From: Mung Tong <mungtong@zomi.net>
Date: 2015-09-12 20:15 GMT+07:00
Subject: {Z.A.C} Zo Phualva Thupuak - Volume 05, Issue 19
To: ZAC <zomi-adventist-com@googlegroups.com>
Cc: ZomiSDA <zomiSDA@yahoogroups.com>, zomiadventistmls <zomiadventistmls@googlegroups.com>, zothang hono <zothanghono@gmail.com>, Cin no <cinnoshalom@gmail.com>, Sian Pum <sianpum@gmail.com>
"HONG BAWLPHA KIK IN" JEREMIAH 31:3,4
Kum 1999 kumtawp lam in Aizawl a Vanapa Hall ah crusade nei dingin nasia takin ka kithawi uh hi. Zogam sunga Adventist pastor-te leh Evangelist-te Republic Pastor quarter ah giak khawm in, a lunggulhte Bible Study pia in ka om uh hi. Zingsang khat Republic Pastor Quarter ka zinbuk phone hong ging in, nupi khat lungkham leh mangbang mahmah aw khat in aw-ling keuhkeuh kawm sa in "Pastor Thlenga a om hia?" ci-in hong dong a, "Om mah ing, tu a na hopih pen keimah Pastor Thlenga kahi hi" ci-in ka dawng hi. Tua nupi aw in, "Pastor aw, nong huhna kisam lua ing, zan sagih ka ihmu kei hi. Ka ihmut sawm ciang ihmu suak ding bangin ka om a, a si ding hileng ka kha nuntakna ding khamuanna nei zo lo kahih manin ka lau hi. Ni tam zong nungta in ki um nawn keng. Durtlang Agape Center a Gupkhiatna Camp na bawlte uh ka za a, nang tungtawn in Pasian in ka lunggimna leh ka haksatna khempeuh hong vengsak dingin ka lamen hi. Hehpihna tawh ka inn ah nong hawh thei diam?" ci-in hong thum hi. A awsuah panin zong a lungkhamna lian mahmah cih ki thei ahih manin, nial dingin ka ngaihsun ngam kei a, "Tua ahih leh hehpihna tawh mi khat peuh hong la dingin nong sawl thei diam?" ci-in ka dot leh "Ka naute hong sawl pah ning" hong ci hi. Ka zing-an nek khit uh ciangin Jeepsy khat ka kong mai ah hong na ngak a, ka lawmpa tawh tua nupite inn lam zuan in ka pai uh hi.
A inn uh ka tun phet un tua nupi in athu teng hong gen pah sawm a, ahih hangin hong gen ma in, "Inn khan-awng na neih leh tua sungah kikum ni" ka ci hi. Amah pen kumpi nasemte khat ii zi hi aa, inn-le-lo tawh nuamsa in kisap dang neih tuak hetlo hi. Ahih zongin amah'n a lauhuai lungtang natna nei a, a pumpi ci-le-sate ah sisan teng nawn lo in eng khin hi. A khut ling keuhkeuh aa, hoihtak pau thei lo hi. Milian officer ahih mah bangun India gam zato mun tuamtuam ah a paipih uh hangin damna mu zolo hi. Tu in ahih leh lamet bei lungkia in bangmah zong a kibawl nawn kei uh hi.
