Part 2
Evangelist minthang mahmah khat huihtuntal bangin a sam tungheuhau-in platform tungah hong ding hi. Puankaang suits silh tawntung hi. Mipi tamlua-in mualkuam dim ding tawh kibang hi. Mipi ding zihziahte a khutpeek nih tawh a galva pan a sawnleh, zaangbuhno huihmut bangingin pukdeda dingin kithawi hi. Amah zong vangletna khat in a lehsawn bangkekin, kal-5 bang nungleh kin se hi.
Tuhun khanlawhna sungah dawi hawlkhia thei bang a kibawl tam semsem hi. " Zeisu min tawh taikhia in, thu kong pia hi," civial gamgam uh hi. Dawite koipan hong pai cihthu theician hi le-u paungawh ngamlo kha ding uh hi. Pianthakna pen nalamdang bawl nading ngimna himasa lo hi. Silehsa deihna nusia a, satan gampi kantanin Pasian ki-ukna sung tumna ahi hi. Khalam mittaw theihna tawlua munah Pasian bang hiam cih a theihna ding uh deihna tawh kizang hibek hi.
Tuhunin nalamdang laknuam, cina damsak nuam, dawi hawlkhia nuam hong tam a, mihonte lunglutin nungdelh ziahziah uh hi. Hitakpi hiam, ci-in a kanmi honkhat om a, sulzuih zuih uh hi. Mipi-mai platform tung a cinadam a tamzaw pen a kineih ngentang ahi hi. A zingciang a Clinic paikhuankhuan tam mahmah hi.
Khasiangtho silpiak
1Corinthians 12: 7-11.
"Mikhempeuh aadingin phattuamna a om theihna dingin Khasiangtho hong ompihna a nam tuamtuamin hong kilang hi.
Mikhat tungah pilna;
Khat tungah thugen siamna;
Adang khat tungah upna;
Adang khat tungahcina damsak theihna;
Adang khat tungah nalamdang bawltheihna;
Adang khat tungah kamsanna;
Adang khat tungah thuthuk theihna;
Adang khat tungah kamtuamtuam pau theihna;
Adang khat tungah kamphen siamna;
Hih a tuamtuam hong pia pen Khasiangtho khat bekmah hi a, mituamtuamte tungah ama hoihsak bang a hong piak ahi hi."
Khasiangtho nei khempeuh kamtuam pau dihdih lo hi. Lungdamna thupuak a tello minam tuamtuam lakah kisam a sak bangin kipia ahi hi. Tua zong bualbual pen hilo hi. Pasian in Khasiangtho silpiak pakzat lo hi. Khagupkhiat nading ngimna tawh Khasiangtho silpiak kihawm ahi hi.
Khasiangtho kaptuk;
Ei kiangah "Khasiangtho kaptuk " cigemgam se hi. A ut khempeuh kikaptuk hiam, a melhoih teng kikaptuk hiam, a lunggulh khempeuh tuk pahpah hiam kathei kei hi. A laisiangtho text matnate khat khit khat sittel suk leng;
Matthews 17:6;
" Nungzuite in tua aw a zak ciangin, lau-in a bok uh hi. Zeisu hong pai a, a khut tawh vasu-in, tho un, lau kei un, a ci hi. Amaute in a ettoh uh ciangin Zeisu longal a dang a mu kei uh hi."
Zeisu in, Peter, James leh John samin, mualtungah a kahtoh pih hi. Tua munah Zeisu meel kikheel hi. A maitang ni bangin taang hi. A puante khuavak bangin pak hi. Tua bangin a et laitakin, Moses leh Elias te Zeisu tawh kiho mu uh hi. Amun hoihlua ahihmanin, Peter in Zeisu kiangah, " Topa om nangin hoih hi, "nang aadingin innkhat, Moses aading khat, Elias aading khat, lam leng," cipah phuatphuat hi.
Zeisu in, amaute vantunggam lak ahi hi. Sihna ciam khalo misiangthote leh sihna pan a gualzo a thokik misiangtho namnih omding , cih lahna-in Moses leh Elias lakcitciat se hi. Jews minam Pharisees leh Saducees te'n vantunggam leh vantungmi cih khawng omdingin umlo mawk uh hi. Messiah hong pai dinga, a kumpi tokhom Jerusalemah hong phut ding a, Israel minamte tungtawnin leitung hong uk ding hi, cihpen amaute lamet lianpen ahi hi. Khalam sangin leitung silehsa lamah kinga zaw uh hi. Nungzui thumte in vantunggam a mu hi gige uh hi.
