Dear Laisim akuamapeuh,
Weeken hong tung kikta ahihmanin mail sim in hun ka zang thei hi. Thu kigelh na tam peuhmaha khat guak ka om munah ka cim hong phawng tuam mahmah hi. Lungsima suaktek kisungkhia thei ahih teh maan ding maan lo ding lam hilo-in ka lungsima om bang gelhnopna hong suak ahihmanin hong gelh limlim ning.
Kitotna lam leh kilangneihna lama lak loh ding thupi sa ing. Ka lungsima hong suakte:
Zomi veina bek tawh ahih leh Lai Pian pawlpi or ZBCM khawng suak ziau leng peuh ci thei ing. Pasian in SDA upna leh Zomi hong khen ding zong hisam lo in ka ngaihsun hi. Tua ahihmanin SDA i suah teh Zomi vei nawnlo ding cih danin ka khen kei hi. SDA i hihna tawh Zomi leh leitung mi nam tuamtuamte' ading phattuamna i sep ding thupi ka sa semsem hi. Zomi i vei leh, Zomite' khantohna dinga i sihpih ngamzah donga i san theih upna-ah i kipawl pen a hi ding mah in seh ing. Bang hang hiam cih leh amite ading mahmaha avei hih
kisam zel mawk hiven... SDA i hih leh zong Zomi i vei semsem ding pen paikhialhna hi tuan lo a ci hi ing.
Ka cihnopna ah Zomi i hih hangin i upna tek tawh i nuntak pen ahi ding mah hi ka cihna hi. I upna ah i nuntak teh i upna leh i omna denomination tawh i minam leh i gam leh i pawlpi mah akhantoh ding thupi hi.
Tua khantohna ding tawh kisai in Kawlgam SDA sungah i upna leh i thupuak pen ahiding zah in kisem lo ahihmanin degree, pilna siamna, background neih leh lamh nei hetlo ka hih hangin ka neutunga ka khanna leh ka gol ciangin SDA thupuak dik hi maan hi cih ka san theihna tawh kei' tum takin ka vei mahmah hi.
Khatvei Mandalay Mission inn ah ka tunga Union President Sia Muller hong pai tawh kituakin a meileng ticket ding vai Rail Station ka paipih hi. Station pan ka ciah uh teh Station mai liana lampi paisuak ka tawn uha Quickly Cold Drink sai ah ka lutpih hi. Tampaza tui ka dawn khawm uha tua tungtawnin Pawlpi thu ka gen uh hi.
Ken "Sia aw ei pawlpi tu in Kawlgam kum 100 cing khin napi, i departmentte zong hoih thei mahmah denomination dangte' sep zawh loh ding zong a sem zo ding hinapi hangin Kawlgam i SDA pawlpi khang kei lua hang" ka ci hi. Siapipa in " Kawlgam pen Milim Biakna gam hi in nasep haksa mahmah hi" ci in hong dawng hi.
Ken " Sia aw haksa i cih sam hangin Pawldang gentehna bang in AG te khawng 1970 kum khita hong kipante zong khang mahmah hilo maw, amau bang pen Rev. Pum Khan Nang bang Biakna hangin thongkia zah dongin sem hi. En haksa i sak hangin i thuakna om nailo hi. A sem lo hi zaw lo ding i hi hiam? I Department leh i nasepna te pen Kumpi' tunga registration i neih tampi zong om hilo maw, sia" ka cih leh Siapipa in" Kawlgam sung, kawlte' laka nasep ding hun nailo hi" ci in hong dawng leuleu hi.
Ken " Bang dia hun nailo ahia, sia" ci-in ka dong leuleu hi. Siapipa in 1988 kum in sandah kipiah in sisan naisan leh nuntakna tampi a bei hangin Kawlgam ki-ukna kibangbang lai hi. Thongkia ding leh sihna zah dong dingin Pasian' na sep hun nailo hi" hong ci kik hi.
