Sianthona Kimu Khia Thei
Hong Honpa leitung khawvak hi napi, leitung in Amah thei lo hi. Hehpihna nasepna ah Amah om tawntungin, mi khempeuh lampi ah khua vak sak hi napi, Ama kikholhpihte in Ama gamtat hoihna, Ama angsung nialna, Ama kipumpiakna leh thusiamnate a etteh lo dingin kuamah sam lo hi. Judah mite in tua bang nuntakna paakta lo uh hi. Amaute' kipibawlna tawh kituak lo a hih manin amaute in Jesu' om dan a thupi-in seh lo uh hi. Khris in a lungsim leh a tak tawh biakna a kin hi kei, ci uh hi. Bang hang hiam cih leh amau' om dan pen mi' laka kipibawlna, a kilangtaaka thungetna, mipi mai-a kilahna, mi' muha thupha bawlna khawng a hihi.
Lungnemna in sianthona gah manpha bel a hihi. Tua thupha in mi a uk ciangin a lungsim kipuah pha hi. A tawntungin Pasian ngakin, Ama deihna bangbang hi sak hi.
Angsung nialna, kipumpiakna, citna, siamna, migitna, mi-itna, thuakzawhna leh muannate in Pasian tawh a kizom taktak mite' nisim gahte a hihi. A gamtatnate uh leitung ah a kitangko kha kei zongin, amaute nisimin siatna tawh kido-in, mawhzolna leh khialhna tungah gualzawhna a manpha ngah uh hi. Kiciamna thupite bawl pha-in, thungetna leh pilvang kiukiauna pana a ngah uh hatna tawh picin zel uh hi. Tua bang khinkhiana nasemte' hanciamnate, thahata a sem buatbuat mi in a phawk khak khol loh hangin, lungsim tawng a mu thei Pa' mittang in kiniamkhiatna leh lungnemna tawh a kisem khia khempeuh paakta-in na thupi seh gige hi. Gamtatna ah ki-itna leh upna kham siangtho a kilat khiatna dingin ze-etna hun kisam hi. Pawlpi sungah haksatna leh lungkhamnate a hong tun ciangin Khris' nungzui taktakte' lawpna hong khangto zaw hi.
Biakna kin mi' huzap sunga a om kha mi khempeuhte in Khristian nuntak a hoihna leh a namtuina hong phawk kha uh hi. Ama zongsatnate leh gamtatnate Khristian nuntak hi pah lel a hih manin tua banga om a hih lam amah leh amah kiphawk kha khol lo hi. Pasian' thumaan khawvak ngenin, tua khawvak bangin gamta hi. Vana a Pa' deihna bangbang hih ding pen ama an leh tui a hihi. Ama nuntakna Khris tawh Pasian sung ah kiseel hi napi-in, amah in kisaktheihpih tuan se lo-in, zong phawk tuak se khol lo hi. Topa' khekhap a zui cinten a kiniam khiat mite Pasian in paakta mahmah hi. Vantung mite amau' kiangah utin, a lampi kim uah khawlkhawl nuam uh hi. Kipahtawina a deihte leh a gamtat pha uh a kidawk sak nuamte in amaute phawk tham sa lo ding uh a hih hangin, vantung mite amaute' tung ah kum sukin amaute' kimkot ah meikuang daai bangin om uh hi. SL, laimai 11-15.
Ref: Pawlpi Thu Lamlak, Zop Lai Ding.
No comments:
Post a Comment