KHAWKPI 1
THUMAAN MITE THAMAN
(Ka Mangmuhna Masa)
Innkuan biak piakna ah thu ka nget lai takin, Kha Siangtho ka tungah hong tu-a, leitung khawmial tung pekah a sang zaw semsemin ka tung to tawh kibang hi. Leitunga om Adventist-te ka en suka, ka muh loh ciangin aw khat in, 'En kik in, a sang zaw diak mun en in,' hong ci hi. A sang zaw diak mun ka et ciangin leitung sanga asang zaw peka kikhungto lam neu tang zeza khat ka mu hi. Lam tawpna peka a om khuapi lam manawh in Adventist-te pai uh hi. Lampi kipatna a nung lam panun khawvak taang beba khat in amaute kapa, tua pen zankim kikona hi ci-in vantung mi in hong gen hi. Amaute a tuuk lohna dingin a paina uh lam dung tawn in tua khawvak tang hi. Khuapi dong amaute a makaih a mai uha pai Jesu a et gige nak uh leh patauh om lo hi. A sawt lo-in pawl khatte gim uha, khuapi gamla lai si, ci uh hi. A tung baih dinga kilamen uh a hihi. A tak lam khut laam to-in Jesu in amaute hansuaha, tua Adventist-te' tunga a kivei a khut panin khuavak hong tang khia-in, amaute in 'Halelujah" ci-in a awng uh hi. Kim khatte in a nung uha khawvak nialin, hih tanta hong pai pih pen Pasian hi lo ding hi, ci uh hi. A nung uha khawvak hong mitin, a lampi uh hong mial cipa, at otna ding uh leh Jesu mu nawn lo-in, a nuai a a mial a gi lo leitung ah kia suk uh hi. A sawt lo-in, Jesu hong pai ni ding leh a hun a hong gen Pasian' aw tui tampi ging bangin ka za uh hi. 144,000 a pha a hing lai mi siangthote in tua aw ging tel thei uha, mi gilote in a hih leh van ging leh zinling ging bangin ngaihsun uh hi. Pasian in a hun hong gen ciangin Kha Siangtho ih tung ah hong sungin, Sinai mual pana Mose hong ciah suk lai mah bangin, Pasian' vangpi tawh ih maitangte a taang pempam hi.
144,000 te a vekpi-un kiciamtehin, kipum khat sinsen uh hi. A taltang tung uah Pasian cih leh Jerusalem Khua Thak cih kigelhin, Jesu' min thak kigelhna aksi pi zong tuang hi. Sianthona tawh lungdamin ih om ciangin mi gi lote heh mahmah uha, thong sung hong denna nuamin hong delhin hong man nuam uh hi. Topa' min tawh ih khut ih zan ciangin, cimawhin amaute lei lak kidenna hi. Eite khat leh khat khe a kisil sak, a siangtho kinapna tawh a kihopih, Pasian in a it mite ih hih lam Satan' nung a zui nuam zaw Satan' pawlte in hong theih uh ciangin, ih khe mai uah hong bia uh hi.
Mihing' khut bom lang cia bang a pha ding meii vom khat hong kai a hih manin ni suahna lam ih ena, tua pen mihing' Tapa' lim a hih lam ih thei thei tek hi. Dai khikhepin tua meii ih en hi. Hong nai semsemin, hong taang zawsem hi. Hong lian semsemin meii ngo golpi khat hong suak hi. A nuai lam mei kuang bang hi-a, sakhi tuihup in kual khum hi. A kim kot ah vantung mi tulsawmte omin, a ngaih mahmah la khat sa uh hi. Amau' tungah Mihing Tapa tu hi. A samte kaangin kiil thitheuha, a liangko baan hi. A lu tungah lukhu tampi om hi. A khete mei kuang bang hi-a, a tak lam khut ah phiau kawi hiam omin, a vei lam khut ah ngun pengkul a tawi hi. A mittangte mei bangin te kelkela, a mite a omna en kawikawi hi. Maitang khempeuh daang gawpin, Pasian a nial mite khawmialin tuam cip hi. Tua ciangin ih vekpi-in, "Kua'n thuak zo ding hiam? Kei' puan ah nin a baang kha hiam?" ih ci hi. Vantung mite a lasak uh hong khawlin, tawl khat sung hong dai khikhep uha, Jesu in, "Khut siangtho leh lungsim siangtho a neite in a thuak zo ding hi. Ka hehpihna no'a dingin kicing hi," hong ci hi. Tua ciangin ih mai tai-in, lungdamna tawh ih kidim hi. Vantung mite in a la aw uh sang sak zawin hong sa kik uha, mei lom lah lei lamah hong tual kai zaw hi.
