Paul, Barnabas leh John Mark kithuahin missionary pai uh hi. John Mark pen masuan tunlopi-in Pamphylia khua a tun ciangin ciahkik ngiau hi.(Acts15:39-41) Paul in, John Mark pen mi-muancing hilo hi, ci-in ciamteh hi. " Bawng lokhawhna len-a a nunglam ente in Pasian gamtawh kituak lo hi" Luke9:62 acih bangmahin naseem dingin cing lo hi, ci'n ngaihsun hi. Eite upna hangin Pasian(Zeisu) min thangsak ding a, Zeisu hangin eite inzong minthanna ngah ding ihi hi, tua dingin kipiak sawmlo hi, ci hi.1Tim1:12. Pasian neihsa keem dingin thuman salo hi.1Cor 4:2. Thupoimawh mahmah laitakin ciampel theipa um lecin naha kitan ding a, na kheguh nalawitan ding hi, acih paunak tawh kituak sa hiding hi. Proverbs25:19.
Missionary a kuankik ciangin Paul in Mark deih lo hi. Barnabas in tonpih nuamlai hi. Hih thu hangin nasiatakin kinial uh hi. Laisiangtho sungah "'mikhat ama kampan thuzakna omlo-in thukhen loding, " ci hi.( Proverbs 18:17). Tua ahih ciangin Jerusalem Council kitun uh hi.
Jerusalem Council Nungzuipite thukhendan
Jerusalem Council in amaute nih pen kua maan, kua maanlo, ci-in thukhen lo uh hi. Paul panpih leh Barnabas panpih ci-in kikhen lo hi. Bang hang hiam cihleh hihthu pen upna langpang hilo hi. Lungdamnathu masuan mainawt nang deihluatman ahi hi.
Christian kinialna -ah man leh manlo tawh thukhen ding ngaihsutin neilo uh hi. Nasepna ahi, Lungdamnathu mainawt nadingin panpih nading lampi zongzaw uh hi. Thu-um tuaktuak kuamah puapaih ding leh danpiak ding om lo hi. Paul gumnuam leh Barnabas gumnuam kikhenlo hi. Abeh aphung sunglehpu hihna khawng sihsanin neilo hi.
Upna ah kipumkhat hi. Kipawlna Organization zong langpan hilo hi. Ahih hangin kipiakzawhna kikimlo hi. Naseem khawm theilo hibek lel ahihmanin, Paul leh Silas kithuah sak hi. Barnabas leh John Mark kithuah -in naseem uh hi.John Mark pen Barnabas sanggam hikei, christian lungsim tawh pantah nuam hi, a ci zong om hi. Hih kikhenna pen Pasian in Ama-gam zaina dingin zang thei hi.
Pasian vaihawmna itheihloh tampi om hi. Mihingte in thusia bang-a imuh tampite pen, nasepna tangzaina ding hizaw thei hi. M leh C vai zong Jerusalem Council kitun hizenzen leh hong koici thapiak zen tam, ut huai kasa mahmah hi. Paul leh Barnabas a kikhen khit ciangin amau masuan ciat nawtin nakpitakin naseem uh hi. Gal bangin kimu se nawnlo uh hi. Gupna ngah ding leh ngahlo ding khawng tawh kikawk nawnlo uh hi.
Silehsa tawh kinungta ahihmanin Pawlpi lusu-in, Pawlpi a dinkhiatna bang deihna hiam, ci-in phawk nawnlo thei hi. Thuhoih deihna hang tawh kikhenna leh kinialnate pen Pasian in ahoihlamin hong heisak thei hi. Ahi zongin lungsimtawng a om kamtawh kipaukhia khempeuh Topa thukhenna mai-ah kitangko kik ding hi.
Tuhun Christian LeaderThukhenna
Tuhun Pawlpi makaite leh Jerusalem Council members ahi, nungzuipite ngaihsutna kibang nawnlo kha ding hi. Pawlpi makai siapite pen Judges Jury, Court Lawyer tawh kibang zaw thei hi. Pawlpi Executive Committee Meeting pen thukhenzum bang hilo ding hi. Mawhna danpiakna committee hilo ding hi. Mawhneite sukgawp nading, Pasian in, makaite tungah power pia ngeilo hi. [Helper, Comforter, Councellor, Guide, Lead] Huh ding, Thapia ding, Kikuppih ding, Makaih ding ahi hi. Lungdamnathu langpang lo khempeuh,sepdan idea kibang takeileh,Pasian naseem ahi uh hi.
Christian Pawlpi sungah biakna-mi mahmah makai mipilte idea kibanglo hi. Pawlpi leh Pasian-gam zai nang nasepzia muhna tuamtuam om hi. A lui nate kicimtak hi. Lampi thak tawh kalsuan nuam uh hi. Biakinn model tuamtuamin kilam hi. A tungzeuzau pen Pasian san'theih model hituanlo hi, cita uh hi. Platform leh pulpit zatzia, mipi tutna setting bawl zia, hun-gelzia leh hun-zatzia kibang lo hi. Thunget zia kilamdang hi. Pasian-min pahtawina lasak ciangin gamtat-luheek zia kibang lo hi.