Tua laitakin awkhat vantung panin hong ging a," Hih in kei hong lungdamsak ka it ka Tapa ahi hi, amathu namang un," ci hi. Pasian pau himawk ahihmanin, leitung bangzahin lok ding a, bangzah mulkimhuai ding hiam, kithei lo hi. Amaute lau-in lei-ah bokin a mai phuum uh hi. Pasian vangletna laulua a tuk uh ahi hi.
Paul kikhelna
Acts 9: 3-4.
" Pai-in, Damascus khua a tun kuanin, vantung panin khuavak hong pai a, ama kiimkotah hong tang hi. Amah leitang kidenna hi. Tua laitakin awkhat in, ' Saul, Saul, bang hangin kei hong bawlsia nahiam?' a ci hi."
Saul in Christian banmatin Jerusalem siampi uliante kiangah puak tawntung hi. Damascus khua a om Christiante bawlsia ding a pai ahi hi. Damascus khua tunma deuh in khuavak a kimkotah taang hi. Vantung panin kihopih a, 'Saul, Sual, bang hangin hong bawlsia nahiam?' a ci hi.
Tualai munah Saul tuk hi. Amit taw hi. Amah pen Israel minam Pasian pawlpi hu aa kinei ahi hi. Zeisu bawlsia ahihlam kiphawk kha lo hi. Tua munah Zeisu in khaktanlo hileh gupna taan ding thamlo-in Christian tampi in nuntakna taanlawh ding uh hi. Ama khialhna kiphawk kha ngeilo ding hi. A sih dongin Pasian naseem kisasa ding hi. Pasian mitnauta a sawkkha ahihlam phawklo hi. Israel minamte in khang tawntung a angak det Messiah theilo-in a nungzuite dongin sumai nuam ahi hi. Pasian pawlpi mittaw zah dong a ahu kinei ahi hi.
Paul kaptuk bangin nisimin tuk zuahzuah kul ding hiam? Saul pen Christian bawlsia kimlai a kikhel nang a kaptuk ahi hi. Gupna ngah khin ing, ci a, laamlaamte kaptuktuk kul nawn ding hiam? Mikhempeuh kaptuk bek tawh kikhel ding uh hiam/
Mikhempeuh tungah zat kullo hi, zong zanglo hi. Pasian in mimal khatciat lungsim a heizia ding thei hi. Khat leh khat a ngahna kibanglo hi. Peter ngabeng a om kaikhia hi. A kizuak numei suangtum tawh denlup ding kimlai suahtakna pia hi. Mihingte kikhel nading lampi khatciat om hi.
Mangmu John.
Revelation 1:17.
" Amah kamuh ciangin, ama khe phungah misi bangin katuk hi. Tua ciangin amah in a khut katungah hong nga a, lau kei in, hong ci hi."
John pen hilhkholhna lak nuamin Zeisu in sam hi. Mangmuh laitakin ama lungsim pumpi aman uklo hi. Ama sisan hatna zang kikeuh lo-in Khasiangtho in kha lungsim guanin thumuam ahi hi. Pasian lawn mikhat pen silehsa in uk theilo hi. Pasian sapna ngahlopi-in utman tawh kipumpiak tawm theih hilo hi. Christian mihoih suahna dingin kipumpiak thei a, Khasiangtho letsong khatpeuh saannopmanin kipumpiak theih hilo hi. Pasian in a zatnopte bek samin pia hi. Nungzuipite khansungmah inzong Christion mak tampi om a, a honhon a kikaptuk mahmah i za ngei kei hi.
Khasiangtho khamin tuk
Kaneulai-in, hiangkawmin Haimual kapai uh hi. Hualngo khua ahi hi. Eimi peemta inn-7 bang om hi. Nitak simin khuangpi kisaat dimdim hi. Sanggamte tawh ka-en uh hi. Hunzang a thuhilh awng awng tawh, ama utthu a laamlaam tawh, khukdin a thungen kapkap tawh, kaptuk thuak a thallup deldal tawh om neunau uh hi. A hun pen Sunday sun ahi hi. Sanggam ten ka-et ding uh hong phal lo uh hi. Hong kaikhia ngiat uh hi. Hong lawh ding hi, limsaang hi, hong ci uh hi. Laulo maw, hong ci thathap uh hi. Kilipkhap mahmah hi.
Nitak nitum ciangin hong kipankik leuleu uh hi. " Heih kha, heih kha," ci-in hong laam uh hi. A late pen beitheilo hi. Kipankik zel hi. Pulpit tung a hunzangpa pen kamtuam pau-in baakvaat bangin buaikhop hi. Bang hiam aw khat hong ot leh, pulpit mai a mihon lomnaunau laam teng hong tuk pekpak hi. A vekpi-in kamtuam pau khin u, kipum khuk u. Nasa mahmah leh kilawm u. Khat leh khat a kisuk khaklam kiphawk lo u. Anik-apuan silhte kikaizukin kiphenkek khin u. A meivak huih beita a, a mutkuang dingin kuamah a phawk omlo uh a, damdamin mitin khuazing in khuhcip sukin kinusia hi. A masuan bang a cizop tam kuaman kitheilo hi.
Kaptuksate pumpi ki-uklo
Kaptuk ciang a omte in a pumpi uh uk nawnlo uh hi. Pr Malsawma tawh kasepkhoplai un, limsaangthu hong gen zel hi. Zaknop si, dahhuai si, maizum huai si khatin kingai ngeungau hi. Khalam lawmngaih nei thei uh hi. Khalam-zi, khalam lawm ngai thei uh hi. Khalam cih hangin pumpi neihsunsun mah zang veve mawk uh hi.
Naupang bangin napianthak keileh, cih laisiangtho kammal zangin, naungek bangin kibawl hi. Ama lungtuk khat khanu hisak hi. A angah kualin a nawi tep pepa hi. Innkuan kilemna omnawn thong tam i theizo nawn kei hi. Nungzui hunin tua bang ngeina kimu ngei hiam?
Hih taangthute kisutnuam mawk hilo hi. Zeisu in a kunghoihte pen agah tawh nathei ding uh hi, ci ahihmanin, azung-abul hoihlo hi, cih gennuam ihi hi.
Nitak laam a tawp ciangin kha kham ci-in, numei pasal deilo-in kiphah pekpak uh hi. Zingsang khuavak kuan pawlin pasal khat hong tho hi. " Mawngkua inspection" bawl ding cimawk ngiau hi. Nelhoihte minphatna pia uh hi. Hizah dongin lampial hikhin napi kithei tuanlo uh a, ahi ding mah salel uh hi.
Tua ahih ciangin, pai kei un, en kei un hong lawh ding hi, cihpen kikepna hoih mahmah khat ahi hi.
" Midangte thuhilh napi a, keimahmah paihkhiatna kathuak lohna dingin, keima pumpi nasia takin kakem cing hi. " 1Corinthian 9: 27.
" A innvengte tangguak aa-om a muhnop manin zuthawl tawh zutui a tulhte in samsiatna ngah tahen." Habbakuk 2:15.
Dawi kihawlkhia mite
Luke 8:15
" Amaute Zeisu kiang hong tun uh ciangin a sung-a dawi kihawlkhia mipa puansilhin a ngeina bangin Zeisu khe kiangah tu amuh uh ciangin, a lau uh hi."
" Tua dawi in Zeisu amuh ciangin tua naupangpa gonggaw sak a, leitang tungah cilphuankai-in kikhuk hi." Matthews 9:20. Tua dawiveiite pen meikhuk sung a tuk tawh, khuadung-khuaivai pha a awng tawh, hanlakah kuku tawh om uh hi. Hih naupangpa pen a sung a dawite hang a gonggaw ahi hi. Khasiangtho dim a gonggaw-sibup hilo hi. Dawiveite pen pumpi ki-uk theilo hi. Puansilh lo hi. Ama utthu tawh a gennop peuh genin, a paunop bangin paupau lel uh hi. Pumpi tung zahmawh dongin kepsiamna kiphawk theihna neilo hi.
Dawi aa ahihmanin Pasian lim suun lo hi. Eite pen Pasian lim suun dinga hong kipiangsak ahi hi. Piangthak maan ahih leh Pasian hoihna, sianthona, thumaanna, pilna, kikepsiamna, asia-apha khensiamna kha lungsim tawh kidim ding ahi hi. "Eilim sunin mihing ih bawl ding hi," acih ciangin pumpi leh lungsim genkhawm hi.
