TUU CING HOIH
(John 10)
Tuucing hoih in a tuute a ding anuntakna pia ngam hi
Gam khat khantonna pen gam makai kumpite khut tungah a ki ngak mah bangin, pawlpi khantohna ding zong pawlpi makaite tungah ki nga hi.Pawlpi makaite in pawl sung khantohna ding leh a hoihna dingin thatang itsitlomi, angsung khuallomi, thasiallomi ahih kul hi. Makaite’n deidan a neih laiteng mainawt zo ngeilo hi. Pawlpi sung khantohna dingin Zeisu in leitungah hong pai lai-in a nungzuite kiangah pawlpi sung makaih dan ding, ama nuntak zia tawh thu na hilh hi. Tuucing hoihte ii nuntakzia ki teltak in John10 sungah hong theisak hi.
Tuucing pa in a tuute teltak in a theih kul hi: “ Ken ka PA ka theih bangin ka tate’n zong hong thei ding hi”.(John10:14). Tuucing hoih in a tuute a theih masak kul hi. A tuute khat khat in a theih kei leh tuucing dingin kuaman cial nuamlo ding hi. Tuute aw or voice, teltakin za aa, adeih, aduh, gamtazia, a omna, cihte teltak in theih kul hi. Tuucing hoih in a tuute a theih mah bangin, a tuute in zong a cingpa a theih kul hi. Pawlpi maikaite pen tuucingte hi aa, a tuute dinmun teltakin a theihna dingin amau lakah a gamtat a tualbial kul hi. Kuamah deidan loin pawlpimite kiangah thungetsak kawikawi ding hi. Sum leh pai haksaktnate, kha lam nuntaknate, a haksatna khempeuh uh theih tel ding ki sam hi. Sia pawl khat in kei keel cing hi keng, tuu cing bek hing ci thei uh hi……. Kuate tuucing hoih ai tam?...
Tuucing hoih in a tuute tawh ki itna nei uh hi: “Ka tuute in kei hong thei uh hi” (John10:15). Tuucingpa in a tuute a theihtel bektham loin, tuute in zong tuucingpa kua hiam cih theihtel kul hi. Tua bangin tuucingpa leh tuute a ki theihtel uh ciangin, ki itna hoihtakin hong nei uh aa, bangbang hatsatna a tuak uh zong mapang khawm liailiai uh hi. I pawlpi sungah haksatna tampi I tuahna pen pawl sung makaite in a mipihte va pha man denlo, innlak thungetna om lohna hang cih ka mu hi. Ki maingap in makaite leh mipite’n nasem khawm leng, ki elna, muhdahna, ki telkhiahna bei ding hi. Pawlpi sungah khantohna a om kei leh tuucingpa leh tuute koi khial zaw ai tam?
Tuucing hoih in a tuute lampi maan ah makaih hi: “Kei pen tuute adingin kong khak ka hihi.”(John10:9). Tuucing hoih pen tuute a lut nang kongkhak hoihtak in, a theisakte hi uhhi. A tuute pen lampi maan ah hilh ding aa, tuute in a thumang in zui ding uh hi. Tulai leitung pilna leh siamnate hong khangto zelin, ki hilh hoihlo tampitak hong om hi. Tuu te’n lampi hoihlo a tawtloh nadingin, tuucingpa in hoihtakin a kepcing kul hi. Lampi maan hilhin tawntung nuntakna lampi ah makaih ding hi. A mite in amah a etteh theihna dingin tuucingpa a gamtat a hoih kul hi. Tua pen tuucingpa ii nasep hoih pen leh a kisam pen ahihi. Tuucingpa in a tuute a cin zawh kei leh ngiate in that lup sak gai hi…Na tuute bang ci kep na hiam?Ki ngaihsut huai hi....
Tuucing hoih in a tuute anlim tawh vak hi: “…. ( John10:9) A tuute sung tum pusuak in lonona mun a mu ding uh hi.” Nute in a tate nawitui tawh a khansuah mah bangin, tuucingpa in a tuute anlim tawh a vaak ding thupi mahmah hi. A tuute gamtatna ding anhoih omna mun leh gam hoih zonsak ding aa, a khantohna dingin anlim a omna zonsak ding thupi hi. Tua mah bangin pawlpi makaite zong a tuute a khantohna dingin a annek ding uh a buai pih uh kul den hi. Upna lamah a thanemna uh thei in, a kalsuan dan ding lampi zonsak ding hi. Kha lam a dangtakte, upna thanemte, a kilemlote, hanthawn siam in thapia ding hi. Pawl sung lumsuah na dingin hanciam in ki pumpiakna tawh na sem ding hi. A ki pumpiak ngam lo sia or tuucingpa khat nang bang ci ngaihsut na hiam? …..
