Hih tawh kisai thudot a ukte adingin dot theih ding tampi om hi. Easter Sunday in Jesu sihna pan a thawh kik ni mah hiam? Hilo ahih leh hibang ngeinate koi pan hong piang hiam? Thumann a thei nuam tadingin ka lai-at hoihtak na sim sak leucin phattuamna ngah ding kong lamen hi.
Ih theih masak ding ka deih ah, Christian a kici-te in hih Easter pawi a bawl lote na hizaw uh hi. "Ishtar", awsuah "Easter" ih cih in kha (moon) nusian leh ni (sun) pasian te' tapa khat neihsun "Tammuz" pasian ii thawhkikni pahtawina pawi ahi hi. Tang lai in, Noah tapa Ham ii tupa Nimrod a kici mi khat om hi. Ham in tapa khat nei aa Cush kici hi. Cush in Semiramis numei tenpih hi. Cush leh Semiramis te nupa in tapa khat nei aa Nimrod cih min phuak hi. A pa hong sih khit ciangin Nimrod in a nu, Semiramis tenpih aa, kumpi thunei hong suak hi. Laisiangtho in Nimrod tawh kisai hidan in hong gen hi: "Cush pen leitunga a thahat gal siam masa-a kigen Nimrod' pa ahi hi. Amah TOPA mai-ah a thahat sabengpa hi a, tua ahi manin, "Nimrod bangin TOPA mai-ah a thahat sabengpa," kici hi. A masa pen ama kumpi gam khuapite Shinar, a Babylon, Erech, Akkad le Calneh-te ahi hi." (Piancil 10:8-10 ZIV)
Nimrod pen pasian khat hong hi aa, azi lah hi, anu zong ahi Semiramis zong a minthang tanglai Babylon kumpi nu hong suak hi. A tawpna ah Nimrod pen a galte'n hong thah sak uh hi. A sa kisem nen in agamke te ah kipuak kawikawi hi. A sa a kikai khawmteng a ki mansuah khat losiah Semiramis in hong la hi. A ki mansuah sa pen ahih leh Nimrod ii pasal van nahi hi. Semiramis in "Tua sa omlo in Nimrod hong hing kik theilo ding hi. Nimrod ni tungah kahto ahih man "Baal" (Ni pasian) ih cih ding ahi hi" ci hi. Semiramis in, "Biakpiakna ah ih zat meikuang, khuaimei or meivak te limte sungah Baal pasian hong om ding hi" ci hi. Semiramis in kuama theih zawh loh thusim biakna khat hong bawl aa, Satan panpihna tawh amah leh amah Nusian in hong kikoih hi. Amah leh amah naupaai aa kigen hi. Nusian ahi khapi zong ni 28 sung a kimkot khit ciangin atui tui hi. Tua khapi kiang pan kha tui agol mahmah khat in Euphrates gun tungah hong kia dan in amah leh amah kigen hi. Hih thupiang in khal hun kipat sun leh zan kikim ni khit kha bemkim hun laitak-in piang hi.
Semiramis pen "Ishtar" (awsuah: easter) in hong kithei ta aa, ama kha-tui pen "Ishtar's' egg" hong kici hi. Tua zawh asawt lo in Ishtar pen nau hong paai aa, ni pasian Baal ii aleng (azang) in hong gai sak ci hi. Tapa khat hong nei aa, "Tammuz" min phuak hi. Tammuz in a zawdeuh in ganhing sungah bilpi hoihsa mahmah hi. Amaute pen tanglai biakna sungah asiangthote hong hi uh hi. Ahangin Tammuz pen ni pasian Baal ii tapa in ummawh uh hi. Tammuz pen a pa mah bangin sabeng siam khat hong hi hi. Ni khat Tammuz pen a sabenna pan ngal in na that hi.
