Sunday leh Sab bath thu - Zomi Angvan

N.B. Thukhupna Sim hamtang in.
1. Zomi Angvan: Nipi khat sunga ni masapen a cih tu-a Sunday pen mah
ahihi. Jewte Sabbath pen ni nunung pen ahihi. Topa Zeisu athawh kik khit
ciangn nungzuite Sabbath ni-in kikhawm nawnlo uha, thawhkikni ahi Sunday
ni-in kikhawm uh hi(John 20:19,26;Sawl 20:7)
Behlapna: “Jewte Sabbath” cihpen Laisangtho Sabbath hizaw hi. Sabbath pen
Jewte Sabbath hituan lo hi. Pasian in, “ka Sabbath” ci hi (Exod 20:8).
Pasian pen Jew hilo hi. Thukham 10 zong Jewte’ a hilo, Pasian’ Thukham hi
(Exod 20:6). Topa Jesu zong Jew pua in mihing ahong piang hibeka Jew hilo,
Pasian hi. Sabbath neipa pen Jew hilo hi (Mark 2:28). Jesu in Jew
ahihmanin nungzuite (Jews) in azui hilo a, Pasian’ Tapa (Messiah)
ahihmanin azui uh hizaw hi. “Zui” cih limlim tel lah man leh huat manin ie
Gumpa leh ie Pasian Jew suak sak kei ni. Nausilna tui-nin nabuak ciangin
anau nangawn ih bua kha deh!

2. Zomi Angvan Genna: “Nungzuite in Sabbath ni in kikhawm nawnlo uha,”

Behlapna: Zomi-angvan in “Nungzuite in Sabbath ni in kikhawm nawnlo uha,”
acih pen Christian khat ie kampau hilo hi. John 20:19, 26 ah nungzuite
biakna pia dingin kikhawm cilo a, “jewte kihta ahihmanun” kikaikhawm uh
hi, ci zaw hi (19). Nungzuite-in Sunday tang uh hi, acihna khangtangthu
leh Laisaingtho mun khat zong amu om nailo hi. “Lau uh ahihmanin” (26) ci
zaw hi.

Sawltak 20:7 ah Sunday sun kikhop hilo hi. Saturday (Sabbath) nitum ta a,
Sunday ni khuamial tawh kipan a, nekkhawm nei-in, khua avak ciangin Paul
Assos lamah khualzin zaw lai hi. Paul in Sunday tang hileh khual azin ding
hiam? Paul adinga mangphakhak kikaihkhopna hi-a, biakpiak hunpi kikhopna
hilo hi. Zan-farewell thu kivaikhakna hun hi. Thawhkikna pawi akhaam hilo
hi.

3. Zomi Angvan Genna: “Thawhkikni ahi Sunday ni in kikhawm uh hi.”

Behlapna: Nungzuite in Sunday tang uh hi, cih pen zomi angvanna bek mah
hia, Laisiangtho leh thumaan angvanna hi lo hi. History of Christian
Church version tampi sungah Early Church en lecin LaTourette leh
adangdangte-in hih theology lei lo ding uh hi. Laisiangtho in, ni asim
ciangin khuamial tawh kipan hi. Piancil ah “nitak panin nitak” ci hi.
Jewte in tuamah zui uh hi. Sawltak Tangthu a atpa ngiat zong Jew mah hi.
Sunday ni pen Saturday khuavak bei-in khuamial panin azingciang khua amial
dong ahi hi. Paul hanthot hun pen Sunday khuamial hun hi.

4. Zomi Angvan Genna: Siampi laibu 23, 25 sungah sabbath thum na ki gen
hi. Siampi 23:1-3 ah nipikal sabbath(weekly sabbath) na gen hi. Siampi
25:1-7 ah kum 7 sabbath na gen hi. Siampi 25:8-17 ah kum 50 sabbath ahi
Jubilee kum na gen hi. Hihte sabbath tang dinga Pasianin hong sawl Israel
mite in a zuih ding uh ahi hi. Nipi kal sabbath bek hilo in, kum sabbath
te mahmah zong a lungsim ah koih in Pasianin ka "sabbath-te" ci in na gen
zel hi. Tua sabbath-te atanloh manun Israel mite sal nataang uh hi (Siampi
26:32-34).