Meii lom tungah Jesu kum sukin, mei kuang in Amah tuama, a kham pengkul hong ging hi. A ihmu mi siangthote' han a et khit ciangin van lam enin a khut laam to-a, "Tho un! tho un! lei laka a ihmute aw, tho un!' a ci hi. Zin nakpi-in hong liing hi. Hante kihongin sih theih lohna tawh misite hong pai khia uh hi. 144,000 te in sihna tawh a kisalai a lawmte uh a muh uh ciangin, "Halelujah" ci-in kiko uh hi. Tua lai tak mahin ei zong kikhelin, Topa a dawn dingin amaute tawh lak tohna ih ngah hi.
Meii lom lak ih lut to-a, ni sagih ciangin limlang tuili ih tung hi. Jesu in lukhute la-in, a tak lam khut tawh hong khu sak hi. Limlang tuili tunga ning kim ah 144,000 te ding uh hi. Kim khatte a lukhu uh taang mahmaha, kim khatte taang lua lo hi. Kim khatte aksi tawh kidimin, kim khatte tawmtawm om hi. Amau' lukhu ciat tawh lungkim uh hi. A liangko pan a khe dong uh puan tual paak tawh kituam hi. Limlang tuipi panin khuapi sung ih pai ciangin vantung mite ih kiimah om uh hi. Jesu in a khut vanglian laam to-in, kep kongpite lenin, a te zalzal kawmheekte tungah kivei sakin, "Ka sisan sungah na puante uh sawp sianga, Ka thumaan ah kip taka a ding te aw, hong tum un," hong ci hi. Khawpi sungah a lut thei ding mah hi hang, ci-in ih lut diamdiam hi.
Hih lai ah eite in Pasian tokhom le nuntakna singkung om ih mu hi. Tokhom pan gun tui hong luang khia a, a pang tuak ah nuntakna kungte po hi. Gun gal tuak panin nuntakna singkungte a hiang zaamin ki tuah ngimngiama, kham meel suun in a pai letin kimu thei hi. A masa in singkung nih ka mu hi. Ka en pha kika, singkung dawnte a kituah hi. Tua pen nuntakna gun pang tuaka po nuntakna singkungte a na hi hi. A hiangte zaamin ih omna mah hong baan hi. A gahte thupi in, kham leh ngun kihel meel suun hi.
Eite ih vekpi-in sing nuai ah pai-in, minthanna munte enin ih tut lai takin, Pasian' gam thuhilh nasem han sunga Pasian in a hot khiat dinga a sial mi nih sanggampa Fitch leh Stockman te, eite kiangah hong pai uha, amau' ihmut sungin bang thu teng piang hiam cih khawng hong dongdong uh hi. Eite in zong ih thuak siatna a nasia penpen te gen ding ih sawma, a hih hangin ih ngah sa minthanna leh tawntung hamphat nate tawh saikak tham peuhmah lo a hih manin, gen khia thei vet lo-in ih vekin ih awng keeka, 'Halelujah, Vantung tun hak kei mah si!' ci-in kiko in- ih tamngai ciat la-in vantung teng thawnin ih tum hi.
Jesu masa penin khuapi pan leitung ah ih kum suk a, mual gol minthang tung khat Jesu in a siik leh nang zo lo-in a mual cimin kizalha zang lei tual a suak hi. Ih en to leuleu-a, khuapi siangtho taw dap cial 12 nei kong vang 12, a kiu pang khat ah vang 3 ta a om, kong vang sial ah vantung mi om ciat, ih mu hi. Eite ih ki ko-a 'Khuapi, khuapi lian, vantung Pasian kiang pan hong pai suk hi, hong pai suk hi,' ih cih lai takin, ih dinna kiang mun tual zang ah hong kinga hi. A khuapi pualam a minthanna tuamtuam te en dingin ih kipan hi. Tua lai ah inn minthan pen te ka mu hi. Ngun meel bang hi a, suang manpha khuam li tawh ki ding sak hi. Tua te mi siangtho te teenna ding a hihi. A dei sung te ah kham tawh kibawl khinnote a om hi. Mi siangtho te tua innte sungah lutin, a tee zialzial a kumpi lukhute uh tua kham khinte tungah nga-in, tua innte panin vai kuan khia kik sawnin om ka mu hi. Amau in lei nasepte sem uha, a hih hangin tulai eite lei nasepte bang hi lo hi; hi het lo hi. Minthanna khuavak in a maute lutung uh sala, a tawntungin Pasian phatin kiko den uh hi.
