawl lua tha beilua mahmah in ih om thei hi. Ahih hangin Redmond bangin ih hat kei ta zongin hih Khristian tai kidemna ah khawl loin tai teitei ni. Vantung a om ih Pa in hong huh dinga, a khatna, nihnate ngah lo himah leng, atawp dong ih tai nak leh Topa in eite thaman letsong hong pia veve ding hi.
Kong it u leh naute aw, eite tai kidemna ah ei guak bek ih tai kei hi. Vantung aa om, ih Pa in eite hong taipih hi. Haleluijah. Ih khitui luannate, ih thanemnate, mi hong liamsaknate hong mu ahih manin amah om khong thei lo hi. Eite tai kidemna tualpi ahi hih leitung ah eite hong huh dingin Amah hong lut in, Amah eite thaman letsong hong pia ding pa ngiat in hong taipih hi. Lungkia kei ni. Mawhna tawh kidim mahleng, eite mawhna hong maisak in eite ama tate dingin hong koih zo hi. A khatna, nihnate ngah lo ding himah taleng, atawp dong taite thaman pia dinga a kamciam ih Topa in eite tua thaman letsong hong pia ding hi. Atawp nading kung ih tun mateng tai ni. Topa'n minthanna tang tawntung in, lai sim mimal khempeuh thupha hong pia ta hen. Amen.
? Pastor PL Thlenga, Translated by Daniel Shoute.
No comments:
Post a Comment