AHIH HANGIN KEI ADINGIN PASIAN TAWH KINAI AHOIH HI. LATE 73:28
Thuzui mite "Khristian" cih min akisap masak pen na munin Antiok khua ahi hi (Sawltak 11:26). Khristian ci-in asapna hangin amaute agamtat-luhek pen Khazih (Zeisu) tawh kibang, kisun lua ahih manun, Zeisu tawh a kibangte cih khiatna nei 'Khristiante' cih min akivawh ahi hi. Tua ahih manin Thu-um mite ihtup in "Zeisu tawh kibang" ding ahi hi. Zeisu bangin nungta in, Zeisu bangin khamangthangte it in, amaute a dingin kipumpiak leh itna tawh kidim ding pen Khristiante nuntak mungtuppi ahi hi. Pasian tawh akinai taktakte gamtatna leh nutakzia-ah kilang bek thamlo in, amel uh zong lamdangin taang thei hi. Moses zong sun sawmli leh zan sawmli Sinai mual tung-ah Pasian tawh akiho in, Pasian tawh kinai takin om ahih manin, mualtung pan hong tuaksuk ciangin ameel taang mahmah aa, mipite in en ngamlo in amai uh humcip liang uh hi. India mi Pasian nasem masa Sadhu Sandar Singh pen Brahmin (Siampu nam) tapa hi napi, Hindu biakna ah lungkim zolo a, Christian ah a ki pumpiak ciangin, apa in sum-le-pai, neih-le-lam tawh na zol in, azuih Zeisu tawpsan dingin na ngenngau hi. Ahih zongin amahin, "Na khempeuh sangin Zeisu neih utzaw ing" acih ciangin apa in innpan hawlkhia hi. Hita leh Pasian in amah na zanga mikang gam na-ngawn ah va zin in biakinn pulpit tungah Pasian thu hong gen ciangin, amaute in Zeisu mel tawh kisun sa lua uh ahih manin, amel hong taan' tawh Zeisu mahmah hong kumsuk in amaute thu ahilh saliang uh hi.
Mite in Pasian tawh kinai takin a om ciang, a nasepna uh ah damna ngahin Satan khemnate zo toto uh hi. Khatvei mual tungah thungen dingin Zeisu, Peter, John leh Jacob lawmtate teng kahto uha, Zeisu mel hong kilamdang hi. Tua hunlai in mel kilamdanna mual tunga a kahto lo mual nuai-a om nungzuite in tua thute telsiam lo uh hi. Dawivei naupang khat sunga dawi nangawn ahawlkhia zokei uh hi. Tua ahih manin Zeisu ihbat ding pen ei Khristiante mungtuppi ahi hi. Tua Zeisu tawh kibat nading pen mel kilamdanna lo in gualzawhna ki ngah zolo hi. Kongit uleh naute aw, tu-in ih nuntakna kisit kik ni. Zeisu tawh mel kibatna nei nai hetlo zong hikha thei ni. Ahih hangin lungkia kei in. Zeisu nungzui lakpana khat ahi John pen "Van-ging' tapa" kici lungtom leh huaiham, angsung bek akhual mi khat ahi hi. Ahih hangin a nung ciangin banghang in "Itna Johan" kici hiam? Ahang ensuk pak ni.
1. Nungzuite lakah anaupangpen leh sawt nungtapen hi.
2. Zeisu tawh akimuhma-in mi huaiham, sin-gam leh ama angsung bek akhualpa ahi hi.
3. Zeisu kiangah amah leh asangampa dinmun sangpen a ngah nang a ngen dingin anu asawl ngeipa ahi hi.
4. Zeisu in zong "Vanging' tapa" ci-in amin na phuaksak hi. Thu-um, cilehsa lungsim nei, mi haza, lungsimsia leh lungtom mi ahi hi. Ahih hangin ahoihna khat in, amah leh amah ahoih lohna kithei napi Zeisu kiangah bek ah om sawm tentan hi. Kumpi David in "Kei ading ahih leh Pasian tawh kinai a om hoih hi" cih kammal pen zangsiam hi. Kei pen mi thahatlo kahih manin Zeisu gei-ah atamthei pen ka om kei leh mangthang ding hing ci-in Zeisu tawh kinai sawm den hi. A sawm mah bangin, nungzuite lak panin Zeisu tawh tamvei akisawhpen leh tamvei azuikha pen hongsuak hi.
5. Zeisu in Jairus tanu athawhsak lai-in, nungzui dangte banglo in inn sungah Zeisu tawh lutkhawm a, Zeisu in naupang sihna pan athawhsak laitak amit tawh amupa ahi hi.
6. Meel kilamdanna mual tungah zong, anungzui dangte mual nuai-ah a omlai un, Johan ahihleh alawmte nih tawh mual tungah Zeisu gei ah om ding asawmden manun Zeisu mel hong kilamdanna zong amit tawh amu hi.
