SABBATH NI ADEIHNATE
Sabbath ni hong tun ciangin, eite in nasepna pan tawlngak pelmawh dingin ih nei hi. Pasian in ei thu-um mite adingin hong piak hih Sabbath ni pen a nuai aa bangin Topa hong deihsakna thu thukpite theih beh leng Sabbathni tawlngakna in ih taksa a'ding leh kha a'ding in man-nei zawl lai-in ka lamen hi. Sabbath in lamdanna lianpi leh khalam ah khiatna thukpi nei hi.
1). Sabbath ni pen Piansakna Phawkna: Pasian in piangthak tate zuih ding ahong piak Thukham Sawm ah Sabbath ni athupina bulpi pen Pasian in a piansak nate phawkna ding ahi hi. (Pai 20:11). Sabbath pen "Pasian in leitung vantung a om na khempeuh a piansakna tawh kikhen thei lo bek thamlo in lei mihingte in zong amau kipiansakna phawkna dingin Pasian vangliatna in amaute tungah hong kilatna ahi hi." Tua ahih manin Sabbath pen Pasian hong piak ni manpha a piansakna phawkna ni ahi hi. Pasian ih biakna in Amah piangsakpa cihna ahih mah bangin, Sabbath ni zong ciaptehna leh piansakna phawkna ahi hi. Eite in suahni (birthday) ih bawl mah bangin Sabbath ni pen leitung vantung leh a sunga om khempeuh suahni (birthday) ahi hi.
2). Sabbath ni Eite Tatkhiatna Lim: Pasian in Israel mite Egypt sal panin a suahtak sak khit ciangin, Sabbath ni, Pasian' piansakna phawkna ni pen suahtakna phawkna ni zong hong suak pah hi (Thuhilhkikna 5:15). Pasian in nipikaal Sabbath ama deihna banga atangte Isrealte bang in suakta sak nuam hi. Tulai mite kisap in sila tuamtuam ahi, huaihamna, thuneih nopna, liangko kikimlohna, mawhna tuamtuam leh angsung khualna panin suahtak ding ih kisam hi.
Sabbath ni pen "Eite mawhna gamtatna leh mawhna kol panin Emmanuel makaihna tawh ih paisanna phawkna ahi hi. Eite' puak ih vangik-pen in 'thuman lohna' ahi hi. Sabbath tawlngakna in Khazih han sungah a tawlngakna, mawhna tunga gualzawhna phawkna tawlngakna, Khazih ih san theihna ding hun hoih leh Ama'n ih mawhna hong maisakna, kilemna leh tawlngakna akawk ahi hi."
3). Sabbath ni Eite hong Siangtho sakna Lim: Sabbath ni pen Pasian' vangliatna kilatna, a sianthona or hong siangtho sakna lim ahi hi. Topa in "Keima Sabbath ni in note na tawlnga ding uh hi. Bang hang hiam cihleh hih pen Topa ahi keimah in note hong siangthosakpa ka hihna natheih nadingun na khang tawntung un keimah leh note kikal ah lim khat hiding hi" (Paikhiatna 31:13, Ezekiel 20:20). Tua ahih manin Sabbath ni pen Pasian in eite hong siangthosakpa a hihna lim ahi hi. Eite Zeisu' sisan in hongsiangtho sak (Hebrews 13:12) mah bang in, Sabbath ni zong Pasian umte Zeisu' sisan hanga mawhmaina ih ngahna lim ahi hi. Siangthona in Pasian tawh ki lawmtatna leh amah tawh pumkhat ih hihna ih nuntakzia tawh lahna ahi hi.
