Ciimphawng TV en-en leng Sea World khawng, Disney Land khawng, a nopcit dan ong kilak lakin naupangte genloh ei ulian khangtak khinsate nangawn ih painoptha ongsuak hi. Topa Zeisu ong lamsak Kham Khuapi tawh teh mawkmawk ding hikeisam naven tomno khat lungnop suutpakna dingin et cim lo ze-etna zangkuammun ahi hi. A ut khempeuh kikhaamlo a paitheihna mun zong ahi hi. Ticket neih nakleh.
Ticket neih hang zong ut bangin nuamtakin kilut theilo lai hi ei! Lutna ding gate kawcik lua kisa, tong tantan sikzawl kipei bualbual in ong control lai, gate cingten i ticket ong sittelna mah, i pumpi ah deih loh bang puakha hiam tit..tit..tit..signal eng suak leh phadawm, san kha henla palik te' matin omkha vanglak leng,,,,,, kawlgam palikte thunuam zawlai kha ding uh hi. Hmm...hm....Kong kawcik thu hizen ei', ki honlut theilo, kuaciik lua a cinuam, lutkhin leng lah tuisung sumkuang khah bang.
Tuhun teh a theilo zaw ka hiam, a zalo ka hiam, a ki sa nawnlo a hiam? Ko neulai bang 'Ka sap mi a tam hangin Ka teel mi a tawm hi' cih 'LA' ngaih mahmah, thang mahmah, mi kim in sak hiauhiau leh sak zel zelin ki nei hi. Ih sak kawmkawmin a teel mite tawm ahih teh ei seventh-day te hi hang a kici hilai hi. A La aa a saknop hangin A thu aa ong ki gen teh san hak kisa, ki dong kikkik, ki sianpiah ta leh kidong kik kiknuam teitei veve, a gente lah gim, a dongten lah cimtak tuanlo. Bang hang ai tam?
Hih La ong piankhiatna Topa Zeisu Kammal Matthew 22:14 Mi tampi a kisap hangin tawm bek a ki teel hi, cih ahi hi. (Bang dia a vekpi-in teel lello aiding?)
Ih Topa in kua teng sam hiam? Matthew 11:28 Vangik pua aa gim mite aw, ka kiangah hong pai un tawldamna kong pia ding hi.
Vangik pua aa gim mi kua hiam? Zeisu in tawldamna a piak kua hiam? Zan thapai vangik pua aa gim mahmah Judahmi Ulian Nicodemus ahi hi. Topa in Israel te' siapa, mipil, ulian Nicodemus aw, John 3:16 For God so Loved the world that He gave His only begotten Son, that whosoever a um khempeuh in Him should not perish, but have everlasting life. ci-in thu na hilh ngekngek hi.
Pasian in Amah a ki up theihna dingin lampi nam tampitak khung hi. Syrian Galkapmangpa Namaan en pak ni. Israelte' Pasian a theihna dingin natna satna phaknatna na vei hi. Elijah kamsangpa' thupiak na tawh Jordan gun sungah na ki tuiphum hi. Damna hong ngahkhit teh Israelte' Pasian um, muang, bel pah tinten hi. Israelmi khempeuh in theihpih khinlo ding uh hi. Ih upmawh hetloh dawibia mi khat vantunggam ah ih muh dan ding, tua dan hi. Ih neulai a SDA suak hetlo dinga ih upmawh ih kikholh pih lawm le gual te ih kithuahpihnotloh kum tampi khit ciangin SDA na suakin na khauhpai mahmah uh hi. SDA a suahlam uh theilopi vantunggam ah kimu khaleng lamdang ih sak dingte pawl hi. Ei' theih lai-in ih lawmpa pen Pasian um or thuzui zong hibeeklo, Lawki (Namaan) hi.
Pasian' ong sapdan leh lam ong lahdan a munmun a khuakhua zui-in ki lamdang ding hi. Khat veivei Evangelist te a zatna mun, Pastor te a zatna mun om dinga khat veivei Namaan sila numeinonu a zatna om ding hi. (Advanced light khuavaak muhkholhna a tuatuam) Pasian umlo pipi, theilo pipi Pasian in bantang kaihin vantunggam tungsak mawk leh dawimangpa nak lungkimlohlua mahmah zel ding hi. Tua ahih manin 'thu ummi khempeuh' (a umlo khempeuh hi- lo) nuntak tawntungna ong khaam hi. A um mi khempeuh adingin zong Zeisu Khazih bek mah tawn tung nuntakna lampi ahi hi, Nicodemus leh Topa Zeisu. Saptuam teeltuam ong nei hi zenzen lo hi. Ahi zongin.....
A um mi khempeuh nangawn sungpan tawm bek mah ki teel ding hi, Matthew 22:14. A bangci totolai hiding ahia leh! Matthew 22 Vantung ki ukzia pen mopawi thugentehna tawh ong hilhna ahi hi. Atom in gen leng gentehna tangthu tawpna ah 'mopawi siimna puan silhlopi-in mopawi siimpa' ong hi hi. Kumpipa' tapa mopawi siim ding a kisam (Jews) mite kuamah pailo uh hi. Tuatak ciangin kumpipa in mihoih mihoihlo cilo-in na muh mi khempeuh mopawi siim dingin va sam un, ci-in a nasemte sawl hi.
A sap mi bangzah a hiam? Kumpipa inn dimleet dektak hi. Hih mopawi siim khempeuh in mopawi ann ahi bawngsa tuusa keelsa ne kimkhalo ding uh hi. Mopawi siimna puan a silhte bek in ne khading uh hi. Gospel messages tawh genteh pahpah ni, mate.
Gospel messages zakna bek tawh ol takin sehnel tungah inn lam ziaute in gupkhiatna ngah ding tichia lo hi. Gospel messages zakna tungtawnin haksa sapipi mah inn lam nuamin sehnelteng tokhia, luak khia, paaikhia aa suang tungah inn lamte in guah a zuu aa tui a khang zongin a puk ngeikei ding uh hi.
Peter in bang ong ci vaikhak hiam cih leh, 2 Peter 1:10 Sanggamte aw, Pasian in note hong sapna leh hong teelna ah a kip taktak na hihna dingun hahkat mahmah un. (hih nilnel ding ong vaikhaklo hi).
Judas sia kaazoh banga a tawpdong bangci? citak zolo, sum deihluatna in guiawk sak hi.
Topa Zeisu in ong telsiam mahmah hi. Na kipatcil un bel haksa sakha mah nu teh, ahih hang.....
Matthew 24:13 Ahi zongin a bei dongin a thuakzote in hotkhiatna ngah ding uh hi, ong ci hi. Luke 13:24 Kong kawcik tawnin na lutna dingun hanciam un. Mi tampitak in lut ding a hanciam uh hangin lut zolo ding uh hi, ci-in hong gen lai hi. Damascus khuapi tawh tehna in Israel gam kamsang Elijah tenna mun kong kawcik lua ahih manin Namaan a sakolleng tawh pai theilo dektak ci hilo ahia, mate. Namaan bangin hanciam mahmah a kulna ong gen den uh hi.
Hanciam kulkei e, ei' hihzawh ding hikei, aci christian mi tam mahmah hi. Zeisu leh Peter kammal a nialnial uh hi. Um peuh leng cih denkeei tawh ong kilamdang mahmah hi. Kuaman hanciam nopnaneilo, mopawi puan kisam salo uh hi. Tua manin ka sap mi tam a, ka teel mi tawm hi, a cici na hi hi.
Peter in Pasian' deihna ong gen hi. John 3:16 tawh kibang dektak ka sa hi. 2 Peter 3:9 Mi pawlkhatte' ngaihsut bangin Topa in a kamciamna a hong tungsak hak hi zenzen lo hi. Note khat beek in siatna na thuakkhak dinguh deihloin na vekpi un na kisik ding uh deih ahih manin hong pai nailohna pen note hong khualna hizaw hi. Pawlkhatten Zeisu ong kum mengmeng leh utsiing ci uh hi. Tua bang mite thu khual a kici diam? Pasian in Sodom leh Gomorrah a haltumna pen tu laitak a eite ong khualna hizaw hi. Tua hikei leh HIV, AIDS natna hia hun peka kipan ong kizel khin dinga nang le kei Christian ih hi kei pelmawh ding hi.
Khasiangtho leh Mothak in a dangtak mi khempeuh hong pai uh hen la, a deih mi khempeuh in nun takna tui a khawnkhongin ong la ta uh hen. Mangmuhna 22:17
No comments:
Post a Comment