Sunday, December 19, 2010

A min bang ahi zen tam? - by Nang Khine


Zi ih neihkhit pongmawk hangin nungak tuailai khangno kum 18 kiim pawlpawlte hoih kisa lai veve mawk hi. Ih maingap zawkdeuhte bang a mangdanin kawiin pombawl leng guh neilo taang neilo bangin zaw ngikngekgeuh uh in ithuai ngiipngiiap mahmah uh hi. Na up kei uh leh na sin leu cin. Ningtui banga kidawnthei hileh dawndawn nop dingdan na himawk uh hi. Amau hoh a tuacihlam a kithei uh tam? Lawmte nungak theizawdeuh te ong gen leh ka sinsin pawlkhat hi. Kumcingsa leh kum cing milmialte bel kikhai mawk mah ei! ka ci bek hi. Hih bel kei tuah patpat mawk hi in, neulai Sakollamah Sia Thangpu thugen ding ong pailai pek a acih ngei, Sakollam pawlpi sungah nungak pawlkhat hihte khawng tawh..ki ......leng.......azom bel.......full stop mawk ei'. Aw! Pasian in ki ittheihna dinga a piansak hizen veh ee, cih ka phawk sansan hi. Ka mikha ah a mangtheilo, a min ka theih nopnop tua nuneino nu thu tawm khat ong suutkik ning.

Syrian ten Israelte' gamgii kiim a khuano pawlkhat valuhin, a deihtenguh na manpha pawl khat leh khangno numei pasal pawlkhat kaikhia in ciahpih uh hi. A ciahpihte lakah nungak no khat a etet uh ciangin a tunna dinga kilawm penpen Taimuu Bu Naaman inn simloh a ki tuahpih ding mulo, Bu nu tawh omkhawm ding bek kilawm kituak sa uh ahih man in tua lai ah ap uh hi. Bu Naaman zong tuahpha veve maw!!!  
Galmat samat lakah kihel tua nungakno nu,a it a nu leh a pa, a innkuanpih teng nusia aa, theih ngeilohna gam leh muh ngeiloh mite lakah a kisawl bangbang sem dinga piandang nunna sin dingin singno suan bangin ong kiphungvuh ta hi. A omna zong Syrian Galkap Bu inn sung hipah malam hi. Bu Naaman ahih leh Syria Kumpipa pahtawina ngah galhang, galkapte' galkap (Sia Thankhum pau leh Tedim te gilo sang gilo zaw), a vanglian, mite zahtak ulian, tulai pau leh medal tampitak a lokhia pa hi.
Ngaihsutsak leng a inn sungah galkap lianpen inn sung cihteh om maimailo kha ding hi. Annek sabuai tutphah vom sitset, kawm dimin medal kisuang zihziah ven cin, lumletei hoih penpen kikhai hikhek ven cin, ka neulai kalnel Suando inn ka muhsak ngei a, thau uuk laitak hisi, thaulawng a theihsa lawng 17 ding mahmah kitung zihziah ka muh teh ka cimul tho hi. A diakdiakin .22 caliber bang peuhmah khangno tadinga hoihbeklian hisawnsawn, nak deihgawh hiveng. Saiha kitung ngeungau aw, aw...aw.....aw.....Israel nungaknonu ii omna ka ngaihsutsak teh haza mai ingh. Kei zong Bu Suando in galin ong man henla, a inn ah ong koihleh cih ka nung ngaihsut kikkik khangei hi.
Ahi zongin Israel nungaknonu leh Naaman te mi kikhatlo, sa kikhatlo a bangci omtam uh? Tanu bangin a ngaihsun tuanding uh hiam? Nungaknonu in zong nulepa bangin a ngaihsun zo tuanding hiam? Pau kibang bualbual tuankhollo dinga, pau teltheihma kilungduai sam na ven, pau teltheih khitteh kilungtom kikhasia baih thei thong hi. Mi' pau mi' ham teltheih baih zong khat veivei big problems tung thei se hi. Tua nungaknonu omtheilel hileh kilawm hi. Zingsang tho, niangtui awm, puantaih, boot taih kiuhkeuh nelvom sak dildel. Galkap mang lianpi inn cihteh standard sang zekzeka om kulkha ding hi. Naaman zumkah inn ong tun teh dawn setset, a vanteng dawn, puansilh suahsak, khaisak, Bu nu tawh kinak taklah ding uh hiven, noplah nopmawh kencin, kuate pau leh hihenghang suah khading ai ve, mataw. 
Syria ta dingin lah galzo khin, patau ding khat zong neilo, Pasian in Naaman hangin Syriate galzo sak dikdek hiven, nopmahlo dingmaw?
Lusei tapong bel banzo keng in, Rakhine tapong kumpi galkapten a vanuai dikdek un bel, Tedim ah sangpi tennis court ah galzawhna awngpuaikhan cihdanin mawkwin zohsian cive un, cinema cikmah a muhngei loh ong lak ve un, a manteh zingsang nai 4, ak masa khuang nuamta, naknop kisa hiven. Ni bangzah kizom ong lakzen uh hiam, tudongin phawkin neilaizen veng aw!!!!!!! Tua bang mahin Naaman te zong lungnuamin omlel khading uh hi.