7. Inndei tungnungpen ah nitak-an nunung pen anek dingun zong, Zeisu ang beel kawmin, Zeisu' naipen ah natu hi.
8. Gathsemane huan ah zong, nungzui dangte ahih leh huan kongkhak gei a om alungkim lai-un, Johan ahihleh a kong sung lut ngiatin Zeisu zui-a, Zeisu gei-ah na om hi.
9. Zeisu hong kimat ciangin, nungzuidangte khempeuh in taisan uh a, Johan in ahihleh Siampi lianpen Kaiapha inn ciang dong Zeisu na zui hi.
10. Peter zong Johan hang bekin Siampi lianpen Kaiapha innhuang sungah valut thei hi. Ahangin Johan pen Siampi lianpen meltheih ahih manin, baih takin ahuang sungah lut thei a, tua pan alawmpa Peter sam in lutpih hi (John 18:15).
11. Zeisu singlamteh tungah akilhcip lai un, nungzui dangte lau in taisan mahleh Johan in singlamteh phualciang dong zui-in, singlamteh phung pan naino khat ah om hi (John 19:27). Tua tawh kizui-in Zeisu in anu don dingin Johan pen mawhpuak napia hi.
12. Zeisu thawhkik ciangin zong nungzuite lakah han a vatung masapen zong Johan mah ahi hi. Peter tai masa mah leh Peter makhelh in Johan in han sung tung masa hi (John 20:3). Hih lai atna ah Johan in a ma min nangawn at nuam lo hi.
13. Hi bangin Zeisu tawh kinai penpen in om sawm den ahih man in, Zeisu nuntakzia in zo mahmah a, Zeisu thawkkik khit ciangin hangsan takin lungdamna thu tangko-in na lamdang tampi semkhia hi.
14. Hi bangin thahat hetlo mah leh Zeisu nung zuihsawm tentan pa ahihna tawh kizui-in Zeisu in mangngilhlo hi. Mang-muhna khempeuh lakpan athupipen, kamsang dangte san phakloh pen Patmos tuikulh tungah Topa Zeisu in na pia hi.
15. Zeisu itna in a nuntakna leh ngaihsutna zokhinlua ahih manin, asepna bawlna khempeuh ah Zeisu itna longal gending theilo hi. A laikhakte khempeuh zong itna thu tawh kidim in, Pasian pen theician semsem a "Pasian pen itna hi" cih leh "Pasian in leitung mite itlua ahih manin, a Tapa neih-sun pia hi" cih Lai Siangtho mun thupi pen (golden text) zong Johan at mah ahi hi.
16. Johan a sihna thu akigenna ah, beel sung a sathau-so lipi sungah kikhia in si zolo a, tua khitciangin Ephesa khua ah teksih hi, kici hi. A lungkham lai pen leh huhna kisap lai pen hun nangawn in Zeisu kianga om tentan Johan pen Zeisu in na mangngilh ngeilo hi. Tua mah bangin, Johan a lungkham leh haksatna athuak lai, sathau lipi sunga kikhiat lai in Zeisu in a ompih manin bangmah kang zolo hi. Haleluijah!
17. Khansauna tawh Zeisu in Johan thupha pia a, nungzuite lakah akhansaupen pa ahi hi. Nungzui dangte mi' thah leh sihsia in asih lai-un, Johan ahihleh tua bawlsiatnate thuak kha mahleh sihpih lo in Ephesa khua ah teksih hi. A sih ding teh na vaikhak nop a om leh hong gen in ci-in aho uh ciangin, "Note khat leh khat na ki-it un" ci-in a vaikhak khit ciangin si hi.
18. Zeisu azuih tung lai-in "Vanging' tapa, mi lungtom, mi huaiham leh angsung bek akhualpa" kici himah leh, thahat lo pi-in Zeisu gei-a omding ateelna hangin Zeisu' itna ama' sungah hong kizel in, atawp ciangin amin "Vanging' tapa" cihna panin "Itna Johan" ci-in na kikhel hi. Haleluijah!
Kongit sanggam aw, abeisa leh tu-a na nuntakna ngaihsun pha kik in. Johan nuntakna masa bangin itna neilo, mi huai-ham, lungtom, angsungkhual mi zong hikha mah niteh. Ahih hangin lungkia kei in. Na thanemnate pen na buaina hilo hi. Zeisu tawh kinaih den na ut hiam? Zeisu gei-ah om tentan na ut hiam? Zeisu tawh kinai sawmden in, Ama' nung nazuih tantan leh nikhat ni ciangin ama' meel nasun dinga, itna nei in Amah tawh kibatna kicing nanei ding hi. Na maitang suah pan bek in zong mite in damna ngah ding uh hi. Na thanem hun leh na puk hun zong omphial khamah leh lungkialo-in Zeisu zuan peuh lecin, atawntung in ih Topa Zeisu in hong sang den hi. Zeisu tawh kinai theithei in om sawm ni. Sumhlo ding hihang. Topa'n thupha hong pia tek tahen. Amen. ? Pastor PL Thlenga, Translated by Daniel Shoute.
No comments:
Post a Comment