Paak nam tuamtuam tawh a kidim huan dang khat ka mu a, khat lo khia-a tawi-in, 'A pulh ngei lo ding hi uh cina maw' ci-in ka kiko hi. A mun dang khat ka ena, lopa sau hing dikdek, minthanna tawh a kidim ngun leh kham banga pahtak huai mun ka mu-a, Jesu kumpi minthanna pua-in a vuang diamdiam uh hi. Ganhing a dim taka omna mun khat ka va lut leuleu uha, humpi neelkaaite, tuunote, kamkeite, keivomte, nuam takin na ta khawm diamdiam uh hi. A laizang uh nawkin ka kan tan uha, amaute nop sa-in kilem ciat lel uh hi. Gam sung khat ka lut leuleu uha, hih lai-a ei gam lak neih te bang hi lo-in, khua vakin minthanna tawh taang hi. Sing hiangte kiveei diamdiam uha, ko zong lung muang takin teng thei ding hanga, gam lak mah ah ih giak thei ding hi,' ci-in ka kiko uh hi. Gam lak ka kheng khia ta uha, Zion mual lam manawh in ka pai uh hi.
Tua banga ka pai kawmun, mun nuam hoih tuam tuamte a vel mihon khat mah ka mu uh hi. A puante uh a khuina dungte sana, a puan taktakte pen kaang ki ciana, a lukhute uh vaang thupi nei-in ka ciamteh hi. Amaute ka hopih lai takun, Jesu kiangah, amaute kua te hiam, cih ka dong hi. Amau in Jesu' a dinga thah na thuakte a hih uh thu hong hilh hi. Amaute lakah naupang neu a kisim zo lo zahin om uha, a puan mong te uh san ciat hi. Zion mual pen ka mai uah oma, a mual tungah minthang biakinn khat oma, a kiim ah mual dang sagih zong kikhungin, a tung lingpaak hoih te leh unok paak te po uh hi. Tua ka muh naupangte in a mual tung kahna uah, a ut uh leh a kha uh tawh leng to in, a pulh ngei lo paakte lo-in, mual dawn tung to uh hi. Tua biakinnpi kiimkot ah a mun zeem ding in singkung nam kim po hi. Taaksing, taamtaaksing, sathaukung, namtui kung, mang kawlsing kungte, a hun huna gah thei kungte, a gah leek-in kun ngimngiam a, mun khempeuh meel hoih sakin om uh hi. Tua biakinn pi sung ka lut nuam uha, Jesu in A aw khum tawh '144,000 te bek lut thei ding hi' ci-a, ko zong 'Halelujah' ci-in ka kiko uh hi.
Hih biakinn pi in a khuamte a pailet-a kimu thei kham leh suang manpha tawh ki peh sagih tungah ki lam a hihi. Tua lai-a ka muh na lamdangte ka tel gen kim thei kei hi. Aw, Kanaan pau siam leng, ka muh leitung minthanna a tel zawin gen khia thei khasop mah ding hi veng. Suang peek te zong ka mu-a, a tung ah kham laimal tawh 144,000 te' min kigelh zong ka mu hi. A minthang biakinn pi ka muh khit uh ciang in ka pusuak uha, Jesu in kote hong nusia-in Khuapi lam ah a pai hi. A sawt lo-in Ama aw ka za leuleu uha, 'Ka mite, hong pai un, haksatna lianpi panin Kei a dingin na thuak siat ngingei khit uh cianga hong suahta note, Kei' deihna banga gamtate aw, Ka nitak ankuang hong uum un, Keimah in kong vak ding hi,' hong ci ka za uh hi. Ko zong, 'Halelujah! nuam lua hang!' ci-in ka kiko uha, khuapi sungah ka lut uh hi. Ngun citak tawh kibawl sabuai na kidawha, mit muh khop dong, tai tampi a sau hi. Sabuai tungah nuntak na singgahte, manna, mangthei, theipi, mang kawlsing, leenggah leh singgah nam tampi ka mu hi. Jesu' kiang ah singgahte hong ne sak in, ci-in ka ngen hi. Amah in, 'Tu-in na ne kei ding hi. Hih muna gahte a ne mi in, leitung ah ciah kik thei lo hi. A hih hangin muan huai taka na om naak leh, tawm vei khit ciangin nuntakna singgah hi ta leh, nuntakna tui hi ta leh, ne in na dawn veve nading hi,' hong ci hi. Amah in, 'Leitung ah na ciah kik phot dinga, nang kong lah nate khempeuh mite tungah na va gen sawn phot ding hi,' hong ci hi. Tua ciangin vantung mi khat in dam tak in a mial leitung ah hong pua suk hi. Khat veivei ka ngaihsutna ah, hih leitung bel lung zuan huai lua hi, sawt vei om zo nawn kei ning, ka ci zel hi. Leitung hoih zaw va mu khin ka hih manin, ka lung zuang lua mahmah hi. Aw, vahui bangin kha nei leng pawh, leng mangin ka tawl dam sak mah ding hi veng! EW 14-20.
* * *
Source: Pawlpi Thu Lamlak - part 1
No comments:
Post a Comment