EU Myanmar Adventist Conference, Denmark 23-25 July 2015
EU Myanmar Adventist Conference pen, nuam takpi in kizo thei hi. EU gam 6 te ahi, Cyprus, England, Denmark, Sweden, Norway, Germany leh Asia gam Korea pan kipai ciat in, kikhawm atampen ni in 160 kipha hi. Naupang te Hall atuam khat ah kikhawm uh aa, lasakna kimawlna tuamtuam nei uh hi. Naupang 50 kiim bang pha ahihman in, hong kepsak siate tungah naakpitak in lungdam mahmah hi.
Kawlgam pan hong pai, Syamah Lamh No, V.C.Mang leh Sia Sang te tungah ki lungdam mahmah hi. Tua ban ah, Korea pan in, Lily Lee leh Germany pan in, Kam Cing, England pan Sya Dong Bawi , Sweden pan Pu Tong Seal zong kihel thei hi. Cyprus pan in, Kayin sangam nu Naw Phaw Gyee hong kihel thei hi. Muslim mi tamna gam ahi Cyprus ah Adventists upna a hih theihzah in a tangko khat ahi hi. Amah hong kihel thei man in, ki angtang mahmah hi.
Christ's Ministry: Topa Zeisu nasepna te enkik le hang, Healing, Teaching leh Preaching kihel khawm hi. Tutung conference zong tua thum a kigawm ahi hi. Cidamna thu kigen a, thusina om in, thuhilhna leh thapiakna te zong om in kicing mahmah hi. Adventist message te ah cidamna, thusinna leh thuhilhna a kikop denciang apicing ministry khat hong suak thei pan ahi hi.
Sya pipi te un, a tel khol lo zong om kha ding hi. Gam khangtona te ah zong, conventional medicine sangin, side effects a om lo, tabavuah tawh kibawlna te a thupi penpen mah in kingaihsun lai hi. Tabavuah tawh a kibawl zatui zuakna sai om in, tam man thei mahmah lai hi. Mikangte mahmah in zong, theikim tuan hetlo hi. A kin deuh, a sin deuh te bek in thei kha lel hi.
Natural Remedy: Cidam na tawh kisai pen Syamah Lamh No in hong gen aa, zaaknop huai leh manpha kisa mahmah hi. Conventional medicines te pen, side effects tampi kingah thei aa, tabawah zatui te zat siam leh nisim ih aneek tuidawn sungpan a kingah zatui zaha te hi in, an zong zatui hi aa, zaa zong an hi veve hi acih dan in aneek tuidawn pan cidamna a kicing in ngah thei ding athupi pen ahi hi. Topa in zong tabawah tawh a kinai semsem ding hong deihsak hi.
Huih, Tui, Nitaang, Tawlngakna te ihzat siam ding kisam lua hi. Aneek tuidawn icih te zong pen, ineih hang zatsiam kei leng a neilo mah tawh kibang hi. Ih zaakzaak sa te zong zuih sawm kei leng a za ngei nailo te mah tawh kibang hi. Ih zaak zaak ding zong kisam aa, ih nuntaakna sungah izat pah pah ding thuman pha te ahi hi. Syamah Lamhno tung ah naakpi tak in lungdam hi.
Gam mialna ah misionry nasem: Syamah Niang Lamh Vung (Syamah Lamh No) pen, Shan gam palaungte tena a khangto nai hetlo mun khuata te ah gamial phulding in, na nasem ngei hi. Tua khuate pan, naupang 4 la in, i pawlsang ah kah sak hi. Khatin, Myaungmya pan Degree ngah khin, tukum khat in ngah lai ding. Maikum 2016 ciang in, tua naupang te khua ah nasetak in effort bawl nuam lai hi. Topa ading in, a nasep khiatna te thupi kasa mahmah hi. Pasian in zong panpih mahmah hi. Kawlgam sungah gamial phulna akuama peuh in ih panpih theihzah panpih ciat ni.
V. C Mang: Sya V. C Mang pen, nidang amin kazaak aa kipan ka muh nop den Zomi lasiam minthang khat ahih baan ah thudik hiit hiat mahmah hi. A thukhual, a ciim, kholhpih nuam, ngaihsutna picing, Upa kician mahmah khat ahi hi. A lasak te i ngaih ciangin, i lungsim sung hong bun pha deuh hi. Topa in ama nasepna ah thupha tampi buak khin, sangsak khin zo hi, tua mah bang in a mabaan te ah zongh daupaina lawhcina hong piaksak zom suak lai ta hen.