Ahi zongin Galkapmangpa Naaman tungah a lamdang a kisel theilo vun natna phak natna ong vei dihdih hi. Bangzahin nasa ding hiam? theihpihlo hihang. Tua hunlai-in, zatui zaha tawh phak natna kidamsakthei nailo hi. Singunau sangkah lai-in, guitar siam mahmah ama' siamnate zong sangnaupangte deihsakna lianpi tawh a hawmhawm sangsiapa a khutme kawk a guitar khau mekna ding keekkeek phak vei sese hi. Citciat sese cih sakding simloh cihna dingdang omtuan nawnlo hi. Tua lai-a zato siama nu in zong damsak theilo hi mailo dia! zatui kisun dingin Zangkongah vapai vilvel pahpah hi. Lainatpih khasiat pih mah mah hing.
Galkap mangpa Bu Naaman zong a nopsak laitak, pahtawina a neih laitak, mipi lakah zahtakna lukhu akhuk laitak mahin phak natna ong vei sese hi. Sih dong gum thuakding hi mikmek mawk hi. Cikciang ka si tam? or Bangcih leng ka damthei zen tam? hih thu namnih bebek lungsim sungah ngaihsutin om tawntung ding hi. Vanglian galhanga min thang khat tu-in a vang ong kiamta, galsim dingin thahatna a nei nawndiam? Mipi lakah ulian aa om genloh kuama sukkhaklohna ding munah khattang sawlbang ong heita. Citciat sese aw! A khoithei a damsak theiding khat lah omlo. Naaman needed help.  
Hih munsan takah 'nang' hile cin bang na cih diam? Galmat samat thuak aa, mikhual inn ah ong kikhawi sila bangin om hile cin bang na cih diam? Na khutme kawk tegel sialki tum bangin kibik..kibik..ci-in na tum kha mai tam? Silanu nungaknonu in kuama lawn theihloh lawng dingin Israel Pasian' piak ki-itna lungsim siangtho tawh a topa' damna ding lainatpih mahmah ahih manin ahihtheih tawpin mapangin ong kalsuan ta hi. A tua cingei na om uh hiam? A tonu kiangah pai-in huau khekhe in (telephone setin, bel hisam ken teh) kam tam pau kei; "Samaria ah a om kamsangpa tawh ka topa kimu thei leh! Amah in a phakna damsak ding hi," cih sentence gual nih bebek tawh a tonu kiangah damna zatui leina ding letmat (prescription) at sak hi. Tulai Siavuan te bangin signature thuh mangngilh hilo dia, mataw. Isreal Kumpipa in a zak teh kuan hibang letmat pia hipeuhmah ding hiam ci-in, heh in a puan balkek ci zawzen hiven. Surgeon Elisha lah na dipkua beeklo, damsakthei lua ding kisa na lungmuang hithiat lel sawnsawn.
Hih thu a zakphetin Naaman zong damnuamlua ahih manin Elisha tawh kimuh ding lawpin linglawngkeei in kisalah mahmah pah hi. Siavuanpa tawh ong kimu in siavuanpa cih bangin sagih vei tuisungah ong kisil khitteh a natna ong vengpah pah hi. Bangzahin a lung a dam zen tam? Nuam mahmah kha ding hi. Lungdamna khutui luang in um ingh.  Topa Zeisu mahmah in zong hih thu mah na genkikkik in: Naaman aki damsak laitakin, Israel mi sungah zong phak natna vei tampitak omin kidamsak lo hi, na ci sese hi.
Bangdingin hih zahta a tangthu hoih ki repeat genkik ngeknek sungah hih nurse numeinonu min ki atlo sese hiam? Numei ahih man hiam? Sila sawltak ahih man hiam? Jezebel khawng a min aa, a ki at sangin hih numeinonu min ki at hileh ka thei nuamzaw hi. Paul hileh at mahding hiven, ka ci simsim hi.
Banghanghiam cihleh, a zenzenin hih numeinonu in a theih, a muan khat thu iimin na genkhia lo hileh, Naaman in damna ngahlo bek thamloin Syria gamah Israel Pasian biakin na kineilo kha ding hi. Tua sentence gualnih a va genngam mahmah zong hang sa ingh, lamdang zong sa ingh.  Ei khat hilehang va genpongin ih topa ong damkeileh ih ci khamai tam? Hih numeinonu in Israel Pasian thei mahmah muang mahmah cih kilang mahmah hi. Hih banga galmat samata aom zong Pasian phal mah hi cih thei giugiau hi mawk ding hi. Natna satna khempeuh zong Pasian in a damsak theihlam thei giugiau khin himawk hi.  