Satan pen khemsiamna
Tuhun kha nasepna lamdanhmah hi. Muhtang mahin gamtang thei mawk hi. Satan van panin hong kihawlkhiat a kipan kheem ding longal nasepdang neilo hi. Kumtul tampi zuauthu genpa hi a, mihing mawkmawkte dem zawh ding hilo hi. Leitung biakna namkim khempeuh ama nasemte sepkhiat ahi hi. Milim biate aadingin milim ahi hi. Sum zongte aading sum hi a, min deihte aadingin leitung minthanna ahi hi. Numei paktatte aadingin pasal patat hi a, pasal paktatte aadingin numei paktat ahi hi.
Christian pawlpi namkimah mi nei kim hi. Khakhan lawhna ci-in makai thei hi. Christian thalakna ahi, gamdaih thungetna nakzat mahmah hi. Zeisu zatdan tawh kilamdang hi. Numei leh pasal kithuah nadingin thusuak om tawntung hi. Khalam naungeek kineih thei uh hi. Khalam nu zongin nawi limci khempeuh bantep mawk thei hi.
Tua khempeuh Khasiangtho leh Khanin khen theihna pen Pasian thukham leh Laisiangtho bek om hi. Pasian thukham pen ze-etna ettelna hiam hoih pen ahi hi. Leitung vantung a bawlpa leh pasian dangte kikal kidalna kulhpi pen thukham-10 bekah om hi.
Part 3
CINA DAMSAK, MISI THOSAK.
Revival-meeting munkhatah thungai-in kapai hi. Hunpi hong kipan hi. Amakaite ka-enen a laisiangthobu a tawi tam lo hi. Thungai (audience) lakah laibu leh laikung keng zong omlo hi. A aw heu chialchial uh hi. Amit uh leengphiephiai hi.
Khuangpi dungtom mahmah amai lawhpi cia a pha hong kikoih hi. Tua khuangpi hong tun ciangin gospel makai teng lungdamin " Halelujah" ci uh hi. Tua khuangpi ommanin adeih khempeuh a cing dingtawh kibang hi.
Crusade bawlna mitam mahmah munkhat om hi. Cidam nuamte mai-ah hong paikhia un, acih ciangin,taaltung a hong kizawng tawh, lenuainih ciangkhuttawh kinang kawm a hong paitawh, wheelchair tawh hong paitawh ciakneunau uh hi.
Platform tungpanin siapa hong kiko hi. Natna neikhempeuh in, nanatna uh nalawng ciat un, Jesu mintawh tua natna kihawlkhia ding hi, acih ciangin, amau natna munciat lawng uh hi. Damlo khempeuh dam maw, kathei kei hi. Revival leh reformation pen Pasian kiang zuatkik ding deihna hi a, dammawhvehna bek a zat ding hilo hi.
" Amaute in leitung khempeuh pai-in Pasian nilianpi ni-in galdo ding-a leitung kumpi khempeuh a kikhawmsak ahi,nalamdang abawl dawigilote kha ahi uh hi." Revelation 16:14.
Khalam khanlawhna leh kipuahphatna.
Congregation mipi ngahmahmah thuhilh minthang khat kikhopna kangai leuleu hi. Pastor Joel Osteen makaihna ahi hi. Bible Based Church kici hi. Laisiangtho tung tawn a nuntak ding leh laisiangtho lamlahna bang a kalsuan ding ngentang ahi hi. Khanlawhna goal khat leh khat kilamdang mahmah hi.
"Revival and Reformation" khanlawhna leh Kipuahphatna kizom tawntung ding hi. Kipuahpha cih ciangin Pasian limsuun aa nungta dinmun tunkik nang ngimna ahi hi. Pastor pawlkhat ten "Laisiangtho-ah Ciahkik Ni [Back to the Bible]" thulu tawh revival bawl om hi. Vantungmi tawh ki-innkuan dingte ihihmanin nuntak siangtho kisinsin ihi hi. Silehsa tawh perfection a omkei zongin, ih phak dongin tawlnga lo-in delh ding ahi hi.
