Itna tawh Citpiakna (Love gift) - Dongbawi

Tahan ah ka tute khat mehteh mehgah zuak, nektawm zong khat om in nuntak hamsa simtham hi.  Khatvei ka hawh leh a sabuai tung ah puanten thak khat na koi leklak a, atung pan ka vel leh, inn thunget sam nuam a pastor pa a piak ding ahih lam hong gen hi. 

Tua puanten a tawm man te hi a, a pastor pa’n teng nuam lua in ka um khol kei hi.  Ahi zong tua meigong nu in hamsa pi a lei ahih lam ka tel mahmah hi. 

A pastor pa it ahih man in Love gift a pia ahihi. 

Philippines ka sang kah lai in ka lawm te khat a zi a tate tawh sang kah in cimawh sim tham hi.  A sanggam pa in USA pan amah a huh ding sang in Kawlgam a om Pawlpi min thang a Pastor pa va huh zaw ahih man in a khasiat na hong gen thei zel hi. 

Pasian leh a pastor pa it ahih man in Love gift a pia ahihi. 

Huansung pan a piang anteh lom khat, maino pum khat a ki pan mehteh mehgah na neih sunsun pastor/sia te na puak vauvau pen, Siate it na hih man in Love gift a pia na hihi. 

Tua mah bang in sum zong pai zong te in pekkhat peknih Pasian na sem te apiak pen Love gift a pia ahihi. 

Tuu cing sia te in a tuu te it leh a tuu te in zong a sia te it kik ding cihna hi.  Tuu hon lak ah Kel ahi a Tuu vom (black sheep) a om ding bel a ngei na hi. 

Pr. Do Za Thang a nuntak lai hong gen ngei khat ka mangngilh thei kei hi.  "Ei Pasian nasemte bel I khasum tawm lua mihaute niangtui man zah zong phalopi ka cih leh Pr ……. in niang tui duh na hih uh leh pawlpi mite kiang ah thunget sak in vak ve vua" hong cihsan mawk, hong ci hi.  

 Adventist pawlpi sung ah Love gift ki zong lo tawh ki bang hi napi sumbawl hau a thu ngaihsun thei te leh pawldang te tawh a ki tam thuah te'n zang tham cih ka mu hi. 

I sia te mi lak ah hong vaam pian mah leh ei zong ki ang tang in I lu ki dawk sak ngam zaw deuh hi.  Puanten kek sa, ap phianphuan sa a hong ki hel uh ciang, amau sang in ei a pawlpi mi te, apawlpi mahmah zum huai zaw hi. 

Tua ahih manin Leitung paizia zui in Pasian I itna I Siate tung ah lak siam leng hoih mahmah ding ahih manin a pia zo te'n Love gift piak kisin huai mahmah ta hi.  A pia khia te tung ah thupha hong tung kik takpi ding hi. 

Love gift a piakhia ziahziah nuam ding leh zo ding in laisim mimal tung ah Topa in thupha hong pia ta hen.

Itna leh deihsakna tawh

Dongbawi

Tawmvei, London