Pastor Tony: Denmark Esbjerg aa district Church pastor pa in, Sapi thu, sum zuak, sum lei theilo ding cih tawh kisai in LST text munthum te hong sinpih aa, tua munthumte lak pan, munih pen Biblical Encyclopedia sungah symbolic in kila in, mukhat pen literal in kila ahihna hong lak khia hi. Ama gena ah avekpi in symbolic in laak ding hi zaw hi ci in hong hilh cian hi. Thu manpha mahmah hong hawm khia ahihman in kilungdam mahmah hi.
Gay married pen USA president Obama in permit pia khin. Supreme court in a phal hi ta. Europe gam ah neih kibangte a let that nuamlo pastor khat thong ki kia sak khin zo hi. USA ah leh Leitung mun tuamtuam te ah zong Topa thukham tawh a ki leh bulh kumpi thukham tampite hong bawl lai ding uh hi. Gay's right, gay married cih pen thukham 1 na hi pan. Tampi bawl beh lai ding. Pasian thukham 10 hilh khuan, gen khuan kikhak ding hi. LST sungpan Topa thukham sawm ki lakhia lai ding. 666 ciaptehna anei te bek in, Pasian thugen khuan nei ding, Pasian thu ngai khuan nei ding cih te damdam in hong om ding hi.
Child dedication: Thangpi te Nupa nau apna zong, Pastor Tony in hong neihpih lai hi. Naupang tampi in la hongsa hi.
Esther Nuam Khan Dim (5 yr) in, LST kam ngah Gensesis 1:1 leh John 3:16 hong nei aa, OT leh NT laisiangtho bu min te zong lot ngahsa in hong gen khia hi.
Pastor H. Lian Do, Tong Seal : Hun nunung tawh kisai hehpihna kong kikhakna, Vantungmi 3 tangkona, Sapi ciaptehna thute a bucing takin seminar ah hong sinpih ngekngek hi.
Praise and worship zinghun 30 minutes, Praise and worship sun khit 30 minutes, Praise and worship nitak anneek khit 30 minutes kinei den hi. Hun khat le khat kikal lasakna ki om sak zel lai hi. Health talk, Seminar, Sermon namthum ta kizang aa, tentikhana zong om hi.
Sya Dongh Bawi, Syamah Lily Lee, Syamah Kam Cing te in hanthotna cidamna thutuamtuam tawh tha hong pia hi. Kicing thei mahmah hi.
AY hun pen, South Korea pan hong pai, Syamah Lily Lee in interview bawl aa, Sya leh Syamah te 5 interview ki nei hi. Zaaknop kisa thei mahmah hi. Interview na ah VC Mang, Syamah Lamhno, Muan Mung, Sya Sawmsang i, Syamah Naw Phaw Khee hi hel hi.
An huan: Norway Pa Pum in an huan tavuan hongla in, a huh ding a hunhun in mi kilaih hi. An te zong lim thei mahmah hi. Karen ih sangam te zongin pawipi sungah nitaak khat an hong vak hi. Amau mahmah anhuan in hong diang pah uh hi. Thupi kasa mahmah hi.
Music lam: Khangno te in, music van a kicing in hong kawm uh aa, lasakna te zong nuam in, lingh thei mahmah hi. Gitar tum siam lasa siam, drum sat leh keyboard tum ding hong kicing mahmah hi. VC Mang tawh hong kikop thei lai uh ahihman in, nuam kisa mahmah hi.
Kalaka khun leh Laisuan: Cing Niang – (Niangno) leh a lawmte in tavuan hongla in, design zong etlawm mahmah hi. A zatnuam mahmah ding in hong gen uh aa, projector munih a kilak theihna ding in zong hong gel aa, lem mahmah hi.
Sya thum sapkhat in kisam: Kawlgam pan, sya 3 sap khat in kisam ahihman in, vai tuamtuam hong tam mahmah hi. Invitation tawh kisai, Health Insurance tawh kisai, Visa tawh kisai, Lamsaap ding zon kawikawina tawh kisai tampi te avekpi in Pu Tong Seal in hong van sak hi.