I makaipite' Pasian nasep nop dan leh ahun seh dan uh pen hih dan ahih man hi ding aive maw ci-in bangmah ka gen zom nawn kei hi. Kei mahmah zong ka kipia zo kei hi. Kei sanga a siam zawte zong akipia tuanlo tampi na om zel hi. Kuamah kimawhsak ding zong om ka sa nawn kei pah hi. Tua teng tawh Mission inah ka ciahphei uh hi.
SDA thupuak bel thupi in maan ka sa mahmah hi. Thalawpna ahihleh pawlpi sunga nasep dan tawh ka ngah zo kei hi. Denomination danga ka lawmte kipiakkhiatna ka muh teh tua in tha thak hong guan zel hi. Khasum cileng lah Denomination dangte sangin SDA sungah tam zaw hi. Khansakhuan ci leng zong tamzaw lai hi. Lovegift om lo mah ci in hiven ci in SDA sunga nasem tampi in hong dawngin Pasian' na ahi dingzaha a sep zawhlohna uh hong gen thei zel uh hi. Kei laitan nei leh mipil ka hi kei hi. Ahizongin SDA sangte ah pilna sang pipi kisin leh ka deih mahmah hi.
Tu laitaka Union Education Director Siapi Nginkok in AAS ah hong sep lai in sia aw i sangte a standard i up kei leh tu in kumpi sang hoih zaw ta ahih teh Science subject mahmah hahkat sak ni in kumpi sangte zong tuition hong painopna ding zah dongin geel ni ci-in ka kikum uha, ken zong India pan ka meltheih sangpi thum bang aneite' min tawh kumpi sungpan Science Laboratory Equipment hong vaihawm ning ka ci leh Siapipa zong lawm mahmah in UMM meeting khatah tua tawh kisai fund ding agenda na guang pah hi. I sia
dangte in zong ong thukimpih ahih manin AAS bek hilo Singunau leh KAS in zong Science Lab Instrument leina ding Ks 10000(tulsawm) ta a tawphah ding kingah hi. Aban pen a sum ding a om loh banah siapi hong kilaih toto in kizom thei nawnlo hi. Ahoihna veve khatah Sia Nginkok in Yangona a meltheih kumpi sunga sangsia sem khat tungtawn in Science lab Instrument pawlkhat lei thei cih thu hong gen hi. Tua hun ciangin sia Nginkok in Singunau ah semta ahih man in Singunau adinga ahanciamna hong suak hi.
Sia Dal Mang in Education Director a sep lai in SDA sangte' zat ding textbook ahi, Bible, English, Science, Mathematics hih subject te pen singapore te' a zat ding hinapi Union ah sum kicing lo ahih manin Bible subject bek kilaih zo hi. Tua thu ka theih ciangin adang subjectte copy ka ngena Tedim ah keima copier set a thak tawh copy bawl in Yangon xerox copy sak man lian bek tawh ( kei sumh) Kawlgam sung SDA sangte in a deih bangvua
hong leitheih dingin AAS sang tawh kop in Advertistment ka bawl leh tua subjectte a sin sawm SDA sang pen tampi a om hangin a deihlo hong om leuleu hi. Asawt ciangin ka zom nawn kei hi. Tu dong tua dan mah ahi tam maw text book hoih zaw i nei khin tam maw ka theihpih nawn kei hi.
2004 kum ciangin Siama Prisilla in Union Education Director hong sem hi. Kei zong AAS, Tedim ah India kumpisanga computer subject te sin dingin ka nget leh tua laitak Sia Nginkok UMM Education Director hi in akuamapeuh hong panpihna tawh hong sang thei uha AAS ah tuni ciang dong deih a bang zo kei zongin India kumpisang a kisin Tan lang pan ----- computer subject te kioffer hi. Aban zom in Sakollam Adventist School( Conference sang) ah zong tua bang mah in Sia Gen Mung tawh pangkhawm in ki offer thei hi.
