Kamtuampau tawh kisai pen kum-10 gualpawl a kazak ahi hi. A thunuam mahmah Pa.Tun Za Thang hong piangthak hi. Luseigam leh Hualngo singtaang lam azinna pan-a hong ngah ahi hi. Ama pen Limsaang dinmun ahi hi. Lim, cih ciangin, lungnuam, cihna hi-a, saang, cih ciangin, ngah cihna hi. Lungnopna ngah acihna ahi hi. Tuhunin lungnopna ngah a, lamlam, kawivak tampi a om hangin, tuahunin eilakah, amah bek phial om ahihmanin, mihai, ci-in khaukhihin kikolhbulh hi. Hualngogam vapai leh sa nagawh uh, saliang-saphei hong puasak uh hi. Vanpau tawh lasa a, vanpau tawh thugen hi. "En di fai en di bek, bek, bek, Amen sola lalala"acihpen ko naupang ten cimphawngin kimawlna-in kazang uh-a, la-in kasa theizel uh hi.
Khanlawhna hong tun ciangin, ahoihtawh ahoihlo tawh hong om hi. Christian genloh lawkite sepngam loh ding a khelnono om hi. Christian genloh mihing gamtat ding-a kilawmlo thu tuamtuam hong piang hi. Amaute in, Khasiangtho ompihna ci uh hi. Eikiang hong tunma kum-80 lai khawngin Tahan, Khampat, Zomun khuate-ah khuangpi saatin, sanggam Luseite na paatngiingei khin uh hi.
Khanlawhna hangin khantohna tampi ingah mahbangin, kisiatna zong tampi hong kibehlap hi. Pianthakna gah tuamtuam om a, tuni-in kamtuam-pau thu i kikum ding hi.
Penticost Ni-in Khasiangtho Kibua
" Tua laitakin, huihpi nung bangin, thakhatin, huging hehu vantung panin hong pai a, amaute kikhopna innsung khempeuh hong dim hi. Tua laitak mahin leii bangin a kaa' zezua meikuang kikhenin, amaute tungah hong kilang a, mikhempeuh tungah hong khawl hi. Amaute khempeuh Khasiangtho tawh kidim uh a,Khasiangtho in thuhilh theihna a piak bangmahin, kam tuamtuamte tawh pau-in thu a hilh uh hi."Acts 2:2-4.
Pastor-pa in nupikhat tuiphum hi. Tuisung pan a lu adawktoh phetin, kamtuam tawh hong pau hi. Tuinawl a tun ciangin, a puanlaihlo liangin kipumkhuk hi. A ang leh a taw-a zahmawh khempeuh kilok ziahziah hi. Mipi in naklo-in en uh hi. Tuhunin Singtaanggam munkhempeuh tua bang kek mahin kamtuampau tawh kidim hi. Singphung gamdaina munah amahguak pau hi. Mipi lakah kuamah tawh kikumlo-in pau uh hi. Kamttuam pau pen Khasiangtho tuiphumna takpi hiam? Tua bektawh Khasiangtho ompihna kilang thei ding hiam? Laisiangtho in kamtuam pau acihtawh a kibang diam? Lungdamnathu aadingin metna om hiam?
Leitung minamte pau
" Penticost pawini hong tun ciangin, amaute lungsim pumkhatin munkhatah omkhawm uh hi." Acts 2: 1.
Penticost pawi siim dingin, leitung muntuamtuam aa kithaangtheh Israel minamte hong kikaikhawm uh hi. Amau omna gamte pau bangbangin pau uh hi. Hebrews pau mangngilh khin uh hi. Gam-16 pan ahi hi. Leitungah Lungdamnathu taangkona a dongkholh pen pau kibanglo hi a, Khasiangtho in tua kidalna kulhpi lian mahmah hong hepkhiatsak ahi hi.
Khasiangtho huih gingsesu-in hong tuaksuk hi. Mimal khempeuh tungah meikuang bangin hong khawl hi. Pau khempeuh amau paubangin za khin uh hi. Nungzuite thugen a ngai khempeuh in, amau kam bangciatin zalel uh hi. Khat leh khat a kiho ciangin, amau kamciatin pau a, amau kammahin adangte pau zong za lel hi. Mawhna hang a kikhenkham leitung minamte Jesu sungah namkhat suak ding uh hi.
" Tua lai-ah vannuai munkhempeuh pan a hong pai, Jews thu-um tampi Jerusalem khua sungah om uh hi. Tua huging a zak ciangin mipite hong kikhawm uh a, lungmang uh hi. Bang hang hiam cihleh, thu kigen khempeuh amau kamciatin a za uh hi..." Acts 2:5-8.