Tua nupi kiang ah na haksatna teng bangmah iimlo in hong gen in, ka cih ciangin amah zong bangmah gen zolo in hong kapkhia gawp hi. Tawlkhat hong kah khit ciangin, "Pastor aw, kei pen migi lo mahmah kahi hi. Mi angkawmte sang zong ka mawh zaw a, tapa taimangpa sang' zong ka mawh zaw hi. Ahang in Pasian kiangah mawh nawn kei ning ci-in tamveipi ka kiciam khit ciang zong ka mawh kik veve a, tua man in Pasian in kei hong paisan khin in ka kithei hi. Tuma lam in ahih leh Pasian sungah ka lungdam thei mahmah in, tu a na gen banguh pumpi siangthonate, tep-le-muamte, leh nek leh dawn sianglote nangawn ka zang kei hi. Pasian in zong hong ompih in, la phuak siamna hong pia aa, tampi mah ka phuak khin hi. Ahih hangin, ka ut loh pen mawhna ah ka puk kha a, tua panin lungnopna ka nei zo nawn kei hi. Mi khempeuh in "migilo nu" hong ci dingin ka lungsim ah ka kikoih den a, ka maizum lua in koimah ka pai ngam kei hi. Kuamah tawh ka kikhawl kei a, innpua ka pai khiat lohna zong sawt khin ta hi. Ka innvengte na-ngawn in mihai bangin hong mu ta uh hi. Na theihsa mah bangin ka pasal pen kumpi nasem zalian khat ahih mah bangin a nasepna ah nungakte tawh ka muangmawh den hi. Hite hangin ka lungsim leh ka taksa zawmlawh mahmah in, zansagih ihmu lo hi'ng. Ihmu leng si suak dingin ka ki ngaihsun a, si leng tawntung nuntakna ngah ding khamuanna nei lo hi'ng. Tua ahih manin Pasian in hong maisak zo lai diam cih ka thei nuam hi. Pasian in ka mawhna hong maisak in ka nuntakna hong puahpha kik ahih leh hih leitung ah hih kan a ka lunggulh om lo hi. Hih ka pumpi bangbang apiang zongin ka lungkim ding hi" ci-in kap ngelhngelh kawm in hong gen hi.
Tua bangin nupinu in a tangthu hong gente kei zong ka khitui mualtuang kawmsa in ka ngai a, "Topa aw, hih a hehpihhuai nupinu tunga na thugennop hong hilh in, na nasempa in kong ngak hi" ci-in lungsim thungetna ka nei hi. A sawtlo in Topa in a Thu Nungta ka lungsim sungah hong koih hi. Tua ka lungsim sunga Topa hong koih pen Jeremiah 31:3,4. Tua khit phet in nupinu kiangah, "Kongit ka sanggam nu aw, Topa kiang pan hong hopih na kammal in hih bang ahi hi. Pasian in 'it tawp lo in kong it a, kong bawlpha kik ding a, kong din thak kik ding hi'. Tuni in Topan hong damsak ding hi. Tu in na mawhnateng khat zong sit loin, Topa mai ah pulak inla, mawhmaina ngen in. Na lu tungah khut-nga in thu kong nget sak dinga na dam ding hi" ci-in upna tawh ka sawl hi. Tua bangin khitui luang ngelhngelh kawm in mawhmaina ngen aa, ken zong tua bang mah in a mawhnate maisak na ding in khitui luang kawm mah in thu ka ngetsak hi. Tua khit ciangin ka ciah san uh hi.
Zan in ka lup kawmsa in ka ngaihsun a, hih nupinu natna pen mawhna hang hi, hazatna in a nuntakna thanemsak lai hi. Tung lam pan Topa in huhna hong piak kei leh hih nupinu in a natna sihpih ding hi cih ka mukhia hi. Ka mitkha ah tua nupinu amel hehpihhuai, khut ling kelkel pen aluai den hi. Tua khit ciangin nupinu kiangah upna tawh ka gen mah bangin a kha nuntakna leh a taksa natnate Pasian in damsak hi. Tu in ahih leh natna bangmah gen ding thei nawn lo hi. A damna teci pang in lungnuam takin om ta aa, pawlpi ah numei makai in mapang hi. Pasian in minthanna tang tahen. Amen.
