Saturday, December 25, 2010

"LEEI LEH HA ZONG KI PET"

  "LEEI LEH HA ZONG KI PET"

                         I nuntakna ah I ki it luat man leh I ki deihsakluatna hangin ki telkhialhna hong om den hi. Tua hangin , Khangluite’n “ Leei leh Ha zong ki pet” na ci hi. Tuni in pen "Ha" thu I tam gen kei ding aa, "LEEI" thu I gen zaw ding hi. “LEEI"  in a genkhiat bangbang sia leh pha leh, vantung dongah  a  keng ding hi mawk hi.Na zatkhialh leh thukhena maiah hong tun ding aa, na hoih zat leh  misiangthote omna pasian mai hong tun ding hi.Tua ahihmanin, “LEEI” thu tawh tha la ciat ni.

                     “Sanggamte aw, note in na theih ding uh ka ut thu in, thu a ki gen khempeuh ngai pahpah un. Ahizongin pau pahpah kei unla, heh pahpah kei un” (Jeim1:19)

                      Laisiangtho bup sung en leng, kam a kemzote Pasian in thupha pia in, na kem hi. Tua ahihmanin I Christian nuntakna ah kam kem zo mi I hih ding pen a thupi mahmah khat hi. Nupi manmawh khat pen minutes khat in 150 pan190 bang kam pau thei hi. Kam tam pau in tampi khial hi. "Leei" pen hong si sak thei gu bang hi."Leii"pen a ki mitsak zo lo " Mei" or "fire" bang a hihi. Tua banah gulgilote gu tawh zong ki bang hi cin Laisiangtho sungah na gen hi. I kep zawh loh khat pen "leei " a hihi. Na kampau ciang hehpihna kam na pau kha hiam?Mite thangpaihna ding peuh na pau kha hiam? Ki teisakna, ki pilsakna in na kamna zang  kha hiam? Pasian thu genna in na zang hiam? Ki ngaihsun tek huai hi….

                      Mangte paunak ah, “ Na ngawng pen na leei tawh tan ken” ci hi. Mipil mahmah khat in, "Leei "pen letmat 3 sau bek hinapi, pi 6 a tunsang mipa that zo hi” ci hi. "Leei" pen a kidawp huai zia leh a kep cing huai zia ki mu thei hi. Khang luite’n zong, “Kampha in sial leei lawh aa, kamsia in sial leei liau lawh” na ci hi.Upmawh kam gen pen ki dawp huai mahmah hi.Gentehna: hinteh, hih tuak, hi vak, peuh mah zat loh ding ki sam hi.Thu khat na gen ciangin hehna masuan lo ding hi teh. Kayate paunak ah, “Thuk tungah an suang lopi in, an ne ken” ci hi. Mang paunak ah zong, “ Na kalsuan ma, na dian ma,  hoihtak ngaihsun masa in” ci hi. Hehna masuan leng ki khial baih hi. Tua hihmanin leei pen hoihtak a kemzo te mipilte hi uh aa, Pasian pahtaak, maipha ngah hi.

                     Kam pauna tawh Pawlpimite’n Makai lutangpite, Siate, upate I zuak kha hiam? Amau pen Pasian sathau nilh ngahte a hih uh hi. Ei leh ei ki sittel dih ni.I kampauna te hangin mite a phongto zo I hi kei zong, a puksakte hi kei beek leng hoih ding hi.Zeisu kiangah I kam, leei, pumpi I ap kul hi. Ngaihsut loh a pau pen ki khial thei hi. Tua ahihmanin kam khat;i pau ma in pasian ho masa leng hoih pen ding hi. Paunak16:32, Vangliatna sangin lungduaina hoih zaw aa, khuapi khat ukzawhna sangin ei ma pumpi ki ukzawhna hoih zaw hi”. vangliatna, mipil cih ding  ngahnopna lel tawh na pau kha hiam? Ki ngaih sun in . A hih kei leh khuapi khat, union khat, section khat, circle khat, church khat uknopna lel lel tawh kam a pau kha na hiam? Ki ngaihsun in.

Guhnei lo a nel mahmah leei
1.     Leei pen nel mahmah aa, zong ham mahmah hi,
2.      Leei pen zaw mahmah na pi, khauh mahmah hi.
3.     Leei in hampha sak thei aa, zong hamsia sak thei hi.
4.     Leei in maitai sak thei aa, zong maigum sak thei hi.
5.     Leei in daupai sak thei aa, zong  kamsia sak thei hi.
6.     Leei in pahtawi sak thei aa, zong nengngiam sak thei hi.
7.     Leei in nui sak thei aa, zong kapsak thei hi.
8.     Leei in ki gawm sak thei aa, zong ki khen sak thei hi
9.     Leei in mawhmai sak thei aa, zong mawh kik sak thei hi.
10.  Leei in a paukhiatsa thei nawnlo hi.
11.   Leei in u leh nau deidan tuam nei lo hi.
12.  Leei in a sia a pha khentel theilo hi.
13.   Leei in Pasian leh satan khentel theilo hi.

Thukhupna : Matthew 12:37
                    Bang hang hiam cih leh no mau kampau na tawh ki zui-in thu hong ki khen ding aa, dik hi cihna ahizong, mawh hi cihna ahizongin, na ngahna ding un nomau kampauna mah hong ki bulphuh ding hi”

                      Tulai tak bel ei utut in ki pau  ekek thei hi. Ahizong hoihtak in ki dawm in kampau ni. Nau pang hi nawnlo ihihmanin mite phattuamna ding kampha, kam hoih zang ciat ni. Ki lemna ding kam pau ni. Khantohna ding kampau ni. Tung nun ding ki tuh nawn kei ni. Sanggam unau khat veve hi hang aa, mi dang sa dang ki om lo hi. Ki deihsak na leh veiluatna a omna hang zong ki tel khialhna om thei mah ding hi. Ahizong kampau pen hoihtak in ki dawp huai mahmah hi. " Leei leh Ha zong ki pet" phawk den ni. "Leei" leh "Ha "pen a ki pet kha thei zel bek hi aa a tawntung hi lo hi. Zeisu hong pai ni ciang dong "LEEI " hoih tak a kem zo ciat dingin Topan a thupha hong buak suk ta hen cih ka thungetna hi..Amen


--
"ITNA NEITE IN  KAMPAU ZIAU TAWH IT ING CILO AA,  SEPKHIATNA (ACTION)  TAWH LAK ZAW HI"

ITNA BUL PHUH:
KapDo Thang (Taangpua)
Spicer Memorial College
Pune- INDIA
Ph: +919762354452

No comments: