Thupi lua ei.sanggam aw
Sent from my iPhone
--https://www.youtube.com/watch?v=r80MdQOzINk&feature=youtu.be
KHAWKPI 38KIDEK KIDAM DING SAWLNA
Cidamna in gen zawh loh thupha khat hi-a, mi tampite' phawk theih zah sangin biakna leh ngaihsutna tawh a kizom pha mahmah khat ahi hi. Nasep siamna ding tawh zong kisai mahmah ahih manin, zia-le-tong zah maha lim taka kep ding ahi hi. Bang hang hiam cih leh kicidam zaw leh Pasian' nasepna a mainawtna ding leh mite' phattuamna ding hanciamna, kinei zo zaw ding hi. CT, laimai 294.
Cidamna lam kipuah phatna in Topa a dawn dingin mite a kiging sak ding nasep lianpi ii hiang khat a hih lam 1871 kum December 10 ni-in kei hong kilak kik hi. Pumpi tawh khut a kizop mah bangin tua thu pen vantung mi thumna thupuak tawh kizom hi. Mite in Thupiak Sawmte zangkhai ngaihsut uh a hih hangin, amaute hilhna thu puak masa lo-in, tua thukham a palsatte a gawt dingin Topa hong pai lo ding hi. Thumna vantung mi in tua thu gen hi. Mite in Thupiak Sawmte zui uh hen la, tua thukham ii thuguipite a nuntakna uah zang uh hi leh, tu-a leitung bup a tuam, natna hong piang lo ding hi.
Numei pasalte in a duh a deih uh a nek a dawnna uh tawh pianpih thukham palsat uha, Pasian' thukham zong palsat uh hi. Tua a hih manin Pasian in, ih pumpi sunga a koihsa thukhamte ih palsatna hanga ih mawhna ih muh theihna dingin, eite' tungah cidamna lam kipuah phat na'ng khawvak a hong taang sak ahi hi. Nopsakna leh thuaksiatna khempeuh pen pianpih thukham zuihna leh zuih lohna tawh kisai hi. Hehpihna tawh a dim vana Pa in, Ama phuhsa thukhamte a palsatna uh hanga mite' omzia a dah huaina mu hi. Kim khatte in a thei pipi maha palsat hi-a, a tam zaw in a hih leh thei lo-a a palsat' uh ahi hi. Mite hong itna leh hong hehpihna tawh Amah in cidamna lam kipuah phatna khawvak hong taang sak hi. Mi khempeuh in thei-a pianpih thukham tawh kituaka a nuntak theihna dingun Ama thukham leh tua thukham a palsat te' thuak ding teng Ama'n hong za sak hi. Amah in a thukham kician [243] takin tangko-a, theih baih dingin bawl a hih manin, mual tunga kisat khuapi tawh kibang hi. A pilvang lo te zong peng thei tuan lo ding hi. Pianpih thukham kithei khawk saka, zuih dinga hanthotna in, Topa a dawn dinga mite a kiging khol sak ding thumna vantung mi' thupuak tawh kipawl nasep ahi hi. 3 T, laimai 161.
"No Pumpi No Aa Hi Lo"
Khris hong pai baih ding cih thu lung hiang lo-in ih um hi. Tua in phuahtawm thu hi lo hi; thu taktak ahi hi. Hong pai ciangin Amah in ih mawhnate hong sawp siang ding; ih zia ih tong a hoih lo'te hong hep khiat sak ding , ih lungsim ih sinlai zawngkhalnate hong dam sak ding hi lo hi. Sep ding a om khempeuh tua hun ma-a zawh khit ding ahi hi.
