Rapture A Takpi Mah Hiam?
Rapture cih kammal in a simtham in Jesu hong kumkikna in kizang zel hi. Christian tampite ii ngaihsutna ah Christ nih vei hong kum kik madeuh in kum sagih sung vantung ah lak tohna om ding cih ahi hi. Rapture akhiatna Tongdot-te ah "lungnop, ki-itna tawh kipumdimna" cih hi aa, Laisiangtho lam ah en le hang, "Jesu hong pai ma or hong pai ciang leitung panin laktohna" cih ahi hi. Protestant tampite in "rapture" kammal pen "Christ hong kum ma-a laktohna" in saang uh hi.
Rapture up dan, san dan hong kipat zawh kum asawt nailo khat in, Christian radio ah thugen Harold Camping (late) in lak tohna ni ding anuai aa bangin thum vei na seh aa, avek in na khial hi: September 6, 1994; May 21, 2011; leh October 21, 2011. Hih nite ah amah in asim tham in vantung ah laktohna om dinga, a ki nusia-te kaat leh meikuang in kangtum ding ci hi. Hih bang aa hangsan takin agen khiatna hangin mite in ama nungzui uh aa, huhna sum dollar tampi pia uh hi. Mi tul tampite in vantung ah laktohna asawt lo in ngah ding cih um uh aa, a neihsa uh leh asumte uh amah pia uh hi.
Ahi zongin October 21, 2011 ni-in, lak tohna leh leitung beina hong pian loh ciangin, "Eite in ahun tuatna ih khial kha hi" ci-in hong thum hi. Amah in hih nate bang hun ah hong piang ding cih a theihlohzia leh mai lam thute bangmah a genkholh theih lohna hong ki pulak khia hi.
Nihvei Hong Paikik Nading Kamciam: Jesu nih veina hong pai kik nadingin mun khempeuh aa om Christian-te lametna lianpen ahi hi. Jesu ngiat in hong pai kik nading tam veipi hong genzo hi. "Ka Pa inn sungah om anding mun tampi a om hi. A om lo hileh kong gen khinzo ding hi. Note om nading mun bawlkhol dingin ka va pai ding hi. Va pai in note aa ding mun ka bawl khit ciangin kong pai kik dinga ka omna mun ah note zong na om theih nadingun ka kiangah kong la ding hi" (John 14:2,3, ZSV). Jesu nihvei kum kikna leh vantung ah lak tohna omlo hileh, Paul ii gen mah bangin Christian-te upna "amawkna" hong hiding hi (1 Korin 15:17).
Jesu Christ pen a mite la dingin hong pai kik mah ding hi. Ahi zongin Jesu nih vei hong kum kik madeuh kum sagih in a kimu lo in hong pai dinga, mi siangthote van ah a simtham in hong la ding cih in sandan maan lo ahi hi. A tam zaw thuhilhna ah mite: zi/pasal/tate/lawmte/vengte le midangte hong mangziau dinga, vantung ah laktohna ngah ding hi. Mawtaw hawl laitak, sangkah laitak, lamsiauh laitak (ahk) vanleng tawh khualzit laitak kuama theih loh aa thakhat in kimu nawn lo ding a, a puan teng bek uh cian ding hi.
Tua khit teh, Christ langpang-pa ukna nuai ah kum sagih sung gim thuakna tawh hong kizom ding hi. Hiteng apian khit ciang bek in, Jesu taktak hong pai dinga, ih theihsa bangin leitung beina hiding hi.
Khat Kila in Khat Ki Nusia: Bang hangin mi tampite in thu-um mite vantung ah a simtham in hong kila ding cih um ngeingai uh hiam? Hih in Laisiangtho kammal pawlkhat ih san khialhna leh ih nusiatna hang ahi hi.
Hih a simtham rapture hong pianna vai ah Laisiangtho bulpi pen in Matt 24 ah kimu thei hi. Jesu nih vei hong kum kik madeuh aa thupiang dingte ih kikup ciangin, Jesu in "Tuiciin tunma a mite in Noah tembaw sungah a lut ni ciangdong, zukham ankham, kipi kiteeng in a om uh hi. Tuiciin tunga amaute khempeuh a tupmang dongin khuaphawk loin a om uh hi. Mihing Tapa a hong pai ciangin zong tua mah bangin a piang ding hi. Tua hun ciangin lokuan mi nih khat kila in khat kinusia ding hi. An sukhawm numei nih khat kila in khat kinusia ding hi. Na Topa uh hong pai ding hun thei lo nahih manun kiging den un" (aneu 38-42, ZSV).
A simtham lak tohna a umte in 'lokuan khawm, an sukhawm khat a simtham in vantung ah kila to dinga, khat ahih leh ki nusia ding' ci-in saang uh hi. Hih Laisiangtho mun sung-ah Jesu in hong pai kik hun ding pen Noah tuiciin tawh na genteh hi. Tembaw sungah alut kha lote tuihual in na la a, tui kia in si uh hi. Tembaw sunga a omte in hotkhiatna ngah uh hi.
Vantung Panin Topa Mahmah: "Topa mahmah vantung panin, a ngaih mahmah thupiakna tawh, vansawltak lian aw le Pasian sapna pengkul ging tawh hong kumsuk dinga, tua ciangin Christ sunga a sisate tho masa ding uh hi. Tua khit ciangin a om lai a nungta lai-a om eite, huih lakah Topa dawn dingin amaute tawh meii lakah hong kilato khawm ding hi. Tua tak ciangin Topa tawh i om khawm tawntung ding hi" (1 Thess 4:16,17). Hih LST mun in Christ kum kikna tawh kisai thu thum hong lak hi.