Tu in Kawlgam ah sang dang Private English Medium, leh Private Boarding School te hong popular mahmah laitakin SDA sangte kiam semsem hi. Bangbangin sanga sem sia tampi in ahoih gen zongin kiam mahmah hi. Pawlkhat in Sabbath Problem bek tawh sang kiphuan hi cih danin hong dawng thei zel hi. Kei' lunggulhna ah leitungmite' amapi ding i hih mah bangin Sabbath Problem bek tawh sang i phuat leh SDA khangnote mailam khang tampi a tuantual sak i suak ding hi ka ci thei hi.
Tulaitak pen Kawlgamah pilna neite in Boarding School tawh sum a hauh lawh laitakin i sangte tawh i pawlpi zawnlawh ding dinmun i tung phialphial ta hi. Hih groupmail pen official ahih loh mah bangin lunggulh kikupna-a ka gennopah Sia Nginkok leh Sia Kelly mahmah in hihdan dinmun Director hong sepma a i kikup ngeite tu lian in nong sep kei uh leh Pasian in hih dinmun ah hong laptohna akhiatna bang om mawk ding hiam? Khangno te ahusa bek tawh tawmvei gualnoppihna ciangbek pen lungkim huai lo hi. I sangte pen
"Adventist Education, Its the best" i cih ngamna taktakna dingin no khutsungah om hi. Tu lian mahmah in U Nangkuk mahmah in zong atagahkepte SDA sangah kahsakin ama' tate kumpi sangah akahsakna pen tate' mailam ding angaihsutna mah hi. SDA sangkah in degree angah khitteh Malay paina ding ciang bek pilna hong ngah uh pen khasiat huai ka sa hi. SDA te cidamna lam a thupi ngaihsut mahmahte hinapi hangin i pilna in hong cin zong SDA sang tawh Siavuan kisuak ngeilo ding hilai hi. Puahphat kisam hi.
I sangte hong lamsang un. Sangsia hoih tampi gamdang pai khin in tansawm ong liamliam, degree nei mialmial leh gamdang pai zolo ciangteng SDA sangsia in kizang cileng tampi i khial kei ding hi.
Zomi leh SDA khantohna dingin thu ngaihsut ding ka lungsima suak dang khat leuleu pen:
Bang hangin Zomi te in gamdang bebek kipai hiam Bangaladesh mi khat in Yangon a tun theihna dingin Ks 30 lakhs bei ngama India mi khat in Kawlgam matpungtin a neih theihna dingin tampi bei ngam hiam? Sente in Kawlgam, Maymyo ciang hong lut theihna dingun sen sum a lakh lakh in bei ngam hiam? Gamdangte in Yangon tung uh leh mihau in kingaihsun napi bang hangin Zomite in i gam nusia mawk i hi tam maw!! Gamdangtektek ah zong huhna tam akingahna gam tun zawhna ding bek kikum ta i hih teh Zomite pen i pu i pa' cihtaknate kem nawnlo a ei' khe a ding nuam lo, abaihsa bek lunggulh ta! thupha ngah
minam i kicih laitakin leitunga samsiatna angah minam a na hi gige i hitam maw! cih zong ka lungsim ah lut thei zel hi.
Israel te Canan gam azuat uh pen amau' gam a ciah ding hi-a Zomite gamdang a pai pen mi' sila ahihkeileh khutdawhngen kivaak dana akihuh akipumvak ding lunggulha pai pen Canaan gam zuana kiseh kha i hitam maw zong ka ci thei zel hi. Kei zong gamdang ka ut mahmah veve hi.
Bangbang hileh 2010 pen Kawlgam Democracy banga kiteel ding kum hita ahihmanin siapite mahmah in zong Pasian' nasep hun hong sa ta in, SDA sangte zong Zomite' khutsungah a om laitak ahih manin Zomi leh SDA hong khantoh ding lunggulhna tawh tu-a zah hong suah pak phot ning.
Veina lianpi tawh
Hau Suan Cin@Cinpu(Will SOL)
No comments:
Post a Comment