Ordain pastor piakdan nangawn kilamdang hi. Kawlgam ah Ordained ngahsa khempeuh in Annual kikhoppi hunkhat ngakin khutnga -in ngen hi. Kei omna Conference ten laisiangtho sangtuak degree ngahsa mikhat samin tuiphum khinsa teng in thungetsak ziahziah uh hi. Conference khat leh khat kibanglo hi. Numei ordained a pia om a, a nial zong om hi. Hihte pen Lungdamnathu sungah naseemte kalsuan zia tuamtuam ahi hi. Kei nangawn kadip hongkua sak lai hi.GC,UNion, cihkhawngin buaipih nawn selo mawk uh hi. Kawlgamah bel maanzaw takeileh Administration power tawh kilencip lai hi. Leitungbup mukimlo Kawlgam ciang bektawh omlaite aadingin buaitham cing mahmah tampi om hi.
Idea khat leh khat kilamdang hi. Pawlp Associatian khat omsa sihsanin Pasian gam zai nang seem ding maw, autonomy local church movement zangin naseem zaw ding, cih thu tawh kisai Protestants dangte sung ngaihsutna question lian mahmah khat ahi hi.
Thu-umte Pumkhatna
Thuzui mite kipumkhat ding Zeisu in nakpi-in thungen hi. John17:21. Tua mah bangin Paul in Corinthian pawlpi hanthotna nei kik hi. " Sanggamte aw, note khempeuh in kikhenlo-in lungsim pumkhat sungah awkhat lawngkhatin suakin paubanna omlo-in khat leh khat nakizopna ding un Topa Zeisu Khazih mintawh kong thum hi."(1Corithian1:10)
Paul in Mark pen kikholhpih dingin a deihloh hangin, Christian sanggam Pasian naseppi mahin ciam teh hi. Amah tawh a semkhawmlo khempeuh gal bangin ciamteh tuanlo hi. Pasian naseem theilo ding dongin khaktan ding hanciam lo hi. Nuntakna suksiat sawmlo thamlo-in Christian sanggam hihna thanem sak lo hi. Colosian laikhakna sungah, Paul in, Timothy kiang ah , "nong pai ciangin John Mark zong hong tonpih in," ci-in vaikhak hi. 2Tim4:11 Paul aadingin John Mark pen a ngaihhuai Khazih sungah sanggam hoihkhat hong suak hi.
Pasian in Ama Pawlpi sung kilamdanna leh ngaihsut kibatlohna khempeuh Lungdamnathu tangzai nadingin zang thei hi. Pasian pen leitung mipilte tungah kinga lo hi. Zaliatna minthannate leh hauhna tungah lungdamnathu nga ngeilo hi. Amamin paulam a nungta kha khatbeek mansuah lo ding hi. Pasian tate pen leitung aana neite teel hilo hi. Zeisu teel ahi hi.
Numei kizuak khat, Zeisu in hopih hi. Amah pen suangtum tawh denlup ding sazian sungah kihel pawl ahi hi. Zeisu in, pasal-5 nei zo teh, vasam in, ci hi. Kamsang ahih keileh Pasian zat mikhat hiding hi, cipah hi. " Kapate un hih mualtungah biakna bawl uh hi, note inbel Jerusalem bekah kibia thei hi, naci uh hi," a cih ciangin, " ---Numei aw, hong um in, hih mual tung zong hilo, Jerusalem zong hilo, Pa a biate in thuman thutak tawh biak ding hi.---Maantak a Pa a bia nuamte in, lungsim leh kha tawh biakhun hong tung ding hi, tu-in hong tung zo hi" ci hi. John 4:20-24.
Pasian biakna, vantung innkuan suahna pen lungsim leh kha hong kingen hi. Biakinn nuam sungah biakhun om hi. Nipi-nuai khataang nuai-ah biakhun om hi. Mualkawm suangkawmah biakhun om hi. Biakinn kiu suang Zeisu omna khempeuh mun-muanhuai ahi hi. Eite tunna munkhempeuhah Pasian min thangsak dingin hanciam ni. " But the our cometh, and now is, when the true worshippers shall worship the Father in spirit and in truth: for the Father seeketh such to worship Him. God is a Spirit: and they that worship Him must worship Him in spirit and in truth."
Khutzaak deda-in vantunglam ento aa thungen om hi. Leilakah bokkhupin thungen om hi. Khutkuak dawh kiukiau aa ngen om hi. Khukdinsa aa thungen om hi. Biakdan ngeina tuamtuam a om zongin, Pasian deih pen lungsim taktak ahi hi. Kuamah ciat in, Zeisu hong nget lungsimtakpi leh kha tawh kidim biakna tawh amah nai ciat ni. Topa'n thanemna khempeuh Khasiangtho tha hong dimkik ta hen.
Pr Thang Siangh. zogampalpi@yahoo.com
No comments:
Post a Comment