Topa hong pai ciangin a siangtho mite a siangtho-in om ding hi. A pumpi a lungsim uh a kician, a siangtho a pahtak huai-a a om sak mite in tua hun ciangin sih theih lohna ngah ding uh hi. A thutang lo te, a siangtho lo te leh a kihhuaite a hih leh tua bang mahin om pai suak ding uh hi. Tua hun ciangin amau' aading bang mah kihih nawn lo ding hi; a hoih lohnate uh kipaih khiat sak nawn lo dinga, zia-le-tong siangtho zong kipia nawn lo ding hi. Tua teng khempeuh tu lai hun hoih sunga hih kholh khit ding ahi hi. Ei' aadingin tua nasep a kisep hun ding pen tu laitak ahi hi.
Diktatna, zia-le-tong sianthona leh hehpihna sungah khantohna ding a kilangpanna hun sungah eite ih om hi. Ih khawdakna khempeuh ah kisiatna, poina hemna leh mawhna vive ih mu hi. Sih theih lohna ih ngah ma-deuhin hih leitung ah eite in bang sem ding ih hi hiam? Hih hun nunung sungah ih kimkota om siatnate tawn kisawh kha lo-a ih om zawhna dingin ih pumpi siangtho saka, ih lungsim ih kiciat sak ding ahi hi.
"Note'pumpi in Pasian' kiang pana na ngah uh na sung uha a om Kha Siangtho' innpi hi-a, nomau'aa a hih loh lam thei lo na hi uh hiam? Man tawh a kileisa [243-244] na hi uh hi: tua a hih ciangin Pasian'aa a hi na pumpi uh leh na lungsim uh tawh Pasian' min thang sak un." I Korintu 6:19,20.
Ih pumpi ei'aa hi lo hi. Pasian' Tapa' thuakna leh sihna a hi, man tawh kileisa i hi hi. Hih thu thei thei hi lehang, Pasian'na hoih taka ih sep theihna dingin, a cidam thei bel dinga ih pumpi ih kep ding tavuan lian khat nei ih hih lam ih kiphawk ding hi. Ih guhtui a kang sak, ih hatna a kiam sak leh ih pilna a mial sak khat peuh ih bawl khak ciangin Pasian' tungah a mawh i hi hi. Tua banga ih om ciangin Ama aa a hi, ih pumpi leh ih lungsimte tawh Ama min a thang sak hi lo-in, Ama muhna ah khialhna lianpi a bawl i hi hi. 2 T, laimai 354-356.
Thumanna In Mimal Tavuan Hi
Mihing Piangsakpa in ih pumpi nate na buptuah hi. Ih pumpi nate a lamdang mahmahin kibawl hi. Mihing in Ama thukhamte zui-a Amah tawh a pan khop nak leh tua mihing pumpi cidam taka a kem dingin Pasian hong kiciam hi. Mihing pumpi a uk thukham khempeuh zong, a kipatna leh a pianzia mahmah Pasian' kiang pan hi-a, Pasian' Kammal zah mahin thupi hi ci-a ih ngaihsut ding ahi hi. Kidawm lo-a lungngai lo-a gamtatna khempeuh, Topa' bawlsa a lamdang pumpi khel bawlna khat peuh, mihing' sunga om Ama thukham tuam te awlmawh lohna in, Pasian' thukham paIsatna mah ahi hi. Leitunga Pasian' pian sak nate enin, ih pakta kha ding hi; a hi zongin mihing pumpi pen lamdang zawkan lai hi. CD, laimai 17.
Nate' thukham zong Pasian' thukham mah hi veve a hih manin, tua te limtaka i ngaihsut ding ih tavuan ahi hi. Ih pumpi tawh kisai tua thukhamte' deihna ngaihsunin i zui ding hi. Tua te awlmawh lohna in mawhna ahi hi.