Khatna, Paul' genna ah a nungta lai eite in amaute tawh huih lak ah Topa dawn dingin meiipi tungah hong kilato ding hi. Nihna ah, hih Laisiangtho munte ah laktohna (rapture) tawh kisai na om aa, ahi zongin asim tham naci lo hi. Topa mahmah in vantung panin kikona tawh, vantungmi mangpa kikona tawh, Pasian pengkul ging tawh hong kumsuk ding hi. Thumna ah, hih laktohna (rapture) ah bang piang lai hiam cihleh, "Khazih sunga a sisa mite hong tho masa ding uh hi". Hih in tuma kum tampi lai aa LST genkholhsa misite thawhkikna ahi hi. Tua in Jesu ngaihsut thu leh agenkhia thu hi: "Tapa a um mi peuhmah in nuntak tawntungna nei dinga, nitawp ni ciangin amah ka thokiksak ding hi. Tua in kei hong sawlpa deihna ahi hi," a ci hi (John 6:40, ZSV). Bangbang ahi zong misite thawhkikna leh Christ hong kumkiknate ih sin tak ciangin, a simtham aa laktohna (rapture) cih in sandan maan lo ahi hi.
Laisiangtho mundang tampite ah zong hidan mah in na kigelh hi. Sawltak John in Mangmuhna 1:7 sungah, "En un, meii tung tuangin amah hong pai ding hi. Mittang khempeuh le amah a dawtlum mite in zong mu ding uh hi" (Kilaakna 1:7, ZSV). Jesu mahmah in hong pai kik dan ding agenkholhna ah, "Nisuahna lam panin khua hong phia a, nitumna dong a tansuak bangin Mihing Tapa hong pai ciangin tua bangin apiang ding hi. Tua laitak in vantung ah Mihing Tapa tawh kisai limlamdang hong kilang dinga, leitung minam khempeuh a kap ding uh hi. Mihing Tapa vantung panin vangliatna leh minthanna lianpi tawh meiitung tuanga hong pai a mu ding uh hi. Amah in a ngaih mahmah pengkul aw tawh ama vantung mite sawl dinga, amaute in lei kiuli le van mong khat pan mong khat donga om a teelsa mite a kaikhawm ding uh hi (Matt. 24:27, 30, 31, ZSV).
Zan a Guta: A simtham a lak tohna a um mite in asim tham aa hong pai ding dan zan a guta pa tawh na tehkak uh hi. Peter in agelhna ah, "Ahi zongin Topa Ni in zan laitak a hong pai guta bangin hong tung ding hi. Tua ni ciangin vantung nate ginngaih mahmahsa in a mangthang ding uh a, a sunga om nate zong sa lua in a tuimang ding hi. Leitung le a sunga om na khempeuh zong a kangtum ding hi" (2 Pet. 3:10, ZSV).
Hih mun ah Topa hong pai ding Ni agen hibek hi. Guta bangin hong gu sim ding hilo hi. Guta-te hong pai ding hun a kitheih loh mah bangin, Topa hong pai ding hun zong kithei lo cih agen nuam ahi hi. Vantung nate ginngaih mahmah sa in mangthang ding, a sunga om nate zong sa lua in tuimang ding, leitung leh asunga om na khempeuh zong kangtum ding ci sawnsawn lai ahih manin simtham het lo ding hi. Guta bangin cih tawh kisai in Laisiangtho mundang ahi 1 Thess 5:4-6 leh Matt 24:26 ah zong kimu thei hi. A simtham aa gamtatna hizaw lo aa, ahun kithei lo cih a gen nuam hizaw hi.
Rapture guksimna aum te in Jesu kum kikna pen hun nih in seh uh hi. Ahi zongin Thubu in Jesu nih vei kum kikna pen hun khat sunga piang ding hi aa, Pasian' mite leitung pan hong kilaktoh hun hiding naci hi. Tua in Christian te'n kum 2000 sung bang ih pom ngiat lametna lianpen hi aa, ih lungkiat, ih thanem hun ciang tha hong pia aa, hong phong to LAMETNA ahi hi. ? Clifford Goldstein
'' MIMAL KIKONA, KISELNA LEH APICING LO LAITE KIKHAKTAN HI ''
" ITNA LEH DIKNA TAWH THUMAN GENNI "
ZAC Tawh Mimal Kizop Nang : zomiadventist@gmail.com
ZAC Groups Ah Lai Na Khaknop Leh: zomi-adventist-com@googlegroups.com
ZAC Groups Laite Na Deih Nawnkei Leh Laikhak In: zomi-adventist-com+unsubscribe@googlegroups.com
ZAC Group Thukhunte: https://groups.google.com/forum/#!topic/zomi-adventist-com/Ukey4yzR9qc
ZAC Facebook1: https://www.facebook.com/groups/zomiadventist/
ZAC Facebook2: https://www.facebook.com/zadventist
AWR: http://www.awrmyanmar.org/
SSL: http://www.myanmaradventist.org/myum-report-2009/sabbath-school-lesson/
SSL_CiimNuai: http://www.ciimnuaiministry.info
SSL_PowerPoint: http://www.fustero.net/es/index_ci.aspx
---
You received this message because you are subscribed to the Google Groups "Zomi Adventist Communication" group.
To unsubscribe from this group and stop receiving emails from it, send an email to zomi-adventist-com+unsubscribe@googlegroups.com.
To post to this group, send email to zomi-adventist-com@googlegroups.com.
For more options, visit https://groups.google.com/d/optout.
No comments:
Post a Comment