Behlapna: Zomiangvan in Sabbath thum mu khia hi. Amundangah zong pawi
sabbathte na gen lai hi. Paisan Pawi, Pentecost Pawi, Buk Pawi, Siansuah
Pawi, Silngo Sawhloh anlum Pawi, Anpal Pawi, Pengkul Tum Pawi, cihte zong
apatni leh atawpnite pen sabbathte mah naci hi. Ahizongin nipikal Sabbath
pen “S” alian tawh ki-at a, adangdang sabbathte pen “s” aneu tawh ki-at
hi. “S” leh “s” sabbathte akibatna aom zahkhat in, akibatlohna ih theipih
ding kisam hi. Laisiangtho in Messiah limciinna sabbathte leh Nipi sial
Sabbath kibang saklo hi. Nipi kal Sabbath pen Jesu kiang panin ihngah kha
tawldamna lim hia, Jesu lian imciinna hilo hi.

5. Zomi Angvan Genna: Sabbath a kipan thukham peuhmah Israel mite' tungah
kipia ahi hi (Thuhilhkik 5:1; Sawltak 25:8; Rom 2:14; 9:4).
Gentilete'tungah thukham ki pia ngeilo hi (Sawl 18:14,15; 23:29;Eph
2:11,12). Tuaban ah, thukham tanna tawh kuamah ta in diktansakna ngah
ngeilo hi(Rom 3:20; 8:3,4; Gal 2:16). Topa Zeisun sihna in thukham hemkhia
hi(Eph 2:15; Col 2:14; Gal 3:19; Heb 8:7-13; 9:9-10). Tua ahihmanin eite
Thukham khut nuaiah ih om kei hi(Rom 6:14; 7:2-6; Gal 3:19-25). Thukham
zuihna ihcih pen Hotkhiatna ngahna hilo hi, cih a gennuam ka hihi.

Genbehna: Sabbath leh thukham khempeuhte gupkhiatna apom Pasian’ mite bek
kipia hi. Israelte zong Egypt mawhna saltanna panin akihot ciangin
Pasianin KAMTAI siampiza pia-in, Thukham leh Sabbath napia hi. Israelte
ading bek hilo hi. Thuhilhkikna pen Exodus 20: a etkikna hi.

Sawltak 25:8 in Israelte ading bek, cih proof nadingin kizang lo hi. Rom
2:14 ah Paul in thukham neilo Gentilete nangawn Pasianin alungsung vuah
zuihding at sak hi, Israelte ahihleh zuihding suangpek tungah at sak hi,
ci ahihmanin Pasianin sia le pha akhenna thukham pen hong piak dan
kibanglo bek hia, mi khempeuh hong pia, cih hizaw hi.

Sawltak 9:4 ah Israelte tungah thukham 10 suangpek tunga apiakna hong
genbeh hi. Tuhun pau in, Thukham 10 in apiangthak Pasian’ tate ading bek
ahi hi. Lawkite ading hilo hi.

Gentilete tungah thukham kipia ngeilo hi cih na akipsak nadingin Rom 3:20
na matpen Gentile te in Israelte ngah thukham lian mah ngahlo uh
ahihhangin “mawhsakna” aom laiteng sia leh pha khen theihna thukham khat
Gentilete kipia hi, cih gen nading Laisiangtho mun hizaw hi.

Rom 8:3, 4 ah Gentile te thukham akipiak loh lam hong gen kei in, agen pen
thukham zuihna pen Jesus Christ sungah aom KHA tungtawnin zuihna picing
thei ahihna hong gen zaw hi.

Gal 2:16 zong thukham nei leh neihlo nampi nihte hong gen kei in, agen pen
“thukham sepna tawh dikna kingah hilo, Jesus Christ upna tawh” cih ahong
gen hizaw hi.

6. Zomi Angvan Genna: “Topa Zeisu’n sihna in thukham hemkhia hi (Eph 2:15;
Col 2:14; Gal 3:19; Heb 8:7-13; 9:9-10).”

Genbehna: Topa Jesu asi a, athokik ahizongin, thukham 10 (Gal 3:19) ie
ngimna ahi “mawh maw mawhlo cih ahong lahna” bek hong gen hi.

Eph 2:15 ah Jesus in kilemna thu agenna ah, “the laws contained in
ordinances” acihte in Jesu lim cinnate hia, Jesu asih ciangin tua
limcinnate akizatna tawh bei ta hi (Col 2:17, 22). Ahihhangin thukham 10
ahihleh lungtang ah hong kigelh sak hi (Rom 2:15).