Numei leh pasalte hong pian thak taktak uh ciangin amau' pumpi sunga Pasian' guansa nuntakna thukhamte hong thupi ngaihsut ding uh a thatang, lungsim leh gamtat gina lo te pelh ding hong hanciam ding uh hi. Tua CC-19 [244-245] thukhamte zuih ding pen mimal' tavuan ahi hi. Thukham palsatna hanga a piang gimna pen eimau ciat in ih thuak ding ahi hi. Ih zongsatnate leh ih gamtatnate tawh kisai-in Pasian' thusitna ih thuak ding hi. Tua a hih manin, "Mite'n bang hong ci tam," cih hi lo-in, Khristian khat hi buang ka hih teh Pasian' hong piak ka pumpi koi cih leng hoih ding hiam? Kha Siangtho tenna innpi a hi ka pumpi hoih taka kepna tawh ka kivaakna ding leh ka kha' aading sem zaw ding ka hiam, a hih kei leh leitung mite' ngaihsutnate leh gamtatnate mah zui zaw mai ding ka hiam?" cih thu lung hihmawh ding hi zaw hi. 6T, laimai 369, 370.
Mihing' Sunga Pasian' Hinna Bek Mihing' Lametna
Lai Siangtho bang a zui biakna in pumpi leh lungsim cidamna sia sak lo hi. Pasian' Kha' huzap in natna dam na'ng zatui hoih bel ahi hi. Vantung in cidamna ahi hi; vantung thute phawk semsem leh a dammawh thu-um mi a damna ding lamet om zawsem hi. Khristian biakna ii thuguipite in mi khempeuh mai ah gen zawh loh lungdamna piang sak a hihna hong lak hi. Biakna in a phul den tuinak hi-a, Khristian in a duh zah dawn thei in, kan hun cih nei lo hi.
Lungsim omzia in pumpi cidamna sukha hi. Gamtat pha hang leh midangte' lungdamna ding a bawlna hanga lungsim ii vanzanna leh lungkimna in, pumpi buppi lungdam sak sawn a hih manin, sisan hoih takin luang sakin' pumpi bup hatna piang sak hi. Pasian' thupha in cidamna hi-a, midangte' phattuamna ding a bawl den mite in lungsiin leh pumpi thupha a lamdangin ngah ding uh hi.
Zongsatna hoih lo leh mawhna tawh kipawl gamtatna a nei mite in Pasian' thumaan hong zuih uh ciangin, lungtang sunga a lut thumaan in a zaw gawpsa tawh a kibang gamtat hoih te hing kik sak hi. Tua bang a ngah mite in tawntung Suangpi tawh a kikilh khop ma uh sang a nasia zaw, a kician zaw thu-theihna hong nei uh hi; Khris sungah khamuanna a ngah tak ciangin ama pumpi cidamna zong hong hoih zaw pah hi. CH, lai-mai 28.[245-246]
Mite in Khris' hehpihna a saan uh ciang bekin, a kicing thumanna ii thuphate ngah thei ding uh a hih lam a theih ding uh kisam hi. Pasian' thuphate zuih zawhna a piang sak pen Ama hehpihna ahi hi. Tua bek mah in zongsatna hoih lo kol panin hong suakta sak thei hi. Lam maan ah a hong kip sak ding zong tua hehpihna ii hatna bek mah ahi hi.
Lungdamna thu zong a sianthona leh a vangliatna tawha kisaan ciangin, mawhna pana a piang natnate zong dam sak hi. "A kha nuai ah dam sakna tawh" dikna Ni hong suak khia hi. Hih leitung ah bang mahin lungtang kitamkhamte dam sak thei lo-a, lungnopna zong pia thei lo-a, lungkhamna zong nilkhia thei lo-in, natna zong bei sak thei lo hi. Minthanna, pilna leh siam nate in zong a dah lungtangte lungdam sak zo tuan lo-a, a mawk beisa nuntakna zong din kik thei tuan lo hi. Mihing' sunga Pasian' hinna bek mah in mihing' lametna ahi hi.