Pasian in a tate misiangtho minphatna tawh hong pahtawi hi. Kicing hilo-in, upna leh utna lungsim nei ihihman a hong piak ahi hi. Misiangtho cih pahtawina pen amaute upna sihsan a gamtathoih leh thumaanna tungtawn a kipia ahi hi. Tua gamtatnate in abiak uh Pasian pen a siangtho Pasian hi, ci-in kimu sak hi.
Pasian in nalamdang bawl a minthanna sangin, ama tate' thumanna leh gamtathoih tungtawnin minthanna ngah nuam zaw hi. " Midangte in note gamtatna-hoih (goodworks) amuh uh ciangin, vantungah a om na Pa uh min a phatna dingin, note gamtatna-hoih tawh nakhuavak uh nataangsak pha un" Matt 5:16.
Pasian leh Satan' gamgi.
Pasian leh Satan in gamgi nei hi. Leitung a kibangin zangkhawm uh hi. Mihingte sungah Pasiangam or biakinnpi om hi. Satan in zong mihingte sungmah zangin a gam phut nuam hi. Pasian' thupiak sawmte pen amaute kikal a kikhung gamgi khuampi ahi hi. Tua thukhun thupiak-10 te simloh Pasian gam leh Satan gam ciamtehna gamgi-suangphuh dang omlo hi.
Christian minpua khempeuh Pasian mi hikhin lo hi. Satan Christian kineihna khamul pen a tatak sangin sauzaw lai hi. Nalamdang cileng a zang siampen hizel hi. Pahtawina lasak zong siam kal'kal' mahmah hi. Lungdamko lehzong siam mahmah hi. Ahi zongin kamsiam kamzolte hangin Pasian gamgi kiphiat lo ding hi. Pasian mite pen Zeisu minsuangin Pasian thupiak tawh ki-ukna sungah om hi. Satan mite pen, Zeisu minsuang mahin Pasian thupiak pualamah ut bangbangin om hi.
Satan mite pen leitung tawh nuntak zia, neek leh dawn kilamdanglo hi. Amaute nungzui hihna pen lasakna leh thungetna bektawh kicingsak uh hi. A kamtawh Pasian hoih hi cici napi, Pasian hoihna etteh ngeilo uh hi. Satan gammite Pasian gam a lut ciangin kong kawcik mahmah hi. Pasian mite satan gamlam a lut ciangin tanzau mahmah hi. Kongkawcik pen nuntakna paina ahi hi. Kongtanzau pen kisiatna lampi sihna gam tunna ahi hi.
Pianthakna hong lutcil lai-in pawlkhat khauhpai mahmah uh hi. Khuaneu khatah misi phong dingin pai uh hi. A kiphumsa misi phongkhia-in thungen uh hi. Makaipa ki-aaplua kisa-in misi kimkotin kitomtom hi. Misi muat khinsa pen, ' na-upleh tho in,' cikha zawzen hi. A thungai honkhat iipzolo-in nui uh hi.
" Mitampite in, Topa, Topa aw,nangma-min tawh hilhkhol hilo kahi uh hiam, nangmin tawh dawite hawlkhia hilo kahi uh hiam, nangmin tawh nalamdang tampi bawl hilo kahi uh hiam, hongci ding uh hi. Tua ciangin keimah in, 'note kong thei kei hi, mawhna abawlte aw kakiang panin paikhia un,' kaci ding hi." Matt 7:22-23.
Satan in kineihsiam tampi zang hi. Cina khat bang pen, a kineih ding a aken kawikawi khat himawk zen hi. Hihmunah kha zong hinawnlo-in zuauthu zangin naseem ahi hi. Tuhun khalam naseem pawlkhat inzong kineihsiam tampi khawi kul hi.
Kahong gen thute zuinuamlo napi-in, bang hangin Topa, Topa hong ci nahi uh hiam? Luke6:46." ------Christ bang aa kibawl thuhilh-zuaute leh kamsaang-zuau hong piang ding hi. Kateelsa mite nangawn a kheemna dingin lim leh nalamdang tampi a bawl ding uh hi." Matt 24:23-24. " Hih thu lamdang nasa kei un. Satan inzong a taang vantungmi bangin hong kibawl ding hi." 2Cor 11: 14.
Khasiangtho in bang seem
" Pasian in Kha ahi hi. Tua ahih ciangin amah a biate in kha leh thuman-thutak tawh bia kul hi." John 4:23-24.