VC Mang & Youth
Children song, Child dedication, Sermon Pr. Tony
Who Am I (By LiLy Lee), What is 3 Angels messages (Pr. Lian Do), The love of God- (Pr. Sawm Sang).
Health Talk (Syamah Lamhno), Music (Pasing) Songs,
Last days events (Pr. Lian Do), Song (VC Mang), Song (Niangno, Sancing)
VCMang leh Syamah Lamh No te, Germany, Denmak, Sweden leh Norway hawh kawikawi man uh hi.
Reflection:
3 Angels messages: Vantungmi thumte tangkona agenkhia nuam mi tampi kisam lai hi hang. Hun nunung thupiang ding te gen ding alawp phadeuh, mite a kiging sak nuam, a vei takpi Sya leh Pawlpi mite kinaak sap mahmah lai hi hang. Vantungmi 3 tangkona icih pen SDA te aa ding bek a sa kha, Sya leh Pawlpi mi tampi om leh kilawm hi. Conference te ah gending hilo hi aci zong om lai. Gen noplo leh, gengen ding kul asa lo bang omlai. Adah huai thu ci ni. (General Conference 2015 San Antonio ka paina ah, cidamna thu, hun nunung thu, vantungmi 3 tangkona thu, adang tampi kicing mahmah in seminar te ah zong kigen lua zen hi.) General Conference khawmpi na ngawn ah, 3 Angels messages, 144000 te kuate hiding ahiam cih te, Health seminar, hun nunung tawh kisai seminar te nasetak in ki pia ziahziah hi.
Vantungmi 3 tangkona icih pen, minam khempeuh, kampau khempeuh, gam khempeuh aa ki taangko ding hi ci in mangmuhna sung ah siangtak in kigelh hi. Rev 14:6 … dwell on the earth, and to every nation, and kindred, and tongue, and people. Leitung mihing minam khempeuh warning piak ding cizaw lai hi. Tua ahih ciangin, Christian pawlpi dangte gen nai kei ni, SDA sya te mahmah zongh in, atel sinsen lo aza ngei, a sim ngei ciang bek tampi om in ka um hi. Tua man in, SDA pawlpi mi te ading zong gengen ding a kisam lua thute na hi zaw hi.
Jonah in, Ninewee khuami te ading, thuman gen ngamlo in lau hi. Tuhun ciangin zong, mi te'n zanuam kei kha leh, hong kimudah mawk leh, love gift hong kipe kei mawk leh cih lung himawhna tampi kinei hi. Neutung pan ih zaaksa hi a ci tawh, ih thudon nonloh tak ciang, aza nailo te sangin a dah huai zaw dinmun a kitung hi gige hi. Agen nuamlo, aza nuamlo te in, a teena aveng a paam te ah gen hetlo ding cihna hi pah hi.
Ih gengen leh ih zakzak ciang a kiging thei dinmun kitung thei pan ding ahi hi. Spirit of prophecy leh LST sung a om hun nunung thupiang ding te leh vantungmi 3 tangkonate gen nuamlo, ngai nuamlo, za nuamlo, theih sawmlo, tel nuamlo aa ih om ciangin, khalam a thanem mahmah te, ahih kei leh khalam a site ih hi hi. Ka neulai pek pan ka zakzak sa hi aci SDA te, athu don nawnlo te ataktak in alauhuai pen dinmun ah a ding i hi gige hi. Piangsak pa biakni ahi Sabbath ni siangtho ni, sianthosak ding thei napi, a zui nuamlo te leh ni masa ni Sabbath in a zangh te kibang hi.
Timorthy Muana Paul- Kawlgam SDA union president pa zong nidang piat mahmah ngei hi, a nu le a pa in thu nasetak in ngetsak den hi. Ni khatni ciang hong kikhel hi. Kei siamna kei pilna bangma omlo hi ci hi. 3 Angels messages munkhempeuh ah taangko dingin, azi tawh ki-ap ngiat uh hi. Tua hun pan aa kipan Topa in a nasem dingin limzat semsem zaw hi.