Penticost pawi a Khasiangtho piak kamtuampau pen tuhun aate tawh kibanglo hi. Penticost ni-a kipau pen leitung minam tuamtuamte pau hizaw hi. Jesu in Christ(Messiah) hi ci-a teti pang uh ahi hi. Hih kamtuam-pau pen Lungdamnathu puaksawn nang a kipia ahi hi. Agen thute teltakin saang thei uh hi. Zeisu in Pasian tapa takpi hi, ci-in teti pang uh hi. " Tua ciangin amaute in, Zeisu in Messiah-Christ hi, ci-in lawptakin saang uh a, tua ni-in mi tulthum hong kibehlap hi." Acts 2:4.
Gentiles minamte zong kipia
Kamtuam pauna pen minamkim tungah Lungdamna a tunkimna ding ngimna tawh kipia Pasian Khasiangtho nasepna ahi hi. " Note pai unla,minam khempeuh thu vahilh un. Pa min, Tapa min, Khasiangtho min tawh tuiphum un." Matt 28:19. Zeisu in Christ(messiah) hi a, eite hong tankhia khinzo hi. Messiah hong paikhin hi, cih thu taangko uh hi.
Gentile-mi ahi Cornilius innah pai dingin Khasiangtho in Peter sawl hi. Peter in Aramaic kamtawh gen a, Roman galkap maangpa innkuante in, amau kam tawh naza uh hi. Galkap mangpa inn sungah Gentile mi bangzah cih genlo napi, mipi kikhawm hamtang hiding hi. A innsunga kikhawm khempeuh kamtuam tawh kiho uh hi. Pasian min phat uh hi.
" Peter in, hih thu a gen laitakin, tua thu a zakhempeuh tungah Khasiangtho hong kumsuk hi. Peter tawh hong tonkhawm vun ki-aat thu-um mite in lamdang a sa uh hi. Bang hang hiam cihleh Gentile mite zong Khasiangtho kipia hi. Tua ciangin, Peter in, " Eite mah bangin Khasiangtho a ngah mite tuiphumna dingin a khaktan thei kua om hiam?"Acts 10:44-46.
" Thugen dingin ka kipat ciangin, a kipatcil lai-in eite khempeuh tungah a piang banglianin, amaute tungah Khasiangtho hong kibuasuk hi." Acts 11:15.
Paul in kamtuam pau zatkhialna telgen.
" Paul in a khut amaute tungah a ngak ciangin, Khasiangtho amaute tungah hong om a, amaute kamtuamtuam tawh pau-in hilhkholhna a gen uh hi."Acts 19:6. Paul tawh a omkhawm thu-umte kamtuam pau uh hi. Hilhkholhna gen uh hi, ci hi. Bangthu tawh kisai gen hiam, ci-in kithei hi. Mite theihloh kamtuam-pau pen Paul in, man kei cinuam hi.
" Note khempeuh sangin kamtuam tampau zaw kahihmanin Topa tungah kalungdam hi."1Corinthians 14:18. Paul pen Gentile mite lakah thuhilh ahihmanin minam tampi pau thei hi. Tua ahih ciangin note khempeuh sangin kamtuam tam pau zaw ingh' aci ahi hi.
1Corinthians 14: 6-9. sungah a khiatna omlo, amal kitello, thu kigenkhat peuhpeuh khalam kilamtoh nading man neilo hi, ci ahi hi. Teltakin sim in.
" Kamtuam tawh thuhilh a, thungen a omleh kamphen sak hen. Kamtuam tawh thu kanget hangin lungsim bek hi a, kuama theihpih hilo hi." vs 13-14. " Biakinn sungah kamtuam tawh maltulsawm kapau sangin , miteltheih malnga tawh thuhilh leng pha zaw hi." vs 19.
" Mikhat peuh kamtuam tawh thugen a omleh, minih ahi a, thum ahi zongin kamphen guang hen." vs27-28. Kamtuam pau pen minamdang khatpau gen ahi hi. Ama thupuak pen a mawkna asuahloh nadingin kamphen guang hen aci ahi hi.
Penticost a kibua Khasiangtho piak kamtuam-pau pen a zate teltheih kammal a kipau ahi hi. A genthute teltakin thei uh a, mitampi tui kiphum uh hi. Kuama theihloh kamtuam-pau pen Khasiangtho pan hong kipan lo hi. Paul in, Biakinn sungah daitakin omzaw hen ci hi.
Pr Thang Siangh. zogampalpi@yahoo.com
No comments:
Post a Comment