Heb 8:7-13 sungah thukham thu gen lo hi. Thuciam thu gen hi. Thuciam Lui
leh Thuciam Thak saikak bek hi. Covenant leh Law kibang lo hi.

Heb 9:9-10 ah Thuciam Lui pen Israelte in “KO ka hih ding uh hi” cih
kamciam hia, mihingin picin zo ngeilo ding ahihmanin Thuciam Thak hong
kipia hi. Athak sungah mihing hih ding kigenlo a, Jesu in hong hihsakna
hong gen hi. Mihingin azuih zawhloh kamciam pen Jesu in hong zuih sak hi.
Tua hong genpih hi. Jesu sihna in Thukham 10 hemkhia, cihna hilo, thukham
ie ngetna kicing sak hi.

7. Zomi Angvan Genna: Sabbath zenzen pen Israel mite le Pasian' kikal
kiciaptehna lim(sign) hi a (Paik 31:13; Neh 9:13-14), Egypt gam pan
akihonkhia Israel mite' tungah Sinai mual tunga kipia ahi hi (Paik 16:23;
Neh 9:13-14).

Genbehna: “Kei nong up uhleh Abraham suan taktak na hi uh hi” Jesu in acih
ciangin Sabbath pen Israelte ading bekin akipia hizenzen lo-a, Jesu aum
khempeuh ading ahi hi. Hotkhiatna pen Israelte ading bek hilo, thu-um
khempeuhte ading ahi hi. Sabbath in Jesu a-umte leh Gumpa akizopna lim ahi
hi. Israel kamsangte in nagen uh ahihmanin Israel ading cih hilo hi.
Messiah piakding Israel kamsangte in na phawng uh ahihmanin Gupna pen
Gentile thu umte ading hilo, cihzong hilo hi. Piancil panin Mangmuhna
ciang Pasian’ Gupna tangthu khat bek hi a, akisaikha mipi Jewte leh
Gentile nam nih kihel hi. Paul in Romans sungah mawhna vai hileh gupna vai
hileh hih namnihte Pasian’ maiah akibangin nagen hi.

8. Zomi Angvan Genna: Adam' khang panin Moses' khangdong, kum 2,500 sung
Sabbath tanna peuhmah kigen lo hi. Piancil 2:2 ah Pasian' tawlngakna khat
na om bek hi. A tawlnga pen mihing hilo a, Pasian ahihi. Mihingte' adingin
tua ni pen ani nih ni hipan hi.

Genbehna: Thukham omlo in mawhna omlo hi, ih ci khin hi. Adam leh Moses
kikal-a khang mite in Sabbath tanglo, cihpen ahoih thukhupna hilo hi. Adam
panin Moses dong “mawhsakna om” ahihleh thukham om, cihna hia, thukham om
ahihleh Sabbath om, hipah hi. Adam panin Moses kikal-a mite in mawhna bawl
uh ahihleh suangpek tungah piakna tawh Sabbath atheihloh uh hangin lungsim
sungah theihna tawh Sabbath thei uh ahihna kilang zaw hi. Piancil sungah
Sabbath tawlngakna pen mihing apianzawh ani 7 ni ci zenzen lo hi. Piansak
khempeuh abawl zawh ani 7 ni, ci lim lim hi. Sabbath pen mihing in atan
ziau ding loh ngal thudang om lo hi. Pasianin mihing pen Ama’ lim leh meel
sun in Bawl (Pianc 1:26), ci ahihmanin Pasian in Sabbath ni atawl ngak leh
mihing zong Pasian lim sun ahihmanin atawlnga ding ahi hi. Atawl ngak kei
leh Pasian tawh kisun lo hi ding hi. Piancil ciaptehna ah Sabbath tawlngak
pen mihing pian ciaptehna hilo a, Pasian piansakna ciaptehna ahihmanin
Sabbath innbul ahihna kilang sak zaw hi. Adam’ khangsimna hilo, Piangsakpa
hun hi.

9. Zomi Angvan Genna: Amah azan-a kibawl ahi hi. A peuhmahin tua Pasian'
tawlngakna thu nangawn 1,500 B.C kim a Pasian' kilaakna tawh Moses in a
gen hibek hi. Abel akipan Noah te, Abraham te akipan Moses hun ciang dong
mi siangtho tampi na om a, Pasian' lu a kisak nadingun Sabbath tang mi
khat beek na omlo uh hi. Pasian in sawllo hi.