Thei bek hiloin genkhia lai hi. Eite khatciat in zong hih bang compassionate sentence ki itna lainat pihna kammal te i zat khiat kim zawhna dingin Pasian in ki itna lungsim siangtho, ong pia kim ciatta hen.
Innlam ka ciah laitakin ka sungh nu cina kisa in Tahan Zato ah na lum dekdak hi. Amun amual mahmah kipia salo kahih manin hih tengah omom leng piang kenteh ci-in Zangkong lam ka zuatpih hi. Kei thehna ciangah Zangkong thupi sazaw kahih man hi. Zekailua uh teh ong kicihsan mawk hi. Zekai cih zong theihak zahak himawk mah hi. Tua laiah vapai leucin kici thei baih leh a hun lapna ding zong om kha thei hi. A siamzaw a pilzaw omlam zong thehding kisam veve hi.
Blue Star Acadamy ah warden ka seplai-in, nungakno khat dawilut cimawk, kitom keei, ki khaamzo mahmah lo. Siapipa tawh Vice pa tawh ka lencip uh a, pasal tingteng sawm in zong ong laileh ka thum un ong zawhkholloh laitak ding uh numeino khat ka lencip zo kei uh hi. Ka cihna dinguh ka theih tawpna ah siavuanpa sam in ihmut suahza nihvei ka sutsak uh teh ong phadawm sam hi. Sangkah hunta ahih manin Siapipa in Sia Nangkhai nangman na cing in, ci-in ong nusiat mawk uh hi. Lawmnu zong lum dekdak, ong khanlawh pianteh muh theihloh a lawmte tawh bang nekding kipia uh himawk dinghiam kisang keei in a kam ah guang keei mawk hi. Lungsim sungah hih pen upna taktawh thu ngen leng damin teh cih ka theisam hi. Ahih hang Sia Siangh te Sia Lianpau te tuahngei za ngeikhin ka hih manin ka thunget laitak banglo khat ong hihding ka khalau simsim hi. Thu ka ngen ngam kei hi.
Kei' hangin bangmah nalamdang piang kei mah. Ka min zong theihhuailo, ciapteh taklo mah hi. Ahi zongin hia Israel nunhaknonu' min bang ahi zen tam?
Pasian a upna, a muanna lian sa ingh.
Amah genloh ulian mawkmawk khat in zong uliante' ulian Naaman
paupih ngam hetlo dinga, aman' tua laiah vapai in ci-in sawl ngam lai hi.
Tulaitak khangual ciatciat thu khat kigen leng kinehpiksan hun tawh
tehna ding in tua hunlai te nasia zaw kanlai dinga, sila khat in tote tungah thugen cihmawk pen  a ngaihsun zolo ding kitam veve kha ding hi.
Hehpihna, lainatna, itna aneih man hizen aa, tua sanga lianzaw
Pasian a up amuanna mah lianzaw khozaw ahih manbek ahi hi. Bangbang apiang zongin a Pasian in gumkhiazo veve ding cih lungmuanna nei gelgal hiding hi.
Amin Bang Ahizen Tam?
khannolai nungaknote,
nuihmai siusiau geuha,
la sa aa, la makai sema,
keyboard tuma,
gamdang tangthu gena,
hun uk a,
pawlpi phattuamna dinga
nasep nabawlna khempeuh uh
kineu ngaihsutkha kei un.
Ong bawlpa Pasian' na asem nahi uh hi.
Na awkhum hiuhiaute uh iip kei un.
Paukhiasak un. Zaknopin ngaihbang mahmah hi.
Tu-a ka gengen nungaknonu zong a topa cina in lupna tungah lum diatduat den a, aman topa aw, na noptuamta hiam, bang ann ong huansak leng na lunggulh aa,na meimate ong siaksak ning maw, maw....maw... acih sangin hia lai-ah vapai leh damsiangbaih zawding cih upna muanna tawh a sila lungsim hemkhia photin, compassion, kawlpau in khumzawlai.chitchin myitta karuhna.., lungsim kamkhum tawh na sawl hi. A topa in zong silanu sawlna na mangin a vapai takpi leh damsiangin a ci asa nosuah ngikngek kik hi. Tua bek hiloin Israel Pasian meihal biakna tawh piakding khensat hi. Israelte leivui tung mahmah ah bianuam ahih manin a sakol leh la teng puakkhop dingin Israel leivui agam Syria ah pua lai uh hi. Bangzah takin lungdamna om dinga, kipakin nuam hiding hiam? Hih teng ih ngaihsut ciangin nungaknonu idea piak hang hizen a, cih i ngaihsut ciang ki itna lungsimhoih lungsimpha nei beklo a, i hopkhiat ding Pasian deihna ahi hi, cih ong musak hi. A kua akua cilo-in Pasian piansaksa mi khempeuh tungah compassion sentence zang ciat ni. Kuamah kineu et, ki el se kei ni.
Tua nungaknonu min bang ai tam? Amin mahmah in lo nuam mahmah ingh.

No comments: