"But the hour is coming, and now is, when the true worshipers will worship
the Father in spirit and in truth; for the Father is seeking such to
worship Him" John 4:23 NKJV
"Ahizongin, maantakin Pasian abiate in kha leh thumaan thutak
tawh abiak hun hong tungding hi.Tu in zong ahong tungkhinta ahi
hi. Pasianin tuabangin Amah abia dingin adeih ahi hi." Zawhang
4:23
Jesu Messia Honpa leh Topa in ihsaan ciangin Pasian ihbiakdan hong
kilamdang ding hi. Siamazih nu in Gerizim mual tungah Pasian bia a,
Judah mite in Jerusalem ah biakna pia uh hi. Solomon kumpipa amaan
khit ciangin Jeroboam in Rehoboam langpanin kumpi gam khat phuan tawm
hi. Amite ama kiangpanin ataikhiat ding khalau ahihmanin Jerusalem ah
biakna pia dingin paisaklo a, Sechem leh Gerizim mual ah Jerusalem
demna in biakpiakna tau bawl tawm sak hi. Judah mi leh Samarih
minamte in biakna mun leh siampi atuamin nei tuak uha, kisawh kha
nuam lo uh hi.
Jesu in siamarih nu kiangah Messia ahong pai ciangin biakna mun,
siampi deihteelna om nawnlo dinga Pasian pen "kha leh thumaan thutak"
tawh kibia ta ding hi, tua in tu in hong tung ta hi, ci hi. "Kha"
acih ciangin Khasiangtho agen hilo a, mihing lungsim agen ahi hi.
Jesu' gennop "kha" in thu um mi khat in apuatham mun leh mual leh
gangawh biakpiakna leh zeh tanna tawh Pasian kibia nawnlo ding a,
sungtawng lungsim taktak tawh kibia ta ding hi. Sungtawng cih ciangin
Khasiangtho lamlahna ahi hi. Tuabek thamlo in, ganhing sisan tawh
hilo, Jesu sisan, sumngo gul hilo, singkhuam tungah akikhai Jesu,
zuihna hi masa lo, Pasian itna tawh biakna agen ahi hi.
"Thumaan thutak" acih ciangin Laisiangtho sungah akipulaaksa
thumaante leh Jesu' nuntakna ah akilang thumaan tawh kituakin biakna
agen ahi hi. Biakpiakna ah lungsim lawpna aciang khat akisam ahiphial
zongin ngaihsutna kizanga akithei thumaan bangin nungtakna akal ahi
hi.
Tuni Christiante biakpiakna in puatham lim (form) ahilo lungsim
taktak (essence) leh lunglawpna bek hilo thumaan tawh kizawitawnin
biakna ahi hiam?
No comments:
Post a Comment