Dear laisim mi mal khempeuh,
Sia Khambawi vai hawmna tawh sia Sawm Sang Bangkok ah Pasian thugen na nei ding cih ih zak ciangin ih lungdam pih ciat ding leh ih huh ih pan pih theihna ciat pan in ih huh theih tek ding hoih ka sa hi. Tha neem nading leh thasial nading thu ih gen sangin thapiak na leh thunget na tawh ih panpih zawh tek nading hanciam huai kasa zaw hi.
Love gift vai tawh zom kha ih hih man in lovegift tawh kisai tawm kong gen nuam hi. Love gift pen ei kam in citpiak a ci zong ki om hi. Cit piak sangin direct translate pah lel in it piak mah cih leng man zaw hi. Ih cit man a kipia hi masa lo hi. Ih it na in hong deihsak sak, hong phal sak, hong cingh sak ahih man in a kipia ahi hi.
Ih sumpi te Pasian ih it man in iksiik het lo in (phaltak) in ih pia tek hi. Ih sumpi piak khem peuh Love gift (it piak) vi ve ahi hi. Pasian in in iplah pipi phal lo pipi aa sumpi ih piak ding hong deih lo hi. Phal taka ih piak ding hong deih hi. Thu pha ngah kik ding cih lunggualh na leh lamet na bek tawh apia te Pasian in deih tuan lo hi. Na khat peuh ngah kik ding cih lam etna tawh piak ding hi lo hi. Marry in tampi man sathau namtui tawh topa Zeisu na zuut hi.
Hamphat na khat peuh ngahkik ding lam et na tawh akipia van leh sum te pen love gift hi lo a, golhguk (bribe) ahi hi. Hih bang piak na te Pasian in deih lo hi. Siampi te Zudas Iscariot tung ah sumtang 30 apiak na ki mu thei hi.
Mi khat peuh in mi khat tungah sumtang (or) van khat peuh apiak ciangin it na leh phal na tak pi tawh pia maw pia lo, akhuan azii khat peuh ngahkik nopna or lamet na tawh pia maw pia lo cih te lumgsim tawng dong a thei Pasian leh apia nu/pa bek in thei hi. Ei mihing te in mi lungsim tawng mu thei lo ih hih man in mawk gal sansat ding hi lo hi. Ki khial thei hi.
Pasian sumpi ih piak ciang ahi aa, sia te or mi khat peuh sum or na khat peuh ih piak ciangin it na tawh phal takaa ih piak pen love gift hi aa, iplah sim leh akhuan azii khat peuh deihna or ngah nopna tawh ih piak leh golhguk pia ahi hi.
Leitung ah pawlpi khempeuh sumpi tawh ading vive ahi hi. Sumpi tawh ading lo pawlpi khat zong om lo hi. Sumpi tawh ading pawlpi khempeuh love gift tawh ading uh ahih mah bangin, khasum ngah aa pawlpi na asem te khempeuh love gift tawh anung ta uh ahi hi. Hih pen Pasian gel na ahi hi. Love gift om kei leh pawlpi om thei lo ding hi. Love gift pen golhguk (bribe) ih suahsak khak loh ding thupi mahmah hi. Love gift pen golhguk (bribe) ih suahsak khak zel man in pawlpi buai na apiang ahi hi.
Midang te kipiak ki lak na te gen gen zaw lo in, en ih piak khiat sum te leh vante golhguk (bribe) ahih khak loh na dingin itna takpi leh phalna takpi tawh ih piak tek zawh na ding hanciam tek ni. A telsiam ding leh azang siam tek dingin Topan hong panpih ciat ta hen.
Deihsak na tawh
Pa Thang Khan Dal (Daltawng)
(USA)
No comments:
Post a Comment