II Tim 4:3 Mihingte in, doctrine maan azaaknop lo hun hong tung ding aa, abil te uh thakin, amau zaaknop thute bek bek agen thei ding syate tampi a kiim a paam ah khawm tuah ding uh hi. (Tu hunciang in, hih genkholhsa mah bangin Sya tampi te thugen ngaileng, gualnopna entertainment bek in zangh ta uh hi. LST sound doctrine ahi, thuman thutak te, hun nunung thupiang dingte gen sawm nawn peuhmah lo uh hi.) Dah huai mahmah hi. Mipi te zong, a bil thak uh aa, gual nopna ciamuih thu teng tawh lungkim ta uh hi. A theih huai, a ciapteh huai LST thuman laigil te zanuam nawnlo uh hi.
Ka neu lai thu: Nitaak in, mi hong hawhciang mei awi kawm in, ciamuih thupeuh gen in, nui ziahziah nuam kasa pha mahmah hi, nai 10 a saat lam bang kiphawk lo, lusu lo, ihmut suaklo in ki tutu zo mawk hi.
Tua pen, ka nu ii zaakdah penpen thu khat hi ciitciat se se hi. "Laisin sangkah te bangdia ciamuih thu peuh ngai in, mei gei tu na hi uh hiam? Cia muih thute lai huana ah hong kidong ding sa na hi uh hiam hong ci thei zel hi. Inn sung pai un la, na sanglai te uh sim un" ci in hong hawl khia pahpah hi.
Laibu leem in, minutes 5 bang 10 bang itut ciang, lusu in ih mut suak dandan pah hi. Lusu kawmkawm ihmut suak kawmkawm mah aa lai kasim, lai kibawl tangh tangh hi.
Ih mut suakpipi mah aa, lai ih sim, home work ih bawl te hang mah in, laihuan ciang kum sial in a ki zo toto ahi hi. Ciamuihna leh nuihzaakna thupisak kha in, laihuan aa hong pai ding lai-te en kei leng cih mah hun in, lai a ki ong zo ding hi lo hi.
Tua mah bangin, ihmut suak phial mah ta leh, ih neu pan ih zaak zaak sa hi phial mah ta leh, hun nunung aa piang ding thu te ih zaak kik kik ding mah a kisam hi zaw hi. Tua in hong kiging kholsak ding ahi hi. Nu ngak 10 te en in, meitui nei 5 hi aa, meitui neilo 5 hi. A vekpi in thuman thutak zangei sa te vive ahi hi. Ahizong in, vantungmi 3 tangko na leh hun nunung thupiang ding spirit of prophecy sung gen kholhna te athudon lo seventh-day Adventist te pen meitui neilo nungak 5 te ahi hi. Tua te lak-ah minister, pastor tampi kihel lai ding hi. A theih bangin, gen nuamlo, nungta nuamlo, mite zong hilh nuamlo… a tawpna a khalam nuntaakna meitui te beita ahi hi.
Spirit of prophecy leh LST gen kholhna ah, hun nunung thupiang dingte, vantungmi 3 taangko nate genoplo na, gentheihlo na ding, SDA Pastor, Ministers te mah Dawi Mangpa in hong zangh ding hi naci lai hi. (Siate khat le khat a ki thutuaklo na ding, Dawite khaaniin te in tawholh ding, sutuah ding ci ngiat hi.) Khasiantho zat, Sya khat a hih leh thuman iim lo in, thuan taangko ding thanuam mahmah zaw ding hi. Ki bawlsia aa, kithat phial leh zong gen veve lai ding hi.
Gen kholhna piang takpi: Tua mah bangin, nunglam deuh mah in, USA state khat sungah Great Controversy hawm khiatding ki print hi. General Conference ah committee atu te hong ki kupkup uh takciang in, a bu neu khat hong suah in, a thulu zong hong laih hi. Original The Great Controversy version hong hi nawnlo mawk ta hi. Dawi Mangpa in Peter bilsung ah Zeisu thei ngei keng ci ve ci in, a huau sim mah bangin, ih ulian te, ih sia te lungsim hong zang in, The Great Controversy bu tawh thuman taangko ding kimlai, laibu neuno "The great hope" cih khat hong suah hiau mawk uh hi.