4). Pasian tung ah Cihtakna Lahna Lim: Adam leh Eve te Pasian tunga cihtakna pen Eden huan laizang a apo sia-le- pha khentheihna singgah tawh a ki ze-et mah bangin, mi khempeuh zong Pasian in thukham sawm a laizang a ki-at ahi Sabbath ni siangtho sakna tawh hong sit ahi hi. Lai Siangtho in, 'Ni tawpni ciangin mi nam nih in kikhen dinga, Pasian tunga citak muanhuai "Pasian thupiak zui a Zeisu a umte" leh Sapi leh alim abiate om ding hi (Mang 14:12). Tua hun ciangin Pasian' thuman hong kilang dinga, Pasian um taktakte in a upna uh leh Pasian tung a cihtakna pen Sabbath ni tanna tawh lak ding uh hi.
5). Kilawmtatna Hun: Pasian in ganhingte mihingte' lawm ding piangsak in (Pian 1:24, 25), tua sanga kilawmtatna hoihzaw Pasian in mihing masa Adam leh Eve tungah na pia hi (Pian2:18-25). Tua mah bangin Pasian in Sabbath ni-in Amah leh mihingte a' dingin a sangpen ki lawmtatna na nei hi. Sabbath ni hong tun ciangin tua Sabbath in eite lametna, lungdamna leh thathak hong puak in, tua ni pen eite in Pasian biakna, thungetna lasakna, Pasian thu sinkhopna leh lungngaih khopna, Pasian' itna tangko khiatna in zat ding Ama'n deih hi.
6). Eite Upna hang in Midik suahna Lim: Sabbath tanna tawh thu-um mite in midik suah a kisawm hilo zaw in Khazih, Piangsakpa leh hong tanpa tawh a kizop khit manun tua Sabbath ni atang hizaw hi (Rom 2: 14-16). Sabbath a tanna uh pen amaute mawhna kol pan suahtakna leh Khazih tungtung tawn in Diktanna a ngahna lahna hizaw hi. Sabbath tanna in "Eite mithak a hong bawl Khazih, hong Bawlpa leh hong Honpa thupitna kilangsak hi. Tua in a ni maan tanna leh upna hang bek tawh diktanna mann hong piang sak hi.
7). Khazih sung a Tawlngakna Lim: Sabbath ni pen Isreal te adingin Canaan gam ah tawlngak nading Egypt gam pan suaktakna, leh agam kiimlehpaamte ukna lak pan suaktakna lim ahih mah bangin (Thuhkn 5:15), eite leitung mawhna pan suakta in Pasian sung ah tawlngakna lim zong ahi hi. Pasian in Ama sungah tawlnga dingin hong sam a, "Pasian in a nasepna pan akhawl bangin, amaute a nasepna pan tawlnga ding hi (Heb 4:10). Hih tawlngakna in khalam tawlngakna, ih mimal nasepna pan tawlnga, mawhna bawlna pan khawlna ahi hi. Pasian in a tate Sabbath ni tawlnga dingin hongsam hi (Heb 4:9), tua Pasian tawlngakna ahi khalam tawlngakna ah upna tawh lut dinga, mawhna zong paisan in ama gupkhiatna dingin amah in thalawh ding hi. "Tuni" in Pasian tawlngakna sungah tawlngakna dingin hun hoih pen hi (Heb 4:7, 3:13).
Tua ahih manin, Sabbath ni in eite a'dingin lim thuk mahmah hong lak a, Pasian deihna bangin ama ni siangtho takin ih tan ciangin Amah hong piangsakpa' phawkna, eite hong tatkhiatna, eite hong siangtho sakna, eite Amah tungah ih cihtakna lahna, eite Amah tawh kilawmtatna, eite Ama hangin midik ih suahna, leh eite Ama sungah ih tawlngakna ahi hi. Sabbath ni hong bawlpa Pasian deihna bangin a zang thei tek dingin Topan thupha hong pia tahen.
A sim mimal khempeuh tungah Sabbath thupha leh tawldamna Topan hong pia kimciat ta hen. Amen.
? Sia Daniel Mung Shoute
References:
-SDA Encyclopedia p. 1237.
-A.H Strong, Systemetic Theology, p.408
-Bachiocchi, Rest for Modern Man,p.15
-E.G White, Tesimonies, vol6, p.350.
-Andreasen, Sabbath, p.25,94, 105,
No comments:
Post a Comment