CHURCH & MUSIC
A masa in Pasian in cidamna hong pia in Amah aphat thei leh music tum theihna siamna hong piak manin Pasian min ka phat hi. Khat veivei mihingte in ei neih loh bangbang kideih in ei neih khat pen manpha in kiseh lo, manpha kisa lo thei zanzan hi. Ih mel puakzia, ih aw luanzia, ih vun omdante pen ki hawmthawh in a tuamtuam in ei hoihsak danin lampi dang zongin a kullo pipi in hun tampi bei in, sum tampi bei in ih hun zang hihang. Piangsak-pa a khasiat hun tampi vei om dingin ka um hi.
A kipatcil in piansaksa khempeuh pen genbanglo in Pasian in hoih hi ci hi (Piancil 1). Mawhna hong lut khit ciangin mihing nuntakna in gen bang, kawk bang hong suak hi. Galpa (Satan) in Pasian bawlsa, Zeisu khutma khempeuh sia suaksak nuam in ahih theih zah in gu khah sim den in, a limna, a hoihna, a zaknop huai aw (melody) te pen peengsak in a ki lawmlo nate pen a kilawm ding dan in ih ngaisutna ah hong guat sawm den hi. Pasian phatna, biakna ding aa kilawmte pen nawlkhin sak nuam in a kilawm lo nate pen hoih veve cih tawh mihingte ngaihsutna hong peengsak in, mihing lungsim puakzia hong susia in silngo hong khah-khah hi. Hih thu kong gen ciangin Pasian biakna ah bangci bangin zahtak huai leh a deihhuai biakpiakna hih thei ding ih hiam cih ka gennopna ahi hi.
Khai leh, pawlpi leh music cih tawh kisai thu kikum dih ni. Kua gen hiam thei keng ahih hang kazak ngei khat ah Zomi te'n guitar khat a neih vua leh pawlpi khat sat nuam cih ki gen za ngei ingh. Tua in thu nam nih hong ngaihsun sak hi.
1) Zomite pen Pasian phat aa lasak nuam a sate cihna,
2) Zomite pen thu kituak haksate, thu tangpek, ki pilsak ahih hang lah pil khin zo taktak nailote, angsung khual, makai siamlote.
Hih a tung a thu namnih te en pak leng kei ngaihsutna kong gen pak hilel aa, hih thu pen Zomite sungah ih phut khak thu ahi hi. Numbat khatna bel deih huai mahmah in thangah huai hi. Nambat nihna pen simmawhna leh muhdahna kam tawh kibang hi, ahih hang ih thanemna hong lak kammalte hi a, ih ki puahphat theih nang ngaihsutna hong pia laigualte ahi hi.
Music tum pen pawlpi a om ciang bek in kitum thei hilo na pi'n pawlpi leh music pen a kikhen theilo hai (cup) leh niangtui bang ahi hi. Pawlpi in music banghang thupitsak kul hiam? Biakpiakna ah music omlo in biakpiakna picing suak theilo ahih man hi. Vantung ah music hong kipan hi. Piangsakpa biakna ah music pen a thupipen vanzat hong suak hi (Psalm 148:11-13).
Tua ahih manin biakpiakna ah music tum leh lasak pen Pasian mai ah deihhuai asuak ding biakpiakna kisam hi. Ka gen ngei zel a om mah bangin music pen a ngai mipite a ding in lungsim a nawngkaisak leh biakpiakna lungsim hong kai peng thei music leh lasak na a hih loh ding thupi mahmah hi. A diak in guitar tumte in distortion sah lua kisamlopi in biak-inn sungah tum loh ding hong han thawn nuam mahmah ingh. Kei zong Rock music pan aa akhang khia musician khat hi'ngh. Ahih hangin biakpiakna ah pen distortion ih zat ciang in a siam taktak control siamte ih hih kei leh lasakna pen lamalte khuh mang in ih lungsim hong nawngkaisak hi. Alawp huai music beat-te pen biakinn sungah tum pen khialhna hilo hi ahi zongin tawndian gawp nopna hong piangsak music beat-te pen biakpiakna a zat ding kilawm lo hi. Bangbang ahi zong-in biakpiakna ah music tumte in music pen a sate aw sangin ngaih saklo zaw hamtang ding kisam hi.
A nihna ah, laphuak-te'n love song melody khawng Pasian biakna la a ih bawl ciangin Pasian min zangkhai ngaihsut suak hi cih hong gen nuam ingh. Pasian pen a masa, a pal, a limci, leh ahoih pen, a masa pen adeih Pasian hi. 2nd person a ut Pasian hilo hi. Pasian pen love song a ki sasa la awte khawng tawh phat ding pen lungkim in na um hiam? Pasian pen a tuam vilvel, seh tuam, tuam koih ngiat, siangthosak ngiat cih a deih Pasian ahi hi. Tua ahih manin Exodus sungah Pasian in Sabbath ni pen amah biakpiak ni dingin sehtuam, siangtho sak ngiat hi. Tua ahih manin Pasian phatna la pen love song aw khong pan ih phuah loh ding hoih kasakna hong gen hingh. Thudang khat ah original laphuak-te phalna omlopi a la dang khat a ih phuahsak kik pen mi neihsa guksak kisuak hi.
A thumna ah, English gospel late pen Zola alet ding pen nasep hoih leh a deihhuai thu khat hi. Original lamalte khiatna kibangin kampau dang a akilet ciangin original la neite ading in deihhuai mahmah a lungkimhuai hi. Ahih hangin a aw bek lak sak in athu ih khel ciangin thumanlo a mi neihsa laksak suak leuleu hi. Hih kong gente pen a sang theilo tampi om ding, ahih hang copyright khiatna a telte in thuman leh ih zuih ding kilawm, leh original composer-te credit piakna kilawm ahih zia hong gen ka hi hi.
Zomite Pasian a phat zo semsem ding leh, a deih huai, kilawm, a siangtho phatna ih piak zawh nangin Pasian in thupha hong pia ciat hen! Amen. Lungdam na leh Itna tawh,
? Mg Muang, B Mus., M A Ed.
Tawmvei Pune, India
No comments:
Post a Comment