Tuucing hoih in gaalte lakah a tuute keem hi: “….(John10:12) a ki cialtawm tuucingpa in a tuute'n haksatna a tuah ciangin taisan hi”. Tua bang pen tuucing hoihlote nasep ahihi. Ki lawh mawkmawk tawh nasem ahi uhhi. Ahihhangin tuucing hoihpa in muanhuai takin gallauhuai pen mun nangawn ah a tuute huu in keem hi. Tua mah bangin pawlpi makai te'n zong Satan nasepnate deihloin hangsan takin a mite keemcing ding hi.Kha nuntakna a susia thei gitlohna khempeuh, huaihamnate, gualnop zualzana, kisaktheihna, thadahnate, hih SATAN vanzatte tuute lakah a omloh nadingin pilvang takin tuucing hoihpa in kem cingding hi. Satan in tuute nek sim dingin zong den hi, (IIPeter5:7) hih Satan thang pan a kep zawhna dingin tuucingpa in tatsatloin Topa tungah kiap den ding hi(IThess5:17) Mi lungkhamte, beidongmite, panpihneilote, tawntung nuntakna lampi ah hilh ding leh makaih ding pen tuucing hoihpa leh tuu hoih te nasep ahihi. Leitung lungsim bang tuute in a neih lohna dingin tuucingpa in a tuute galvan muan huai tawh dalsak ding hi(Ephe 6:10-18) sim in. Tuute na cin ciang bang galvan zang thei na hiam?.....
Tuucing hoih in a tuute ading a nuntakna pia ngam hi: …. (John10:15) Tuucing hoih Zeisu in a tuute ading a nuntakna a piak ngam mah bangin, I Pastor tuuucing te’n zong a pumpi nuntakna uh a tuute ading a piak ngam kul hi. Tuute pen Zeisu in a nasem dingin hong sam hi cih tuucing hoih pa'n a theihsak kul hi. Agape itna pen midangte tung I piak kul hi. Ngaihsutna leh lungsim khempeuh tawh pawlpi mite a dingin hun a pia zo tuucing hoih ahih kul hi..Mite adingin itna tawh nasem tuucing hoihpa in thupha sang ding hi (Luke 18:29).Tuucing hoihpa pen Pasian in thupha pia ding aa, hun haksa a tuah ciangun zong a mipihte in it in ngai ding hi. Na haksat hun ah hong ngai tam loin, hong it a tam kei leh nang kua cing na hiam cih nang leh nang ki dot kul hi… Nannuntakna na pawlpimite adingin na piak ngam leh hong it lo hong ngai lo om peuhmah lo ding hi, tuucing siate vaw.
Tuucing hoih in a tuute huang khat ah koih hi: ……(John10:16) Ki pumkhat, lungsim ki khat in sepkhiatna pen Zeisu deih dan a hihi. Tuu huang sung khat ah I gamtat theih ngeingaina dingin tuucing hoih in tha deihtak a san kul hi. Tua bang mahin, thu-um nailo mi tampi tawh lungsim ki khat lam khat, upna khat ah I tut zawhtheihna dingin mimal ciat in mawh puak I nei hi. Tuucingte mawh puak lian pen in khut khat tawi, khe khat khai bangin I kal suan theihna ding amau mawhpuakna ahihi.Ahihhangin tuucingte zong a nasep uh sem kim zo lo ahihmanin, ki pumkhat in sem khawm ding hi hang. Ih tuucingte haksatna thei siam in ih sep khop zel ding pen mipite nasep hi aa, makaite tung ap gai loin mipi te’n zong pawlpi khantohna dingin sem khawm bawl khawm zel le hang I khangto ding hi. Huang khat sungah tuute leh tuucing pa in na a sepkhop theih kei leh kua ki sapna ai tam cih ki dot huai hi…..
Asim mimalte tungah Pasian in na mit hong vaksak hen la, na ngaihsutna uh hong tang zai sak in minam leh pawlpi, gam leh lei a dingin nuntakna apia ngam, makai vai hawmpi leh tuucing hoih a hi dingin ih biak Pasian in thupha guah bangin note tung hong zuusak ta hen cih ka thungetna hi...AMEN...........
"ITNA NEITE IN KAMPAU ZIAU TAWH IT ING CILO AA, SEPKHIATNA (ACTION) TAWH LAK ZAW HI"
ITNA BUL PHUH:
Dothang
Spicer Memorial College
Pune- INDIA
Ph: +919762354452
No comments:
Post a Comment