" Tua ciangin Pa kiangah kangen ding a, note tawh a om tawntung dingin adang Hhpa, thuman-thutak ahi Khasiangtho a hong pia ding hi.--Pa kiangpan a hong pai ding thuman Khasiangtho ahi Huhpa hong tun ciangin, amah in Pa kiangpanin a ngah thuman note hong hilh ding a, keima thu teti a pang ding hi." 15:26.
Pa-hun, Tapa-hun, Khasiangtho-hun khenin ngeina tuamtuam zuih ding kibawl lo hi. Khang tawntungin Pa kiangpan la-in tua tawh Khasiangtho in hong makaih ahi hi. Pasian in ki-ukna policy laihngeilo hi.
"Amah[Huhpa Khasiangtho] hong pai ciangin leitung mawhna hong teltak hong hilh ding a, thumana bang cih hong hihlh ding a, thukhenna hong laktel ding hi.-----Thuman Kst hong tun ciangin thuman khempeuhah hong makaih ding hi. Ama ngaihsutna hong gen ding hilo a, Pa in ama tung a a gen thukhempeuh leh hong tung ding thukhempeuh hong gen ding hi." 16:7-13.
Pasian thukham palsatna in mawhna kici hi, ci-in teltakin hong lak ding hi. Pasian in ama thukham tung tawnin thu hong khen ding hi, ci-in hong telgen ding hi. Pasian bekmah thuman hi a, Adam aa kipan zuih ding hong piak tawntung-thukham, cidamna tawh kisai zuih ding nuntakna thu khempeuh 'thuman' kici hi. Tua thuhilhnate Khasiangtho hong pulak kikkik ahi hi. "Thuman" pen Khasiangtho in mundang pan lalo hi. Pa kiangpan bekin la a, tua thu bekmah hilh thei hi. Pasian thukham khawng Zeisu mintawh paihsak mawk ding hilo hi.
"Kikhop innah ahi zongin, thukhenmangte zumah ahizongin, aana nei upate kiangah ahi zongin hong paipih ciangin bangci bangin dawng ding, bangci gen ding, ci-in lung himawh kei un. Tua hunsungin Khasiangtho in nagen ding thukhempeuh hong hilh ding hi." Luke 12: 11-12.
Pasian mintawh bawlsiatna hun leh zumkong mangkong kitutna a om ciangin, Khasiangtho in naseem ding hi.
Thusuak leh Sawlna tungah kinga ken:
Thusuak leh Sawlna tungah kingak ngam ding hilo hi. Thusuak hang a inn leh lo, ganno-dawng khawilai tanlawh tampi om hi. Sawlna hang a, zi leh ta khahsuah dailawh tampi om hi. Piancil panin Mangmuhna dong zuih dingin kicing khin hi. Pasian kammal tektekmah nuntakpih ding kisam hi. Adam khang a kipan Nungzuipite tung dong a hong muap hong thuhilh hong pattahnate longal bangmah dang kisam lo hi.
Pasian misiangtho sawltakte Khazih sunga om lungsim bang aneih nading hanciam uh hi. Lungsim siangtho deih uh hi. Gamtat hoih ahi Pasian deihna tawh kituakin nungta nuam uh hi. Thuman takin naseem nuam uh hi. Pasian deihna bang hiam, ci-in zong tawntung uh hi. Thumang mihoih khat ahih ding ut mahmah uh hi. Amaute kamsung pan zuauthu kimu lo hi, ci'n kigen hi. " Topa ka Pasian aw, nangma deihnate kabawl ciangin, kipakin kalungsim in nuamsa hi. Nangma thu in kalung sungah om hi." Psalms 40:8.
Cidamna leh nopsakna Pasian geelna.
Pasian in leipiancil a kipan ama-pilna hong guan hi. Pilna leh asia-apha khen thei a, ahoih teel thei dingin hong bawl hi. Pasian lamlahna ih teel ciangin nuntakna lampi a teel ihi hi. Tua lamlahna inial ciangin mawhna sila kisuak pah hi.
Adam tungah, hih singgah naneekleh nasi ding hi, ci hi. Tua singkung pen amau batzawhloh dingin koih lo hi. Huanlaizang tektek ah koih hi. Pasian bangzah it hiam, bangzah takin ama tungah thuman hiam thei nuam ahi hi. Teel sak hi. Pasian in zawhthawhna tawh amah kibia sak lo hi. Um ding, it ding, uttakpi-in ama nungzui ding ihi hi.