Kongit u leh naute aw, tu laitak nupinu bangin na nuntakna dangtak in Pasian ngai in na om hiam? A beisa hun in Pasian in zong hong ompih, a na zong hih theih zah in sem napi damdam in Pasian tawh ki gamla semsem in, tu in ahih leh Pasian tawh kigamla khin mahmah in na ki ngaihsun ngei hiam? Na innkuan buaina, na zi na pasalte hangin lungsim gim in na om hiam? Na tate hangin lunggim leh beidong in na om hiam? Ahih kei leh ka cisa damlohna hangin lamet na bei ngei hiam? Ahih keileh na sawm het loh mawhna ah puk kha in tua thu tawh Pasian mai ah kisuang in, Pasian in zong hong maisak zolo dingin na ki ngaihsun kha ngei hiam? Kha Siangtho in hong paisan khin in nang-le-nang zong ki um kha mai ding hiteh. Pasian in kuamah paisan masa ngeilo hi. Eite in ih paisan mateng in Amah in hong paisan ngeilo hi. Ih mawhna hang a, lungkham in kapkawm a ih thungetnate hong dawng dingin ih Pasian pen manlah den hi sanggam aw. Pasian in na khempeuh hih thei hi, Amah in hih theih loh nei lo hi kici hi. Ahih hangin, Sanggam aw Pasian hih theih loh khat hong hilh nuam ingh. Tua in, ih mawhnate kisik in Amai ah ih mawhna pulak in khitui luang kawm in ih thum ciang amah in eite ih mawh hong maisak lo theilo hi. Hih in ih Pasian hih theihloh khat ahi hi. Pasian in nang hong lehngat, taisan ngei lo hi. Banghang hiam cihleh, na mawhna sangin hong hehpihna lian zaw hi. Mawhna hangin lungkham in Pasian kiangah mawhna pulak in khitui luang kawm a mawhmaina ngente ih Pasian in ih mawhna hong maisak dingin omkhong theilo in nawhtak in eite itna tawh hong pom hi. Amen.
Pasian thu ah ka deih mahmah leh khum ka sak mahmah in "Bangzah ta in gilo in kisia khin hi mah leng, Topa aw ka nuntakna a bulpan pan pha kik nuam ing" ci-in na nget leh ih Pasian in abul hong patpih in hong ompih hi cih thu ahi hi. Haleluijah. Ih Topa itna thupi mah si mataw. Kei mahmah zong ih Topa'n a bul pan apat phat a bawlphat ding hong phal lo hileh tu in ka mangthang tading hi. Ahih hangin ka thanem ciangin Topa kiangah "Topa aw, a bulpan hong kipan phasak in" ci-in thu ka ngen a Topa'n hong dawngin hong pansak pahpah hi. Amah ih Topa in kei a ding in abul hong pat phat sak, hong puahphat kik zelna hangin tu a dinmun atung thei ka hi hi. Kongit ute naute aw, angkawmte sangin zong mawhzaw kha mah niteh, ahih kei leh Tapa taimang sangin zong mawhzaw mah ni. Ahih hangin, tua na mawhna nengnote in Pasian hong itna leh hong hehpihna neucik zong liah zo lo hi. Ih Pasian in hong ngak den lai hi. Tu mahmah in hih thu na sim zawh khit ciangin Topan mai ah khukdin in thungen pah in. Tua nupi hehpihhuai mahmah a damsak Topa in nang hong lawng dinga, na kha leh taksa damna hong pia thei hi cih na thei ding hi. Pasian in ih mawhna hong maisak pen athu bek hi lo hi. Mi tampi in a kha uh tham loin a taksa uh zong dampih uh hi. Hih thu na sim khit ciang in thunget pih ding kisam a special tak a neih ding na lunggulh leh hong thei sak inla, na min tektek sam in thungetna kong neih sak ding hi. Ka FB min pen <PLThlenga Chhakchhuak> ahi hi. Topan hih thu a simte na vekpi un Thupah hong piak sak ta hen. Amen. ? Pastor PL Thlenga, Translated by Daniel Shoute.
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.
No comments:
Post a Comment