Mihing' pumpi sung tenga Khris in a kizelh sak ki-itna in hinna piang sak hi. Pumpi tunga nuntakna ding a phamawh zaw diak a hi khuak, lungtang, phawk theihna sazang cih te zong tua in cidam sak hi. Pumpi tungaa thupi bel hatnate zong tua mah in gamtang sak zo hi. Nuntakna tha a zawm sak kisuantakna leh dahna, lungkhamna leh lung hihmawhnate panin zong, ki-itna in mihing suakta sak hi. Ki-itna in lungsim sianthona leh daihna zong piang sak hi. Leitung tawh kisai na khat beek in a suksiat theih loh lungdamna a hi Kha Siangtho sunga lungdamna-cidamna a piang sak, nuntakna a piang sak lungdamna pen ki-itna in lung sungah hong guan hi.
"Ka kiangah hong pai un, tawldamna kong pia ding hi." cih hong Honpa' kammal in, thatang, lungsim leh khalam natnate dam sakna ding thu ahi hi. Amau' khialhna mah tawh mite in amau leh amau gimna a ki-tut uh hangin, Honpa in amaute hehpih hi. Ama kiang pan amaute in huhna ngah thei ding uh hi. Amah a muangte aadingin Amah in na lian pipi hong sem ding hi. MH, laimai 115. [246]
Cidamna Lam Kipuah Phatna Thu Gen Un
I nasepna ah kidek kidamna lam i nak ngaihsut ding kisam hi. Kipuah phatna ding a kisapna mun khempeuh ah kisikna, upna leh thumanna zong kihel hi. Ih nuntakna a thak zaw leh a thupi zawin laam to ding cihna ahi hi. Tua a hih manin kipuah phatna khempeuh pen thumna vantung mi' thupuak tangkona in huam khin hi. Kidek kidamna lamah kipuah phat ding pen nakpi-a ih ngaihsut ding leh ih panpih ding kisam hi. Ih kikhoppite ah tua thu bul phuhin nei-a ih lim gen ding kisam hi. Kidek kidamna thu guipite mite' kiangah genin, kiciamna lai tungah zong a min uh a gelh ding ih hanthawn ding hi. Zongsatna hoih lo-i sila a hi te lim taka i don ding ahi hi. Khris' singlamteh phung ah amaute i puak ding hi.
Hun bei ding tawh kinai semsem ih hih mah bangin, cidamna lam kipuah phatna leh Khristian kidek kidamna thu ah a sang zaw semsemin ih kah to ding hi. A kician zawsem, a phamawh zawsemin ih gen ding hi. Ih kampi bek tawh hi lo-in, ih gamtatna mahmah tawh mite hilh pil ding ih hanciam den ding hi. 6 T, laimai 110, 112. [246,247] xXx
"T-Tongsan sim Thuthak thei"
Zomi sungah Thukizakna pan kimeltheihna, khat le khat kihuh/ kipanpihna le minam kipumkhatna pianna ding banah Zolai itna, zuunnopna le Kepcingnopna lungsim akhan semsemna ding ngimna tawh kiphuankhia tongsan@googlegroups.com le www.tongsan.org te pan nisim, hunsim in thutak tuamtuam kisim thei den hi.
Tua banah hih Tongsan Group ah member alut nuamte Minpi, khualui le tulaitak omna Address cihte akiciantak a piak kei leh Tongsan Group member dingin kisanglo hi.
Note: Tongsan Group tawh kisai Thukhun kician i neih mah bangin, Group tawh kisai hici zawdeuh leh cih ngaihsut piaknopna a neite le thuthak (News) le Thului (Article) apuak nuamte in Tongsan Tanute (tongsan.weekly@gmail.com)tungah ngaihsutpiakna kineithei den hi.
All rights reserved.
Tongsan Media Group ii hiang khat ahi Tongsan Mailing Group ah thukikupnate khempeuh Tongsan tanute in panpihlo-a, tua kikupnate in lai khahkhia member mimal/kipawlnate muhna le kuppihna hi den ding hi.
---
You received this message because you are subscribed to the Google Groups "Tongsan Weekly" group.
To unsubscribe from this group and stop receiving emails from it, send an email to tongsan+unsubscribe@googlegroups.com.
For more options, visit https://groups.google.com/d/optout.
No comments:
Post a Comment