Cidamna tawh kisai Pasian geelna
Laisiangtho sungah neekding leh neeklohding hong khensak hi. Neekding acihte 'AN' cipah a, neekloh ding acihte pen anmin vawh ngeilo hi. Thu naman uleh cidamin nakhansau ding uh hi, ci-in teltakin gen hi. Cidamna ding lampi khunkholhsa ahi hi. Tua pen damna ding geelna nambat khatna ahi hi.
Science mipilte in cidamna tawh kisai Laisiangtho lamlahna pen thupi seh mahmah ta uh hi. Mehteh-mehgah leh singah neekna pen Pasian hong piak Original Food ahi hi. Tuiciin khit ciangin singkunglopa kisia khin ahihmanin, sa-siang leh sa-niin hong khensak hi. A siangte pen 'ne un an dingin kahong pia hi', citektek hi. A sianglote pen, kihuai hi, cingiat hi. Kihuai(abomination) cih ciangin ektawh kibang hi, cihna ahi hi. A kihuai khempeuh naungek ten a lawnkhak ding lau-in, " lawng kei o, bawi, ek-ek-ek" icih bang ahi hi.
A neutung a mehteh-mehgah bektawh a khangkhiate pen leitung cidamna lamah a khatna hipah hi. Natna siahuai Cancer, phak natna, --ects tawm mahmah hi. Sivuante bawlzawhloh dong natna sihuai tawmpen hi, ci uh hi. Pawlpi thukham hang hilo-in theihsiamna zangin sa nenuam kikeuhlo, biaknami tampi tak om hi. Billy Graham bang in sa nektuaklo hi. Amah tawh a kibang mihoih mipha kikemsiam tam mahmah om hi.
Cidamnalam ahoihpen nihna pen sa-siangtho nete ahi hi. Voksa neek bang pen a lauhuai lungno tammahmah hi. Pasian in hoihlo acihte a hoihlo ahi hi. Lawnloh ding ahi hi. Tua a hoihlote damin kikup dingin koih ni. Pasia abawlpa hi a, a tate aading bang hoih cih thei hi.
Cidamnalam ahoihpen thumna gu leh khamtheih zatui tuamtuamte zatloh ding ahi hi. Laisiangtho in khaikhanam peuhmah ne kei un, cingiau leuleu hi.
Gentehna-in: Medical Science lampanin muhkhiat tampi nei uh hi. Zatepna hangin tuap TB natna piang hi, ci-in mu hi. US ah TB veite pen nasia takin keem uh hi. Zatui pia mawk beklo hi. Zatep(tobaco) zang kei in, ci-in khaam ngiat uh hi. Leitungah cidamnalam muhna saang khempeuh in, Pasian thuhilhna ahi neek leh dawn lamsang neuseh lo hi.
Cancer natna a tamzaw pen saneekna pan hi, ci-in gen uh hi. Pasian kiangah damna i ngetma-in, ahoihlo khempeuh kidal masa leng lungkim ding hi.
Nattun lungno tawh kipelhna dingin,tuisiangtho tuiminsa dawn ding hi. Thokaangte omlohna dingin ih kiim ih pam siangtho sak ding a tui kivung omlo ding hi. Tuhun lungmawk mihai tam mahmah hi. Nattun lungno hang tampen hi. Natna khempeuh dawi hang hikhin lo hi. Mihingte septheih kidalna khempeuh sepmasak kul hi. Kumpi zawngkhal ahihmanin agam cidamna ding kidalna kisam bangin semzo lo hi. Ei pilna siitlo-in septheih khempeuh hanciam huai hi.
"Note in, na Topa na Pasian aw limtakin na ngai uh a, ama muhna-ah a man bangin seemin, ama thupiakte thudon a, ama ngeina upadi kipte nazui uhleh Egypt mite tung a katunsak natna khatbeek note tungah kong tungsak kei ding hi.--Bang hang hiam cihleh Keimah in note hong damsak na Topa na Pasian kahi hi." Exodus15:26.
Dawi hawlkhia theite ih sapma-in, Pasian hong lamlahna bangin cidamna lam thukham zui phot leng, dawi hawlkhiat ding tawm tuam mahmah ding hi.
Pr Thang Siangh. zogampalpi@yahoo.com
No comments:
Post a Comment