Genbehna: Pulaakna tawh aki-at Laisiangtho bu khempeuh Pasianin thupi sa
hi. Moses in anung at “BEK” hi lo hi. Zan ni, tu ni, zingciang, akikhello
(Mal 3:6) Pasian in thupi taktaai tawntung ahih mahbangin Moses lai-at
zong thupi-in taktaai hi. Adam khuak sungah Pasian atheihdan picing hi.
Adam in atusawn khang 6-8 dongin Pasian thu na gen suk, kam navai khak
thei hi. Akhuak sungpanin atheihna tawh hi. Laisiangtho in Adam thutheih
abul abalin hong khil saklo hi.

Adam in eite theihna sangin Pasian na telsiam zaw ahihmanin gumpa
alam-etna alah nadingin gangawh biakpiakna na pia hi. Abel in Pasian’
lamlaihna pan piallo in biakpiakna apiak sese zong Pasian atheih amuanna
alak ahi hi. Enoch, Pasian tawh lam tonkhawm in vantungah aciah suakpa, in
Pasian thei leh um ahihmanin ahing tanga lakna ngah hi. Pasian’ deihna zui
ahihna lak hi. Hih mite tungah Pasianin alah Ama deihnate eite kiangah
akhawng akhia in amal mal in hong pulaak lo hi. Eite’ theih dingin
kigelhlo ahihmanin amaute in Pasian’ deihna theilo uh hi, cih nading thu
omlo hi.
Noah in kum 120 sung tembaw lam in Pasian deihna na mang ahihleh Pasianin
adeihna dang lak lai hileh zong mang ding ahihna lak hi. Abraham in Pasian
thu mang hi. A Tapa khat aneih apia khia ngampa in Pasian deihna thei lopi
in na pia khia ngamlo ding hi. Hihmite in Pasian’ maiah “Midik” cihna ngah
uh hi. Pasian tawh kizopna ah paubaanna neilo uh ahihmanin Pasian’ deih
thu khat zong nelhsiah loding hi, ci leng ngaihmuanna om zaw hi (Hebia
11).

10. Zomi Angvan Genna: Ahizongin Egypt pana ahot khiat Israel mite' tungah
sabbath apiak huna kipanin sabbath natang uh a, a tanglote suangin ki
denglum zazen leuleu hi. Kum 1,500 sung peuhmah sawt ding hi. Sawltak 2:1
panin Khasiangtho hong paina tawh Pawlpi hun/hehpihna hun kipan-a, tuhun
thu um mite' tungah sabbbath tan ding sawlna om kilkel lo ahihmanin
sabbath kitanglo hi. Psian' hong sawlte kisem a, hong sawl lohte kisemlo
hi. Sawltak 15 sunga Jerusalem Council ah Gentile mite zuih ding thu 4 ki
pia, tua longal hakkol dang suat loh dingin ki khensat hi. Vun-atna,
sabbath akipan tanglai ngeinate zuihsak loh dingin ki khensat hi.

Genbehna: Mangngilh loh dingin, Pasianin Sabbath thukham apiak ciangin
azat kammal, “na tan nading PHAWK in” ahi hi. Egypt ah saltan hun sungun
Pasian’ zia le tong leh Pasian’ deihna mangngilh khin uh ahihmanin aphawk
kik dingin Pasian in hilh kik hi. Tua panin nunghei lecin, Adam panin
Jacob ciangin Pasian’ sawlte phawk uh hizaw hi. Sinai mual panin phawk kik
ding sawlna pia hi.

11. Zomi Angvan Genna: Tua ahihmanin Thuciam lui hun lai a sabbath pen
Thuciamthak hun Sunday in ki laih zawzen lo hi. Tuhun piangthakte adingin
sabbath tan banga tanding Sunday omlo hi. Topa' thawhkik ni ahihmanin
biakpiakna ni-in kizanga, tua ni-in thu um mite kikhawm uh hi. Tua mah
hipah lel hi. Sabbath tan bangin kitanglo hi. Sabbath pen Sunday in ki
laih hetlo ahilam gen dih ni.

