May 21 ni peen Zomi te adingin ni thupi mahmah khat ahi hi. A diakdiak iin ZomiSDA pawlpi mite leh Pasian thumaan a lunggulh, Zogam aa Pasian thumaan (Christianity) (tapidaw = discipleship) hong khan khiatna tangthu a thei nuam te adingin a theih huai ni thupi phadiak khat ahi hi.
Zomi te ading aa May 21 ni peen ni thupi, a ciaptehhuai ni khat ahihna thu tomno a nuai aa bang ahi hi. Tangthu maan ka tom kaih hi aa a tawp dong nong sim sak ding uh hong ngen ingh.
1953 kum April kha sung iin Pr. C. B. Guild, U Robert Mya Pe, U Freddie Ba Tin leh Pr. A. E. Anderson te Tedim khua dong hong pai to uh hi. Geel kholhna om het lo pi ahihhangin Zomi tangvaalno khat ahi Sia Go Za Kham in Pasian lamlahna hang iin Kawlpi vanleeng tuualpi ah a theih khak ngei loh hih makai pi 4 teng na hopih na dawntuah seisai hi. Hih makaipi 4 teng peen gam veel ding iin Tedim dong pai to suak uh aa a thaai ciang iin Kawlpi kileh suk kik uh hi. Kawl mi makai 3 teng Rangoon ah ciah kik uh hi. Pr. A. E. Anderson leh Kawlpi pan a kimuh pih pak khat mah ahi, tangvaal Rualchina te Tedim khua zui iin Rih khua dong pai uh aa April 20 ni pan April 29 ni dong a om khit uh ciang iin Tedim lam ah ciah kik uh hi. Amau te geel Tedim ah hong ciah kik uh ciang iin Tedim Zatopi aa liammaa hang aa zato lum aa a om Sia Ngul Khaw Pau va mu uh hi.
Pr. A. E. Anderson peen Myaungmya SDA Bible School aa sang siapi a sepna pan Zogam ah missionary a sem ding iin a luang khamm iin kipia khia aa December 8, 1953 ni iin a innkuan un Tedim ah hong peem uh hi. Pr. A. E. Anderson leh Sia Lal Khuma te in Lei Lum khua ah January kha akipan Bible Study piak kipan uh hi. Sabbath ni, Saturday, January 9, 1954 ni iin Zogam sung aa Lei Lum khua ah Pasian thu um tawm khat te in Pasian’ Sabbath ni siiangtho a zath masak peen ni uh ahi hi. March 21, 1954 ni ciang iin Lei Lum khua aa mawng kungpi nuai aa hausa pa, Pu Hang Za Gin te inn sung ah Pasian thu taangkona neih kipan uh aa naupang dong aa sim thungai vekpi 250 vaal bang pha iin Sia Go Za Kham in kamphen (pau leth) hi.
Topa Pasian in Pr. Arthur Eugene Anderson nasepnate ah thupha pia ahihmanin May 8, 1954 ni iin nupa kop 6: Pu Kam Zam te nupa, Sia Phung Kai te nupa, Pa Khual Do Thang te nupa, Pa Suak Khaw Kai te nupa, Pa Cin Za Suan te nupa, leh Pu Cin Nang (B) te nupa leh pasal tangsuak 2: Sia Go Za Kham leh Sia Ngul Khaw Pau, a vek iin 14 te in SDA pawlpi sung ah tui kiphumna tawh ki app thakna nei uh hi. May 21, 1954 ni iin Lawibual veeng, Tedim khuapi ah Seventh-day Adventist Church masa peen phut uh hi. Tua hun aa kipan Zogam ah Pasian thumaan kitaangko toto hi. Pr. A. E. Anderson, Sia Go Za Kham, Sia Ngul Khaw Pau leh Sia Phung Kai te’ nasepna te Topa Pasian in thupha pia ahihmanin Pr. A. E. Anderson, kum khat leh a lang sung khawng bek Tedim gam ah a hong om sung iin Tedim khua sung bup linglawng bek tham lo iin Kapteel, Laaitui, Bukphir, cih bang khua tuamtuam te ah pawlpi hong khan hanhan ciang iin Tedim aa biakna makai te in SDA pawlpi a khantoh ding a deih loh man iin Rangoon aa Kawl kumpi Foreign Affairs Ministry sung aa Zomi kumpi nasem Christian veve khat kawi iin Zogam ah Pr. A. E. Anderson a om theih nawn loh nading iin order bawl khia sak hi. Tua thu hang iin Pr. Anderson te innkuan in Zogam ah om thei nawn lo uh ahihmanin April 6, 1995 ni, suun 12.00 p.m. iin Lawibual SDA Mission, Tedim khua, Zogam, ciahsan iin Yangon khuapi lam zuan uh hi. Pasian in A pawlpi nusia tuan lo ahihmanin hi bang aa hamsatna a tuamtuam kawmkaal mah ah SDA pawlpi in maa nawt veve hi.
Tu kum, Saturday, May 21, 2011 ni peen Zogam ah Seventh-day Adventist Pawlpi a kiphuh zawh kum 57 a cinna ni ahihmanin Zomi buppi leh a diakdiak iin Zomi SDA pawlpi mi te ading iin a phawk huai, a ciapteh huai ni thupi khat ahi hi cih hong thei sak ingh. SDA pawlpi maan sung ah tui kiphum masa 14 te lak pan a nuntakna uh a bei dong aa SDA pawlpi sung ah a kip 5 bek om uh aa tua te in Sia Phung Kai, Pi Tel Khan Niing, Pr. Ngul Khaw Pau, Pu Khual Do Thang leh Pi Vung Khan Man te a hi uh hi. Tua tui kiphum 14 te lak aa tui a kiphum masa peen Sia Go Za Kham bek in tu ni ciang dong hong dam pih laai hi.
Zogam ah Seventh-day Adventist pawlpi a kiphut zawh May 21, 1954 pan May 21, 2011 dong, kum 57 a cinna ih phawk kawm iin Topa Pasian in Zomi te sung pan SDA pawlpi a kiphuh nading aa a khut zat masak peen Sia Go Za Kham leh Zogam ah Pasian thumaan hong puak missionaries, kum 93 a pha ta Pr. A. E. Anderson leh kum 92 a pha ta a zi, Lois Anderson, te tung ah cidamna, khansauna leh lungnopna hong piak sak henla, kum sawt pi hong nuntak pih hong dam pih laai nading un Topa Pasian in thupha hong piak sak ta hen.
Thupuak, lai gelh,
Mungno Gualnam
Riverside, California
No comments:
Post a Comment