Dawi in, nungzui te kimkhat a zat bangin, ih ulian te, ih sia te zong zang thei luazen hi. Thuman peengsak aa, midang upna leh saan theihsa thute bek gen nuam uh hi.
Contemporary Christians Churches te ah: Sound doctrine LST thuman thutak gen nawnlo aa, biak inn leh pulpit pen, gualnopna ciang bek aa azangh te, agena ahi hi. Ih mut suak phial mah leh zong, thuman thutak zaak zaak ding a kisam hi zaw hi.
Topa Zeisu asih ding nitaak aa, nungzui te kiang themvei na ngak lai un, thu nangen ngen un ci na pi, nung zuite a ihmut uh suak mahmah aa ihmut san zelzel uh hi. A tawpna ah a hun hong tungta hi. A topa hong kiman ta hi. Nungzui te kuamah in Zeisu neh ngamlo pah uh hi. Thuman thutak, nuntakna, lampi ahi Zeisu tawh cile sa pumpi in, kinai mahmah napi uh, khalam tawh a kisap penpen hun in hong ki gamla mawk uh hi. Gen gen ta leh kiging lo ahihman hi. Peter bek in agal pan zui ngam hi.
Topa in, "ka thuman agen nop kei uh leh Suangtum te ka kitaangko sak ding hi" "if they keep quiet, the stones will cry out." ci hi. Luke 19:40. Thu gen siam mahmah khat in, thuman agen nop kei leh thuman theilo pa sangin a seh sawm in thuak kik ding aa, a gen siamlo pen te Topa in zangh ding hi. Mite in, Topa aw, ko ka Syate un, hi thute hong hilh ngeilo hi ci lai ding uh hi. A syate un, thuman agen loh man un, a zah 10 in thuak ding uh hi.
Pasian ii a silpiak ahi a talent a zangh khial D. M. Canright SDA minister pa thu tawm ensuk ni. Self-glorification a lungulh luat man in nungtolh aa asih dong, thuman zuan kik zo nawnlo mawk hi.
D. M Canright: Thugen siam mahmah Adventist Minister khat hi napi in, thuman tangko ding sang ama minthana ding lungulhzaw hi. Mi zaaknop theih ding, mi nopsak ding, ama popular thei ding leh minthan theih ding ut zaw aa, Pasian thuman mite hilh nuamlo hi. Pasian thu kagen sangin, politics lut leng popular zaw lai ning ci ngei hi. E.G.White ii thuman tangko nate leh do hi. Langdo lianlian mawk hi. A tawpna S.D.A thuman tangko na pan amah leh amah hong kihem khia mawk hi. Tu dong mah in, Adventist thuman langdona laibu D. M. Canright ii agelhsa te pen mite'n simsim uh a lampial sak hi. Dawi mangpa khutzat pi khat hong suakta hi.
A tawpna Khasiangtho in D. M Canright taisan hi. E. G. White gen sia sia ahih hangin, ama om mun ah "She is a good woman, a true servant of God" ci zel in, amah leh amah pen, "I am a lost soul, I am a lost soul… I am lost" .. ci in ama zaak khom in gen aa, naupang bang in sual tung ah kikhuuk in kap zel hi ci in, a secretary pa in gen kik hi.
Thugen siam mahmah in, dangnaal mahmah ahihang in thuman taangko nuam lo aa, mi paaktat ding zaaknop ding thu bek agen gen man in leh thuman kigen te a leh do pahpah man in, a tawpna amah na leng khaa mangthang hong suak mawk hi.
Christians te, adiakdiak in SDA thuman tangko nate ah thuman leh do dingin khanin in, pawlpi Siate, pawlpi mite mah hong zangh thei lua zen hi cih pen, a thak in phawk ding ka deih hi. Desmond ford zong pen atawpna khanin in hong zatsak aa, kha mangthang hong suak hi. Thuman lampi pan a mah leh amah a tawpna kihemkhia hi. Vantung biakbuukpi om lo hi cih dong in, LST thuman hong nial ta hi. Thuman a kizelhsak te ih hih ding thupi zaw hi.
A kuama peuh nong thungetsakna te ka lung uh dam mahmah hi. Mai lam ah zong thu nong ngetsak beh lai na ding uh hong cial nuam ing.
Khazih sungah
Pastor H. Lian Do, Tong Seal
No comments:
Post a Comment