Genbehna: Thuciam Lui ie Sabbath om lai-in, sabbathte beita a, Thuciam
Thak ah Sabbath om paisuak hi. Nipi Sabbath in Messiah limciinna lakah
kihello hi. Mawhna nasepna panin tawlngakna lim hi. Jesu neilo a, na
nuntakna panin Jesus nei-a tawlngakna ahi Sabbath pen abei thei hilo hi.
Sabbath akhailum ding Singkhuam omlo hi.

Thuciam Lui leh Thuciam Thak akibatna leh akibat lohna enpak ni:

Akibatna
1. Apiapa: Pasian
2. Pasian’ kamciam: Jesu Christ
3. Pasian’ kamkhap: “Ka mite na hiding uh hi”
4. Mawhmaisakna: Pasian’ Hehpihna
5. Thuciam Sandan: Upna (Heb 11)
6. Thuciam Len maw len lo Sittelna: Thukham 10
7. Thuciam bawlte kiciaptehna Lim: Sabbath
8. Gupna: Adam’ suan leh khak khempeuh ading
9. Pasian: Itna Pasian
10. Gupna Sandan: Upna

Akibatlohna: Thuciam Lui Saikak Thuciam Thak
1. Mawhmaina: Ganhing si saikak Jesu’ si
2. Ciamtehna: Vun-atna saikak Tuiphumna
3. Biakpiakna: Ganhing saikak Jesu Christ
4. Palai Siampi: Levi minam saikak Jesu Christ
5. Amun: Mi bawl Biakbuk saikak Pasian bawl lungtang
6. Thuciam pomna Lahna: Zehtanna saikak Nekkhawm bawlna
7. Siampi: Levui Minam saikak Thu-um khempeuh
8. Siampi: Mihing saikak Pasian Tapa Jesu
9. Thuciam Kipsakna: Ganhing sihna saikak Jesu sihna
10. Kiciamna: “Mihing kamciam saikak Jesu’ kamciam
11. Gupna Pulakna: Jesu’ lim saikak Ataktak Jesu.

Lai-at khat bek ki consult theilo hi. Catholic Encyclopedia, Catholic
Historiante, Methodist Historians, Baptist Historians, Lutheran Historian
cihbang lai-at nate tawh saikak lecin, atunga zomi-angvan theology pen
thulang genna (half-truth) ahihna muding hiteh. Zomi-angvan lengh Pasian
leh akammal kiangvan zolo thei hi.

Zomiangvan Theology asimte in na muh ding uh:
1. Laisiangtho aphenna ah Laisiangtho a lui leh athak consistency nei lo
sak hi.

2. Laisiangtho Lui Pasian leh A Thak Jesu in kipumkhatna neilo sak hi.
3. Alui leh athak ah Gupkhiatna plan kibang lo sak hi.
4. Gupna sandan zong alui ah sepna hisakin athak ah hehpihna hisak hi.
5. To Thum Pasian sungah kilemna leh ki aihualna om lo sak hi.
6. Pasian laitak lo-in Mihing laitak ahihmanin thulanggenna kilang sak hi.
7. Sunday tan nading Laisiangtho mun amatte pen kaihtawm hi-in, historical
support neilo hi.

8. Sabbath deihlohna tawh Thukham 10 paai khia nuam napi, kikai-awk sak hi.
9. Gupna sancil dinmun gen nuam napi, Gupna nuntakna telkan mu theilo hi.
10. Dikna leh Sianthona, Honpa leh Topa (Lord) hual siam zolo hi.
11. Hihbang theology pen acidam huai lo leh unbiblical dispensationalism
huzaapna hang ahi hi.

12. Adam panin Moses ciang Pasian leh mihingte kizopna amuhzawh lohna pen
evolution theory in huzaapna ngah hi. Adam tunga akipia Pasian theihna pen
Jesu sungah aom Pasian theihna sangin niamsak zaw hi. Adam pen eite sangin
ahai zaw dingin saang hi.

13. Zomi-angvan theology in antinomianism akici thukham aki limlim huatna
in huzaap hi. Ama’ pat hikei. Tuma kum 200 laipekin Europe lamah na laang
khin hi. Gupna saangin Jesu sungah nungta-a thukham zuihna leh Jesu neih
nadinga thukham zuihna kibanglo ahihna thei nai lo hi. Gupna ngah, Jesu
nei ih hihmanin thukham kizui zo hi zaw hi. Jesu kanei hi, ci-in Jesu’
nuntakzia ih sut kei leh kam-biakna hia, Christian hinai lo hi.