Ishtar kumpinu in "Tammuz pen a pa Baal kiangah kahto aa, amau tegel pen Pa, Tapa, Khasiangtho bangin a siangtho khuaimei, meivak meikuang sungah pasian biate tawh om ding uh hi" ci hi. "Pasian' ii nu leh vantung kumpi" ci aa a kibia ta ahi, Ishtar in zong kuama theih zawh loh thusim biakna hong zom to lai hi. "Tammuz gam sungah ngal in a thah lai in a sisan pawlkhat singkung bulsum ah na taak hi. Tua singkung bulsum pen zan khat thu in hong khangto aa, singkung lianpi hong suak hi. Tua manin Tammuz sisan tungtawn in teh-eng singkungte in sianthona ngah hi" ci hi. Tammuz sihna hangin kum khat cin sim ni 40 ta lungzuan dahna hun khat gen khia hi. Hih hun sungin kua man anne lo uh hi. Mi khempeuh in a siangtho Baal leh Tammuz tungah thu thukpi ngaihsun in om uh hi. Biakna abawl kawmkawm un a lungtang tungah "T" dan lim bawl uh hi. "T" or atung ah singlamteh tawh a kiciamteh cakes siangthote ne uh hi. Kum sim in khua khal sun leh zan kibat ni khit khabem (hla pyih) khit Sunday masapen ni sial in pawi khaam den uh hi. Hih in Ishtar's Sunday ni hi aa, bilpite leh aktuite tawh pawi bawl uh hi.
Ishtar in, "Tammuz pen ngal (vok) in that ahih teh, hih sunday ni-in tua ganhing ne gai ding hihang" ci hi.
Tu in laisimte in tanglai dawibia te ngeinate uh tulai Christian pawlpite kiangah hong kizom to ahih na thei ciat ding kong lamen hi. A taktak in Easter ih cih in Jesu Christ thawhkikna tawh a kisaina bang mah om kilkel lo hi. Banghang in "Easter" laimal King James Version sungah om ci'n pawlkhat te'n lamdang sa uh hi. Sawlttak 12 in, Christian ahi hetlo, Easter pawi bawl ding ageel a gilo Herod kumpipa' thu agen ahi hi.
Paisan pawi leh Easter pen khat veivei kituah kha thei hi, ahi zong kum pawlkhat sungah na ki gamla mahmah taleuleu hi. Amaan athei nuam, a zongte adingin theih lah nading om peuhmah lo hi. Laisiangtho sungah, "Pasian in kha ahi hi. Amah a biate in kha le thutakin a bia pelmawh ding uh hi," a ci hi. (John 4:24 ZIV). A taktak in cile hang, ni 40 tanna, aktui, bilpi, singlamteh moh, Easter voksa cihte in tanglai telzawh loh Babylon te dawibiakna vive nahi hi. Hihte in Anti-Christ ii nasep vive te nahi hi.
Satan pen mikhem siam mahmah ahih manin Christian a kicite hidan milim biaknate tawh hong lungkim sak mahmah hi. Hihte in Pasian' hehna meikuang a thumanglo atate tungah hong puak ding nahi hi. Nang in nasep leh na tate tungah na hilhna tawh kizui in thusitna na thuak hun hong tung ding hi.
Hih Easter ngeinate'n a biak uh Baal, Satan zong a kici, "zingsang nisuak" tung abiak uh hi aa, a inn pen "Zing nisuak Inn" ahi hi. Pawlpi bang zah in nisuah na lam mai-ngat in zing nisuak tung biakna bawl lai ie hiam? Kuateng in tanglai Babylon te bangin aktui limzutna, bilpi tangthu gennate zang lai ie hiam? Hih in thuneu hilo aa, ciamnuihna zong hilo hi. Pasian' Khasiangtho in thumann hong theih sak nadingin thu kong nget sak hi. Tuhun in hun nunung mahmah ta hi. Kisik kik in Babylon pan paikhiat hun, amau te tawh kikhen khiat hun hita hi.
Laisim khat ciat Topa'n thupha hong pia hen!
David J. Meyer
No comments:
Post a Comment